Na' Paulus namnau in mepu nbi Tesalonika
2
Au aok-bian aal ki! Hi aal ki mihiin, tabu hai eim ma mmepu mbi Tesalonika te, hai ka mpolin fa hai suset ma hai haet nane luum-luumn aah. 2 Hi mimnau msa', tabu hai fe' ka eim fa ambi koot Tesalonika te, abiit eun koot Filipi sin nasuseb ma nha'mui nalail kai. Mes Uisneno nha'taen kai, he hai mbalain he m'eut Uisneno In Lais Leko meu ki, maski too mfaun eun namusun kai.a 3 Tabu nane, hai meik Lais Leko meu ki mbi koot Tesalonika, hai ka meik fa noina' le' neik ki neu lanan amle'ut. Hai ka eim fa he mipoib, ai' mibliu ki.4 Tabu nane, hai eim nok neek aknino' ma mneo'. Uisneno neikn On anluul ma nleek kai, he hai meik Lais Leko meu ki. Hai ka mloim fa he mhaliin mansian in nekan, mes hai mloim he mhaliin Uisneno In nekan, natuin In es le' ansuu' hai neekm eun nak, namneo ai' anpeun.
5 Hi mihine msa' mak, hai ka mkope' ki fa, saa' antein he maim lanan he mipein noni na'ko ki. Uisneno nahiin nain hai neekm enu. 6 Hai mmepu msa', ka neu fa he mipein pules na'ko mansian, ai' na'ko ki, ai' na'ko biak enu. 7 Hai le' ii, Kristus In haef enu. Hai mmui' hak he mmo'e yom on le' a'naet eun, mes hai ka neu fa he mmo'e yom on le' nane. Tabu nane, hai mmo'e yom on le' li'ana' le' natua nok ki.b Hai mitoon lais manekat amsa' meu ki, on le' bifee asuus' li'ana'. 8 Hai ka eim fa neu he mfee yaah ki Lais Leko, mes hai mnona' ki hai tau'm eun ii ok-oke', natuin hai mneek miis ki.
9 Au aok-bian aal ki! Hi of fe' mimnau amsa', hai mmeup fai-manas nok ma'tane', he hai mitaah ma misaah kiim hai 'monim nane. Hai ka misuseb ki fa, tabu hai meik Lais Leko nane meu ki. 10 Hi aal ki miit ma msaksii, ma Uisneno nlail saksii msa'ma nak, tabu hai mok ki apalsait abiit eun bale nane, hai mmoin nok neek aknino' ma amneot, ma ka mmoe' fa sanat mese' amsa'. 11 Hi mihiin mak, hai m'ulus ki ok-oke' on le' aam honi an'ulus in aanh enu, 12 es le' hai mha'taen hi neekm enu, mimnauba ki nok lasi huma'-huma', ma mtaul ki, he hi mmoin nok amnonot ma mhalineb Uisneno In nekan. Fun In le' anfain Usif, es le' anboin ki he mtaam amflinl In nonot ma In asal, ma mipein paa' ambi In pinan ma klahan amsa'.
Uisneno anmeup et hi neekm enu
13 Hai misaeb makasi ka natfeek niit fa meu Uisneno, natuin tabu hi mneen Lais Leko nane mi'ko kai, hi ka msium fa mansian aa in uaban, mes hi mneen ma msium Uisneno In A'an. In es le' neikn On anmepu mbi hi neekm eun nane sin naank enu.
14 Au aok-bian aal ki! Hi fe' ammulai mituin Uisneno In lanan, mes hi aom-bian sin le' hi mok sin pah mese', nasuseb ki. Nok lanan nane, hi mitniin miit amsa' mok apalsait eun propinsi Yudea, le' sin napenin suset ma ha'mu'it na'ko sin atoin Yahudis kuun, natuin sin anpalsain neun Yesus Kristus.c
15 Anmui' atoin Yahudis le' ka ntoe natuin fa Uisneno In i'lomin. Etun tabu Uisneno nleek haef In mafefa kniun' eun neman neu sin ite, sin nasuseb ma nha'mui' sin, ma na'maet sin. On nane msa', sin na'maet Usif Yesus. Tabu ii, sin namin lanan he ntitel napoitan kai ntein. Sin namusun nok sekaum-sekau yah. Natuin ale' kanan lasin nane, etun Uisneno ka nloim fa sin.d 16 Lasi yes antein, sin nmo'en ekat huma'-huma', he hai kais meik Uisneno In Lais Leko ii meu tuaf abiit eun pah bian antein. Atoin Yahudis sin ka nlomin fa he Usi' ansoi nafetin tuaf 'a'teta'. Nok lanan nane, sin ntao sin saant eun na'nuun wok ma na'tuup wok piut. Etun Uisneno natoo' ma nhukun sin.
Na' Paulus anloim he na'eku ntein nok apalsait abiit eun Tesalonika
17 Au aok-bian aal ki! Maski tabu ii hit tmaka'loon, mes hit neek eun kais on le' nane. Hai maim tabu, he kaul leko te, hai mfain eim amtein he mi'euk mok ki, natuin hai mimnau miis ki. 18 Au kuuk, au 'soba' ukten-teni he 'eit i'kius ki, mes niut amleu't eun sin anakat, an'eka' kau piut. 19 Hi mihine mak, nasaa' am es hai he eim amkius ki? Hai he eim, natuin hai mifneek ma mi'paen meu ki. Hi es le' amhaliin ma miteut hai neekm enu. Fun sekau ntein es le' annaa' namep-mepan Usif Yesus In kanan, kaul ka hi fa! Kaul hit Usi' ankoen On anfain neem ate, hai mibei' he mi'aiti' hai 'naakm eun, natuin hi laism eun nane. 20 Namneo! Hi es le' mi'naeb hai neekm eun ma mhaliin kai.