Na' Paulus sin nfanin ntenin neun propinsi Makedonia
20
Tabu too mfaun enu ka ntaisibu ntenin fa nbin koot Efesus, koot nane mamut on le' biasa. Nalalit na' Paulus nabuaba' naan apalsait eun abiit eun le' nane, ma nha'taen sin neek enu. Nalalit in naseon, ma nnao neu propinsi Makedonia. 2 In nnao na'ko kuan neu kuan anbi pah nane, ma nha'taen apalsait eun sin neek enu. In nmoe' on nane, tal antia in ntaam neu pah Yunani. 3 In natua nbi nane funan teun. Nalalit in naloitan he nsae bnao oe ma nnao neu propinsi Siria, mes in nneen am nak, atoin Yahudis sin nma'akool eun he nlool nisan. Tabu in nneen on nane te, in ka nloim fa he ansae bnao oe ma nnao he ntia nain neu propinsi Siria. On nane te in nnao nfain anpio' laan meto' nbi propinsi Makedonia.4 Puuk aan es annao nabua nok na' Paulus. Sin es eun le': na' Timotius, ama' Pirus in anah na' Sopater na'ko koot Berea; tuaf nua na'kon koot Tesalonika, sin es eun le' na' Aristarkus ma na' Sekundus; tuaf es na'ko koot Derbe, kanan na' Gayus; ma tuaf nua na'kon propinsi Asia, es eun le' na' Tekikus ma na' Trofimus.
5-6 Nalalit au (es le' na' Lukas atui sulat ii), u'eku 'tein 'ok na' Paulus a'bi koot Filipi, nbi propinsi Makedonia. Na' Paulus in soob eun nnao nahunun ma npao kai nbi koot Troas et tasi ye bian. Tabu atoin Yahudis sin neno 'naek Paskaa oke' nalail, hai nua kai msae bnao oe ma mnao meu koot Troas. Tabu nane, hai maan neno niim. Tabu hai mtia Troas, hai msaun mi'ko bnao oe nane. Hai mi'euk mok hai soba' bian sin le' nahunun kai, on nane te hai mitua mbi nane neno hiut.
Na' Yutikus anmouf na'ko ume es in eon ana' anbi koot Troas
7 Neno nane, neno klei. Na' Paulus nafeek anlail ma nak, “Au aok-bian aal ki! Nookf ate, au he 'nao 'fiin.” On nane te hai nonot apalsait eun ok-oke' eim he mibalab bukae. Natuin na' Paulus he nnao, on nane te in na'uab nok kai tal antia fai ye natnaan. 8 Hai mibua mbi ume es in aktuta' teun. Mabe' nane, sin noutun paku mfau le'uf.
9 Tabu nane anmui' li' moen muinf es, kanan na' Yutikus,b antook anbi eon ana'. In nok anneen na' Paulus amsa'. Ka 'loo fa te, in maatn eun anma'fenan, on nane in ntuup anfiin. Nok askeken ate, in nmouf na'ko eon ana' nane. In nmaet nain. 10 Na' Paulus ansaun natuin amoufut nane, ma nhoo naan ee, ma in na'uab am nak, “Kaisa' mimtau. In nmoin.” 11-12 Hai aal kai mmaliin, fun li' moen munif nane anmoin. Nalalit sin neik nafani' ee neu in ume. On nane te hai msae mfain, ma hai mbukae mibu-bua'. Nalalit na' Paulus na'uab tal antia nmeus anfiin. Tabu maans ee npe'e te, hai miseon sin ma mnao misaitan sin.
Na'kon koot Troas annaon neu koot Miletus
13 Nalalit hai mma'akol ma mbaits om, tal antia hai mi'euk amteni' mbi koot es, kanan Asos. On nane te hai msae bnao oe meu Asos. Mes na' Paulus annao laan meto' neu koot nane.
14 Tabu hai mi'eku amtein na' Paulus anbi koot Asos, na' Paulus ansae bnao oe ii, ma hai mnao piut meu koot Metilene. 15 Mi'ko nane, hai mnao mfiin. Nookf ate, hai mpaumak-maak pulau wes, kanan Kios. Anmeu te, hai mnao mfiin meu pah Samos. Ansine' te, hai mtia koot Miletus. 16 Mes na' Paulus in neekn ee anloim, he kaul leko te, hai mtia labah meu koot Yerusalem, he in napein manuan maut he nok na'naeba' neno 'naek Pantekosta. Nalalit in ka nloim fa he npolin tabu, he nnao nsae neu koot Efesus, natuin in ka nmu'i ntein fa manuan.
Na' Paulus na'uab nok atoni mnasi Kristen abiit eun koot Efesus
17 Nalalit anbi Miletus, na' Paulus anfee hanaf neu atoni mnasi' Kristen abiit eun koot Efesus, he sin neman na'euk nokan. 18 Tabu sin neem antian on nane te, na' Paulus na'uab neu sin ma nak, “Au aok-bian aal ki. Hi mihiin main au 'monik ii, anmulai na'ko neno un-unu' au 'telin au haek ee 'bi propinsi Asia, tal antia tabu ii. 19 Hi mihiin amsa' au 'meup ma'tane' 'bi hi tnaanm eun, mes au ka u'naeb ok fa'. Anbi au meupk eun, au maat nuu we nsain, ma 'ha'mui't ee ka ktia' fa'. Au upein 'ha'mu'it amfaun na'kon atoin Yahudis sin. 20 Tabu au unoina' ki, au upoitan 'ain ale' lais lekon le' au uhiin sin neu ki. Ma au unoina' ki maat-maat. Au 'nao 'eu ume mese'-mese', he umnauba' sin anmatoom nok Uisneno In i'lomin. 21 Au 'eut neu atoin Yahudis, ma atoni bian, 'ak sin lo he nasaitan sin saant eun, he natuin Uisneno. Ma sin lo he npalsain neu hit Usi', es le' Usif Yesus.
