Amonit le' anhaliin Uisneno In nekan
4
On ii, au aok-bian aal ki! Hai mtoti ma mi'paen meu ki, he hi mmoin ma mhaliin Uisneno In nekan, on le' hai minoina' ki tabu nane. Namneo, hi mmoin mituin sin oek' een, mes natuin hit ttaam atlail nonot-asal teu Usif Yesus, es nane te, hai mtoti ki he hi maim lanan ma'tane' antein. 2 Hi aal ki mihine mlail saa'-saa' le' hai minoina' ki sin, ampaek Usif Yesus In kuasan. 3 Uisneno In i'lomin on ii: ammoni knino'! Kais milaih. Tait i'leta' on le': kais ama'paisa' ma amtuup kaul ka ho fee ma ho mone fa. 4 Hi lo he m'atol mihiin hi tau'm eun es he mmoni knino', tal antia biak eun antola' ki.a 5 Kais ammoin mituin hi tenab amle'ut le' anpoi na'ko hi neekm eun nane, on le' biak eun le' ka nahiin fa Uisneno. 6 Kais anmui' tuaf le' he niis anmees kuun ma naim lanan he nalukib apalsait eun neu Uisneno. Natuin Uisneno nane, hit Usi' le' of anseunbanin amleu't eun ok-oke'. Lasin le' ii, hai mitoon sin neu ki hae'-hae', ma mimnauba' main ki sin na'ko tabu ahunut nane. 7 Fun Uisneno anboin nalail kit he tlail Inin. In salit hit lo he tmoni te, taknino', ka talahif, ka on fa tuaf-tuaf le' antupan bute-bute. 8 Nok lasi nane, sekaum-sekau le' ka natuin fa noina' ii, in ka ala ntite kai fa, mes in ntite Uisneno msa' le' anfee nlail In Ismana Knino' neu ki.9 Anbi au tenab ate, au kais a'tui ufani' 'eu ki lasi le' anmatoom nok lais manekat anbi hi apalsait bale nane, natuin Uisneno neikn On nanoina' ki ma nak, hi lo he mmaneek es nok es. 10 Hai mneen milail mak, hi mneek hi aom-bian sin abiit eun propinsi Makedonia nane. Mes au aok-bian aal ki! Tabu ii, hai mtoti ki, he hi mmaneek amtein mok tuaf bian amsa'. 11 Maim lanan he hi 'monim anmamut ma ntainine' ma mhalan nekaf es nok es. Kais amseit-seitn om meu biak eun sin lasin, mes es-es ate m'ulus kuum ho lasi. Hi lo he maim mepu he mipeni mnahat natuin hi haet aa kuun. Kais mifneek ma mi'paen meuatoni bian. Lasi ii hai mimnauba' meu ki na'ko neno wes na. 12 Kaul hi mmoin on le' nane te, hi ka misaeb fa ma'fena' meu biak enu. Of tuaf-tuaf le' ka npalsain fa neun Kristus niit hi 'monim on nane te, sin nak, “Hoi! Apalsait eun neu Usif Yesus, sin i'moink eun lo amneot a'teeb-teeb!”
Lasi le' anmatoom nok Usif Yesus he nkoen On anfain neem
13 Tabu ii, au aok-bian aal ki! Au he eut ki lasi yes, maut he hi mihine teeb-teeb anmatoom nok amaets enu. Hit aal kit tahiin tak, amaets eun of anmonin nfanin. On nane te kaul anmui' tuaf na'ko Usif Yesus Inin anmaten, hi kais misuseb hi tau'm eun nane, on le' biak eun le' ka nahinen fa nak, amaets eun of anmonin nfanin. 14 Natuin hit tahine tlail tak, Na' Yesus anmaet, mes nalalit Uisneno namonib nafani' In. Es on nane te, of Uisneno namonib nafani' ale' amaets eun amsa' le' anpalsai nlalin, ma nabuaba' sin nok Usif Yesus.
15-17 Kaul Usif Yesus ankoen On anfain neem, In nsaun neem na'ko sonaf neno tunan neu pah-pinan, of anmui' hanaf le' naplenat nok ma'tane'. Nalalit ameupt eun sonaf neno tunan sin anakat naplenat sin he nfuun to'is. Oka te Uisneno Inin le' anmate nlalin, of anmonin nfanin. Nalalit sin, nok hit amonit ta'ait yok atsae teu nope, he hit al-aal kit atseun Usif Yesus In imneman nane. Nalalit hit aal kit atmoin tabu-bua piut tokan.b