Tabu nane, na' Paulus annao nasaitan koot Atena, ma in nnao neu koot Korintus amsa'. Anbi nane, na' Paulus anmaka'hine' nok na' Akila ma bi Priskila, natuin in amoe blua' na'ko pasu msa'. Sin natua nabuan, ma nmeup nabuan.

4 Kaul antia atoin Yahudis sin neno snasat, na' Paulus antaam neu sin uim onen. Anbi nane, in nsuu' he ntaul atoin Yahudis ma atoni 'teta' sin, he sin npalsain neu Usif Yesus.

5 Mes tabu na' Silas ma na' Timotius neman na'kon propinsi Makedonia, na' Paulus nasnasab meup pasu nane. Fai-manas in nmeup ma'tane' ma n'eut neu atoin Yahudis sin ma nak, “Atoni' le' hit tpa-pao na'ko un-unu', le' Uisneno nba'an he nleek Ee neem nane, neem nalali yeen. In es le' Na' Yesus!”

6 Mes anmui' atoin Yahudis le' anlaban na' Paulus piut, ma sin na'uab namofu ye. Nalalit in ntekal afu skuku' na'ko in iblua paken, he nfani 'taka' nak, in ka nfiloli ntein fa sin, natuin sin ka nlomin fa he nsium Lais Leko le' in n'eut neu sin. On nane te in na'uab ma nak, “Hi le' ii, lo 'teeb-teeb ki! Hi on he mitono' kiim hi luikm enu! Mes maut nai! Hi of mitaah kiim hi saant enu. Anmulai na'ko tabu ii, au ka 'mu'i 'tein fa lasi 'ok atoin Yahudis ki. Au he 'nao unoina' uuf a'teta' le' ka atoin Yahudis fa'.”

7 Anmui' uim es anhaumaak uim onen nane. In tuan ee, kanan na' Titius Yustus. In ka atoin Yahudis fa, mes in neekn ee nmaliin neu Uisneno. Nalalit tabu na' Paulus annao nasaitan atoin Yahudis sin, in nnao ma ntaam neu ama' Titius in ume.

8 Ka 'loo fa te, uim onen nane in a'naakt ee npalsai neu Usif Yesus amsa'. In kanan na' Krispus. In uim ye nanan nok atoin Korintus bian le' anneen na' Paulus, sin anpalsain neu Usif Yesus amsa'. Nalalit na' Paulus an'atol he naslain sin ok-oke'.

9 Anbi fai yes ate, anbi mnitas, na' Paulus anneen Uisneno nakua' a'an ma nak, “Paulus, ho kais mumtau', ma kais am'oel meu mepu ii, natuin ho 'sutais eun ka oek eun fa fe'. Ho lo he munoina' sin piut meik Lais Leko na'ko Kau. 10 Mumnau'! Ho ka mmepu mmees fa'. Au 'ok ko. Maski atoni' nasusab ko, mes Au 'pasan Au haek 'eu ko. Ma Au 'kius ko fai-manas. Kais amnikan, anbi koot le' ii, Au nuu namfaun.”

11 Anneen on nane te, na' Paulus natua suuk a'loo nbi koot Korintus. In nanoina' Uisneno In Laan A'honis anbi nane, tal antia toon es am batis.

12 Tabu nane, sin nasaeb tuaf es nfain gubernur anbi propinsi Akaya. In kanan na' Galio.^a On nane te atoin Yahudis sin anma'akool eun ma sin nheel neik na' Paulus annao neu gubernur feu', anbi bale feek lasi. 13 On nane te sin ankalaak na' Paulus ma nak, “Atoni' le' ii, ankope' too mfaun he natuin palsait feu'. Maski anaa' aplenat pah Roma ka nahiin fa palsait nane!”

