2-3 Na' Stefanus nataah ma nak, “Sin ama' aal ki! Hi mneen kau fe'. Afi unu' nane, hit nai' Abraham ka npoi nnao fa fe' na'ko in kua mnasi'. Mes Uisneno Apinat-Aklahat nane, nakliil On neu in. Uisneno napleent ee ma nak, ‘Amnao musaitan ho pah, ma ho asal sin. Ho mnao nai, meu pah le' of Au 'luul 'ani ye neu ko!’ Nalalit in npoi na'ko pah Mesopotamia, ma nanani' bale neu koot Haran.^a 4 On nane nai' Abraham annao nasaitan atoni Kasdimas sin pah, ma na'oina' neu koot Haran.

Tabu in aam honi anmaet, Uisneno neki ye ntaam neem neu pah Kana'an, es le' bale le' sin ama' aal kit tatua ye tabu ii.^b 5 Tabu nane, Uisneno ka nboo' ma nbait niit fa afu lakat mese', he nfain nai' Abraham in pusaak. Mes Uisneno nba'an nain, he nfee afu le' ii neu in sufan-ka'un sin he nlail sin auf pusaak. Meski tabu nane, in ka nmui' fa aan honi' mese' msa'.^c

6 Mes Uisneno na'uab neu ne ma nak, ‘Ho sufam-ka'um sin of annao natuan anbin atoni 'teta' sin pah. Ma abiit eun bale nane of anha'mu'i sin ma na'aet sin ka kle'-le'o fa, tal toon natun haa namsoup. 7 On nane toon natun haa namsopu te, Au of a'hukun pah le' nmoe' ho sufam-ka'um anfain on sin ate. On nane te ho sufam-ka'um sin of annao nasaitan bale nane, ma ntaam neman neun bale ii, he n'oen eun ma nasaeb eun makasi neu Kau.’^d

8 Ma tabu In na'uab nalail on nane te, In nfuut lais manba'an neik helit, le' nfani 'taka' nak, nai' Abraham sin anlalin Uisneno In too waah. Es nane te, tabu na' Abraham in anah na' Isak fe' nmoin neno faun, in aamf aa na'heli'. Namuni te, na' Isak na'heli' in anah na' Yakop. Nalalit na' Yakop na'heli' in aan mone bo'es am nua', tabu sin es-es ate fe' anmoin naan neno faun. Sin aal sin es le' anlalin bei' am nai' neu hit atoni Yahudis.^e

9 Anbi neno wes, hit bei' hit nai' sin nato'an sin olif na' Yusuf, nalalit sin na'sosa', ma in nfain ate anbi pah Masir. Mes Uisneno nok na piut.^f 10 Es nane te, Uisneno nafetin na'ko in susal sin ok-oke'. Uisneno nfeen aa lonef ahinet he nahiin lasi namfau, tal antia usif pah Masir anneek nisan, ma nait ye nfain gubernur neu pah Masir anfuun am nateef. Ma in na'naak anbi usif pah Masir in sonaf amsa'.^g

11 Nalalit, tabu amnahas antaman pah Masir ma pah Kana'an. Amnahas nane manenu', tal antia too mfaun eun ansuus anmaten anbin mee-mee. Es anbi tabu nane, hit bei' ma hit nai' sin imsa' ka napenin fa mnahat saa'-saa'.^h 12 Mes nai' Yakop anneen hanaf nak, anmu'i mnahat et pah Masir. Es nane te, in nleun in aanh eun, es le' hit bei' ma hit nai' sin, he nnaon neu pah Masir he nsoosn amnahat.

13 Ansosa nlalin on nane te, sin nfanin. Tabu sin imnaaht eun nane oek eun ate, na' Yakop anleek sin he nfani ntenin ma nsoosn amnahat neun pah Masir. Hae' le' ii, na' Yusuf an'eut in ta'un, nak in es le' na' Yusuf, le' sin olif. Namuni te, na' Yusuf naklila' in asal sin neu usif pah Masir.ⁱ 14 Na' Yusuf antoit he in amaf ma in olif-tataf sin neem natuan anbin pah Masir. Sin amneemt eun neu Masir nane ok-oke' tuaf bo' hitu mniim.^j

