Taben ma haan se'ot na'ko au, na' Paulus kau. Uisneno npiil kau 'lail haef 'eu Yesus Kristus. Ma hit tafneek ma ta'paen teu Usif Yesus, le' anfee kit i'honis piut-piut tokan, natuin Uisneno nsoi nafetin nalail kit na'ko hit sanat ma penu sin.

Tius! Ho on le' au aanh aa kuuk, natuin au ululu' ulail lanan he ho mpalsai meu Kristus. Au 'onen 'eu hit Ama' Uisneno, ma hit Usi' Yesus Kristus, he Sin naklila' Sin neek lekon ma lais kasian neu ko, maut he ho mmoni mbi mamut ma tainine', ma halan nekaf es nok es.^a

3 Neno naa, hit nua kit tabua tbi koot Efesus. Tabu au he 'nao 'eu propinsi Makedonia, au 'ak ko he mubalah ambi koot Efesus. Tabu nane, anmui' tuaf le' antakmanab Usif Yesus In too slani', anpaek noina' le' ansaan ma anpeo'. On nane te au 'toit ko, he mnao mukaina' sin, he sin kais nafinib sin noin' eun nane. 4 On nane msa', tuaf eun le' nane anpoiln eun tabu palsuum aah, kaul sin nnaon ma anmatutan anbi lasi poi sin. Ma sin nmasau fefan nokn ahaa mapiu uuf ma 'naof le' ka natfeek niit fa. Lasin on le' nane, ala neik mansian anmatoen ma nmabanan, ma ka npaumakab fa sin neun Uisneno ma ka nha'taen fa sin lais palsait.

5 Au 'faineek ko he munoina' apalsait eun neu Usif Yesus he nmonin anbin lais manekat nok neek aknino', tenab amneot, ma nbi neek a'teeb aknino'.

6 Mes anmui' anoina' bian le' sin nnao nlalin, ma nait inpolin fainekat nane. Nalalit sin npoiln eun tabu, ma nmasau fefan ma na'uab eun tafi'-tafi'. 7 Sin naklila' sin tau'k eun ma nak, sin le' nane anoina' le' nanoina' nai' Musa in atooln eun. Sin natoon ok on le' anoina' 'naek, mes sin ka nahinen fa saa' le' sin nanoina' nane.

8 Hit aal kit tahiin nai' Musa in atooln eun nane, leko. Lamu hit tanaoba' sin natai nok Uisneno In salit amneot. 9 Atooln eun nane, ka ntui fa sin neu atoni amoe' leko. Mes antui sin neu a'naak fatus, alaban aplenat, na'loo na'ko Uisneno, atoin amaufinut, tuaf le' ka nfiloil fa Uisneno, le' amnebe lasi knino', alool atoni', ma alolo mnasi'. 10 Atooln eun nane antui sin neu mansian le' anmakapaisa' bute-bute, le' anmakapaisa' atoni nok atoni, le' anheek na'tolo' tuaf he nalelab tuaf bian he napein noni, le' abliut, apoiba, ma neu tuaf-tuaf le' anlaban lais noina' amneot. 11 Noina' le' amneot eun, neman na'kon Uisneno In Lais Leko, le' In nana'at neu kau. Ma Uisneno nane, Uis apinat ma aklahat'. Mansian lo mees he ntuna' na'latan In.

12 Au 'toit makasi na-'naek 'eu hit Usi', Yesus Kristus, natuin In npalsai kau, ma anfee kau 'be'if ma'tane' he unaob In mepu. 13-14 Te kahaf, nahunu te, au es le' u'le'uf Usi' Yesus In kanan. Au ususeb ma 'ha'mui' tuaf-tuaf le' natuin In laan a'honis amsa'. Au 'teil u'meuk sin. Au 'maufiun on le' nane, natuin tabu nane, au ka uhiin 'aan fa saa' le' au 'mo'e le' nane, ma au fe' ka 'palsai fa 'eu hit Usi' Yesus Kristus. Mes In ka nnikan kau fa. In naklila' In manekan neu kau.^b Saa' antein, In naklila' In neek leko neu kau piut. In anfee kau tetus-athoes he au ube'i 'palsai Ye nok neek a'ki'at, ma au ube'i 'neek sekaum-sekau on le' In nneek kau.

15 Biasa hit atneen uab ma nak, “Yesus Kristus neem nalali yen anbi pah-pinan, he nsoi nafetin mansian asaant eun.” Namneo on nane! Na'ko mansian asaant eun ok-oke', au es le' amaufinut aneis-nesit. 16 Maski au 'maufiunk kah een, mes Uisneno nafeek he ka nhukun kau fa. Natuin In he npaek kau 'fani 'leta' ma heta' he uklila' Yesus Kristus In lanan neu atoni' le' maufinun ma'taen le'uf on le' au. Nok lanan nane, biak eun le' anmo'en sanat amsa', nabe'i npalsain neu In, henati' sin nabe'i nmonin piut-piut nokan.

18 Timotius, au aan leko! Au he 'eut ko saa'-saa' le' ho lo mees he mmo'e' ma ho mmepu we. Ale' saa'-saa' le' ii, natuin mafefa' knino' Uisneno sin uabk eun anmatoom nok ho ta'um nane. Kaul ho mutuin mulek-leko' uab eun nane, ho on le' solalus le' amakeen leko wes, anlaban amle'ut. 19 Amnaa' mumep-mepan ho lais palsait meu Kristus. Ampanat ho neek aknino' nane piut-piut. Tuaf bian ka nlomin fa he natniin hanaf na'ko sin neek aan'-aan' antein, le' anmoe' sin neek palsait eun nane namle'un, on le' abnao oe naslai' ma natutu' niis on anbi faut puutn enu. 20 Na' Himenius ma na' Aleksander sin i'moe'k enu natai nok lasin le' nane. Etun au una'at sin 'eu niut amleu't eun sin a'nakat. Au 'moe' on le' nane, he sin nanoin eun he kais na'le'uf antein Uisneno In kanan.