Atoni mnasi' Kristen sin nabuan anbin Yerusalem
15
Tabu nane, anmui' atoin Yahudis fauk le' anpalsain neu Usif Yesus neman na'kon laan a'loo, na'kon propinsi Yudea neu koot Antiokia. Neem antian on nane te, sin nanoina' nonot apalsait eun ma nak, “Hi mpalsai meu Na' Yesus ate, leko msa'. Mes nane ka nanokab fa fe'. Kaul namneo-namneo hi mloim he hi mipein lasi 'honis, hi lo mees he maheli' ki mituin hai halat atoin Yahudis, le' Uisneno neikn On nahakeb nani ye neu nai' Musa.”a2 Mes na' Paulus ma na' Barnabas anlaban ma'tane' nok atoin eun nane sin uabk eun. Sin nmatoen nok ma'tane'. On nane na' Paulus nak, “Hi msaan! Apalsait eun na'ko atoni 'teta', hit kaisa' ta'seke' sin he natuina' hit halat mahelit na'ko atoin Yahudis!” Natuin sin nmatoena' lasi nane, es nane te sin anma'akool eun he anleek haef eun na' Paulus ma na' Barnabas nok atoni bian na'ko Antiokia, he neik lasi ii neu Usif Yesus In haef eun, ma atoni mnasi Kristen bian abiit eun Yerusalem.
3 Es nane te, too slain eun abiit eun Antiokia anleek na' Paulus sin he nnaon neun Yerusalem. Sin nnaon npi'on laan meto', neis nokan propinsi Finisia ma propinsi Samaria. Anbin laan atnanan on nane te, sin neisin anmakisun nok nonot apalsait eun anbin sin umen. Nalalit sin nanu'un tal namnuut nak, “Atoni 'teta' msa' te, nabaina' sin tau'k eun ma npalsai neun Usif Yesus!” Annenan on nane te, sin aal sin anmalinan.
4 Tabu sin antian Yerusalem on nane te, apalsait eun neu Usif Yesus ansium sin nok leko. Usif Yesus In haef eun nok atoni mnasi Kristen sin ansium sin amsa'. Nalalit na' Paulus sin nanu'un ale' lasi le' Uisneno nmo'e nlail sin neu sin, tal antia atoni 'teta' mfaun natuina' Usif Yesus amsa'. Ma sin nanu'un sin matoes anmatoom nok lais mahelit amsa'. 5 Anbi tuaf eun le' anneen na' Paulus sin nu'un, anmui' atoin Yahudis Kristen fauk na'kon nonot Farisi. Sin anfeen anhaken ma na'uab eun namep-mepan ma nak, “Amneen milek-leko', hee! Kalu nmui' atoni 'teta' le' ka atoin Yahudis fa, le' anloim he natuin Usif Yesus, sin lo he natuin hit halat mahelit, nok ale' hit halat ma atolan bian le' Uisneno neikn On anfee nain sin neu nai' Musa.”
6 Nalalit nonot apalsait eun ok-oke' anma'akool eun he Usif Yesus In haef eun nok atoni mnasi Kristen sin, nabuan he ntai nalek-leko' lasi nane. 7 Nalalit sin nmatutan uab ma tenab neu-mneman. Namuni te, na' Petrus anfeen anhake ma na'uab ma nak, “Au aok-bian aal ki! Hi mihiin milail mak, nahunut, Uisneno anbeit nain kau na'ko kit, he au 'nao 'eut Usif Yesus In Lais Leko neu atoni 'teta' le' ka atoin Yahudis fa, natuin Uisneno nlomi msa' he sin npalsain neu Usif Yesus.b 8 Uisneno nahiin nalek-leko' hit mansian ii hit nekak mese'-mese'. Ma In es anfee In Ismana Knino' neu sin amsa', namnees on le' In nfee nlali Ye neu kit. Nok lanan nane, hit tahiin tak Uisneno ansium sin imsa'.c 9 Uisneno ka npiil fa humaf, sin ai' hit. Ma In ka nbatis fa sin na'ko kit. Natuin In naknino' sin neek eun, fun sin npalsain nalail neu Usif Yesus amsa', namnees on le' In naknino' nain hit nekak.
10-11 On nane te on mee? Kaul Uisneno nsium nalail sin, nasaa' am es hit he tasaeb attenin sin 'baut ma'fena' teik halat mahelit nane? Te kahaf, kaul hit ta'uab namneo-namneo, hit tok hit bei' ma hit nai' sin, ka tloi tabei' fa hit atolan lais palsait eun ok-oke'! On nane te hit kaisa' ta'seke' sin on le' nane! Au he utaan on ii: Uisneno nsoi nafetin kit, natuin hit tatuin atolan lais palsait eun, ai' kahaf? Kahaf, ai'! In nsoi nafetin kit, natuin Usif Yesus anneek ma nkasian kit. Es nane te, kais amnikan! Uisneno nneek ma nkasian atoni 'teta' amsa' on le' nane.”
