Na' Timotius nabua nok na' Paulus ma na' Silas
16
Nalalit na' Paulus sin nnaon nfinin neu koot Derbe. Oka te sin nnaon nfinin neun koot Listra. Anbi nane, sin na'euk nok atoin muinf es, in kanan na' Timotius. In aamf ee, atoin Yunanis. Mes in einf ee, bifee Yahudis le' anpalsai nlail neu Usif Yesus. Na' Timotius nfain apalsait neu Usif Yesus amsa'. 2 Ale' apalsait eun abiit eun koot Listra ma koot Ikonium nahinen nak na' Timotius le' nane, atoin leko. 3 Na' Paulus anloim he na' Timotius nok sin. Mes anmui' atoin Yahudis et bale nane nahinen nak na' Timotius in aamf ee, atoin Yunanis, on nane in le' nane fe' ka na'heli' fa natuin halat atoin Yahudis. Es nane te, na' Paulus an'atol ma sin na'heli' na' Timotius.a 4 Nalalit sin nnaon na'kon bale neu bale, he n'eut lais fekat le' Usif Yesus In haef eun ma atoni mnasi' Kristen sin nafeek nalali ye nbi Yerusalem. 5 Nok lanan nane, sin nha'tane ntein nonot apalsait eun sin neek eun. Neno-neno, nonot apalsait feu' eun sin ansaat ok piut.
Na' Paulus napein hanaf he nnao neu Makedonia
6 Nalalit na' Paulus sin nnaon nfinin. Sin nnaon neun propinsi Frigia ma propinsi Galatia, natuin Uisneno In Ismana Knino' npenan sin he kais annao n'eut Usif Yesus In Lais Leko anbi propinsi Asia. 7 Tabu sin antian bale yes le' anmanakan nok propinsi Misia, sin nsuu' nitan he ntaman neu propinsi Bitinia. Mes Usif Yesus In Smaan ee npenan sin he kais annaon neun bale nane.b 8 Nalalit sin nnaon nfinin nleuk lanan le' anbi propinsi Misia, ma antian koot Troas.
9 Mabe' nane, Uisneno naklila' mnitas neu na' Paulus. In niit tuaf es anhake nbi tasi ye bian, anbi propinsi es, kanan Makedonia. Atoni' nane anhunun ma ntoti ma nak, “Aam! Au u'auba' ko he oum meu ii, he mtulun kai, pah!” 10 Na' Paulus niit on nane te, haic mifeek he mnao meu Makedonia. Hai mitenab mak, le' nane Uisneno es le' anleun kai, he mnao m'eut In Laan A'honis meu abiit eun tasi ye bian. Etun In npenan kai, he kais amnao meu bale 'teta'.
Anbi koot Filipi, eina' Lidia anpalsai neu Usif Yesus
11 Nalalit hai msae bnao oe mbi koot Troas, he mlaak meu pulau aan es, kanan Samotrake. Nookf ate, hai mlaak amtein ma mtia koot es, kanan Neapolis. Hai msanu mbi nane. 12 Mi'ko bale nane, hai mnao laan meto' meu koot a'naek es, kanan Filipi. (Filipi nane mateka' nbi propinsi Makedonia, ma anaa' aplenat pah Roma msa' nnaa' kuasat anbi koot nane.) Hai mitua neno fauk aah anbi bale nane.
13 Na'euk nok neno snasat atoin Yahudis sin, hai mnao maim bael onen atoin Yahudis. Hai mitenab mak bael onen nane of et noe ye ninen. Es nane te, hai mnao mpoi kle'o mi'ko koot nane, tal amtia hai mbool meu noe yes. Hai mi'euk mok bifee puukn es anbi nane.d Nalalit hai mtoko ma mi'uab mok sin. 14 Na'ko bifee pukan nane, anmui' bifee yes, kanan bi Lidia. In na'ko koot es, le' na'loo et propinsi Asia, kanan Tiatira. Bifee le' ii, na'sosa' muti maas neon-mabe' le' ma'upa' neu atoin makana'. In nmakoe nbi lais onen neu Uisneno. On nane te in nneen na' Paulus in uab eun, ma in nsium nain sin tabu nane.
