Na' Paulus ma na' Barnabas anbin koot Ikonium
14
Tabu na' Paulus nok na' Barnabas antian koot Ikonium, sin antaman anbin atoin Yahudis sin uim onen. Anbi nane, sin na'uab eun lasi namfaun anmatoom nok Uisneno In Lais Leko, tal antia atoni Yahudis ma atoni 'teta' anpalsai neun Usif Yesus. 2 Mes anbi nane, anmui' atoin Yahudis bian le' annaa' namep-mepan sin halat ma atolan, ma sin ka nlomin fa he nsium na' Paulus sin uab eun. Sin es le' anhuita' atoni bian namfaun he nato'an niis nonot apalsait eun neu Usif Yesus. 3 Mes na' Paulus sin ka namtaun fa'. Sin an'etun piut-piut Usif Yesus In Lais Leko neu sekaum-sekau waah. Sin an'etun ma nak, Usif Yesus In nekan nane nasoitn On neu sekaum-sekau waah. In anfee kuasat he sin nabei' anmo'en lasi mkakat huma'-huma' amsa', he too mfaun eun nahinen am nak, Uisneno npaek sin.Tabu nane, na' Paulus sin natuan a'loo nbi koot nane. 4 Nalalit abiit eun koot nane anbaits ok pukan nua'. Puukn es natuin atoni Yahudis le' fe' annaa' namepan sin halat ma atolan, ma puukn es antein anpeis Usif Yesus In haef eun. Pukan nua' eun le' nane, anmatoen es nok es.
5 Ma atoni Yahudis bian le' fe' annaa' namepan sin halat ma atolan sin nabuan ma namin lanan nok atoni bian ma nok sin a'naakt eun, he nasusab Usif Yesus In haef eun. Sin he npoil na' Paulus sin neikin fatu. 6 Mes tuaf bian an'etun na' Paulus sin im nak, anmui' atoni' puukn es, le' nateenb eun amle'ut neu sin. On nane te sin naenan ma na'tool eun anbin propinsi Likonia, anbin koot Listra, ma koot Derbe, ma kuan-kuan anfuun am nateef anbi nane. 7 Anbin balen le' nane, sin anmulai n'eut Usif Yesus In Lais Leko.
Na' Paulus sin anbin koot Listra ma koot Derbe
8 Antian koot Listra on nane te, na' Paulus nok na' Barnabas na'euk nok atoni yes. In haen eun an'oel nanin tabu in einf aa nahonis. 9 Atoni' nane antook ma anneen na' Paulus in uaban. Nalalit na' Paulus annuu' na'tesan ma natenab ma nak, “Atoni' ii in palsait, lo of naleko' in ta'un!” 10 On nane te na' Paulus anhaman atoni' nane ma nak, “Bae'! Amfeen amhaek nai!” Anneen on nane te, in n'ookl on anfeen anhaek ma annao nain.
11 Tabu sin niit na' Paulus anmoe' lasi nane te, sin ansanmakan. On nane te sin na'uab eun neik sin uab Likonia ma nak, “Hi mneen fe'! Atoin nua' eun le' ii, uis pah. Sin neman na'ko neno tunan ma nabain ok on le' mansian!” 12 Sin na'uab eun on nane, natuin sin natenab ma nak na' Barnabas nane, paap mese' on le' sin uis pah es, in kanan na' Seus. Ma na' Paulus, atoin a'uab' nane, sin nak ai' namnees nok uis pah es, in kanan na' Hermes.a 13 Anbi koot nane in kotin, anmui' ume 'tulu' es neu sin uis pah na' Seus. Sin niit na' Paulus sin on nane te, a'tuul eun na'ko Seus nekin fobona' namfaun ma nheel neik biye keso 'naek fauk, he sin na'tulu' sin neu na' Paulus sin. On nane te too mfaun eun nane annaon natuin a'tuul' eun nane he na'tulu' neu Usif Yesus In haef eun.
