Apalsait eun Antiokia anleek haef eun na' Barnabas nok na' Saulus
13
Anbi koot Antiokia, tuaf namfau anpalsain nalalin neu Usif Yesus. Anmui' tuaf-tuaf le' Uisneno anpaek sin he anlalin In mafefa knino'. Ma bian antein In npaek sin he nanoina' too slani'. Sin es eun le':na' Barnabas,
na' Simeon, (sin biasa anteek nani ye nak, ‘na' Metan’),a
na' Lukius, na'ko koot Kirene,
na' Menahem, (le' sin npaloli ye na'ko aan'-ana' nok usif Herodes),b
ma nok na' Saulus.
2 Anbi neno wes, sin nanaah ok, ma sin nabuan ma na'besan neu Uisneno. Nalalit Smana Knino' an'eut neu sin ma nak, “Ampiil maan na' Barnabas nok na' Saulus. Fun Au mepu namfau. On nane te sin lo mees he nait mepu le' Au he una'at neu sin.”
3 Tabu sin nanaah nalali yok ma n'oen eun nalalin on nane te, sin ntao sin i'niimk eun neu na' Barnabas ma na' Saulus, he namepan sin. On nane te sin anleek haef eun nua sin, he nanaoba' Uisneno In mepu.
Na' Barnabas ma na' Saulus antian pah Siprus
4-5 Tabu Uisneno In Ismana Knino' naplenat na' Barnabas ma na' Saulus he nua sin annaon n'eut In A'an ma In Iplenat neu bale-bale, sin nnao nahunun neun koot es et tasi ninen, kanan, Seleukia. Na' Yohanis (le' sin anteek aa amsa' ate, na' Markus) nnao nabua nok sin. Antian bale nane te, sin ansaen abnao oe he nnaon neun pah Siprus. Antian Siprus, sin insanun anbin koot mese, kanan, Salamis. Anbin koot nane, sin ntaman anbi atoin Yahudis sin uim onen piut-piut he nanoina' Uisneno In A'an ma In Iplenat neu abiit eun nane.
6-8 Nalalit sin npoi-ntaman na'kon kuan es neu kuan es, tal sin neman antian koot es et pah le' nane in aon-bian, le' anteek ate nak Pafos. Gubernur natua et koot nane. In kanan na' Sergius Paulus. In loen aa na'aik. Tabu in nneen nak na' Barnabas sin neman nalalin et eun koot nane, in anleun tuaf he nboin sin, natuin in nmaliin he nneen fainekat na'ko Uisneno.
Mes anbi nane, anmui' atoin Yahudis es, in kanan na' Bar Yesus (in kanan es antein le' neik uab Yunani te nak, ‘Elimas’). In atoin alaut. In biasa napoiba atoni' ma nak, in inlail Uisneno In mafefa' msa'. In masoba' leok nok gubernur nane. On nane te tabu na' Barnabas sin neman, in ankope' gubernur nane he kais ansium sin. In nsuu' he nakekub gubernur nane, he kais anpalsai neu Na' Yesus.
9 Mes Uisneno In Ismana Knino' nfee kuasat neu na' Saulus (le' sin nteek aa msa' nak na' Paulus). Es nane te, in na'kehen in matan fuan neu alaut nane. Nalalit in na'uab ma nak, 10 “Hoi! Elimas! Ho on le' niut amle'ut! Ho poi le'uf ko! Ho he mubliu tal antia mee? Ho mlaban ale' kanan lais leko. Es nane te, hai mihiin milail, ho mutuin niut amle'ut eun sin a'nakat. Kais ammo'e mtein nai! Kaisa' mu'eka' lanan Uisneno le' amneot kuun! 11 Ho mneen fe'! Uisneno of anhukun ko. Ho of amfool, ma ho of ka miit fa saa'-saa', tal neno fauk anfiin.”
