Ampaant om mi'ko tuaf-tuaf le' nanoina' paililu' neu too slani'
4
Mes Uisneno In Ismanan an'eut maat-maat ma nak, too slani' bian of antite saa' le' hit tpalsai. Nalalit sin natuin asmanaf bian le' nasekeb mansian, ma natuin niut amleu't eun sin noina' sin. 2 Tuaf le' neem ma nanoina' on le' nane, na'uab ate, nasuil nok 'mo'et. Puta-bliu nuu in tuan! Tuaf eun nane sin nekak naank eun, nameis'ook anlalin. 3 Sin nanoina' bifee ma atoni he kais anmaka'an eun. Sin nakaena' mnahat huma'-huma'. Te kahaf, Uisneno es le' anmo'e mnaaht eun nane. In nmo'e mnaaht eun nane, he kaul apalsait eun anbukaen, sin ntotin makasi neun. Fun sin nahinen neu lais saa' es le' namneo. 4 Ale' saa'-saa' le' Uisneno nmoe' sin nane, lo leko. On nane te kais mikae huma'-huma'. Mansian eun lo mees he nsium sin ma antotin makasi neu Uisneno. 5 Fun hit tahiin tak Uisneno In A'an ma Plenat, ma hit onen nane naknino' nain ale' bukaet eun nane.Usif Yesus In ameup lekon
6 Tius! Mumnauba' lasin le' ii meu hit aok-bian apalsait enu. Kaul ho mmoe' on nane, ho mlail Yesus Kristus In ameup leko wes. Uisneno In A'an ma Plenat sin anmoe' ko he ho mpalsai Ye, ma nanoina' ko he muhiin noina' mee es le' amneot. Ho mnaa' mumeep amlail Uisneno In A'an ma Plenat sin. Nane on le' bukaet le' anha'taen ho aom nane. 7 Kais muneuk tabu he mpiu' uab poi, le' ka natuik ma natai fa nok Uisneno. Kais amtoe mutuin nu'un na'ko 'naef ma fee mnasi' le' nakaen huma'-huma'. Leko nneis munoina' ho ta'um nane he mmoin mutuin Uisneno In i'lomin.
8 Mutakab ho aom aa he nabei', nane leko.
Mes in i'leokn aa, kle'o waah.
Mes munoina' ho ta'um anbi ale' kanan lasi, he mmoin mutuin Uisneno In i'lomin,
nane, in leokn aa nneis.
Fun in i'leokn aa,
ka aal fa neu tabu tmoni tbi pah-pinan,
mes anbi 'monit neno amnemat amsa'.
9 Uab eun le' ii, lo namneo! On nane te mumnau mulek-leko', ma kais amnikan sin. 10 Hit ta'poin ma tafneek teu Uisneno 'Honis. In es ansoi nafetin ale' mansian ok-oke', anneis-neis neu hit apalsait. Etun hit tmeup tameep ma taim lanan ma'tane'.
11 Munoina' lasin ii ok-oke', ma mleun tuaf-tuaf he nmoe' natuin noin' eun nane. 12 Kais mufetin biak eun he nanebet ko, natuin ho fe' munif ko. Ho lo mees he mlali 'heta' meu too apalsait eun, tabu ho mu'uab, ho 'mo'em, ho manekat neu tuaf, ho neek palsait meu Yesus Kristus, ma ho 'monim aknino'. 13 Tabu hi mpao kau he au 'oum ate, kais amnikan he msoi' Uisneno In A'an ma Plenat neu too apalsait enu. Amha'taen sin, ma munoina' sin lek-leko.
14 Ampaek ho manoem le' Uisneno nana'at ko ye, le' ho msimo we tabu a'naak too slani' an'onen ma ntao 'niman neu ko. Tabu nane, sin n'eut Uisneno In i'lomin amsa' anmatoom nok ho 'monim ma ho mepu. On nane te kais musaitan manoef le' ho msimo we nane. 15 Ammakoe he munaoba' lasin le' nane! Maut he biak eun nitan nak, ho 'monim ma ho mepu nanaob ok piut. 16 On le': ampanat ho ta'um nane, he ho mmoin nok neek amneot. Ma mpanat amsa' he ho munoina' lais amneot. Kaul ho mumeep ambi lasin nane, Uisneno of anfei lanan neu ko, ma neu too mfaun le' anneen ma natniin ko, he hi mifeitn om mi'ko lais amleu't enu.