15 Nalalit hai mislain eina' Lidia nok in ume nanan oke'. Mislain milail sin ite, sin nfee haan 'auba' neu kai ma nak, “Sin ama' aal ki. Kaul hi mitenab mak au 'palsai ulail 'eu Usif Yesus te, hi eim meu hai ume ma mitua mtahan mok kai.” In noik kai piut, tal antia hai mituin.
Sin nataam na' Paulus ma na' Silas anbin uim o'of et koot Filipi
16 Neno wes, tabu hai mnao meu bael onen, hai mi'euk mok li' feto wes. In le' nane, atoni' in ate. Niut amleu't es antaamn ee, on nane in nabe'i ntae ma nsoi' atoni in uan. In nabei' nahiin atoni' in lasi na'ko uun a'ba'an amsa'. On nane te atoni' mfaun anlomin he nfeen loit neu li'aan feto nane, ma ntotin he in ntae sin uak eun. Mes aan feto nane, in a'naakf eun es le' napenin ale' loit eun nane, tal antia sin i'mui'k eun kah een. 17 Neno nane, tabu hai mnao te, aan feto nane natuin kai piut. Ma in nhunun am nak, “Atoin eun le' ii, aten na'ko Uisneno Akuasat. Sin neman he naklila' lanan, he on mee te atoni' nabei' napeni 'honis, ma nafeitn ok na'ko sin saant eun!”
18 Li'aan feto nane anmoe' on nane, tal antia neno nua-mteun. Klo-loo ate, na' Paulus ka nloim fa he nneen antein li'aan feto nane in uaban. On nane te in nabain on ma nkius na'ke'en li'aan feto nane, ma in napleent ee ma nak, “Hoe! Niut amle'ut! Au 'eki Usif Yesus In kuasan, ma uplenat ko, ampoi nai mu'ko li'aan feto nane, tabu ii!” Na' Paulus na'uab nalail on nane te, niut amle'ut nane anpoi nain.
19 Tabu in a'naakf eun nahinen nak, sin ate nane in ma'tanen ma manenun nane namneuk, sin nato'an, natuin sin ka napenin fa loit antein' een. Nalalit sin nnaa' neik na' Paulus ma na' Silas neu 'masa', le' nmui' bale es le' biasa sin npake ye he nafekan lasi. 20 Anbi bale nane, sin nkoa' eun namep-mepan ma nak, “Atoin eun ii neman he naleu' hit koot. Sin ka na'kon fa bale ii. Sin atoin Yahudis le' neman na'kon bale 'loo-loo he nmo'en taisibu nbin ii! 21 Sin nanoina' neu too mfaun am nak, hit kais attoe tatuin anaa' aplenat pah Roma sin atolan.”
22 Annenan on nane te, too mfaun eun antaisibun, ma nnaon ma ntuuf na' Paulus ma na' Silas. On nane te a'naakt eun anbin nane, anleun sin anpius naleu' na' Paulus ma na' Silas sin paken, nalalit anbius sin. 23 Sin nbius na' Paulus nok na' Silas, nalalit sin nataam sin neu uim o'of. Sin anleek a'naak apaot anbi nane, he npanat atoin nua' eun nane lek-leko. Kais-kaisa' sin naenan. 24 Anneen on nane te, a'naak apaot nane nataam sin neu ke'an es anbi uim o'of nane in atnanan. Nalalit in nhaip sin haek eun neik hau 'loki'.
25 Oin tabu fain atnana' te, na' Paulus ma na' Silas an'oen eun ma nsiin he nbo'is Uisneno. Atoin hukun bian nokan nbin le' nane, nokan nneen sin nsiin. 26 Nok askeken, nain ee na'beko' 'naek on le' nainunus, tal antia uim o'of nane ok-oke' na'beko' msa'. Uim o'of nane in eon' enu nasoitn ok mainua le'uf. On nane te atoin huukn eun, sin koleen fuuts enu natseif eun oke'.