Na' Paulus na'uab nalail on nane te, atoni' nane anfool nain. On nane te in nableo lanan he naim tuaf he nnaa' in i'niman, he ntoup neki.
12 Tabu gubernur nane niit nok in matan fuan, ma nneen nok in luken, noina' na'ko na' Barnabas sin anmatoom nok Na' Yesus, in ansanmaak, nalalit in anpalsai neu Usif Yesus.
Sin neik Lais Leko neu koot Antiokia es antein, anbi propinsi Pisidia
13 Na' Paulus sin ansaen abnao oe na'kon koot Pafos anbi pah Siprus, he nnaon neu koot es et propinsi Pamfilia, le' nteek ate nak Perga. Antian bale nane te, sin ansanun na'ko bnao oe, nalalit na' Yohanis Markus anbaits on nok sin he in anfain-koit neu Yerusalem. 14 Na'kon Perga, sin nnaon laan meto' neu koot Antiokia abiit propinsi Pisidia.
Sin antian koot nane. Nalalit, na'euk nok atoni Yahudis sin neno snasat, sin nokan an'oen eun anbin atoni Yahudis sin uim onen. 15 Tabu nane, sin nso'in na'ko nai' Musa in sulat, ma na'ko Uisneno In mafefa knino' bian sin suult eun. Nalalit a'naak uim onen sin antoit na' Paulus sin ma nak, “Sin ama' aal ki! Kaul hi mmui' uab saa' neu kai te, hai mtoit he mi'uab meu kai, he mha'taen hai neekm eun.”
Na' Paulus anmulai na'uab nok atoin Yahudis anbi Antiokia
16 Nalalit na' Paulus anhake nbi sin maatk eun. In nait in i'niman ma ntoit sin he nta'an. Oka te in na'uab ma nak, “Au aok-bian aal ki, too Isra'el! Ma au eina' ma au ama' sin le' amtaam meu lais palsait Yahudi, natuin hi neekm eun nane namnau niis too Israelas sin Uisneno. Au 'toit ki he mpasan hi luikm eun ma mneen kau!
17 Uisneno npiil ma nbeit nalail hit bei' ma hit nai' too Isra'el na'ko afi unu'. Tabu sin annaon natuan anbin pah Masir, le' ka sin pah aa fa, Uisneno anfeen sin tetus ma ao-mina', tal antia sin nasuufn am naka'un. Nalalit Uisneno neki In kuasat ma neik sin anpoin na'ko pah Masir.c 18 Oka te sin nnaon na'kon bale es neun bale bian, tal antia toon bo' haa'. Meski sin na'naak-fatun, mes Uisneno natuuk sin nok neek a'none'.d 19 Nalalit Uisneno nnoes naneuk nain too pah hiut anbi pah Kana'an. On nane te In anbati afu pah nane neu hit bei' ma hit nai' sin, he nfain sin auf pusaak.e 20 Sin nmonin on nane, tal antia toon natun haa' mbo' niim (450).
Nalalit Uisneno naiti ma nfeen sin afeek lasi tuaf amfaun, he na'naak sin, tal antia Uisneno nbeti ma nfeen sin In mafefa knino' wes, in kanan nai' Samuel.f 21 Tabu nai' Samuel anfain on Uisneno In mafefa knino', hit bei' ma hit nai' sin anlomin he nmui' kukun usif. Es nane te, Uisneno nbeti ma nfeen sin na' Kisi in anah, es le' na' Saul, na'ko uuf na' Benjamin. Na' Saul anlail usif ma naplenat tal toon bo' haa'.g 22 Nalalit Uisneno nasanut. Ma In nait na' Isai in aanh es, in kanan na' Daut, he nfain uis feu', anseka' na' Saul. Uisneno nahiin nalek-leko' na' Daut in nekan, es nane te, In na'uab ma nak, ‘Na' Isai in anah na' Daut le' ii, in neekn aa he nuu namnees nok Au nekak. In of anmoe' natuin ale' Au loimk eun oke'.’h 23 Tabu nane, Uisneno nba'an nak In of anfee tuaf es na'ko na' Daut in sufan-ka'un, he nsoi nafetin too Isra'el na'ko sin sanat ma sin penu sin. Au he 'eut ki 'ak, na' Daut in sufan le' Uisneno nba'an nani le' nane, es le' Na' Yesus.”
