Lulut-lekat anmatoom neu a'naak jema'at
3
Saa' le' biak eun na'uab sin nane namneo, nak, “Tuaf le' he nlail a'naak too slani', in npiil naan kuun meup leko wes.” 2 A'naak too slani' lo he tuaf le' in kanan leko. In lo mees he na'kii' anbi mafeet nok bifee mese'. In lo mees he nalan nahiin in ta'un, in nekan lo mees nameep, atoni antola', ansium amnemat anbi in ume, ma nanoina' nabei' tuaf bian. 3 Kais tuaf amauf tua', ma kais amatoes. Tuaf le' amneot es le': atoin neek ma'nula', naim nahiin lais halan nekaf, ma ka nkoman nnesin fa noni. 4 In lo mees he n'atol nahiin in ume nanan. In aanh eun lo mees he natniin ma antola'. 5 Fun kaul in ka nabe'i n'atol fa in ume nanan ate, nok lanan mee he in nabe'i n'atol Uisneno In too slain enu?6 Leko nneis ampiil maan tuaf le' in tenab, mo'et ma taos namnasi nbi Kristus. Kais misaeb maan a'naak too slani' na'ko tuaf le' fe' natuin Usif Yesus; kais-kaisa' in na'naeb on. Kais-kaisa' Uisneno annoto on le' Uisneno annoot niut amleu't eun sin a'naak anesit. 7 Kaul hi he misaeb tuaf es he nlail a'naak too slani', maim tuaf le' in kanan naleok nain nok atoni bian amsa'. Nok lanan nane, in ka namaeb on fa. Ma niut amleu't eun sin a'naak anesit ka nabei' nakleo namouf we fa.a
Tuaf le' he ntulun a'naak too slani'
8 On nane msa', neu tuaf le' he ntulun a'naak too slani'. Sin le' nane, lo he tuaf le' kanan anfoo boon, tuaf le' ka napoib on nahiin fa, tuaf le' ka niun fa tua', ma kais tuaf le' naah sufa'. 9 Sin neek eun lo he kniun' eun, ma sin lo mees he nnaa' namep-mepan noina' le' Uisneno anfee ye ma natoon neu kit, too apalsait enu. 10 Amtae sin i'moink eun ma sin meupk eun lek-leko. Kaul ka mipein fa sin saant eun ate, na' mait sin anlalin tuaf le' he ntulun a'naak too slani' sin.
11 On nane msa' sin feek enu.b Bifeen nane sin i'moink eun lo he namneon ma namnonon. Kais bifee aloob-le'ot le' naleu' biak eun sin kaan foo bona. Sin lo mees he nalan nahiin sin ta'uk eun, ma tuaf bian anpalsai sin imsa'.
12 Tuaf le' he ntulun a'naak too slain eun, lo he atoni le' na'kii' ma nameep anbi mafeet nok bifee mese'. In lo mees he n'atol nahiin in ume nanan nok leko, ma nanoina' nahiin in aanh eun amsa'. 13 Tuaf le' anlail abha'et neu too slani' lek-leko, lo teeb biak eun of antola' sin. Ma sin anbalain ma ka namtaun fa he na'uab anmatoom nok sin lais palsait neu Yesus Kristus.
Hit lais palsait in i'tu'in
14-15 Tius! Au ufneek ma u'paen he kle'o' wes anteni te, au 'eit ma 'kius ko. Kaul au u'bake' a'kle'o te, sulat le' ii of antia nahuun. Au 'tui sulat ii, he eut ko ma ak, Uisneno In inin lo he nmonin on le' mee. Kais amnikan, Uisneno nane, Uis Amonit. Uisneno inin paap mese' on le' ume le' nahaket anbi 'tu'if ma nii einaf le' nameep. Nok lanan nane, sin lo he natnaat Uisneno In noina' amneot.
16 Uisneno nfei nalail lais ma'tolo' a'naek na'ko hit lais palsait. In i'tu'in on ii:
Kristus neem nalali yen anbi pah-pinan ii,
anpaek humaf ma masaf mansian on le' hit.
Uisneno In Ismanan amsa' naklila' bukti ma nak,
Na' Yesus nane, Tuaf neek amneot ma amnonot.
Ma Uisneno In ameupt eun sonaf neno tunan niit Ee amsa'.
Uisneno nait nasaeb Ee antaam neu sonaf neno tunan,
nalalit na'aiti ma ntuna' na'latan In.
In nu'un nasiitb on ma nasaan on anfuun ma nateef uuf ma pah anbi pah-pinan ii msa'.
Anbin mee-mee nbi pah-pinan ii, tuaf anpalsain nalali yen.
Hit tpalsai on le' nane, pah!