Na' Yakobus in i'maten, ma na' Petrus antaam neu uim o'of
12
Tabu nane, usif na' Herodesa anmulai nha'mui' Usif Yesus In apalsait eun bian. 2 In naplenat tuaf he nlool na'maet na' Yakobus anpaek suni'. Na' Yakobus nane, na' Yohanis in tataf. 3 Tabu na' Herodes nahiin nak na' Yakobus in i'maten anhalineb a'naet Yahudi sin neek eun, in nmo'e nneis na'ko nane. On nane te na'euk nok neno 'naek le' sin nteek nani ye nak, Fesat Utunu' le' ka Maseol Laul Haef fa,b in naplenat tuaf he nnaon nheek naan na' Petrus. 4 Anheke nlali on nane te, sin nataam ee nbi uim o'of. Nalalit sin anluul naan solalus pukan haa, he nmaseek eun fai ma manas, he npao ma npanat na' Petrus. Solalus pukan es ate, tuaf haa'. Na' Herodes anloim he nafeek na' Petrus in lasi anbi too mfaun eun sin huumk eun ma sin maatk eun, tabu fesat nane namsoup.c 5 On nane te tabu sin nataam na' Petrus anbi uim o'of, Usif Yesus In apalsait eun an'oen eun piut-piut, antotin he Uisneno npanat ma npao na' Petrus.Uisneno napoitan na' Petrus na'ko uim o'of
6 Nookf aa on nane te, usif na' Herodes he nafeek na' Petrus in lasi nbi too mfaun eun sin huumk eun ma sin maatk eun. Mes fai nane, sin nfuut na' Petrus neik koleen besi nono' nua anbi uim o'of ee nanan. Nalalit in ntuup anbi solalus nua sin atnaank eun. Solalus bian antein anhaken ma npaon anbi eno' in matan.
7 Nok askeken ate, Uisneno In ameput es na'ko sonaf neno tunan neem ma nhake nbi nane. Oka te ke'an nane anmeu'-siin. Nalalit ameput nane anpoo' nafena' na' Petrus ma nak, “Pe'u! Amfeen nai!” Tabu nane msa', koleen besi nane natseif' nani na'ko na' Petrus in i'niman. 8 Nalalit ameput sonaf neno tunan nane anlenu ma nak, “Ampaek ho beet-kone! Ampaek ho 'pein hae eun!” Na' Petrus anpaek nalail on nane te, ameput nane anlenu nteni ye ma nak, “Ampaek ho beet-kone mnaun kotif, ma oum he mutuin kau nai!”
9 On nane te na' Petrus natuin ameput nane anpoi na'kon uim o'of. Mes na' Petrus natenab ma nak, ai' in aal nanai. Te kahaf, nane lo nlali 'teeb. 10 Tabu sin nnaon nasoup bael paot nua maka'tui eun ate, sin antian eon besi. Eno' nane nasoitn on kuun, ma sin anpoi natuin lanan le' he nnao neu koot. Nok askeken, Uisneno In ameput nane annao nasaitan na' Petrus anmes-mees.
11 Tabu ameput nane namneku nlali te, na' na' Petrus nahiin ma natenab ma nak, “Namneo'! Tabu le' ii, au fe' uhiin. Uisneno nfee In ameput neem he nafetin kau na'ko na' Herodes in i'niman. Uisneno nmoe' on le' nane, he atoni Yahudis sin tenab amle'ut le' he nalailb ee neu kau, ka ntoman kau fa'.”
12 Nalalit na' Petrus annao neu eina' Maria in ume. Eina' Maria le' ii, na' Yohanis in einaf. Na' Yohanis nane, in kanan es antein, es le' na' Markus. Anbi nane, anmui' tuaf namfau le' nabuan ma n'oen eun. Sin ntotin he Uisneno ntulun na' Petrus nok in lasi. 13 Neem antia ume nane te, na' Petrus antia ma nboin anbi eno' nane in kotin. On nane te aan feto ameupt es anbi ume nane, in kanan bi Rode, nnao na'meo' he nahiin neu amnemat nane sekau. 14 Anneen na' Petrus in hanan ate, in nahiin nani. In nmaliin anmaet. In naen antaam ma an'eut neu abiit eun nanan ma nak, “Na' Petrus anhaek et mone'!” Natuin malinat a'naek nane, tal antia in innikan nain nak in he nasoitan eno' nane neu na' Petrus.
