Anmatoom nok usi' ma ate
6
Anmui' usif le' sin aten anpalsain neun Usif Yesus. Sin lo mees he ntola' sin usin, maut he biak eun kais napenin lanan he na'uab namouf Uisneno In kanan, ma na'bauna' hit noina'. 2a Anmui' aten le' sin usin anpalsai neu Usif Yesus. Aten nane sin kais na'bauna' sin usif nane, natuin in anpalsai neu Usif Yesus. On mee-on mee msa', sin lo he ntuthae leko nneisi ntein neu sin usin nane, natuin sin aal sin palsait mese', ma sin lo mees he nmanekan es nok es.Noina' le' ansaan, ma upan alekot
2b Tius! Munoina' lasin le' ii ok-oke', ma mfaineek too slain eun, he sin nmoe' natuin sin ok-oke'. 3 Hit noina' le' amneot nane, nlali tu'in na'ko laan a'honis le' anhalinab Uisneno In nekan. Mes tuaf le' nanoina' 'teta' na'ko noina' le' ii, sin le' nane antite anpaisan Usif Yesus Kristus In noina' le' amneot. 4 Tuaf on le' nane, na'naeb on, mes in ka malone' fa! Sin menas es le' anlomin he naim lais matoes nok lais luumn ahaa. Lasin ii, anneek-menab tuaf bian, anmatoeba' tuaf, naleu' atoni' bian sin kaank eun, ma anmaktiun eun luum-luumn aah. 5 Tuaf human on le' nane, anmoe' lais taisibu piut-piut. Sin teenb eun namle'un. Sin ka nahine ntenin' fa, mee es le' amneot ma amnonot. Sin natenab nak kaul sin nmakoen anbin lais palsait, sin nabe'i nfanin atoin amu'it.
6 Namneo, lais palsait nabe'i nmoe' mansian napeni mnisat a'naek. Fun a'monit le' anhalinab Uisneno In nekan, anseol nok lais tenab manokab anmatoom nok saa' le' sin nmu'i, nane lo lais palsait amneot aa!
7 Mimnau milek-leko'! Tabu nahoin kit, hit ka teik fa saa' es attaam teu pah-pinan ii. Ma tabu hit tmate msa', hit ka teik fa saa'-saa' atpoi ta'ko pah-pinan ii. 8 On nane te lamu mnahat, mninut, ma paken nanookb on ate, ta'tena' hit tenab nai'!
9 Mes tuaf le' anloim he nlail atoin amu'it, naak fa te, in of napein lasi 'su'at huma'-huma', ma nmoufu nbi kleot a'lii ma ne'u, natuin sin nateenb ahaa 'mu'if. Ale' kanan lasin nane of neki snama' ma naleu' sin i'moink enu. 10 Atneek tanesib noni te, nane anlail uuf neu lais maufinu huma'-huma'. Anmui' tuaf bian le' sin naimn ahaa noni, tal antia sin antanhai sin lais palsait amneot. Nok lanan nane, sin neikn ok, naleu' sin i'moink enu.
Amnaa' mumep-mepan noina' le' ho msimo mlali yen
11 Timotius! Ho mlail Uisneno Ini ya ko. On nane te amtet-koit mu'loo-loo' mu'ko lais amleu't eun ok-oke'. Ammoin mok neek aknino'. Ammoni mbi lasi le' amhalineb Uisneno In nekan anbi ale' kanan lasi. Ampalsai piut meu Yesus Kristus. Amneek sekaum-sekau yah. Ho lo mees he malan ambi suset. Ammoin nok neek ma'nula' mok sekaum-sekau yah amsa'. 12 Ammeup namneo-namneo, he munaob ale' noin' eun le' hit tpalsai sin. Uisneno nboin nataam ko meu lasi 'honis abal-balat. On nane te amnaa' ma mhoo mumep-mepan lasi 'honis nane, kais mufetin. Ma ho m'eut mulail ho lais palsait meu Usif Yesus anbi too mfaun eun sin huumk eun ma sin maatk enu. 13-14 On nane te tabu ii, au 'toit ko he muhakeb lais manba'an on ii: ammoe' mutuin Usif Yesus In apleent eun ok-oke'. Kais amtanhai plenat mese' amsa', maut he biak eun kais nitan ma napenin sanat na'ko ko. Ammoe' mutuin sin ok-oke' nok a'teeb-teeb, tal antia hit Usi', Yesus Kristus, ankoen On anfain neem. Au 'toit ko he muhakeb lais manba'an on nane anbi Uisneno In human ma In matan. In es le' anfee snasaf neu ale' kanan amonit. Au 'toit ko he ho muhakeb lais manba'an on le' nane anbi Yesus Kristus In human ma In matan. In es le' neikn On an'eut amneot anmatoom nok In ta'un anbi gubernur Pontius Pilatus in human ma in matan.a
15 Usif Yesus le' ma'taen le'uf nane, In es le' annaa' kuasat!
In le' nane, Kesel A'naek anneis na'ko ale' uisf enu.
Ma In le' nane, A'naak Anesit nneis na'ko ale' kanan a'naakf enu.
Antia in taubn ate,
Uisneno of naklila' ale' kanan lasin ii.
16 Ala In kuun, es le' ka nmaet fa ma nmoin nabal-baal.
In nmoni nbi meu-sine' le' mansian ka nabei' fa he nkius na'kehen .
Ka tiit tain fa tuaf es, le' nabei' he nkiso We.
Ale' kanan lais tola' nasaeb ok neu In!
Ale' kanan kuasat et In i'niman tal antia nabal-baal!
On le' nane, pah! Amin!
Anmatoom nok amui't enu
17 Tius! Am'eut meu amui't eun pah-pinan ii, he sin kais na'naeb ok, ma kais na'panen sin i'moink eun neu 'mu'if pah-pinan. Fun a'mui'f eun nane of oek' eun. Leko nneis sin na'paen ok anbin Uisneno 'Honis. Fun In es le' nathoeb kit saa'-saa' le' hit tpaluu sin, he hit tabei' tatniin tiit 'monit in miin onin. 18 Am'eut meu sin he sin anpaek sin i'mui'k eun he nmo'en lais leko. Sin lo mees he nmakoen anbin nmoe' leko. Sin lo mees he nnona' sin i'niimk eun he nfiit ma nbaab tuaf, ma nloim he nfee athoen na'ko Uisneno neu sin. 19 Nok lanan nane, sin nabuab a'mu'if he nlali tu'in ma'tane' neu sin i'moink eun noka' ma nmeu'. Nok lanan nane msa', sin nafena' lais monit le' ma'upa' ma ma'ota'.
Na' Paulus natu'ab in sulat
20 Tius! Ampanat mulek-leko' ale' kanan lasi le' Uisneno nana'at ko sin. Kais amseit-seitn om meu lais poi luman. Kais mok amtuut ambi uab amleu't eun, le' ka neik fa lais tola' neu Uisneno. Mumnau, woo! Anmui' tuaf ankee in i'basan nak, in atoin ahinet. Te kahaf, sin ‘hinet’ nane, ka nmui' fa 'sukif. Kais amnao he mmatuut-feef mok sin. 21 Anmui' tuaf bian le' anpalsai lais puta-bliu nuu, tal antia sin nfain-kotin na'kon sin lais palsait le' amneot ma amnonot neu Uisneno.
Au 'toit he Uisneno naklila' In neek alekot neu ki ok-oke'.
Saloom,
Au na' Paulus kau, pah