Atoin Yahudis sin neman a'an lasi nok na' Paulus anbin Kaisarea
24
Neno niim namuni te, atoin Yahudis le' he n'a'an lasi nok na' Paulus, sin neman ntian nbin Kaisarea. Amneemt eun nane, es eun le': na' Ananias, lais palsait Yahudi sin a'naak anesit; a'naet eun bian; ma tuaf es, kanan na' Tertulus, le' ma'fefa'. Etun sin npake, he nlail asaah lasi he sin nlaban na' Paulus. 2-3 Tabu too mfaun eun nane nabuan anbin bale he nafekan lasi, gubernur ee nleun he neik na' Paulus neem. Nalalit na' Tertulus anfeen anhaek ma na'uab namouf na' Paulus. Nahunut, in ntola' neu gubernur ma na'uab ma nak,“Au 'baiseun ko, ama' gubernur! Na'ko 'loo-loo le' ii, nmulai na'ko ho mnaa' aplenat anbi ii, ho muhiin muhuun saa' le' leko neu kai. Nalalit ho mmoe' lais alekot huma'-huma', tal antia hai atoin Yahudis nabe'i mmoin nok mamut ma malinat. On nane te hai he mpaek tabu ii, he mtoit makasi neu ama' gubernur. Te sekau ntein es le' he nabe'i nmoe' on le' ho anbi mee-mee, ahoit. 4 Mes au kais u'uab amnanu'. Au he u'uab 'eu yaah lasi in uun. On nane te au 'baiseun ko aam usi', he mneen mulek-leko' saa'-saa' le' au he 'baisenun sin anmatoom nok tuaf le' ii.
5 On ii, pah. Neu hai atoin Yahudis, na' Paulus le' ii, paap mese' on le' menas es, le' natlaak na'ko baal es neu baal es. In biasa nlaban hai atolan palsait, ma in ntaisibun hai halat ma atolan anbi mee-mee. In nbi bale mee-mee yaah, hai atoin Yahudis sin of lo he nmaka'lais eun es nok es. In le' ii, anlail on le' a'naak akhani' na'ko pukan palsait le' natuin atoin Nasaret es, le' hai mteek main sin im mak, ‘pukan Nasrani’. Mes saa' le' sin nanoina' sin, nasuli 'naek na'ko hai palsait ii in noina'. 6 Atoni' ii msa', in na'taka' niit he nalahib hai Uim Onen Uuf le' knino' kuun, ma in neik atoin meis'okan antaam neu nane. Etun hai mheek ee. [Natuin hai 'lomim, hai he mhuukn ee natuin hai atolan. 7 Mes solalu 'nakaf na' Lisias, neem nasiik naan ee na'ko hai 'nimam. 8 Nalalit in naplenat ma nak, kaul anmui' tuaf le' he nmo'e lasi nok na' Paulus, sin lo he neman ma nbaiseun ko anbi Kaisarea. In teenb ee, maut he gubernur ee, es le' an'atol lasi nane].a On nane te tabu ii, hai eim anbi ii, he ho es le' mtae ma mtai lasi ii. Of ho meikn om muhiin mak, saa'-saa' le' hai mi'uab sin le' ii, lo 'teeb, pah.
On le' nane, ahoit.”
9 Na' Tertulus na'uab nalail on nane te, atoin Yahudis bian sin anteebs ee ma nak, “'Teeb, on nane, usi'.”
Na' Paulus namneob on anbi gubernur Feliks in matan
10 Nalalit gubernur ee nasneku' na' Paulus ma nak, “Tabu ii, au 'fee ko sona' he ho mumneob om.”
Nalalit na' Paulus anfeen anhaek, ma na'uab am nak, “Ama' gubernur! Ho muplenat anbi propinsi ii, a'loo ween. On nane te ho muhiin mulail hai atoin Yahudis hai 'tokom ma hai 'hakem. Es nane te, au ka umtau fa he au umneob ok a'bi ho humam ma ho matam. 11 Of ai' neno bo'es am nua anfini te, au 'nao 'bi Yerusalem he 'onen a'bi Uim Onen Uuf. Ho mubei' mutaan meu tuaf-tuaf le' an'oen eun nokan anbi tabu nane. 12 Anbi Uim Onen Uuf nane, au ka 'maheek fa 'ok tuaf es amsa'. Ma nbi uim onen bian sin, au ka ubuab fa tuaf he au 'moe' taisibu. On nane msa', anbi Yerusalem, au ka 'moe' fa taisibu saa'-saa'.
