Na' Petrus namneob on anmatoom nok aslanit neu tuaf le' ka atoin Yahudis fa
11
Na' Petrus fe' ka nfain fa, mes Usif Yesus In haef eun ma apalsait bian abiit eun Yerusalem anneen nalail nak, tuaf le' ka atoin Yahudis fa sin ansimo nlail Usif Yesus In Lais Leko. 2 Tabu na' Petrus anfani ntia Yerusalem on nane te, anmui' apalsait na'ko nonot Yahudi tuaf fauk,a nasaan aa 3 ma nak, “Hoi! Ho mmoe' on mee es le' nane? Ho muhiin hit halat ii yoo, ai' kahaf? Ho lo mbalain he mtaam meu tuaf le' ka atoin Yahudis fa sin ume? Ho mbukae mok sin! Kais on le' nane, natuin sin ka ma'heil eun fa on le' hit halat! Ka nabei' fa he hit tseol tok sin!”4 Nalalit na' Petrus anpi'on sin ale' lasi le' anlalin nlail nane ma nak, 5 “Neno wes, tabu au 'bi koot Yope, au 'onen. Anbi nane, Uisneno naklila' neu kau anbi mnitas. Nak, on le' au 'iit neno antalfei', ma muti' 'naek es anbool, ma nakfili nbi in suusn eun haa sin. Muti' le' nane ansaun neem neu kau. 6 Tabu au 'kiso 'taam 'eu muti' nane te, au 'iit mu'it huma'-huma', es eun le': mui' hae haa', anonok, nok kolo huma'-huma'. Sin aal sin le' nane, mui't eun le' hit takaen sin. 7 Nalalit au 'neen hanaf es anleun kau ma nak, ‘Pe'u! Amfeen nai! Amlool mui't eun nane, mubalab sin ma mbukae nai!’
8 Mes au utaah ma 'ak, ‘Ka nabei' fa, pah! Kais on le' nane, ahoit! Fun au ka 'euk 'iit fa sisi huma'-huma' on le' nane. Hai atoni Yahudis mikaena' ale' mui't eun le' nane!’
9 Mes hanaf le' nane nataah ma nak, ‘Kaul Uisneno nak saa' es aknino' te, ho kais mak nane nalaih!’
10 Au 'kius 'iit muti' nane anbool hae' teun, ma in na'aiti yon neu neno tnanan.
11 Pas tabu nane, atoni' teun neem antian ume nane. Sin neman na'kon Kaisarea he naim kau. 12 Nalalit Uisneno In Ismana Knino' n'eut kau ma nak, ‘Ho msaun he mnao mok atoin eun nane nai. Kaisa' ho nekam anmafeen! Meski sin atoni 'teta', mes kaisa' ho mma'nisin sin, ma mubai sin on le' atoin alahit.’ Nalalit hit aok-bian sin tuaf nee le' nane, nokan amsa' anbin Kaisarea. Anbi nane, hai mtaam meu solalu' nakaf es na'ko pah Roma in ume. 13 In na'uab am nak, neno fauk afinit, in niit Uisneno In ameput sonaf neno tunan, anhake nbi in ume, ma na'uab am nak, ‘Amleun tuaf he nnao neu Yope he nhoen neik naan atoni yes, in kanan na' Simon Petrus. 14 Atoni' nane of an'eut ko mok ho ume nanan, Uisneno In lanan he nsoi nafetin ki, ma annoes nain hi saant eun.’
15 Es nane te, au 'mulai 'eut neu sin Uisneno In Laan A'honis. Nok askeken te, Uisneno In Ismana Knino' neem antaam neu sin ok-oke', on le' neno wes hit atsimo tlali Ye. 16 Tabu au 'iit sin ansium In Ismana Knino' on nane te, au umnau Usif Yesus In uaban ahunut le' nak, ‘Na' Yohanis naslain ki neik oe nmees, mes Uisneno of anmo'e nneis na'ko nane neu ki, es le' In of anfee ki In Ismana Knino'.’b 17 Uisneno neikn On es le' anfee In Ismana Knino' neu atoni' 'teet eun, namnees on le' In nfee Ye neu kit. On nane te hi mloim he au 'laban Uisneno, ai' on mee? On nane au he u'uab 'ak saa' a'tein?”