22 On nane te au he u'uab on ii: tabu ii, au 'loim he 'nao neu Yerusalem, fun Uisneno In Ismana Knino' anheel neik kau 'nao neu bale nane. Au utuin aah, maski au ka uhiin fa saa' le' of he nlail neu kau nbi bale nane. 23 Mes na'ko koot es neu koot es, Smana Knino' an'eut nahuun neu kau ma nak, of au he 'taam o'of ma 'sutai ha'mu'it amfaun anbi bale nane. 24 Au uhiin ulail on nane, natuin Usif Yesus es le' nasaeb kau mepu ii, he au 'nao 'eut Lais Leko 'ak, Uisneno nneek kit, ma In maneekn ee kah een. Kaul au ka utuin fa In i'lomin, he usoup In mepu, au utniin au 'monik ii ka ma'upa' fa'.c
25 Tabu ii, au uhiin 'ak, hi of ka miit amteni' kau fa yeen. Es le' hi le' au unoina' ki 'loo-loo le' ii, anmatoom nok lasi he ttaam atlail Uisneno In nonot ma in asal. 26-28 Es nane te, amneen. Au usopu 'lail au mepu ee neu ki'. On nane te tabu ii, hi lo mees he mmepu piut. Kaul anmui' tuaf na'ko ki, le' ka ntaam fa anbi Usi' In nonot apalsait ate, hi es mitaah kiim, oo! Au ka usanab fa'. Mimnau'! Au 'eut 'ain Uisneno In a'lomin ok-oke' neu ki. Ka tiit attein fa lasi yes le' ma'tolo' neu ki'. On nane te hi lo he mpanat hi 'monim, ma mpaloil main ale' tuaf le' Smana Knino' anleun ki he mpanat sin. Kais amnikan mak, Usif Yesus anmate nlail, he nbaen nafeek sin uupk eun neik In naa' ee Kuun. In anluul ki msa', he hi mnuu' sin, paap mese' on le' atukus natuuk in i'bib-kasen.
29 Tabu ii, au 'nao usaitan ki. Mes mimnau'! Of anmui' atoni' neem ma nanoina' lafu'-lafu' anbi hi sonam ma hi tnaanm eun. Sin paap mese' on le' aus fui ye antaam anseol yon neu 'bib-kasen nbi o'of. 30 Anmui' tuaf aputa-bliu on le' nane, na'ko bale bian. Mes mimnau'. Bian antein nbool neem na'ko ki'. On nane te sin nanoina' lais luman neu ki'. Sin nlomin he atoni' natuin ahaa sin. On nane te sin nsuu' he nheel neik tuaf he kaisa' natuin Usif Yesus In laan amneot ma amnonot antein. 31 Es nane te, hi mpaant om lek-leko. Kais amnikan, fun au utua 'ok ki, toon teun. Au 'faineek ki fai-manas amsa', ma au ka utenab fa au suset ma au haet. Au maat nuu sin ansain neu ki.
32 Tabu ii, hit he tbaits ok. On nane te au 'nona' ki neu Uisneno In i'niman, he In npaloil ki. Hi mnaa' mimep-mepan saa' le' au 'eut ki na'ko nmulai, le' nmatoom nok Uisneno In nekan alekot. Uisneno In nmui' kuasat he nha'taen ki. In nba'an he nfee tetus-athoen neu In apalsait eun amsa'. On nane te kaul hi mituin piut mok neek aknino' meu Uisneno, of hi mipein In tetus nane.
33 Tabu au 'mepu 'bi hi tnanam, au ka 'sinmakan fa saa' es na'ko ki. Au ka 'toit 'iit fa hi blua' mnatu', ai' noin muti', ai' pake, ai' blua' saa'-saa'. 34 Hi mihiin amsa', tabu au utua 'ok ki, au 'meup ma'tane' he au ube'i 'moin. Ka neu fa au 'mees, mes au 'mepu msa' neu sin le' nok kau. 35 On nane te nok le' lasi le' ii, au 'eut ki lanan he hi msa' mok amtulun atoin asusat, le' ka nmu'in fa saa'-saa'. Mimnau, woo! Usif Yesus na'uab niit nak, ‘Hit tfee te, leko nneis na'ko hit atsium.”
36 Na' Paulus na'uab nalail on nane te, in nli'tuu ma n'onen nok sin ok-oke', ma ntoit he Uisneno npanat sin. 37-38 Sin neek eun ansusan nmaten, natuin na' Paulus nak, sin of ka na'eku ntein fa nokan. On nane te tabu sin he nbaits ok, sin nhoo ma nneek na' Paulus, ma nkaen nme-meu'l eun. Nalalit sin nnaon nasain kaid neu bnao oe.