Na' Paulus anfani ntein neu koot Efesus
19
Tabu na' Apolos fe' anbi koot Korintus et propinsi Akaya, na' Paulus annao nfuun kuan eun abiit eun 'tubu' sin. Nalalit in ntia koot Efesus. Anbi nane, in na'euk nok tuaf fauk le' npalsain nlalin neun Usif Yesus.2 Nalalit in nataan sin ma nak, “Au aok-bian aal ki! Anbi neno le' hi mpalsai meu Usif Yesus, hi msimo In Ismana Knino' ee, ai' kahaf?”
Sin natahan ma nak, “Kaah fa, pah! Hai fe' ka mneen miit fa, nak Uisneno nmu'i Asmanaf on le' nane, pah.”
3 Lalit na' Paulus nataan antein sin ma nak, “Kaul on nane te, sin naslain ki neik slani' mee?”
Nalalit sin nataah ma nak, “Sin naslain kai, npaek na' Yohanis in aslanit, pah.”
4 On nane te na' Paulus nak, “Amneen fe'! Na' Yohanis naslain atoni' he nfani 'taka' nak, sin nasnasab sin tau'k eun na'ko sin saant eun, ma ntebi nfanin he natuin Uisneno In laan amneot. Mes mimnau'! Neno-neno, in es neikn on nanoina' too Isra'el nak, sin lo he npalsain neu Na' Yesus, Tuaf le' Uisneno of he nleek Ee neem.”a
5 Annenan on nane te, sin ntotin he in naslain sin, he sin ntaman anlalin Usif Yesus Inin. 6 Nalalit tabu na' Paulus antao in i'niman neu sin ma n'onen ate, sin nsium Uisneno In Ismana Knino'. On nane sin nmulai na'uab eun neikin uab a'teta' le' sin fe' ka nahiin ee fa'. Ma Uisneno npaek sin he n'eut saa' le' of he nlail. 7 Sin nabu-bua, tuaf bo'es am nua'.
Uisneno npaek na' Paulus anbi koot Efesus
8 Tabu na' Paulus natua nbi koot Efesus, in biasa ntaam neu atoin Yahudis sin uim onen, ma nanoina' sin ntia namnuut anmatoom nok Uisneno In Iplenat. In na'uab ka na'tolo' fa saa' es. In nmoe' on nane, tal antia funan teun. 9 Mes anmui' tuaf le' ka nsium fa noina' nane, on nane te sin nlaabn ee. Sin nhuita' atoni' anbi bale nane, he sin kaisa' natuin Usif Yesus In Laan A'honis. Nok lasi nane, na' Paulus nok apalsait enu nasaitan uim onen nane. Nalalit sin nnao nabuan anbin ume skool es. Uim tuaf skool nane, kanan na' Tiranus. 10 Na' Paulus nanoina' sin Usif Yesus In Lais Leko, tal antia toon nua'. On nane te too mfaun eun abiit eun propinsi Asia nfuun am nateef, sin nneen nalail Usif Yesus In Lais Leko. Anenat sin, es eun le' atoin Yahudis, ma atoni 'teta' amsa'.
Na' Sakewa in aanh enu
11 Tabu nane, Uisneno nfee kuasat neu na' Paulus, he nmoe' lais mkakat huma'-huma'. 12 Ta'leta', on le' kaul atoni' ntoti ntahan na' Paulus in i'pilu, ai' in i'futu', ma sin ntao blua' nane neu ameent enu, on nane sin meens eun nane namneuk nanin. Tal niut amleu't eun amsa', nasaitan nain ameent eun nane.
13-14 Anbi nane, anmui' a'naak palsait Yahudi tuaf es, nok in aan monen, sin tuaf hiut. A'naak palsait nane, kanan na' Sakewa. In aanh enu biasa nnaon neu mee-mee ma anliu' napoitan niut amleu't eun na'ko aniut-saes enu. Sin nsuu' niit he nliu' niut amle'ut, neik Usif Yesus In kanan nak, “Ho muhiin Usif Yesus le' na' Paulus n'etu We, ai' kahaf? Tabu ii, au uplenat ko, a'paek Usif Yesus In kanan 'ak, ho mpoi nai mu'ko atoni' ii!” Ma nmui' atoin ahinet Yahudi bian le' nsuu' he nmo'en on nane msa'.