18 Anneen na' Petrus an'eut namneo on nane te, sin ka nasaan antein ee fa'. Nalalit sin npules ma nbo'is Uisneno nak, “Ainoo! Maneun le'uf! Uisneno nfei lanan he atoni teta' amsa' nabei' nasaitan sin i'monit asanat, he In nnoes nain sin saant eun, ma sin nmonin piut nokan.”
Usif Yesus Inin anbaits ok neun bale-bale. Bian anbi koot Antiokia
19 Neno wes, tabu sin na'mate nlail na' Stefanus, sin nmulai nha'mu'i ma nasusab apalsait eun neu Usif Yesus. Es nane te, sin naen anbaits ok neun bale-bale. Bian naenan neun propinsi Finisia. Bian naenan neu pah Siprus, ma bian antein naen na'loo tal antian koot Antiokia et propinsi Siria. Amnaent eun nane n'eut Usif Yesus In Lais Leko anbin mee-mee msa'. Mes sin an'eut neu yaa sin atoin Yahudis anmesen. Sin ka n'etun fa atoni 'teta'.c
20 Ma anmu'i ntein Uisneno Inin na'ko pah Siprus ma na'ko koot Kirene. Bian sin nnao nfinin neun koot Antiokia anbi propinsi Siria. Anbin bale nane, sin es le' an'eut Usif Yesus In Lais Leko neu tuaf le' ka atoin Yahudis fa'. 21 Uisneno nfeen sin In kuasat, tal antia too mfaun anpalsain neu Usif Yesus.
22-24 Tabu nane, apalsait eun abiit eun Yerusalem annenan nak, atoni bian abiit eun Antiokia npalsai neu Usif Yesus amsa'. On nane te sin anleun haef tuaf es, in kanan na' Barnabas, he nnao nkius sin. Na' Barnabas nane, atoin neek leko, ma npalsai namneo-namneo neu Uisneno. Smana Knino' natuku we msa'.
Tabu in neem antia bale nane, in niit nak, namneo-namneo Uisneno nmeup ma'tane' anbi atoni bian sin i'moink eun. On nane te in nmaliin. Nalalit in nha'tani ntein sin, he sin nabei' nok he natuin piut-piut anbin Uisneno In Laan A'honis. Nok lanan nane, apalsait eun neu Usif Yesus ansaat ok piut na'ko neno nnao neu neno.
25 Nalalit na' Barnabas annao nfiin neu koot Tarsus he naim na' Saulus. 26 Tabu in na'euk nok na' Saulus, in nfuli ye he nfanin nabuan neun Antiokia. Nalalit sin nua sin natua nabalan toon es, nok Usif Yesus Inin le' abiit eun Antiokia. Neno-neno te, sin nanoina' Usif Yesus In Laan A'honis neu too mfaun eun. (Anbi koot Antiokia le' nane, na' atoni' anteek apalsait eun neu Usif Yesus nak ‘atoni Kristen’).d
27 Tabu fe' sin nua sin anbin Antiokia anmui' tuaf fauk neman na'ko Yerusalem. Uisneno biasa npaek atoin eun nane he nlalin In mafefa knino'. 28 Tuaf es na'ko mafeef eun nane, in kanan na' Agabus. Uisneno In Ismana Knino' an'etu ma nak, “Of amnaahs aa ma'tane' antaman pah-pinan fuun am nateef.” On nane te na' Agabus an'etun neu bian antein. (In uaban nane anlail namneo tabu na' Klaudius, usi 'naek kesel Roma, na'naak.)e 29 Anneen na' Agabus in uaban on nane te, Usif Yesus Inin le' abiit eun Antiokia namin lanan ma nabuab eun loit, he nfee sin neu sin aon-bian anbi Usif Yesus, le' nmonin nbi susal anbi propinsi Yudea. Tuaf mese'-mese' anfee natuin in i'be'in. 30 Nabuab nalail on nane te, sin anleun na' Barnabas nok na' Saulus, he sin nua sin annaon nanaat loit eun nane neu a'naak pukan knino' sin anbi bale nane, he nbait sin neu asuust eun.