14 Mes tabu na' Paulus he nfei in fefan he namneob in ta'un, gubernur an'ote nfeek in uaban. In nakaina' nain atoin eun le' natlaak na' Paulus nak, “Haeh! Atoin Yahudis ki. Mitniin fe'! Kaul hi mitlakan kau lais le'uf, ai' lais malolot, au lo he 'neen hi lasi nane. 15 Mes lasi le' hi meik ye neem le' ii, nane lasi et hi uim ye nanan! Aal hi misulin lasi le' nmatoom nok atolan lais palsait Yahudi, ma nok in uab eun, ma nok in kaank eun. Anaa' aplenat ee ka n'ulus fa lasi on le' nane!”^b

16 Nalalit gubernur nane anliu' napoitan sin na'ko bale feek lasi nane. 17 On nane te atoin Yunanis sin anheek naan tuaf es, kanan na' Sostenes. In le' nane, a'nakat na'ko atoin Yahudis sin uim onen. On nane te sin nheel neki ye, ma nbiso we anbi gubernur ee in matan. Mes gubernur nane ka nfiloil fa sin.

18-19 Nalalit na' Paulus natua nabalah anbi Korintus. Mes a'loo-'loo te, in naseon neu apalsait eun abiit eun nane. Nalalit in, bi Priskila ma na' Akila, annaon neu koot es, kanan Kengkrea, he npaon abnao oe. Anbi nane, na' Paulus anpeu in i'nakan he nfani 'taka' nak, saa' le' in nba'an nalali ye nok Uisneno, tabu ii, in nmo'e yeen.^c Nalalit sin nsaen abnao oe, ma nnaon neu koot Efesus. Antian nane, sin nsanun na'kon abnao nane. Nalalit na' Paulus nasaitan tuaf nua' eun nane, ma in ntaam neu atoni Yahudis sin uim onen. Anbi nane, in nmatutan uab nok atoni Yahudis sin. 20 Sin na'ub-uab eun on nane te, atoin Yahudis sin antotin he na' Paulus natua ntein nok sin suuk a'loo. Mes in ka nloim fa'. 21 Nalalit in naseon sin ma nak, “Au aok-bian aal ki, kaisa' hi neekm eun nabatin! Kalu Uisneno nfei lanan neu kau te, of au 'fain 'oum he 'kiso 'tein ki.” Na'uab nalail on nane te, in nnao nasaitan koot Efesus.^d

22 Nalalit in nsae bnao oe ntein ma nnao nfiin tal antia koot Kaisarea. Ma in nsanu nbi nane. Oka te in nnao neiki nsae neu Yerusalem, ma anmataben nok apalsait eun anbi nane. Nalalit in nfain neu koot Antiokia. 23 In natua suuk a'loo nbi nane, oka te in nnao ntein, he in nnao nfuun am nateef anbi propinsi Galatia ma propinsi Frigia. Anbi nane, in nha'taen apalsait eun sin neek enu.

24 Tabu nane, anmui' atoin Yahudis tuaf es na'ko koot Aleksandria et pah Masir. In kanan na' Apolos. In le' nane, atoin mafefa'. In nahiin Uisneno In Sula Knino' ee in neesn ee namnuut. In fe' neem antia koot Efesus. 25 In nneen nalail nu'un anmatoom nok Usif Yesus, ma in nmaliin he nanu'un nafani ee neu tuaf bian. In nanu'un nok malinat, ma saa' le' in na'uab ee nane, lo namneo. Aal in fe' ka nahiin nalail fa ale' lasi nane ok-oke'. In ala nahiin nak, na' Yohanis naslani atoni', kaul sin nasaitan sin saant enu. 26 Anbi neno wes, in na'uab ka na'tolo' fa nbi atoin Yahudis sin uim onen. Eina' Priskila nok ama' Akila sin nok annenan amsa'. An'oen eun nalalin ate, sin na'auba' neki ye neu sin ume. Anbi nane, sin an'eut Usif Yesus In Laan A'honis, tal antia namnuut.

27 Nalalit na' Apolos nafeek he nnao neu propinsi Akaya. Apalsait eun koot Efesus anneek mesen nok in i'lomin. Oka te sin ntui suult es neu sin aok-bian sin abiit eun Akaya, ma ntotin he sin nsium na' Apolos nok leko. Ansium sulat nane, nalalit in nnao ntia Akaya. Anbi nane, in ntulun apalsait eun namneo-namneo. 28 In nmatutan uab nok atoin Yahudis sin anbi too mfaun eun maatk eun, mes sin ka niis ee fa'. In nloim he npaek Uisneno In Sula Knino' he nanoina' sin nak, “Tuaf le' Uisneno nba'an he nleek Ee neem, le' hit tpa-pao We 'loo-loo, In es le' Na' Yesus!”