15 On nane te tabu wes ate, na' Sakewa in aanh eun napleent eun on le' nane, anmui' niut abulalut es nataah sin ma nak, “Au uhiin Usif Yesus. Au uhiin na' Paulus amsa'. Mes hi le' ii, hi sekau ki?” 16 Nalalit tuaf aniut-saes le' nane natoo' niis. Oka te in natiik ma nbius sin imsa'. In napapa' sin, ma npius nain sin paken, tal antia sin naen na'hoaal enu waah na'ko ume nane.
17 Nalalit uab nane nasiitb on, tal antia abiit eun koot Efesus nahinen ok-oke'; et atoin Yahudis, ma atoni bian amsa' nahinen. On nane te sekaum-sekau le' anneen lasi nane te, sin namtaun ma nsanmakan. On nane sin na'naeba' Usif Yesus, fun In es le' anfee kuasat a'naek neu na' Paulus. 18 Oka te apalsait fe'un nane neman neu sin aok-bian sin le' npalsain nlalin, ma nfei sin neek eun, oka te sin nmanauk sin saant enu. 19 Na'ko sin le' nane, anmui' atoin ahinet amfaun. Nalalit sin nabuab naan sin suul noina' alaut ma hiint eun nane, ma nout sin anputu nmaten. Kaul he tsoi' suult eun nane, sin uupk eun ok-oke' noin muti' nifun bo' niim.b
20 Nalalit bifee ma atoni nanu'un Uisneno In Lais Leko fai ma manas anbi mee-mee. On nane te apalsait eun ansaat ok piut. Natuin Uisneno In A'an ma In Iplenat nane, antaam senan sin, tal antia sin nekak naank enu.
Taisibu anbi Efesus
21 Tabu na' Paulus nafeek he nfain neu koot Yerusalem. Mes in nloim he nnao nahuun neu propinsi Makedonia ma propinsi Akaya, oka te na' in he nnao nfiin neu Yerusalem. In natenab nalail nak, “Leko nneis au 'nao 'kius apalsait eun anbi balen le' ii fe', fun maski on mee msa', au lo he 'tia koot Roma.” 22 Nalalit in nleun in soba' tuaf nua', es le' na' Timotius ma na' Erastus, he nnaon nahunun neun Makedonia. Mes in natua suuk a'loo ntein anbi propinsi Asia.
23 Tabu nane, lasi 'naek es le' nmatoom nok Na' Yesus In Laan A'honis, anbool anbi koot Efesus. 24 Lasi nane in uun ee, on ii: Anbi nane, anmui' naan atuut noni tuaf es, kanan na' Demetrius. In biasa nmoe' ume 'tulu' aan'-ana' amfa-faun na'ko noin muti' neu uis pah es, kanan bi Artemis. Natuin in mepun nane nlauk namneo, on nane in npaek ameupt eun amfau le'uf. Etun loit ee ntaam piut amfaun. 25 Anbi neno wes, na' Demetrius nabuab naan in ameupt eun nane, ma bian antein, oka te in na'uab neu sin ma nak, “Sin ama' ma au aok-bian aal ki! Hi mihiin main mak hit i'moink ee on le' ii, natuin loit ee neem na'ko hit mepu. 26 Mes tabu ii, hit tiit teik hit matak, ma hit tneen teik hit lukek, nane na' Paulus in i'mo'en. In nfuli ma nkope' too mfaun ee nak, blua' eun le' hit tmoe' sin le' ii, ka ma'upa' fa'. In nak, blua' 'tulu' le' hit tmoe' sin le' ii, aal uis pah eun luum-luum aah.
On nane te ka abiit eun koot Efesus fa es le' anmesen nenan, mes propinsi Asia nfuun am nateef anneen amsa'. 27 On nane te amneen milek-leko'! Of hit he tlail saa' antein, kaul too mfaun ee natuin na' Paulus sin piut? Of atoni' ka neu he nsoos antein fa hit blua' 'tulu eun le' ii. Mimnau'! Tabu ii, too mfaun ee na'bees neu hit uis pah bi Artemis amasat. Anbi propinsi Asia, tal antia pah-piin ee nfuun am nateef, on nane a'beest eun nane neman ma na'besan anbi in ume 'tulu' uuf, es le' anbi hit koot Efesus. On nane te kais-kaisa' atoni' ka nfiloli ye fa yeen, ma sin ka nlomin fa he neem antenin neu bale ii!”