27 Tabu nane, a'naak apaot anbi uim o'of nane naskeke ma nfeen, ma in nkius uim o'of nane in eon' enu nasoitn ok mainua le'uf. Annuu' on nane te, in natenab nak ai' atoin huukn eun naenan nlalin. Nalalit in nfaik in suni ee he nheo niis on. 28 Mes na' Paulus ankoa' namep-meep ma nakain ee ma nak, “Ailoo, aam! Kais amheo miis om! Hai fe' es kai ii, pah!”
29 Anneen hanaf nane te, a'naak apaot nane namtau nmaet, ma in ntaka'mana' amsa'. Nalalit in nleun he neikn ee 'nopo', on nane te in naen antaam neu uim o'of nane in nanan, mes in aon ee tai-tai. Ma in nli'tuu anbi na' Paulus ma na' Silas sin haek enu.
30 On nane te in napoitan sin na'kon uim o'of, nalalit in nataan sin ma nak, “Sin ama' aal ki! Au neek ee ansuus anmaet. Au he 'moe' saa' he au ubei' ufeitn ok u'ko suust eun le' ii?”
31 Na' Paulus sin ntutan ma nak, “In laan ee on ii: ho mpalsai meu Usif Yesus, he In nsoi nafetin ko na'ko ho saant eun nane. Ho ume nanan amsa'.” 32 Nalalit na' Paulus ma na' Silas na'uab nok a'naak apaot uim o'of nane, ma in ume nanan aal sin. Sin n'eut Usif Yesus In Laan A'honis neu sin. 33 Anfini kle'o na'ko fai tnana' nane, a'naak uim o'of nane neik na' Paulus ma na' Silas he nboe ma npaloil papa' le' afi sin nbius sin. Nalalit sin naslain a'naak apaot nane nok in ume nanan ok-oke'. 34 Oka te in nok sin antaman neu in ume ma ntuthae sin. In nok in ume nanan nmaliin nmaten, natuin sin npalsain neu Uisneno.
35 Anbi nok-nook ana' te, a'naet eun le' nafeek lasi, sin nfeen hanaf neu a'naak apaot uim o'of, he in napoitan na' Paulus ma na' Silas.
36 Anneen on nane te, a'naak uim o'of nane na'uab neu na' Paulus ma nak, “Sin ama' aal ki! A'naet eun nafeek nalalin he nafetin ki. Es nane te, hi mnao nai nok ao-mina'.”
37 Anneen on nane te, na' Paulus ka nsium fa leko. On nane te in n'eut neu ana' lenu' tuaf es ma nak, “Kais on nane! Natuin hai mmui' hak too Romas kai. On nane te hai mtoit hai hak! Anaa' apleent eun lo he n'atol hai lasi ii natuin atolan. Amneot ate, lo ttook he ttae lasi fe', oka te na' athukun atoni. Mes sin ka nmo'en fa on le' nane. Sin ka ntokon fa he ntae lasi nahuun, he naim nahiin hai saant ee saa', mes sin nbius na'ba'-bae' kai nbi too mfaun eun sin maatk eun. Ka tiit fa sanat saa' le' he nfani tu'in, he sin nataam kai neu uim o'of. Ii lo namneo-namneo, sin ntanhai nalail atolan plenat pah Roma. On nane te tabu ii, sin he napoitan kai mnees-amnees na'ko uim o'of, maut he atoni' kais nahinen nak, hai saant ee saa'? Ka on fa nane! Amleun a'naet eun neikn ok neman, he nafetin kai. Nok lanan nane te, na' hai of amsimo.”
38 Tabu ana' lenu' nane anfain ma n'eut na' Paulus in uab eun nane, a'naet eun nahinen nak sin nua sin anmu'in hak too Romas. On nane te sin namtaun nmaten. 39 Nalalit a'naet eun neman neun uim o'of ma nmanauk sin saant enu, oka te antotin saok sanat na'ko na' Paulus ma na' Silas. Nalalit sin nafetin sin nua sin, ma sin ntotin he sin nua sin nasaitan koot nane. 40 Anpoin na'ko uim o'of nane te, na' Paulus sin nnaon neu eina' Lidia in ume. Anbi nane, sin nabuan nok apalsait enu. Sin nanoina' sin ma nha'tane ntein sin neek enu. Nalalit sin nnaon nasaitan koot nane.