Usif Yesus in
Haef eun sin Nu'un
Uisneno nba'an he nfee In Ismana Knino'
1
1-3 Ama' Teofilus.a Tetus ao-mina' na'ko kau, na' Lukas.Anbi sulat ahunut, au 'tui ulail ale' saa'-saa' le' anmatoom nok Usif Yesus In i'monin. Es le' saa'-saa' le' In anmo'e sin, ma saa'-saa' le' In nanoina' nalail sin na'ko un-unun. In nbeti nalail In haef eun. Meski atoni' sin nasuseb ma nha'mu'i Ye tal antia na'maat Ee, mes Uisneno namonib nafani' Ye. Ma okat In nmoni nfani te, In nakliil On neu In haef eun. Sin niit Ee piut-piut tal neno bo' haa', on nane te sin nahinen nak In nmoni nfain namneo-namneo. In na'uab neu sin ma nak, Uisneno on le' Usif le' nnaa' aplenat. In anleek haef eun neik Uisneno In Ismana Knino' In kuasat. Tal antia In ansae nfain neu sonaf neno tunan.
Ale' lasi le' ii ok-oke', le' au 'tui 'iit sin.
4-5 Anbi neno wes, tabu Na' Yesus nabua nok In haef eun nbi 'tubu Saitun, In nfeen sin iplenat ma nak,
“Mimnau'! Nahunut na' Yohanis naslain neik oe, mes kaul hi mpao mteni neno fauk amnemat, Uisneno of anmo'e nneis neu ki, natuin In infee In Ismana Knino' neu ki. On nane te nati' hi kais amnao misaitan koot Yerusalem. Hi mpao ambi nane, tal Au Ama' nfee In Ismana Knino' neu ki, on le' In anba'an nalali. Ma hi mneen milail na'ko Kau.”b
Usif Yesus na'aiti On neu sonaf neno tunan
6 Tabu Na' Yesus nabua nok In haef eun, sin nataan Ee ma nak, “Aam! Hai he mitaan miit on ii: Ho muhiin un-unu te, pah Isra'el in napleent on kuun. Tabu le' ii, Ho he mufetin kai na'ko anaa' aplenat bian, ai' hai he mpao mtein?”
7 Nalalit Na' Yesus nataah sin ma nak, “Hi kaisa' mitaan neu in tabu le' nane fe'. Ala Au Ama' neikn On es an'atol in tabu. 8 On nane kalu Uisneno In Ismana Knino' nane neem antaam neu ki, of hi mipein 'be'it ma matani'. Oka te hi lo mees he mnao m'etun meu ale' mansian aa ok-oke' anmatoom nok Kau. Am'eut meu abiit eun koot Yerusalem, abiit eun propinsi Yudea ma propinsi Samaria, tal antia pah-pinan ii nfuun am nateef.”c 9 Na'uab nalail on nane te, Na' Yesus na'aiti On neu sonaf neno tunan anbi sin maatk enu. In na'aiti On tal antia nope n'aum naan Ee, ma sin ka niit antein Ye fa'.d
10 Tabu fe' sin nbaisenun, nok askeken tuaf nua anhaek nakeit-ketin nok sin, sin anpaken mau muit leko. 11 Tuaf nua' eun nane na'uab eun ma nak, “Atoni Galileas aal ki! Nasaa' am es hi msanmaak ma mbaiseun piut neu neno in itnanan? Fe' na' hi miit Na' Yesus na'aiti On neu neno tunan tal antia nope n'aum naan Ee. Hi miit meik hi maatm eun tabu In ansae neu neno tunan. In ansae on le' mee te, In of anfain neem on le' nane msa'.”