15 Mes sin nataah ma nak, “Kahaf! Kais mulae' on nane!”
Mes bifee nane anki'un ma nak, “Kahaf! Le' naa, lo na' Petrus in hanan! In anhaek et mone'!”
Mes sin ka npalsain fa'. Sin na'uab eun ma nak, “Oin Uisneno In ameput sonaf neno tunan le' anpanat na' Petrus.”
16 Sin nmatita'-loin lasi nane te, na' Petrus anhaman piut, tal antia sin nasoitan eno' nane. Nasoitan nalali te, sin noo mkakan, natuin in le' nane na' Petrus namneo. 17 Na' Petrus na'aiti' in i'niman, he namne'eb sin. Nalalit in npi'on sin nok lanan meem es Uisneno napoitn aa na'ko uim o'of. On nane te in nleun sin ma nak, “Hi mnao nai he m'eut lasi le' ii meu na' Yakobus ma haef bian sin.” Nalalit na' Petrus anpoi ma nnao neu bale bian antein.
18 Anbi nok-nok ana' te, tabu solaul apaot eun ka niit antein fa na' Petrus, sin antakmanan ma namtaun nmaten, natuin sin ka nahinen fa lais saa' es le' of he nbool neu sin. 19 Tabu usif na' Herodes nahiin lasi nane, in naplenat sin he naim na' Petrus. Mes sin ka na'euk niit fa nokan. On nane te na' Herodes naplenat he npalekas solaul apaot eun. Anpalekas nalail sin on nane te, in nleun he nlool niis sin ok-oke'.
Nalalit na' Herodes annao nasaitan propinsi Yudea, ma natua anbi koot Kaisarea.
Usif Herodes Agripa anmaet
20 Tabu nane, abiit eun koot Tirus ma koot Sidon, sin biasa nsosan amnahat na'ko usif na' Herodes in pah. Mes a'loo-'loo le' ii, usif nane anmamusun nok sin. Nalalit sin nma'akool eun ma namin lanan he nhalan nokan. On nane te sin npiil naan tuaf fauk he na'euk nok usif Herodes. Tabu tuaf mapiil eun nane antian koot Kaisarea, sin nmakhiin eun nok atoni yes, in kanan na' Blastus. In nlail atoin makana' anbi usif in sonaf. Sin anma'akool eun nok na' Blastus, he in nlail afulit ma asoitan lanan neu sin, he sin nabei' na'euk nok usif Herodes.
21 Nalalit usif Herodes anloim he nsium sin, on nane te sin npiil naan tabu wes he na'ekun. Neno nane, sin nmo'en acara 'naek. Usif Herodes anpaek in beet-kone usif, ma antook anbi in a'toko plenat. On nane te in na'uab nok sin. 22 Anneen in hanan on nane te, sin anbo'is usif Herodes nak, “Amneen nai in hanan nane! Ii ka hanaf mansian fa'! Ii pah ii tuan in hanan!” 23 Nok askeken, Uisneno In ameput es neem na'ko neno tunan ma neikin na' Herodes menas huum es, natuin in ansium pules neu in ta'un, tal antia in nasi'u ma na'loba' Uisneno. On nane te kaun kalis sin na'susu' na' Herodes in ta'un, tal antia in maet.
24 Lasi nane ok-oke' anlalin, namaut he Uisneno In Lais Leko anhanua yon piut, ma tuaf-tuaf le' natuin Usif Yesus In Laan A'honis ansaat ok piut.
25 Tabu na' Barnabas ma na' Saulus nua sin annaon ma nfee nalail fitis-babat neu abiit eun Yerusalem, sin nfain kotin neun koot Antiokia. Sin nok atoin muinf es, in kanan na' Yohanis. Sin nteek aa te, na' Markus amsa'.