Kaul apalsait eun nabuan ate, lo mees hit tmoe' on mee?
2
Nahunu te, au 'toit ki he hi m'onen amteek ale' too mfaun eun ok-oke'. Kaul hi mbaiseun Uisneno te, mtoti Ye he In ntulun ale' too mfaun eun anbin suset. Ma mtoit makasi msa', natuin In es le' anmoe' lais leko neu sin ok-oke'. 2 Amteek ambi 'oen eun amsa' anmatoom nok kesel enu ma 'naakf enu. Nok lanan nane, hit aal kit tabe'i tmoni tbi mamut ma tainine', ma tmahalan nekaf es nok es, ma tainina' tatuin Uisneno In i'lomin, ma tmoni tbi lanan amneot, on le' tuaf-tuaf le' na'bees neu In. 3 Am'onen on le' nane te, leko. Nane anhalinab Uisneno le' ansoi nafetin kit. 4 In anloim he ale' too mfaun eun ok-oke' napenin a'honis, ma nahinen mee ya es le' amneot ma amnonot, es eun le':5 Uisneno mese' aah.
Ma nmu'i yaa nete lanan mese' aah, le' anhalan Uisneno nok mansian aal kit, es le' Yesus Kristus.
Na' Yesus nane, mansian namneo-namneo.
6 In annona' In ta'un he nsoi nafetin kit na'ko hit sanat sin ok-oke'.
Na'euk nok in tabu te, Uisneno nfei lais leko nane knino'-knino' neu ale' too mfaun enu. 7 Nalalit Uisneno npiil naan kau a'lail In haef, he 'nao utoon tuaf le' ka atoni Yahudis fa a'bi mee-mee, ma unoina' sin he sin anpalsain neu Usif Yesus ma anmonin natuin laan amneot ma amnonot. Saa'-saa' le' au utoon sin le' ii, 'teeb-teeb on nane. Au ka upoib ok fa, pah!a
8 Au 'loimk aa on ii: anbi mee-mee, kaul hi mibua he m'onen ate, hi lo mees he mitaiba' nekaf es nok es. Kais ammato'an. Kais ammatoe. Kaul hi mi'aiti' hi 'nimam tabu hi m'onen, hi neekm eun lo he kniun' eun.
9-10 Bifee nuu on nane msa'. Au 'loim he sin n'atol sin tau'k eun ate, soo' anmatoom, ma npaken amsa' soo' anmatoom. Kais anmoe's ok he biak eun antao mata' neu sin, ai' i'naak fuun eun le' ankiil ma anbua sin huma'-huma', ai' anpaken tai ma'upa' le' ka natuin fa atolan, ai' natoon ok anbaineis nok sin npaken molo'-muti' ma mutiala sin. Le' anmoe' bifee nuu namasan nane, es le' neek aknino', ma sin i'moe'k eun lekon. Le' nane es le' natai neu bifee nuu he na'besan neun Uisneno.b 11 Kaul too slain eun nabuan ma nnenan noina' te, bifee nuu nokan antokon ma nok annenan lek-leok anmatoom nok noin' eun nane. Kais ta'seo' ma kais taslutu'. 12 Anbi au te, ka leko fa kaul bifee nait in ta'un ma naplenat atoni, ma nanoina' sin. Leko nneis bifee nuu sin neek eun anta'an ma kais mafeef eun anbainesin. 13 Fun Uisneno nmoe' na' Adam nahuun. Nalalit, na' bi Hawa.c 14 Ma ka na' Adam fa es ansium uab poi nahuun na'ko niut amleu't eun sin a'nakat, mes bifee. Anmulai tabu nane, mansian antanhai Uisneno In atolan.d 15 Maski on nane msa', mes bifee nuu napenin a'honis, natuin sin nahonin. Lamun sin anpalsain namneo-namneo neu Kristus, anmonin anbin lais manekat, anmu'in neek aknino', ma sin i'moink eun pantas ma kais anbainesin.e