Na' Paulus in sulat hae nua
neu apalsait eun abiit eun Tesalonika
2 Tesalonika
Taben ma haan se'ot
1
Taben ma haan se'ot na'ko au na' Paulus kau, ma au soob lekon na' Silas ma na' Timotius.Sulat le' ii, hai msonu' neu ki aal ki too slani' abiit eun koot Tesalonika. Hi le' nane, es le' ampiil he mituin hit Ama' Uisneno, ma mituin hit Usi' Yesus Kristus.a 2 Hai mtoit he Sin naklila' Sin nekan alekot neu ki, maut he hi mmoni mbi mamut ma tainine', ma mhalan nekaf es nok es.
Na' Paulus antoit makasi neu Uisneno
3 Au aok-bian aal ki! Hai lo mees he mtoit makasi piut-piut meu Uisneno, natuin hi lais palsait nane ma'tane' piut meu Ne, ma hi lais manekat amsa' ma'tane' piut. 4 Es nane te, hai m'eut meu Uisneno In too slain eun ambi mee-mee anmatoom nok ki. Hai m'etu mak, maski biak eun anteil ki ma nha'mui' ki, mes hi malan ambi hi lais palsait nane.
5 Lasin le' ii nakliil' ok ma nak, Uisneno of nafeek hi lasi te, natai. Fun ha'mu'it le' hi misaah ee tabu ii, lo pantas neik ki mtaam amfain Uisneno Inin. In le' nane, hi Kesel. 6 Kais mimtau, natuin Uisneno nane, atai lasi. Amkius! In of anseunbain neu tuaf-tuaf le' anha'mui' ki. 7 In of nait nain ha'mui't eun le' hi misaah sin nane msa'. In of anmoe' neu kai on nane msa'.
Lasin le' ii ok-oke' of anlalin tabu Usif Yesus ansaun neem, nok In ameup ma'taen' eun na'ko sonaf neno tunan. 8 Sin of ansaun neman anbin ai pina a'naek. In nseunbain sin aal sin le' ka nlomin fa he nahiin Uisneno, ma le' ka nlomin fa he natuin Usif Yesus In Lais Leko. 9 In nfee kasat maneun le'uf le' nabal-baal neu sin aal sin, tal antia sin nle'un nfinin. In nliu' napoitan sin na'kon In human ma In matan, he sin kais natniin antein In kuasan le' anpiin ma naklaah le' nane.b 10 Mes tabu In ankoen On anfain neem, ale' apalsait eun na'aiti' ma na'latan In kanan, ma antola' In. Hi of ambi apalsait eun sin itnaank eun amsa', natuin hi msium Lais Leko, le' neno wes hai m'eut ki ye nane.
11 Es nane te, hai m'onen fai-manas ma mteek ki mbi hai onen, maut he Uisneno nkius ki nak, hi lo pantas he mfain In nonot ma In asal. Hai mtoit he In anfee In kuasan amsa' neu ki, he hi mibe'i mmoe' ale' lais leko mituin saa' le' hi mifeek he mmo'e, ma mituin saa' le' hi mpalsai. 12 Kaul hi mmoin nok lanan le' nane te, of biak eun nait na'latan Usif Yesus In kanan. Ma hi of mipein pules ma liatas amsa', natuin hi mituin Ee. Lasin le' ii ok-oke' of anlalin, natuin hit Ama' Uisneno, ma hit Usi' Yesus Kristus, Sin neek lekon.