Na' Paulus na'uab nak Usif Yesus nane, Tuaf le' Uisneno nba'an he anleek Ee neem
24 Na' Paulus antalu ntein in uaban ma nak, “Tabu Usif Yesus fe' ka nait fa In mepu, tuaf es, in kanan na' Yohanis, annao ma n'eut neu too Israelas sin, nak sin lo mees he na'pisan na'ko sin sanat ma sin penu sin, nalalit sin lo he naslanin he nfani 'taka' nak, sin naleko nfanin nok Uisneno.i 25 Tabu na' Yohanis in mepu he nuu namsoup, in n'eut ma nak, ‘Hi kais mitenab mak, au le' ii Tuaf le' Uisneno anba'an he nleek Aa neem. Mimnau milek-leko'! Hi lo mees he mpao Tuaf es, le' of In he neem. In ma'tane' nneis na'ko kau, tal antia au ka maso'ik kau fa, meski bait au 'fani yaa In ana' lenu', fun au ka umnees fa 'okan.’j k
26 Au aok-bian aal ki! Hi le' nai' Abraham in sufan, ma tuaf bian le' hi neekm eun namnau Uisneno. Amneen kau fe'! Uisneno n'eut lasi le' ii neu kit, he hit tahiin In Laan A'honis. In nsoi nafetin kit ma nsaok nain hit sanat sin. 27 Na'ko afi unu', Uisneno npaek In mafefa knino' sin, he ntui ma n'etun lasi anmatoom nok Tuaf le' Uisneno nba'an he anleek Ee neem. On nane te hit a'naak lais palsait Yahudi sin a'naakt eun, nok atoni bian antein abiit eun Yerusalem, ansoi' nafan-fani' tuis eun na'ko mafefa knino' sin. Anbi neno snasat, sin antaman neun uim onen, he sin nso'in anmatoom nok Tuaf le' nane nbi Uisneno In Sula Knino'.
Mes sin ka nahinen fa nak Tuaf le' Uisneno nba'an he nleek Ee neem nane, es le' Na' Yesus. Nalalit sin namin lanan he nhukun na'maet Ye. Mes lasi nane, nanokab manba'an le' Uisneno In mafefa knino' sin antui nain sin. 28 Sin nmo'e lasi huma'-huma' neu Na' Yesus he nakleo namofu, mes sin ka niit fa In sanat saa'-saa'. Meski on nane, sin nnaon neu gubernur Pilatus ma ntotin he nlool na'maet Ye.l 29 Gubernur nane anloim natuin sin. On nane te sin ankuus nakfili' Na' Yesus anbi hau nehe, tal In anmaet. Mes ale' lasi nane, ka nasuil fa nok ale' saa' le' mafefa knino' sin antui nani. Nalalit sin nasanut In aon na'ko hau nehe in tunan, sin nasnaat neki ma natao We nbi noup fatu.m 30 Mes Uisneno neki In kuasat, ma namonib nafani' Na' Yesus na'ko In i'maten.
