Na' Paulus nafeek he nleek na' Timotius he nnao neu Tesalonika
3
1-2 Lamun hi mihiin! Neno naa, tabu hai misaitan ki mbi nane, ka natuik ma natai fa nok hai lomim. Hai neekm eun anmaliin anmaten he eim amkius ki, mes ka nlail fa. A'loo-loo te, hai ka mibe'i mtein fa yen, etun hai mifeek he mleun na' Timotius neit inkius ki. Mes au 'ok na' Silas mibalah ambi koot Atena. Na' Timotius nane, hai aom-bian. In le' nane, hai soba anbi mepu le' hai mibua tabu hai minaob Yesus Kristus In Lais Leko. Hai mleek ee neit he in nanoina' ki ma nha'taen ki, he hi lais palsait meu Uisneno nane na'kii' ma nameep antein.a 3 Nok lanan nane, kaul hi mipein suset, hi neekm eun nane ka na'oin eun fa. Ampooh ma mnaa' mimep-mepan hi lais palsait nane. Fun hi mihiin mak, apalsait eun neun Kristus, lo tebes of napenin suset on le' nane. 4 Afi, tabu fe' hai mok ki, hai mimnauba' main ki mmak, tuaf-tuaf le' anpalsai neu Usif Yesus, of napenin suset huma'-huma'. Tabu ii, ale' kanan suset nane, anlalin ai' on mee?5 Natuin au 'suse 'maet 'ok hi 'tokom ma hi 'hakem, es nane te au 'leek na' Timotius neit neu Tesalonika, maut he hai mipein hanaf nak, hi fe' ampalsai piut meu Uisneno, ai' kahaf. Natuin au 'neek a'bait amsa', kais-kaisa' niut amleu't eun sin a'naak a'naet neem ma amfuil ki he hi maikoit Uisneno. Kaul anlail on nane te, hai mepu neno nane, luman ma palsuum!
Na' Timotius anfain neem ma neik hanaf na'ko apalsait abiit eun Tesalonika
6 Tabu ii, na' Timotius anfain neem een na'ko Tesalonika, ma neik hanaf le' anhaliin kai. In nanu'un ma nak, hi mpalsai piut meu Kristus, ma mmaneek piut es nok es. Oka te in an'eut ma nak, hi mimnau kai, on le' hai mimnau ki msa'.b
7-8 Au aok-bian aal ki! Maski hai abit ii mitniin ate ma'fena' natuin hai mipein susat huma'-huma' ka kle'-le'o fa, mes na' Timotius in nu'un neik lais haan halinet namneo-namneo neu kai. Natuin lasi nane, tabu ii hai mihine mak, hi mpalsai Uisneno piut-piut ma mmafuut leko mokan.
Na' Paulus an'onen ma anteek too slani' abiit eun Tesalonika
9 On nane te hai misaeb sukuul makasi 'na-naek meu Uisneno nok neek malinat, natuin hi mituin Ee piut. 10 Hai m'onen fai-manas, he leko te, hit aal kit tabei' ta'eku ttein. Hai he minoina' minokab ma mimtisib Uisneno In laan a'honis meu ki.
11 Hai mifneek ma mi'paen hai tenab meu hit Ama' Uisneno, ma hit Usi' Yesus Kristus, le' anfei lanan, he hai eim mi'euk mok ki mtein. 12 Hai mtoti he Uisneno nmepu nbi hi neekm eun he hi lais manekat nane nanaob on piut. On nane msa', mok hi aom-bian sin ok-oke', on le' hai mneek ki amsa'. 13 Nok lanan nane, Uisneno nha'taen ki, he mmoin nok neek amneot ma knino', tal antia Usif Yesus ankoen On anfain neem nok Inin, hi mhaek mok amsa' ambi hit Ama' Uisneno In human ma In matan, ma hi ka misaah ma mloi meik fa sanat mese' amsa'.