28 Annenan on nane te, sin nato'an namneo-namneo. Nalalit sin nhuun eun ma nak, “Artemis, neek leko! Artemis namaas! Hai abiit Efesus, mi'naeb Artemis!” 29 Too mfaun eun anneen slutuf nane, ma sin naen neman, tal antia koot nane naheun nok too mfaun. Sin ntakamana eun. On nane te atoin enu anmulai nmo'en taisibu npi'-pio'n ahaa lanan, tal antia koot nane in amnela 'naek.c Sin nheek naan tuaf nua', ma nheel neik sin neu bale nane. Sin kaank enu: na' Gayus ma na' Aristarkus. Atoin eun anheek sin, natuin sin nua sin le' nane, na' Paulus in soob enu na'kon Makedonia. 30 Anneen on nane te, na' Paulus anloim he nnao ntaam neu too ataisiubs eun nane sin atnaank enu, mes too apalsait eun anpeen ee. 31 A'naet bian na'kon propinsi Asia nokan nbin nane, sin nahiin nalek-leko' na' Paulus. Sin nleun tuaf he n'eut ma nak, na' Paulus ka nabei' fa he ntaam neu too mfaun le' nmo'en taisibu nane.
32 Anbi mnela' nane, atoni' nmulai naim lasi nane in uun. Bian anhunun neik haan poi nak, “On ii!” Bian ankoa' eun nak, “On nane!” Te kahaf, too mfaun eun nane ka nahinen fa lasi nane in i'naon. Sin naen nokn ahaa. 33 Anbi bale nane, anmui' atoin Yahudis amsa' le' nmulai namtaun. Sin teenb ee nak, kais-kaisa' too mfaun eun anbuu' sin nak, sin es le' anpees namonib lasi ii. Etun sin nahakeb naan tuaf es antoom maat, anlail atuut hanaf neu too Yahudis sin. In kanan na' Aleksander. Sin ntotin he in namneob sin nak, atoin Yahudis sin ka nahiin fa lasi nane. Nalalit na' Aleksander nait in i'niman, he nakaina' sin he na'teen eun. Nalalit in na'uab he namneoba' atoin Yahudis sin. 34 Mes tabu sin nahinen nak, in le' nane atoin Yahudis te, sin nabaa' piut ma nak, “Artemis neek leko! Artemis namaas! Hai abiit Efesus mi'naeb Artemis!” Sin nabaa' on le' nane, tal tabu nua'.
35-36 Nalalit a'nakaf koot Efesus anhaek ma nakaina' sin ma nak, “Au aok-bian aal ki, abiit eun koot Efesus! Ale' uuf ma pah nahiin nak, hit uis pah bi Artemis, in amneman na'ko neno tnanan neu kit. On nane te hit abiit Efesus, es le' atpaloil talek-leok' ee. Ka tiit attein fa tuaf es, nait nain hit paa' nane, natuin lasi nane anlail nu'un le' anmoin piut, ma ale' pah-pah nahinen nlalin. On nane te nasaa' am es hi mislutu' on nane? Maski anmui' akhani' natuin sin loimk enu, mes hi kais ammoe' taisibu human on le' ii! 37 Hi mtoup meik tuaf nua' eun le' ii, paap mese' on le' sin nmo'en lais amle'ut. Te kahaf, sin ka nabakan fa saa'-saa' na'ko bi Artemis in ume 'tulu' uuf. Sin ka na'uab namouf fa hit uis pah bi Artemis in kanan. On nane te hi he misaan sin nok lais saan saa'? 38 Mimnau'! Hit tmui' bale he tafeek lasi. Afeek laisn ee msa', sin npao nanin. On nane te kaul na' Demetrius sin he nmo'en lasi te, sin lo mees he natuin in atolan, he sin neik lasi nane neu bale feek lasi. 39 Ma kaul anmui' lasi bian antein le' sin he nait ye, he sin nnaon nma'akool eun nok atoni mnais enu. 40 Kais-kaisa' anaa' aplenat pah Roma nasaan kit, natuin taisibu le' ii. Kaul sin he naim lasi le' ii in i'naon ee te, hit of he tataah on mee? Natuin lasi ii, ka ma'uu' fa'!” 41 Na'uab nalail on nane te, a'nakaf nane anleun sin he sin nasaan' ok. On nane te sin natuin eun.