31 Tabu Na' Yesus anmoni nfain, In nakliil On hae'-hae' neu tuaf amfaun. Sin es le' neem nabu-buan nok Ne na'ko propinsi Galilea neun Yerusalem. Ma tabu ii, sin es le' an'etu ma nsaksii neu too Israelas sin ok-oke'.”n
Na' Paulus an'etu mnak Uisneno npake nlail In mafefa knino' sin he n'eut nanin anmatoom nok Usif Yesus
32-33 Na' Paulus antalu in uaban nane ma nak, “On ii! Hai nua kai le' ii, au 'ok na' Barnabas, eim mi'ko laan a'loo he m'eut ki mak, saa' le' Uisneno nba'an neu hit bei' ma hit nai' sin, tabu le' ii, nanookb on een. Uisneno namonib nafani' Na' Yesus na'ko In i'maten. Anbi Sulat Pules-Bo'is bata' nua, Uisneno neki tuaf he ntui lasi le' anmatoom nok Na' Yesus, le' Uisneno anba'an he anleek Ee neem. In ntui ma nak,
‘Ho le' ii, Au Aanh aa ko.
Neno ii, Au 'ait Ko mfain anaa' aplenat.’o
34 Na'ko un-unun Uisneno nba'an nalali yeen nak, In of namonib nafani' Tuaf le' In nba'an he anleek Ee neem nane, ma Tuaf nane of ka nmate ntein fa'. Es nane te, Uisneno npaek In mafefa knino' he ntui ma nak,
‘Nahunut, Au uhakeb 'ain lais manba'an 'ok usif na' Daut, he 'fee tetus-athoen neu ne.
On nane te tabu le' ii, Au he uhakeb a'tein lais manba'an 'ok ko, natuin na' Daut in sufan-ka'un es le' ho.’p
35 Anmu'i nteni Sulat Pules-Bo'is bian le' antui ma nak,
‘Uisneno ka npalakab fa Ho Tuaf Amneot In aon-ta'un,
he npunu nbi In nopu.’q
36-37 Amneot ee, on ii: Sulat Pules-Bo'is le' ii, ka nluul fa neu na' Daut kuun! Hit tahiin on nane, natuin usif na' Daut anmoe' nalail lais leko mfaun neu in too, nalalit in inmaet. Ma sin nsuub in aon-ta'un nane. In aon nane, anpunu nlail. On nane te hit tahiin tak Sulat Pules-Bo'is nane ka nluul fa neu na' Daut, mes anluul atoni bian. Kaul Atoni' le' anlulu nane nmaet, Uisneno namonib nafani In. Es nane te, In aon-ta'un nane, of ka npuun niit fa'.
38-39 On nane te au aok-bian aal ki, amneen milek-leko'! Atoni' nane, es le' Na' Yesus! Kaul hit itpalsai teu Ne, In of nasaah ale' sanat, le' in amneon ee hit es le' he tasaah kuuk sin. Nok lanan nane te, Uisneno annoes nain ale' hit saant eun ok-oke'. Mes hit tahiin talali msa', tak meski hit tmoe' tatuin nai' Musa in halat ma atolan sin ok-oke' on nane msa', ka neu he namneoba' kit fa nbi Uisneno In human ma In matan. 40-41 Etun hi lo mees he mitenab milek-leko'. Kais-kaisa' saa' le' Uisneno In mafefa knino' sin an'eut nani et afi unu' nane, antoom anfain neu ki. Sin antuin ma nak,
‘Ampaant om, ale' atoni a'siu' sin, le' ka nfiloil fa es am es!
Fun Au, Uisneno, a'moe' lasi mkakat huma'-huma' le' namkakab tuaf namfau;
mes hi of amsimo in seun-banin, he hi mmate mfiin.
Au 'moe' lasi yes, tabu hi fe' ammoin,
mes hi ka mloim fa he msimo.
Meski atoni' nanoina' ki,
mes hi ka mloim fa he mihiin lasi nane.
Leko nneis, hi mitenab mifan-fani' lasi nane, he hi msanmaak amsa'.’r
On nane te au aok-bian aal ki. Mitenab milek-leko' saa' le' au 'eut ki le' lelon. Kais ampolin main saa' le' hi mneen milali le' lelon, on le' tuaf-tuaf a'siu' sin i'moe'k eun. Au uab eun na'tuu' ma na'paal on le' nane. Makasi, pah.”