14 Mes tabu sin nahinen nak atoni mfaun eun nane he na'tulu' neu sin, na' Paulus nok na' Barnabas anpenan sin. Nalalit sin naenan neu too mfaun nane sin maatk eun, ma sin npius naleu' sin paken. Nane anfani 'taka' nak, sin ka nlomin fa saa' le' too mfaun eun anmo'en nane. Nalalit sin nua sin anhuun eun ma nak, 15 “Ailoo! Nasaa' am es hi mmoe' lasi ii? Kaisa' hi miteenb am mak hai le' ii uis pah kai. Hai le' ii, mansian ahaa msa' on le' hi'. Hai eim meu bale ii, he m'eut ki lais leko wes. Hi lo he maikoit ale' hi uis pah eun nane le' ka ma'uup eun fa'. Hi lo he mituin Uisneno 'Honis amneot. Natuin In es le' anmoe' neno tnanan ma pah-pinan, nok in nesan ok-oke'.b 16 Un-unu te, ale' uuf ma pah anmonin natuin sin i'loimk eun mese'-mese'. Uisneno anpalakab sin on nane msa'. 17 Mes Uisneno ka nnikan fa he nfeen sin i'taka' huma'-huma', he sin nahinen am nak, Uisneno le' nane, Alekot kuun. In es le' nasanut ulan neem neu kit ok-oke'. In es le' anfee pena' ma ane neu kit. In es le' anhao ma nfait kit, ma anhalineb hit nekak.”
18 Meski na' Paulus ma na' Barnabas antaal sin he kaisa' anmo'en on le' nane, mes atoin eun nane naseesb ok he neikn aa 'tulu' he nfee sin neu sin.
19 Tabu nane, anmui' atoin Yahudis fauk le' neman na'kon koot Antiokia ma koot Ikonium, sin neman neu koot Listra. Sin anhuita' too mfaun eun he nlaban Usif Yesus In haef eun. On nane sin naitin fatu ma npoil na' Paulus. Sin nak ai' na' Paulus anmaet nalali yeen. On nane sin nheel anfonat na' Paulus he npolin neu koot nane in kotin.
20 Mes tabu nonot apalsait neu Usif Yesus sin anhaek ma nfuun naan na' Paulus on nane te, in infeen. Nalalit in ntaam anfain neu koot nane. Nookf aa on nane te, in nok na' Barnabas annaon nfinin neu koot es antein, kanan Derbe.
Na' Paulus ma na' Barnabas anfanin ntenin neu koot Antiokia abiit propinsi Siria
21 Na' Paulus ma na' Barnabas an'eut Usif Yesus In Lais Leko nbi koot Derbe msa'. Nalalit too mfaun eun anpalsain neu Usif Yesus. Okat sin nua sin nfanin ntenin neun koot Listra. Na'ko bale nane, sin nfanin neun koot Ikonium. Na'ko nane, sin nnaon nfinin neun Antiokia abiit propinsi Pisidia. 22 Anbi bale nane, sin na'uab eun nok atoni le' natuina' Usif Yesus he nha'taen sin neek eun. Sin namnauba' sin ma nak, “Au aok-bian aal ki! Kaul hit ttaam atlail Uisneno Inin kit, kais mitenab mak hit of ka neu tapein fa susal ma ha'mu'it antein. Natuin meski on mee msa', hit lo mees he tapein ha'mu'it. Mes hit lo he talan, he tatuin Usif Yesus piut.” Sin nua sin nanoina' lasi nane neun atuina' Usif Yesus anbin koot nane.
23 Nalalit na' Paulus ma na' Barnabas namin tuaf he nait sin anlalin a'nakatc neu too slani' pukan mese'-mese'. Ma sin an'oen eun ma nanaah ok he nahiin Uisneno In i'lomin. On nane sin antao sin i'niimk eun ma n'oen eun, he nait tuaf le' Uisneno anluul sin he nlalin a'nakat neu apalsait eun.
24 Nalalit na' Paulus ma na' Barnabas sin annaon nasaitan propinsi Pisidia, he nnaon neu propinsi Pamfilia. 25 Sin antian koot es, kanan Perga. Anbi nane, sin an'eut Usif Yesus In Lais Leko. Nalalit sin nnao nfinin. Ka 'loo fa te, sin antian koot Atalia. 26 Na'ko bale nane, sin ansaen abnao oe ma nfanin neun koot Antiokia abiit propinsi Siria. Neno wes, nonot apalsait neu Usif Yesus abiit eun koot Antiokia es anleek sin, ma nana'at sin neu Uisneno In i'niman, he In anpanat ma ntuntauk sin. On nane tabu ii, na' Paulus sin anfanin, he n'eut neu nonot apalsait abiit eun Antiokia mnak, sin nasopu nlail sin mepun nane.
27 Antian Antiokia on nane te, Na' Paulus sin nabuan nok Usif Yesus In apalsait eun abiit eun nane. Ma sin an'eut ale' kanan lasi le' Uisneno nmo'e nlail sin neu sin. Nak, Uisneno nfei nalail lanan neu atoni 'teta' le' ka atoni Yahudis fa, he sin anpalsain neun Usif Yesus amsa'. 28 Nalalit na' Paulus ma na' Barnabas natuan suuk a'loo nok nonot apalsait neu Usif Yesus anbin bale nane.