Anbi pah Malta
28
Tabu hai mtia mlail nok ao-mina' ambi meto te, na' hai mihiin mak bale nane, pah Malta. 2 Abiteun pah nane ansium kai nok leko. Natuin tabu nane na'uul, ma maniikn ee kah, on nane te sin nahopin ai, oka te sin nak kai he mlaal. 3 Na' Paulus nok nain hau meto' msa'. Tabu in npaan hau neu ai, nok askeken ate, kaun laso wes anpoi neem, natuin in ka nabei' fa maputu'. On nane te kauna' nane, anlau ma na'kii' anbi na' Paulus in i'niman. 4 Tabu abiit eun Malta niit kauna' nane na'kii' anbi na' Paulus in i'niman ate, sin na'uab eun es nok es am nak, “Oin atoni' ii, alool atoni. Maski tasi ye fe' nafeitn ee te, in uan ee on nane. Etun es in ka nabei' fa he nmoin. Sekau es le' anmo'e amle'ut ate, of in nseu fuan.” 5-6 Atoin eun nane nateenb eun nak, of akle'o wes anteni te, na' Paulus in a'niimn ee of anfu'un. Ma nok askeken ate, of in nmaet.
Mes na' Paulus antekal kauna' nane neu ai. In ka natniin fa menas saa'-saa'. Nalalit sin npaon akle'o es ate, mes na' Paulus ka saa'-saa' fa'. On nane te sin nateenb eun nak, “Kais-kaisa' atoni' ii, uis pah!”
7 Ka na'loo fa na'ko bale nane, gubernur ee in sonaf sin ma in auf manuan eun. Gubernur pah nane, kanan na' Publius. In neem anseun kai nbi tasi ye ninen, oka te in na'auba' kai he hai mitua mok ne nbi in sonaf. Anbi nane, in n'ulus kai neno teun.
8 Tabu nane, gubernur in aam honi ye nameen. In naklofo'. On nane te na' Paulus annao nkiso we nbi in ke'an. Nalalit in npoho ma an'onen. On nane te in naleok nain. 9 Tabu sin niit gubernur ee in aamf ee naleok on nane, amenat bian amsa' neman neu na' Paulus. Sin ntotin he naleko' sin. On nane te in naleko' sin imsa'. 10a Nalalit sin nseun banin kai, nekin blua' amfaun.
Na' Paulus sin natbokan na'kon pah Malta neun Itali
10b-11 Hai mitua mtahan ambi pah Malta funan teun, tal antia ani slutuf ma okin 'naek nane nasnaas. Tabu nane, abnao wes na'ko koot Aleksandria le' in nhaek nain anbi pah Malta. Abnao nane kanan Li'aan Kuana natuin anmui' naan uis pah ankuan, le' bnao tuaf ee nmoe' sin na'ko hau, oka te anpasan nakfili' sin anbi bnao nane in matan. On nane te hai he msae bnao nane, ma mnao mfiin meu koot Roma. Tabu hai msae meu bnao nane, abiit eun Malta neik kai beti' ma blua' bian le' hai mpaluu sin anbi bnao.
12 Hai mnao kle'o-kle'o, tal hai mtia koot Sirakusa et pah Sisilia. Hai misnaas anbi nane neno teun. 13 Mi'ko nane, hai mnao mtein mibnono waah Sisilia in ninen, oka te hai mtia koot Regium. Nookf ate, anin na'ko hai kotim anfuu nok ma'tane', on nane te hai mnao mfiin ma bnao nane in nmanaap. Anmeu te, hai mtia koot Putioli. 14 Anbi nane, hai msaun misaitan abnao nane. Nalalit hai mnao maim Na' Yesus in apalsait eun anbi bale nane. Tabu hai mi'euk mok sin, sin ntotin he hai mitua mok sin. On nane te hai mitua mtahan mok sin neno hiut. Nalalit hai mnao laan meto' meu koot Roma.
15 Tabu apalsait eun abiit eun koot Roma nnenan nak hai he eim meu koot Roma, sin neman nseun kai nbi laan atnanan. Bian na'euk kai nbi 'masa' Apius; bian na'euk kai nbi bale es, kanan Ume Snasat Teun.b Tabu na' Paulus niit sin on nane te, in nbo'is Uisneno, ma in neekn ee nameep.