Sin namin tuaf he nseka' na' Yudas
12 Nalalit Na' Yesus In haef eun ansanun na'ko 'tubu Saitun, ma nfain kotin neu koot Yerusalem. 'Tubu Saitun nane in i'loon na'ko koot oin kilo wes.e
13 Antian koot nane te, sin antaman neu ume le' sin natuan anbi nee. Nalalit sin ansaen neu ke'an abiit fafon. Sin kaank eun, es eun le':
na' Petrus,
na' Yohanis,
na' Yakobus,
na' Anderias,
na' Felipus,
na' Tomas,
na' Bertolomeos,
na' Mateos,
na' Yakobus (na' Alfeu's in anah),
na Simon (na'ko nonot politik Selot),f
ma na' Yudas (na' Yakobus in anah).g
14 Sin aal sin nabuan nekaf mese' piut-piut ma n'oen eun. Sin n'oen eun nabuan nok ein Maria, Na' Yesus In einaf, nok bifee bian ma nok Na' Yesus In oilf enu.
15 Anbi neno wes, sin nabuan nfanin, oin sin tuaf nautn es am bo' nua'. Nalalit na' Petrus anfeen anhaek ma na'uab ma nak, 16 “Sin eina' ma sin ama' aal kit ok-oke'! Oin hi fe' mimnau na' Yudas, le' neno ahunut, in nok tuaf puukn es sin neman ma nheek Na' Yesus. Saa'-saa' le' anbool neu na' Yudas lo he nlail on le' nane. Fun nahunut, Uisneno In Ismana Knino' npaek usif na' Daut, he ntui nani anmatoom nok na' Yudas on le' nane. 17 In le' nane, hit ini, ma nmeup nabu-bua nok kit.”
18 (Mes tabu na' Yudas na'sosa' nalail Na' Yesus ate, in nait loit nane ma nnao ma nsoos afu piis es. Nalalit in nmate nbi bale nane, natuin in nmouf anbeint on ma in tein aa anpee' ma teif eun natlolon npoin oke'. 19 Tabu nane, atoni bian sin nmulai na'uab naktaul eun ma naktuut eun na'ko es neu es, tal abiit eun koot Yerusalem nahinen lek-leko nmatoom nok na' Yudas in i'maten. Es nane te, sin nakanab bale nane neik sin uab Aram nak ‘Hakeldama’, lee neik hit uab ate nak ‘Nain Naa'’.)h
20 Na' Petrus na'uab piut ma nak, “Un-unu te, usif na' Daut antui lasi nane et Sulat Pules-Bo'is sin. In ntui ma nak,
‘Maut he in bale tua' nane luman;
kais anmui' tuaf le' he natua nteni nbi nane.’
Ma in ntui ntein ma nak,
‘Maut he in mepu, nana'at neu tuaf bian.’i
21-22 On nane te hit lo mees he taim tuaf he tseka' na' Yudas. Hit taim taan tuaf es, le' nabua nok kit i'loo ween. In so' he es le' atoni' le' nhaumaakb on nok Na' Yesus tabu In nnao nbi mee-mee, anmulai na'ko na' Yohanis naslain Na' Yesus. In lo mees he niit neik in matan nak Na' Yesus anmoni nfain na'ko In i'maten, tal na'aiti On anfain neu sonaf neno tunan.”j
23 Tabu na' Petrus na'uab nalail on nane te, sin aal sin nataam kanaf nua'. Tuaf es, es le' na' Matias, ma es antein es le' na' Yusuf, (le' fe'-fe' ate, sin anteek ate nak na' Barsabas; ma sin anteek ate nak Yustus amsa'). 24-25 Nalalit sin n'oen eun nabuan ma nak, “Ama' abiit sonaf neno tunan! Ho muhiin mulek-leko' main tuaf mese'-mese' in nekan. Na' Yudas anmate npolin in mepu. On nanet Ho meikn Om amluul ma mleek tuaf es na'ko sin nua sin le' ii, he nseka' na' Yudas, he hai mait ye nfain Usif Yesus In haef.” 26 Nalalit sin anhelan suul ana' neu tuaf nua' eun nane. Ma sin anheel antoom na' Matias in kanan. Es nane te, sin naiti nfain Usif Yesus In haef nabua nok tuaf bo'es am mese' eun nane.