13 Mes tabu ii, atoin eun ii he namouf kau. Saa'-saa' le' sin na'uab sin le' lelon na, ka nmu'in fa bukti saa'-saa'. 14 On ii, ama gubernur. Au he 'manaku' 'aan lasi mese'. Au 'ok pukan feu' es, le' atoni' nakaanb ee nak, ‘Usif Yesus In Laan A'honis’. Au 'onen neu Uisneno paap mese' on le' au bei' ma au nai' sin an'oen eun amsa' neu Ne. Au utuin nai' Musa in iplenat sin ok-oke' msa', ma au 'palsai 'teeb-teeb saa' le' Uisneno In mafefa knino' sin antui nain sin na'ko unu' neu kai. 15 Au ufnekan 'eu Uisneno on le' tuaf eun le' ii, le' anlasin nok kau. Hai mpalsai mak, of Uisneno namonib nafani' amates: es le' amoe' leko ma amoe' amle'ut. 16 Etun au 'aim lanan ma'tane', he on mee te, au ube'i 'moin nok neek amneot ma amnonot, anbi Uisneno ma mansian ee sin humak ma sin maatk enu. On nane te, ka tiit fa es he nabei' namouf kau.
17 Au 'meup toon fauk een a'bi pah bian, ka nbi fa pah Isra'el, na' au 'fain 'oum 'eu Yerusalem. Tabu au 'oum, au 'eik loit le' atoni' nabuab sin, he nfain tulun-babat neu tuaf-tuaf le' anmonin anbin susat. Oka te au 'nao 'bi Uim Onen Uuf he 'onen, ma 'fee fua'-tulu' huma'-huma' 'eu Uisneno anbi nane. 18 Tabu au ukniun ok a'bi Uim Onen Uuf utuin hai halat ma atolan, sin neman ma nheek kau. Mes tabu nane, ka nmui' fa too mfaun anbi nane, ma ka nmui' fa taisibu saa'-saa' amsa'.b 19 Ala nmu'i yaah atoin Yahudis fauk le' sin neman na'kon propinsi Asia, he n'oen eun anbin nane amsa'. On nane te kaul sin anmu'in lasi nok kau te, lo sin le' nane es le' he nlasin nok kau. Ka sin ama' le' ii fa'! 20 Mes atoin eun nane, sin ka neman fa'. On nane te ho mutaan miit sin le' ii, au 'saan saa'? Neno nane, tabu sin npalekas kau 'bi bale feek lais palsait, sin ka napenin fa au saant es amsa'. Ho mutaan ahaa sin. 21 Ala of anmui' naan lasi noon es, le' nmoe' sin tal antia sin ntaisibun ma ka nloim kau fa'. Tabu au haank ee nsae, ma au 'ak, ‘Hi he mhukun kau, natuin au 'palsai Uisneno le' nabei' namonib amates!”’c
22 Na' Paulus na'uab on nane, mes gubernur Feliks nahiin nalail lasi mfaun anmatoom nok ‘Usif Yesus In Laan A'honis’. On nane te in nasnasab a'at nane ma nak, “On ii! Au he 'boin solalu 'naak anesit Lisias, he 'neen in haan ee fe'. Kaul au u'uab ulail 'ok ne, na' au ubei' ufeek lasi ii.” 23 Nalalit in nleun solalu 'naakf es he ntahan na' Paulus. Mes in napleent ee he nfee ne sona' maut he in aon-bian sin neman ma nkiso we ma ntuthae ye.
Na' Paulus na'uab nok na' Feliks ma in fenai bi Dorsila
24 Gubernur Feliks in fenai, bifee Yahudis, kanan bi Dorsila. Naan neno fauk ate, in naim lanan, he in nok in fenai na'uab eun nok na' Paulus. On nane te in nleun he neik na' Paulus he neem neu sin nua sin. On nane te na' Paulus an'eut neu sin, lanan on le' mee, he atoni nabe'i npalsain neu Usif Yesus Kristus, Tuaf le' Uisneno nba'an nani Ye na'ko unu'. 25 In n'eut neu sin amsa', lanan on mee he atoni nabe'i nmoin nok amneot, ma on mee he atoni' nabe'i npaant on he kais anmoe' sanat. In n'eut neu sin ma nak, Uisneno of anhukun mansian ee oke'.
Tabu na' Feliks anneen on nane te, in namtau nmaet. Nalalit in nak na' Paulus ma nak, “Paulus! Noob aah nai! Mutuu'b ee nai! Kaul au upein sona', au he 'boin a'tein ko.” 26 Tabu nane, na' Feliks naim lanan he on mee te, na' Paulus anfee ne loit, he in nafeitn ee. Es nane te, in nboin na' Paulus piut he na'uab nokan.
27 Mes anbi lanan bian, gubernur Feliks naim neek eun nok a'naak palsait Yahudi sin. Etun es in ka nloim fa he nafeek na' Paulus in lasi ye labah. In nasnasab lasi nane, tal antia toon nua'. Nalalit anmui' gubernur feu' le' neem anseka' na' Feliks, kanan Porkius Festus. Mes sin fe' antahan na' Paulus.