Na' Paulus antia Roma
16 Tabu hai mtia koot Roma, [solauls eun nataam atoin o'of sin neu uim o'of.]c Mes na' Paulus, sin ka nataam ee fa'. Sin nafinib he in anseob kuun ume. Anbi nane, in natua nok solauls es, le' npao we fai-manas. Sin i'niimk eun nua sin anfuut sin neik koleen besi.d
17 Neno tenu nfini te, na' Paulus na'auba' atoni mnasi' Yahudi nbi bale nane, he neem na'euk nokan. Tabu sin nabuan, in n'eut neu sin ma nak, “Au aok-bian aal ki! Au 'oum a'tia ii, natuin atoin Yahudis sin anheek kau anbi Yerusalem. Nalalit sin nana'at kau neu anaa' aplenat pah Roma. Te kahaf, au ka 'mui' fa sanat. Au ka 'moe' fa sanat saa'-saa' le' anlaban neu hit atoin Yahudis. Au ka 'moe' fa sanat saa'-saa' amsa' le' anlaban hit halat ma atolan, le' hit tsium tain sin na'ko hit bei' ma hit nai' sin. 18 Anaa' apleent eun anpalekas nalail au lasi nbi naa. Mes sin ka niit fa au sanat mese' msa', le' anmatoom nok hukun a'maten. Etun sin he nafetin kau'. 19 Mes a'naet eun atoin Yahudis ka nsium fa lais fekat na'ko anaa' aplenat le' nak he nafetin kau'. Es nane au usaeb ufinib au lasi ye 'eu pah Roma in uun ii. Au 'moe' on nane, mes au ka 'mui' fa tenab he 'kalaak au atoin Yahudis sin.e 20 Lasi nane, es le' anmoe' kau tal au uauba he hit tabua tbi ii. Maut he hit mibei' mi'uab saa' le' hit atoin Yahudis atpa-pao we: et eun hit tafneek Usif le' Uisneno he nleek Ee neem, he nfee 'honis neu kit too Israelas. Lasi le' ii, in imnekin tal sin nfuut kau neik koleen besi le' ii, pah.”
21 Nalalit sin nataah ma nak, “Antia tabu ii, hai ka msium miit fa suult es na'ko Yudea le' he n'eut kai neu ho lasi. On nane msa', le' amneemt eun na'ko nane, sin ka na'uab niit fa ho lasi ye, pah. 22 Mes hai mloim he mneen saa' le' ho mpalsai mlali ye, natuin hai mneen milail anbi mee-mee, nak too mfaun eun anpenan pukan Kristen sin noina'. Mes amneon ee, on mee te, hai ka mihiin maan ee fa'. On nane te ho munu'un miit kai, pah.”
23 On nane te sin n'akool eun he naim nanan tabu wes, he na'euk anfanin. Antia in tabu te, too nuu mfaun ee kah een neem nabuan anbin na' Paulus in ume. On nane te in nmulai nanu'un sin Uisneno In iplenat. In nait nai' Musa in tuis eun, ma Uisneno In mafefa knion' eun bian sin tuis eun, he nheel sin he npalsain neun Na' Yesus. In na'uab na'ko nok-noka' tal antia maans ee nmaeb.
24 Tabu sin anneen nalail na' Paulus in uaban, bian anpalsain, mes bian kahaf. 25 Sin nasulin es nok es, tal tuaf bian he nfanin. Mes na' Paulus na'uab am nak, “'Teeb! Hi sulim le' ii, namnees nok saa' le' Uisneno In Ismana Knino' an'eut nain sin neu nai' Yesaya 26 ma nak,
‘Ho mnao he m'eut meu pah le' ii mmak,
“Of hi mneen ma mitniin Au uaba' piut,
mes ka mihiin ee fa mnuut es!
Hi mnuu' mifan-fani saa' le' Au 'moe' ma 'tao,
mes hi ka mfiloli ye fa'.”
27 Natuin atoni' pah le' ii, sin neek eun lo fatu.
Sin luik eun ka nloim he nneen fa yeen!
Ma sin maatk eun ee, paap mese' on le' he nfolon nlalin!
Anpalaak he sin kais annenan nai';
ma npalaak he sin maatk eun anfolon.
Ma npalaak he sin neek eun na'teme nfinin.
Tal antia sin ka nahiin fa lanan he ntebin nfain neman neu Kau ntenin,
On nane te Au ubei' uleko' sin, on mee?”’f
28 Nalalit na' Paulus natu'ab in nu'un nane, ma na'uab ma nak, “On ii, au aok-bian aal ki! Hi lo he mihiin mak, tabu ii, Uisneno naloitan nalail he nsoi nafetin neu atoni 'teta' le' ka atoin Yahudis fa, natuin sin nlomin he nneen ma natniin Ee.” 29 [Na' Paulus na'uab nalail on nane te, too mfaun eun nane nasaan' ok. Mes sin nteenb eun ii ka na'ekun fa, natuin sin nasulin es nok es.]g
30 Na' Paulus natua nbi uim seba' nane, antia toon nua'. In nsium sekaum-sekau le' neman neu ne, nok neek malinat.
31 Nok lanan nane, in napein sona' he nanu'un Uisneno In iplenat, ma nanoina' Usif Yesus In Laan A'honis neu sin. In na'uab nok neek ablanit, ma ka tiit fa ekat amsa'.
Aam Teofilus. Au nu'un ii na'tuuk ma na'paal on le' ii, ahoit.
Na'ko au na' Lukas kau', ahoit.