Amaufiun le'uf neem nahuun fe', na' Usif Yesus ankoen On anfain neem
2
Au aok-bian aal ki! Hai he m'eut meu ki lasi anmatoom nok hit Usi', Yesus Kristus, In tabu le' he nkoen On anfain neem, ma tabu hit aal kit tabua tokan.a 2 Kais naak fa te, tuaf es neem napoib ki te, hi mloim mituin aah. Hi of amtakmaan kaul hi mneen biak eun nak, Usi' ankoen On anfain neem nalali yen. Maski sin na'uab eun nak, sin napenin hanaf na'ko Uisneno In Ismanan, ai' sin nnenan na'ko biak eun, ai' sin napenin sulat na'ko kai, mes kais ampalsai sin. Natuin lasin nane, poi oke'! 3 Kais mufetin biak eun he namonob ki. Fun of anmui' naan tuaf amaufiunt es, neem nahuun fe', oka te na' Usif Yesus ankoen On anfain neem. Tuaf amaufinut le' ii, of anlaban ma'tane' neu Uisneno, tal antia too mfaun eun natuin ee ma nlaban Uisneno msa'. Tuaf le' ii, in maufinun ma'taen le'uf! Es nane te, in imneon, in lo mees he ntaam neu ai malala' abal-balat. 4 In na'naeb in ta'un na'laat anneis na'ko ale' kanan pah tuaf, ma nlaban nain ale' kanan uis pah le' mansian na'luli' ma na'besan neun sin. Ma in ntaam neu Uisneno In Uim Onen Uuf amsa', oka te in ankee' in i'basan ma nak, “Au le' ii, Uisneno kau!”b5 Hi mimnau, ai' kahaf? Neno naa au eut 'ain ki anmatoom nok tuaf le' nane, tabu au fe' ubua 'ok ki. Namneo!
6 Tabu ii, tuaf amaufinut nane fe' ka ntia fa in tabu he naklila' in ta'un, natuin anmui' tuaf an'eka' ma antaahn ee. Ma hi mihine msa' mak, saa' es le' antaahn ee on le' nane. 7 Tabu ii, aslutu' le' he ntao taisibu nane, nmepu mnes-amnes', natuin anmui' tuaf an'eka' ma antaahn ee. Mes anmui' tabu he tuaf le' an'eka' ma antaahn ee nane, of he nafeitn ee. 8 Nalalit tuaf aslutu' nane, anpoi neem ma ntao in mepu maat-maat. Mes na'euk nok Usif Yesus In tabu amasat le' ankoen On anfain neem, In na'uab hanaf mese' ate, tuaf nane anle'u nfiin.c
9 Mes tabu Usif Yesus fe' ka nkoen On anfain neem fa te, niut amleu't eun sin i'nakaf a'naek anfee kuasat ma'tane' neu tua amaufinut nane, he in nabe'i nmoe' lasi mkakat huma'-huma', tal antia mansian nateenb eun ma nak, of oin' tuaf anpaek Uisneno In kuasan.d 10 Nok lanan nane, tuaf nane napoib ma nabliu naan kuun too mfaun enu. Sin le' nane, of anbaits ok na'kon Uisneno. Maski In nfei lanan he nsoi nafetin naan kuun sin, mes sin ntite ma npaisan In salit nane, ma ka nlomin fa he npalsain lais amneot ma amnonot. 11 Etun Uisneno npooh naneku sin neek eun na'ko lais amneot ma amnonot, maut he sin npalsain neu lais puta-bliu nuu. 12 Nok lanan nane, Uisneno anfee kasat ma'fena' neu tuaf eun nane, natuin sin ka npalsain fa neu lais amneot ma amnonot. Fun sin nloim nanesib neu 'moe' amle'ut.
Apalsait eun lo mees he nalan ma'tane'
13 Au aok-bian aal ki! Hai mtoit makasi piut meu Uisneno, natuin In nneek ki. Fun tabu In fe' ka nmoe' fa pah-pinan ii te, In nafeek nalail he nsoi nafetin naan ki. Nalalit In anfee In Ismanan he naknino' ki, natuin hi mpalsai lais amneot ma amnonot. 14 Tabu hai m'eut Lais Leko meu ki, Uisneno anpaek Lais Leko nane he nboin ki, maut he hi mitniin mihiin hit Usif Yesus Kristus In pinan in ikalahan.
15 Au aok-bian aal ki! Hi lo mees he mtahan piut, mpooh ma mnaa' mimep-mepan saa'-saa' le' hai m'eut ki sin, ma saa'-saa' le' hai mtui miit sin amsa'.
16-17 Hai m'onen piut meu hit Ama' Uisneno, ma hit Usi' Yesus Kristus. Hai mtoit he Sin nha'taen ki, maut he hi mibe'i mmo'e ale' kanan lais alekot. Hai mtoit on le' nane, natuin hai mihine mmak, Uisneno anneek niis kit ok-oke'. Natuin In nekan leko, es nane te, In ka nasnaas niit fa fe' na'ko mepu le' he nha'taen kit. Nok lanan nane, hit tabei' tafneek teu Ne piut.