3-5 Too slani' lo mees he nbaba ma ntuntaku bifee banu' sin, le' sin ka nmu'in fa nonot ma asal le' he npaloil sin. Mes kaul banu' le' fe' anmui' anah ma upuf ate, sin le' nane lo he es anpaloli ye. Munoina' sin, he sin nseunbain nahinen neu banu' nane in haet. Nok lanan nane, sin ntuthae Uisneno, ma nhalineb In nekan. Mes neu banu' le' anmoni nmes-mees, in ka nmui' fa tuaf antein he npaloil ye. In alahaa nafneek ma na'paen neu Uisneno. Fai-manas in n'onen ma ntoit babat- tuntakus na'ko Uisneno. Too slain eun lo mees he npaloil baun eun on le' nane.

6 Mes neu banu' le' naminab sin ta'uk eun nekin lais malinat pah-pinan, maski in fe' anmoni msa', in ka maso'ik fa yen, on le' atupas sin.

7 Mumnauba' ale' lasin nane neu too slain eun, maut he biak eun ka na'uab na'le'uf fa sin kaank enu.

8 Mes kaul anmui' tuaf le' ka nloim fa he npaloil kuuk sin nonot ma asal, anneis-neis in ume nanan, nane on le' in nait inpolin in lais palsait neu Uisneno. In maufiun anneis na'ko atoni le' ka nahiin fa Uisneno.

9 Kaul ampiil banu' he ntulun a'naak too slain eun ate, in lulut-lekat on ii: in toon monit nane kais ankulan na'ko toon bo' nee; nahunu te, in na'kii' anbi mamonet nok atoni mese'; 10 tuaf eun nahinen ma nak, in le' nane anmoe' alekot neu tuaf bian; in npaloil nahiin in aanh eun nok leko; le' antuthae tuaf bian nok neek malinat; le' anbaba ma antuntaku too apalsait eun nok meup ba-baun; le' anloim he nbaba ma ntutaku tuaf anbi suset; ma le' naloitan in ta'un piut-piut he nbaba ma ntuntaku anbi lais leko.

11 Kais ampiil banu' le' fe' munif he ntulun a'naak too slain enu. Kais-kaisa' sin neek lomit he nmamone ntenin nane, ansiu' napoitan sin lasi mnaut neu Kristus. Nok lanan nane, sin of ka napenin fa sona' antein he ntuthae too slain eun nok lek-leko. 12 Fun kaul sin tabu manuan neu too slani' nabati te, nane namnees nok sin naleu' sin lais manba'an anbi Uisneno In human ma In matan. Of atoni nasaan sin. 13 Kais-kaisa' sin anpehen, nalalit antaisibun ma npoi-ntaman neu biak eun sin umen, ma nanuu'n eun lais luman, ma na'uab na'le'uf biak eun sin kaank enu. Ma lais amleu't es antein, es le' sin nloim nanes-nesib he ansooln ok neu es in lasi, ma na'uab eun lasi le' ka ma'upa' fa. 14 Leko nneis, baun eun le' fe' munif, sin mamonen antenin, he leko te, sin nahonin ma n'ulus kuuk sin ume nanan. Nok lanan nane, tuaf le' anmusun kit, ka napenin fa lanan he naleu' ma nanebet kit. 15 Anmui' baun munif bian le' anseken nlalin. Sin natuin anlail niut amleu't eun sin a'naak anesit in lanan.

16 Kaul anmui' bifee le' anpalsai neu Usif Yesus, le' anmui' banu' anbi in nonot- asal ate, in lo he nbaba ma ntuntaku bifee banu' nane. Kais mufetin too slain eun he sin es ansutai ye. Nok lanan nane, too slain eun nabe'i nbaba ma ntuntaku banu' bian, le' in imneon sin ka nmu'i ntenin fa tuaf bian he nsutai sin.

17 Tuaf le' na'naak too slani' nok leko, hi lo he mtola' namneo-namneo, ma mbaen in kai nok leko. Anneis-neis neu tuaf le' anmeup ma'tane' he naknuut Uisneno In A'an ma Plenat, ma nanoina' ki laan a'honis alekot amneot. 18 Fun matui et Uisneno In Sula Knino' ma nak, “Kaul ampaek biye he nteil namouf pena ma ane in fuan na'ko in aslaken, kais ampaon in fefan, maut he in naah.” Ma matui nteni' msa' ma nak, “Sekau nmepu te, lo mees he napein kai.”^a

19 Kaul anmui' tuaf le' anbuu' a'naak too slani' te, kais amsimo we on ahaa le' nane! Lo mees he nmui' tuaf nua' ma teun le' ansaksii ma na'uab huma' mese', on nane te, na' hi mibe'i m'ulus.^b 20 Kaul mukaina' amlail anmes-mees, mes in fe' anmoin anbi sanat nane te, na' mukaina anbi too slani' sin huumk eun ma sin maatk eun. Nok lanan nane, tuaf bian of ka nbalain fa he nmoe' natuin in sanat.

21 Munaob ale' tuis eun le' ii anbi too slain eun ok-oke', ma kais ampiil humaf. Au una'at mepu ii 'eu ho 'nimam a'bi Uisneno ma Yesus Kristus Sin huumk eun ma Sin maatk eun. Ameupt eun sonaf neno tunan le' Uisneno npili nlail sin, anfanin saksii msa'.

22 Kais ammanaap he mpiil tuaf he nlail a'nakat. Amtai ma mtae milek-leko' nahuun fe'. Natuin kaul hi mpiil maan tuaf es nok laf-lafu', nalalit tuaf nane anmo'e nsaan, hi misaah sanat nane amsa', natuin in i'mo'en. Ampanat ho 'mo'et ma taos he knino' piut.

23 Au 'neen, fe'-fe' ate ho teim aa nameen. Leko nneis, anmulai tabu ii ho mseol tua miin-kase kle'o, maut he nlail le'u. Kais minu waa oe luman.

24 Amkius lek-leko! Anmui' tuaf le' in saant eun nakliil' ok. Sin fe' ka ntia nanan fa neu afeek laisn eun sin maatk eun ate, too mfaun eun nahine nlalin. Mes anmui' tuaf bian amsa', le' a'loo-loo te, na' sin saant eun nakliil' ok. 25 On nane msa' paap mese' neu tuaf-tuaf le' anmo'en leko. Bian natoon ok nanin. Ma bian antein anmo'en leko mes ma'tolo'. Maski on nane msa', saa'-saa' le' sin anmoe' sin nane, a'loo-loo te, nakliil' ok amsa'. Ka nabei' fa he ta'tolo' lais leko.