Na' Paulus antoit apalsait abiit eun Tesalonika he nteek sin anbi n'onen
3
Au aok-bian aal ki! Kais amnikan kai ambi hi onen totis sin. Am'onen, he kaul leko te, Uisneno In Lais Leko nane nanaob on labah neu uuf ma pah, tal antia tuaf bian anbi mee-mee antola' Lais Leko nane, on le' tabu hi msimo We. 2 Am'onen amsa', he leko te, hit tafetin taan ok ta'ko ataisiubs eun, ma ta'ko amaufinut bian amsa', fun na'ko mansian pah-pinan ii, bian ka npalsain fa Lais Leko nane.3 Mes Uisneno annaa' In hanan. In nabe'i nha'taen ki, ma nfani 'pesit neu ki he nafetin ki na'ko amle'ut. 4 Ma hai neekm eun nameep nak, Usif Yesus anmoe' ki natuin saa' le' hai m'eut milail sin neu ki, ma hai mtebes mmak, hi of ammoe' mituin on le' nane.
5 Hai mifneek ma mi'paen meu Usif Yesus, he In es le' na'naak ma nnaa' ki, he leko te, hi mihiin namneo-namneo mak, Uisneno anneek ki. Ma hi mihine msa' mak, hi mtahan ambi suset ma ha'mu'it, on le' Kristus nahunu te, In nalan ma ntahan anbi suset ma ha'mu'it.
Mansian lo mees he tmeup, kais atpeeh
6 Au aok-bian aal ki! Au 'eut 'ain ki a'paek Usif Yesus Kristus In kanan. Hi kais mimnoon mok apehet le' neno-neno te, in nnao ma na'onim neu-mneem luum-luumn aah. Fun sin ka natuin fa hit i'leta' le' hit tmeup ma'tan-tane'. 7 Hi aal ki mihiin mak, hi lo he mait i'heta' mi'ko hai 'monim neno nane, tabu hai mitua mok ki. Hi miit kiim. Hai ka mpolin miit fa tabu anlail luman ma palsuum. 8 Hai mmeup ma'tane' fai-manas, he hai kais misuseb ki. Hai ka msium fa bukaet luum-luumn aah. 9 Hai le' ii, Uisneno In ameupt enu. On nane te hai mmui' hak he mtoit saa'-saa' na'ko ki. Mes hai ka mpaek fa hak nane. Hai le' ii, mfani 'leta' alekot meu ki. 10 Neno naa, hai m'eut ki lasi fekat es nak, “Sekau ka nmeup fa te, kais naah.”
11 Hai mipein hanaf nak, anmui' tuaf na'ko ki le' ala nnao na'onim neu-mneem, ma ka nloim fa he nmeup. Sin ala ntaisibun ma ansooln ok neu biak eun sin ulusan. 12 Tuaf-tuaf on le' nane, hai mimnaub sin ampaek Usif Yesus Kristus In kanan, he sin nasnasab sin 'moe't eun nane. Leko nneis, sin nmulai nmepun, he nsuu ma nloi' kuuk sin i'moink enu.
13 Au aok-bian aal ki! Hi kais misnasab meup leko ii, yoo!
14 Hi mi'taka' milek-leko' tuaf-tuaf le' ka nlomin fa he natuin saa'-saa' le' hai mtui ma m'eut ki sin ambi sulat le' ii. Kais maen mituin sin, maut he sin namaeb ok. 15 Mes hi kaisa' mibai sin on le' hi musun. Amboin sin ma mikain milek-leko' sin, paap mese' on le' hi aok-bian sin.
Na' Paulus natu'ab in sulat
16 Uisneno nane, Usif le' neik lais mamut ma tainine' ma halan nekaf es nok es. Au 'toit he In anfee ki In lais mamut nane anbi saa'-saa' aah. Maut he Uisneno nok ki piut-piut.
17 Uab amuint eun le' ii, au 'tui sin 'eik au 'niimk aa kuuk, maut he hi mihine mmak, sulat le' ii namneo-namneo na'ko kau. Sulat bian sin imsa', au 'tui sin on le' nane.a
18 Au 'toit he hit Usi' Yesus Kristus In neek alekot nane nabua nok ki aal ki.
Sulat le' ii, antuu' ma nheu'b on, on le' nane, pah.
Au na' Paulus kau, pah