2 Kaul sin antian bale es le' nmui' uim onen, na'euk nok atoin Yahudis neno snasat ate, na' Paulus biasa ntaam ma nok an'onen nok abiit eun nane. Anbin Tesalonika msa', in nok antaam anbi sin uim onen. On nane te in nok anmatutan uab nok sin anbi nane, sin npaek Uisneno In Sula Knino'. In nok an'onen nok sin anbi neno snasat hae' tenu npatuut. 3 In na'uab neu sin ma nak, “Kaul hit ttae lek-leok tbi Uisneno In Sula Knino' nane, hit tahiin tak sin na'uab nalalin na'ko un-unu nak, Tuaf le' Uisneno nba'an he anleek Ee neem neu kit, of In napein ha'mu'it amfaun. In of anmaet. Mes nalalit Uisneno of anpaek In kuasan he namonib nafani In. Tabu ii, hit tahini tlail tak, Tuaf le' Uisneno nba'an nani Ye, es le' Na' Yesus!”

4 Annenan on nane te, anmui' atoin Yahudis bian ansium na' Paulus in uab eun, oka te sin nabuan nok na' Paulus sin. Na'ko tuaf-tuaf le' ansium uab eun nane, anmu'i msa' atoin Yunanis le' sin namnau niis Uisneno, nok bifee bian le' nmu'in kaan leok mateka' anbin koot nane.

5 Mes atoin Yahudis sin a'naet eun nato'an ma nneek menan. On nane te sin nhuita' ale' amatoes eun he sin ntaisibun. Tabu too mfaun eun nabuan nalalin on nane te, sin nmulai nmo'en taisibu nbin koot nane. Sin naim na' Paulus ma na' Silas he sin nheel neik sin neu too mfaun eun le' fe' antaisibun. Nalalit sin nnaon naleu' na' Yason in ume, natuin na' Paulus nok na' Silas natua ntaahn eun anbin nane. 6-7 Mes sin ka napein fa na' Paulus sin anbin nane. Nalalit sin nheel neik na' Yason ma nonot apalsait bian neu bale feek lasi. Sin anbuu' na' Yason ma nak, “Tabu ii, anmui' apaisunat le' neman et hit koot. Sin nnaon neu bale mee-mee te, sin nmo'en taisibu! Tabu ii, sin neman he naleu' hit atolan anbi bale ii, oka te anseek ee neik sin atolan! Na' Yason le' ii, ansimo nlail tuaf eun nane, ma nfeen sin bale 'tupa' anbi in ume! Ma sin aal sin anlaban hit atolan, natuin sin ka nlomin fa he nmanauk neu hit usi 'naek, kesel. Sin nmanaku neu sin Usi 'Naek mese' aah, kanan Na' Yesus.”

8 Annenan on nane te, a'naet eun ma atoin eun le' nbin bale nane, sin teenb eun anpaisuun ok. 9 Nalalit a'naet eun koot nane anleun na' Yason ma nonot apalsait eun he nbaen eun loit he sin nmana'fefan ma nak, sin of ka nmo'en fa taisibu ntenin, ma ka naenan fa'. Anbaen eun nalalin ate, sin nafetin na' Yason sin.

10 Mabe' nane, nonot apalsait eun abiit eun koot Tesalonika naten-teenb eun ate, nak leko nneis sin nleek na' Paulus ma na' Silas he nnaon neu bale bian. Nalalit sin nleun atoin nua' eun nane nnaon neu koot es, kanan Berea. Antian nane te, sin ntaman neu atoin Yahudis sin uim onen. 11 Mes atoin Yahudis abiit eun Berea nane, ka on fa abiit eun Tesalonika. Sin nlomin nmaten he nneen, ma nabaalb ok he nsium na' Paulus sin uab eun. Fun abiit eun Berea anneen nalek-leko' na' Paulus sin, on nane te sin nkius ma ntae nalek-leko' Uisneno In Sula Knino'. Sin namin he nahinen nak, na' Paulus sin uab eun nane namneo, ai' kahaf. Es nane te, fai-manas sin npalekas Uisneno In Sula Knino' nane, tal namnuut. 12 Nok lanan nane te, atoin Yahudis amfaun anbi bale nane, anpalsain neu Usif Yesus. On nane msa', atoni Yunanis sin. Apalsait eun neu Usif Yesus nane, bifee ma atoni', anmu'in pengaru 'naek.

13 Mes tabu nane, atoin Yahudis abiit eun Tesalonika annenan nak na' Paulus sin nanoina' Uisneno In A'an ma In Iplenat et koot Berea. Sin neem natuin eun, ma sin nhuita' too he nmo'en taisibu ntein anbi bale nane. 14 Es nane te, abiit eun Berea nnao nanaat na' Paulus labah neu tasi ye ninen. Mes na' Timotius ma na' Silas natua nabalan anbin Berea. 15 Atoin eun nane, annaon nanaat na' Paulus antian koot es, kanan Atena. Nalalit sin namaika anbi nane, ma sin nfanin neun koot Berea. Sin neikin uab manba'an na'ko na' Paulus nak, na' Silas ma na' Timotius lo he neman labah nai he nabuan nokan.

16 Tabu na' Paulus anpao na' Silas ma na' Timotius sin amneemk eun neu Atena, in neekn ee ansuus, natuin in niit bale 'tulu' amfaun anbi koot nane.