12 Anneen on nane te, ka tiit fa es antein le' he na'uab nabliu in ne'ob ma in tenab.
Nalalit na' Paulus ma na' Barnabas nanu'un nafani', anmoe' on meem es na' Uisneno anpaek sin. Sin nanu'un lais sanmaakt eun le' Uisneno anmo'e nlail sin anbi atoni bian le' ka atoin Yahudis fa'. 13 Nanu'un nalalin on nane te, tuaf es, kanan na' Yakobus, anfeen anhaek, ma na'uab ma nak, “Au aok-bian aal ki! Hi mneen kau fe'! 14 Hit tata' na' Petrusd fe' nanu'un nalail kit ma nak, Uisneno nait nalail atoni 'teta' le' ka atoin Yahudis sin fa, he ntaam anlalin Usif Yesus In nonot apalsait eun. 15 On nanet lasi nane, namnees nok saa' le' Uisneno In mafefa knino sin an'eut nani ye anbi afi ahunut. Sin antui nani ye ma nak:
16 ‘Na'euk nok in tabu ntia te, Au of a'fain 'oum.
Natuin Au he uhakeb ufani' usif na' Daut in iplenat.
Fun in sufan-kau'n eun le' namle'un nlalin nane,
Au of ufena' ufani' sin, ma 'ha'taen sin.
17-18 Nok 'mo'et nane, too na'ko pah a'teta' amsa', neem namin he na'euk nok Kau.
Natuin Au 'piil 'aan sin he nlalin Au Inin.
Fun Uisneno na'uab nalail on nane na'ko afi unu'!’e
19-20 On nane anbi au teenb aa te, on ii: kaul tuaf a'teta' na'ko uuf bian le' anlomin he natuin Uisneno, hit atoin Yahudis kais tasusab sin. Hit kais taloiba' sin ma'fena' ntein nok he tleun sin he natuin hit halat mahelit. On nane hit lo he ttui taan suult es ma tfee ye neu sin tak, sin kaisa' natuin hit halat ma atolan Yahudi sin ok-oke'. Hit tamnauba' sin imsa' tak, sin kais anmanpaisa' ma nasna'on kaul ka fee ma mone fa'. Sin kais anbukaen amnaha' 'tulu'. Sin kais anbukaen naa' na'ko mu'it. Ma sin kaisa' nekun sisi na'ko mu'it le' tuaf anfutu we ma nkale' nisan, tal in naa' ee ka nsai npoi fa'.f 21 On nane kaul hit ttao atolan paap mese' on le' ii te, ka lais feu' fa ntein. Natuin too mfaun eun nahinen nlalin nak, atoin Yahudis hit halat ma atolan lo on le' nane. Fun atolan sin nane na'ko nai' Musa, hit tsoi' sin ok-oke' anbi uim onen, ansuun neno snasat et bale mee-mee. On nane atoni 'teta' amfaun eun nahinen nlalin.
Au uab ii antuu' on le' nane, pah!”
Sulat neu apalsait eun le' ka atoin Yahudis fa
22 Nalalit Uisneno In haef eun nok atoni mnasi' bian anma'akool eun he anleek tuaf he nnao n'etun sin lais fekat nane neu nonot apalsait anbi mee-mee. Ma sin namin tuaf-tuaf le' nonot apalsait eun antola' sin, le' namnees nok mepu nane. Nalalit sin anpiil naan tuaf nua'. Es kanan na' Silas; es antein kanan na' Yudas (le' sin nteek nani ye nak, na' Barsabas). Nalalit sin nleun sin nua sin nnaon nabu-buan nok na' Paulus ma na' Barnabas. 23 Sin neik sulat he nfee ye neu apalsait eun le' ka atoin Yahudis fa abiit eun koot Antiokia et propinsi Siria, anfini ntein tal antia propinsi Kilikia. Sulat nane, in nesan nak on ii:
“Tabe ma haan se'ot na'ko kai, Usif Yesus In haef eun, ma atoni mnasi' bian antein abiit eun koot Yerusalem. Hai mtui sulat le' ii meu ki, natuin hai mneek maan ki, nahuum on le' hai oli' ma hai tata' sin.
