Miloitan he mseun Usif Yesus In imneman
5
Au aok-bian aal ki! Hai kais amtui he m'eut meu ki mmak, Usi' In imneman nane, na'euk leuk fauka', ai' funan ii ntaam neno fauk. 2 Natuin hi aal ki mihine mmak, In imneman nane nok askeken, on le' abakat le' antaam ma nabaak tabu fai.a 3 Tabu nane, of mansian eun anmonin anbin mamut ma tainine', mes nok askeken ate, sin napenin snama'. In imneman nane, paap mese' on le' bifee ma'apu', nok askeken ate, meen mahonit antia. Kaul lasi nane anbool ate, hit he ttite atteni on mee? On nane msa', hit Usi' In imneman.4-6 Au aok-bian aal ki! Kais-kaisa' In imneman nane napein ki on le' abakat antaam neu ume anbi tabu fai tnana', na'euk hi mtuup amfiin. Hi kais on le' nane! Hit ka tmoin fa et meis'okan in nanan, on le' biak eun le' fe' antupan nfinin. Natuin hit es le' atpalsai tlail teu Na' Yesus, atmoni tlali tbi meu-sine', miloitan hi tau'm eun nane he msenu We, ma mpanat milek-leko' hi tau'm eun nane. Lasin le' ii, hi mihine mlail sin. 7 Fun kaul attuup ate, attuup nok fai. Ma tbukae laul mafu te, tbukae nok fai. 8 Mes hi kais on le' nane, natuin hit le' ii, tmoni tlail atbi meu-sine'. Hi lo mees he mpanat hi tau'm eun nane. Kaul hi mpalsai piut-piut meu Uisneno, ma mmaneek es nok es, nane on le' solalus le' anpake 'faun besi le' naniin naan in i'basan. Ma kaul hi mifneek ma mi'paen piut-piut meu Usif Yesus le' anpanat ma npao ki na'ko Uisneno In kasat, nane on le' solalus le' na'sobe' 'soeb besi.b
9 Uisneno ka npiil kit fa he hit tapein In kasat. Mes In npiil ma nbeti kit he hit tapeni 'honis, natuin hit tpalsai teu Yesus Kristus, hit Usi'. 10 Fun In inmaet he nseka' kit. On nane te kaul In nkoen On anfain neem, hit of atmoin tokan nabal-baal, maski hit tmate tlail, ai' fe' atmoin.c 11 Nok lasi nane, ampaek au uab eun le' ii, he mmahalinan ma mmaha'tanen es nok es, on le' hi mmo'e tabu ahunut.
Na' Paulus anfee noina' neu too knino' Tesalonika
12 Au aok-bian aal ki! Mimnau he mtola' sin eina ma sin ama' le' antaman amepu klei he natuuk ki. Fun sin le' nane, anmepun ma'tane' neu ki, ma namnauba' ki he hi kais mistuun, mispae, ma ammouf. 13 Amfiit ma mbaab sin nok hi lais manekat amsa', natuin sin nmepun ma'tane' neu ki. Ammoni mbi mamut ma tainine' ma halan nekaf es nok es.
14 Au aok-bian aal ki! Anmui' lasi bian fe' le' hai he mimnauba' ki sin, on ii: tuaf-tuaf le' anpehen, ampaisan sin he sin anmepun namneo-namneo. Sekau in neek a'bait, amha'tane ma mtuntaku. Sekau an'ole te, hi mfiti ma mpesi. Nalalit malan meu too mfaun.
15 Mimnau! Kais ambalas 'moe' amle'ut meik 'mo'et amle'ut. Miloitan hi tau'm eun nane he mmoe' lais leko meu ale' too mfaun. Kais ammoe' leko waah meu hit aok-bian sin kuuk, mes meu tuaf bian amsa'.
16 Miloitan hi neekm eun nane he mmaliin piut-piut. 17 Am'onen fai-manas. 18 Anmui' saa'-saa' aah, et susat ai' malinat, misaeb sukuul ma makasi meu Uisneno. Fun Uisneno anloim he sekaum-sekau le' natuin Yesus Kristus anmo'en on le nane.
19 Kais am'eka' Uisneno In Ismanan In mepun. 20 Kaul anmui' apalsait es nak, in napein hanaf na'ko Uisneno, kais amnebe! 21 Hi lo mees he mpalekas milek-leko' hanaf nane, he na' hi mihiin mak, namneo na'uu' ma na'baa' na'ko Uisneno, ai' kahaf? Kaul namneo te, mituin. 22 Mes mi'loba' hi ta'um eun na'kon 'moe' amleu't eun ok-oke'.
Na' Paulus natu'ab in sulat
23-24 Au 'onen a'toit Uisneno he naknino' hi neekm eun ma hi 'monim ok-oke'. In es le' nabe'i nmoe' kit he hit tmoni tbi mamut ma tainine' ma halan nekaf es nok es. Nok lanan nane, tabu hit Usi' Yesus Kristus ankoen On anfain neem, na' hi mibe'i mhake mbi In human ma In matan, meik hi aom eun, hi neekm eun, ma hi smaanm eun, le' ka nmui' fa sanat saa'-saa'. Namneo! Natuin Usif Yesus In es le' anhaman ma mboin ki mfain In nonot-asal nane, In ka napoib on fa. Saa' le' In na'uab ate, In anmo'e' ma nlail. Nalalit In neik ki mnao meu Uisneno In human ma In matan nok aknino'.
25 Au aok-bian aal ki! Kais amnikan kai mbi hi onen.
26 Au 'toit ki he mfee hai haan taben manekat meu Uisneno In too slain eun abiit eun bale nane, yoo!
27 Au 'toit ki 'eik Usif Yesus In kanan, he msoi' au sulat le' ii meu too slain eun ok-oke'.
28 Au 'toit he hit Usi' Yesus Kristus naklila' In nekan alekot neu ki aal ki.
On le' nane, pah.
Saloom,
Au na' Paulus kau, pah