42 Na'uab nalail on nane te, na' Paulus ma na' Barnabas anfeen anhaken he nnaon nasaitan uim onen nane. Mes abiit eun nane antotin, he leko te, sin nfain neman anbi neno snasat amnemat, he naknutu nteni saa' le' sin na'uab nalali ye le' lelon. 43 Tabu sin anpoin na'ko uim onen nane, anmui' tuaf namfaun anbin bale nane, le' annaon natuin na' Paulus ma na' Barnabas. Ma sin nua sin anfaineek sin ma nak, “Hit tahiin tak Uisneno In nekan leokn aa kah een neu kit. Es nane te, hi lo mees he mnaa' mimepan Uisneno In manekan nane.”
Atoni Yahudis sin a'naet eun ka nsium fa na' Paulus sin
44 Na'euk nok atoin Yahudis sin neno snasat amnemat, ala kle'o te abiit eun koot nane anpoin ok-oke' he annenan Uisneno In A'an ma In Iplenat. 45 Mes tabu atoin Yahudis sin a'naet eun niit too mfaun eun neman he nneen na' Paulus sin uabk eun, sin neek eun namenan. Nalalit tabu na' Paulus na'uab, sin anlaban maat folo waah, ma sin na'uab eun he namouf sin.
46 Mes na' Paulus sin ka nteet ok fa, ma sin na'uab eun maat-maat. Sin na'uab eun ma nak, “Namneo'! Uisneno anfei lanan nahuun neu hit atoni Yahudis, ma nfee kit Lais Leko. Ma 'teeb lo he on le' nane! Mes hi ka msimo we fa'. Es nane te, hi ka maso'ik fa he mmoin piut mok Uisneno. On nane te tabu le' ii, hai he meik Lais Leko nane meu uuf ma pah a'teta' antein, natuin hi mpenan mani ye. 47 Fun Uisneno anleek haef eun kai, paap mese' on le' nai' Yesaya antui nani ye ma nak,
‘Au 'ait ki paap mese' on le' paku le' antana' neu atoni 'teta' ntein, le' ka atoin Yahudis fa,
he hi mtana' lanan le' neem neu Kau,
he Au 'soi ufetin sin na'ko sin sanat.
Nalalit hi lo mees he milulu' lanan nane msa', anbi pah-pinan anfuun am nateef.”’s
48 Tabu atoni 'teta' sin anneen on nane te, sin nmaliin anmaten. Ma sin bo'is Uisneno ma nak, “Hai mbo'is Uisneno! Uisneno In Lais Leko nane, leokn aa kah een!” Anbi nane, anmui' tuaf-tuaf le' Uisneno nafeek nalail et afi unu', he sin anmonin nabal-balan nok Uisneno. Ma sin ok-oke' anpalsain neu Usif Yesus.
49 Uisneno In A'an ma In Iplenat nasiitb on, na'ko tuaf neu tuaf anbi pah nane anfuun am nateef.
50 Anbi koot nane, anmui' atoin makana', bifee ma atoni'. Bian sin anneek ma namnau Uisneno. Mes atoin Yahudis sin a'naet eun neman ma ntaon sin uab, tal antia atoin makaan eun nane nliu' napoitan na' Paulus nok na' Barnabas na'ko sin pah nane. 51 Tabu sin npoin na'kon koot nane, sin nua sin nait naan 'moe't es natuin halat. 'Mo'et nane es le' antekal askuku' na'ko sin haek eun, anlali 'takaf mese' nak, abiit eun koot nane ka nlomin fa he natniin Uisneno In Lais Leko le' sin nua sin an'etu we nane. Nalalit sin nnaon nasaitan koot nane, ma sin nnaon neu koot es antein, in kanan Ikonium.t
52 Mes apalsait eun neu Usif Yesus abiit eun Antiokia, sin neek eun anmalinan, natuin Uisneno In Ismana Knino' neiki 'be'if ma matani neu sin neek eun.