24 Hai mtui sulat le' ii, natuin hai mneen ate nak, anmui' tuaf-tuaf na'ko Yerusalem ii, le' neitin ma na'euk nok ki nbi nane. Sin nanoina' ki laf-lafu', tal antia nasusab ma ntakmanab ki. Maut he hi mihiin mak, hai ka mleek miit fa tuaf eun le' nane. 25 Tabu hai mneen mak anmui' tuaf le' nasusab ki on le' nane, hai mibua mbi ii, ma hai mtai lasi nane. On nane te hai m'akool milail, ma mifeek milail lasi nane. Tabu ii, hai mpiil tuaf-tuaf he neman ma n'eut ki hai lais fekat nane. Sin neem nabuan nok na' Barnabas ma na' Paulus, le' hai mneek sin. 26 Tuaf nua' eun le' nane ansutain ha'mu'it, tal antia ala kle'o te sin nmaten. Sin napenin ha'mu'it on le' nane, fun sin natuin Usif Yesus, Tuaf le' Uisneno npiil nani Ye na'ko unu'. 27 On nane te hai mleek na' Yudas ma na' Silas, maut he sin es le' an'eut ki sulat le' ii in nesan.
28 Uisneno In Ismana Knino' an'eut nalail kai, ma hai mloim mituin on nane msa' nak, hi kaisa' mituin hai halat Yahudi ok-oke', on le' halat mahelit nane. Natuin halat huma' le' nane, anha'fenab hi tau'm eun nane luman ma sona'. Mes anmui' lasi bian le' so' he hi mimnau sin:
29 Kais ammanpaisa' ma misnao' kaul ka fee ma mone fa'.
Kaisa' meuk sisi-'tulu'.
Kaisa' miah naa'.
Ma kaisa' meuk sisi na'ko mu'it le' anfuut niis on.
Kaul hi mibei' mpanat hi ta'um eun na'kon lasin nane, hi ka meik fa ha'nisit meu hi aom-bian nonot apalsait atoin Yahudis Kristen sin. Nok lasi nane te, hi mibei' mibua leko mok sin. Hai sulat le' ii, antuu' on le' nane, pah.”
30 Sin nsimo nlail sulat nane te, na' Paulus sin naseon eun, ma nnaon nfinin neun koot Antiokia. Antian bale nane te, sin nboin nabuab nonot apalsait eun, ma nfeen sin sulat nane. 31 Tabu sin nsoi' nalail sulat nane, sin aal sin anmalinan nmaten, natuin sulat nane in neesn ee nha'taen sin neek eun.
32 Uisneno npaek na' Yudas ma na' Silas amsa', anlalin In mafefa knino'. Sin nua sin nanu'un ale' lais nu'un amfaun neu nonot apalsait eun anbi koot nane. Sin nfaineek ma namepan nonot apalsait eun sin neek eun. 33 Sin nua sin natuan a'loo anbin bale nane, nalalit nonot apalsait eun abiit eun Antiokia naseon sin he nfanin neun Yerusalem neu nonot apalsait le' anleek sin ma neman. Sin nasain sin nok neek malinat. 34 [Mes na' Silas natniin ate, leko kaul in natua nabalah anbi Antiokia.]g
35 Na' Paulus ma na' Barnabas natuan suuk a'loo anbin bale nane. Sin antulun ma nbaab sin aok-bian amsa' le' nanoina' Usif Yesus In Laan A'honis.
Na' Paulus ma na' Barnabas anbaits ok
36 Tabu na' Paulus ma na' Barnabas natuan suuk a'loo nbin Antiokia, na' Paulus nak neu na' Barnabas am nak, “Bae'! Oum he hit tfain teu balen le' nahunut hit ttaam teis tok sin. Hit tnao he tkius tiit hit aok-bian sin i'moink eun. Ka tahiin he sin on mee. Fun tuaf eun le' nane, fe' anpalsain neun Usif Yesus ka 'loo fa fe'. Neno wes naa, hit tanoina' sin. On nane te oum he hit tnao tkius tiit sin.” 37 Anneen na' Paulus na'uab on nane te, na' Barnabas anloim natuin.
Na' Barnabas anloim he na' Yohanis nok sin. (Fe'-fe' ate sin nteek na' Yohanis ii nak, na' Markus amsa'). 38 Mes na' Paulus anpeen. Natuin neno wes naa, tabu sin nbi propinsi Pamfilia te, na' Markus annao nasaitan sin.h 39 Na' Paulus nok na' Barnabas nasulin a'naek, tal antia sin nua sin anbaits ok. On nane te na' Barnabas neik na' Markus, sin nua sin ansaen abnao oe ma nnaon antian pah Siprus.
40 Mes na' Paulus, in nok na' Silas. Tabu sin he nnaon, nonot apalsait eun abiit eun Antiokia an'oen eun antoit Uisneno he npanat sin, ma Uisneno naklila' In nekan alekot neu sin amsa'. An'oen eun nalalin ate, sin nua sin annaon. 41 Nalalit sin nnaon neun propinsi Siria ma propinsi Kilikia anfuun ma nateef. Anbi bale mee-mee, sin anha'taen nonot apalsait eun sin neek enu.