17 Mes anbi nane, anmui' atoin Yahudis nok atoni 'teta' bian le' n'oen eun neun Uisneno. Na' Paulus antaam neu sin uim onen, ma nmatutan uab nok sin. Neno-neno te, in nnao neu 'masa' ma na'uab nok tuaf sekaum-sekau yaah anbi nane. 18 Nalalit in nmakataan eun nok kulu bian na'kon pukan nua anbin koot nane. Puukn es, es le' Epikoros, ma pukan es antein, es le' Stoa.^a Mes tabu in na'uab anmatoom nok Usif Yesus nak, In nmoni nfain na'ko In i'maten, anmui' tuaf le' nnalonan hape nak, “Thfoi'! Poi ye tuan ee, es le' ii!” Bian na'aakn eun ma nak, “Ailoo! Atoni' ii he na'seke' kit, he hit ta'tulu' teu sin uis pah!”

19-21 Abiit eun Atena ma anao-amneemt eun abiit eun koot nane, kaul anneen lais feu' es ate, on le' noina' feu', tenab feu', sin biasa ntook nabuan ma nmatutan uab anbi 'tuub aan es, sin nteek ee te, Areopagus. Nalalit anmui' tuaf na'ko sin neik na' Paulus annao neu bale nane, ma sin ntoti ye nak, “Neu! M'eut miit kai noina' feu' nane! Natuin ho mu'uab lais feu' le' anmoe' kai he mtaka'mana' kle'o. On nane te hai mtoit he ho mu'uab amteni' fe', he hai mihiin namneo.”

22-23 Nalalit na' Paulus anhaek ma na'uab am nak, “Hi atoin Atenas aal ki! Au 'nao 'noon ulail hi koot ii, ma au 'iit ulail 'ak namneo, hi ammakoe he minaoba' atolan lais palsait. Au 'iit hi bale 'tuul' eun et mee-mee. Mes au 'iit bale 'tuul' es maluna' nak, ‘Ii 'tulu' neu uis pah le' ka mahine' fa’. He tabain ee te tak, hi mi'tulu' milail meu Uisneno, mes hi fe' ka mihine Ye fa'. In es le' au 'eut ki Ye nane.

24 Natuin In es le' anmoe' neno tnanan ma pah-pinan nok in nesan ok-oke'. In es le' Usif neu ale' saa' et neno tnanan ma pah-pinan. On nane te In ka natua fa et ume 'tulu' le' mansian ee nmo'e ye. 25 In es le' anfee snasaf ma namonib hit mansian. On nane te In es anfee ale' saa' le' hit tpaluu. Mes In ka npaluu fa saa'-saa'. Es nane te, mansian ee ka nabei' fa he ntuuln Ee.^b 26 Na'ko tuaf mese', In namonib too nbi pah-pinan anfuun am nateef. In es anbait neu ale' uuf ma pah, es-es ate nok in pah. Ma In es an'atol ale' uuf ma pah sin a'hakek ma sin a'moufuk, mese'-mese' te nok in tabu ma in etin.

27 In nmoe' on nane, natuin In nloim he hit mansian kit, tami Ye ma tahiin Ee lek-leko. Mansian sin lo namin kal-kaul sin nabei' na'euk nok Ne. Mes amneon ee, In ka na'loo fa na'ko kit. 28 Anmui' tuaf na'uab niit nak,

Anmui' hi amnait nee msa', na'uab eun ma nak,

29 Nane lo namneo. Hit aal kit le' ii, Uisneno In suufn aa kit. On nane te kais mitenab mak Uisneno paap mese' on le' bale 'tulu' mahuma' le' mansian nabei' anmo'e neiki mnatu', ai' noin muti', ai' fatu, natuin sin teenb eun kuuk. 30 Nahunut, namneo mansian ee ka nahiin fa lasi nane. Etun es le' Uisneno nafetin kit he hit tmoin tatuin hit monok. Mes tabu ii, In ka nloim fa he hit tmoin on nane ntein. Etun In nfee plenat nak, hit lo mees he tnao tasaitan ma taplakab a'tuul' eun le' nane, oka te atnao tatuin Ee nai. 31 In n'atol nain tabu wes, he nhukun ale' mansian nbi pah-pinan ii, natuin sin saant enu. Ma In anluul ma nleek nain Tuaf es anfani In Afeek Lasi. Tuaf nane of nafeek lasi te, natai ma namnees. Tabu ii, hit tahiin nok aknino', Afeek Lasi nane es le' sekau. In es le' anmate nlail, mes Uisneno namonib nafani' Ye.”

32 Mes tabu le' hae hela eun nane anneen na' Paulus nak, anmui' atoin amates anmoni nfain, sin nmains ee. Mes anmui' tuaf bian anlomin he nneen ee. Sin na'uab neu na' Paulus ma nak, “Hai fe' amloim he mneen ho uab eun nane. Mes maut he anbi tabu wes antein.” 33 Nalalit na' Paulus annao nasaitan bale nane. 34 Mes anmui' tuaf fauk le' annao nabua nok ne, natuin sin anpalsain nalail neu Usif Yesus. Tuaf es na'ko sin le' biasa n'atol lasi anbi Areopagus, kanan na' Dionisius. Nok bifee yes, kanan bi Damaris. Ma nmui' bian antein le' nnaon nabuan nok sin.