15 On nane te na' Yakop na'oina' neu pah Masir, tal antia hit bei' ma hit nai' sin anmaten anbi nane.^k 16 Ma toon annao neu toon ate, sin neik nafani' hit bei' ma hit nai' sin nuif eun neu kuan Sikem et pah Kana'an. Sin nsuub nuif eun nane anbi nopu le' nahunut nai' Abraham ansoos ee na'ko na' Hemor in sufan.”^l

17 Na' Stefanus antalu ntein in uaban ma nak, “Ale' lasi le' ii, anlalin natuin Uisneno anba'an nalail nak, In of anfee auf pusaak neu na' Abraham anbi bale nane. Tabu anhaumaak he Uisneno nanokab In lais manba'an nane te, hit atoin Yahudis sin ansaat ok amfaun ee kah een anbin pah Masir. 18 Tabu nane, anmui' usif feu' es, le' annaa' aplenat anbi pah Masir. In ka nahiin fa na' Yusuf in iletan ma in i'naon.^m 19 Usif nane na'aet hit bei' ma hit nai' sin. In maun ee kah neu hit bei' ma hit nai' sin. In na'seke' sin he npolin nasaitan li'ana kluu'f eun, he sin nmaet kukun.ⁿ

20 Tabu nane, nai' Musa in einaf nahonis. In aon aa kmuulf aah! In amaf ma in einaf ka natniin fa usif in iplenat. Sin npaloil na'tolo' li'ana nane anbi sin ume, tal antia in nmoin naan funan teun.^o 21 Tabu sin ka nabei' na'tolo' naan fa li'ana nane antein, sin npolin. On nane usif pah Masir in aan feto wes, es le' niit li'ana nane. In nait li'ana nane ma npaloli paap mese' on le' in aan honi'.^p 22 Es nane te, atoni' pah Masir nanoina' ale' sin hinet ok-oke' neu na' Musa, ma in nfain atoin ahinet ma amanoet. In nahiin ale' uaba' ma mepu.

23 Tabu in nmoin naan toon bo' haa', na' Musa nnao naim he nahiin kuun in atoin Israelas sin. 24 Tabu in npoi nnao te, in niit atoin Masiras es antuuf atoin Israelas es. In ntulun atoin Israelas nane, ma in nlool niis atoin Masiras nane. 25 Na' Musa natenab nak, oin in aon-bian sin nahinen nak, Uisneno nsonu', he nafetin sin na'ko sin susal. Mes sin fe' ka nahiin fa lasi nane. 26 Nookf aa on nane te, nai' Musa npoi ntein he nnao nkius in atoin Israelas sin. Nalalit in niit atoni' nua nmatufun. Ma in nsuu' he nasnasab sin ma nak, “Hoe! Hi nua ki mma'oil-tatan. Mes nasaa' am es hi nua ki mmatuuf?”

27 Mes atoni' le' antuuf in aon-bian nane antital na'loob nai' Musa ma nak, ‘Sekau es le' nait ko he mfani 'nakaf meu kai? Ma sekau es anluul ko he mfain afeek lasi meu kai? 28 Ho mak oin ho mubei mlool miis kau, on le' afi neon ii ho mlool miis atoni Masiras nane?’ 29 Nai' Musa anneen nalail on nane te, in nfeen naen nasaitan pah Masir. In naen ma natua nbi atoni Midianas sin pah. In mafee nbi nane, ma nahoin li'aan mone nua'.^q

30 Toon bo' haa namsopu te, nai' Musa annao neu bale yes le' ka nmui' fa oe, anhaumaak nok a'tubu wes, le' sin teek aa te nak 'Tubu Sinai. Anbi bale nane, Uisneno In ameput na'ko sonaf neno tunan, neem na'euk nok na' Musa, anbi ai le' anpiin anbi hau aan es. Hau nane anpiin, mes ka npuut fa'. 31 Niit ee on nane te, na' Musa nsanmaak. Ma in nnao npaumaak he nkius niit saa' le' anlail anbi nane. Nok askeken, in nneen Uisneno na'uab na'ko ai nane in nanan ma nak, 32 ‘Au le' ii, ho nai' sin Uisneno; es le' nai' Abraham, nai' Isak, ma nai' Yakop.’ Anneen hanaf nane te, nai' Musa namtau nmaet, tal antia in huumn aa nmouf, ma in ka nbalain fa he nait in matan he nkius ai pina' le' nane.

33 Nalalit Uisneno na'uab antein ma nak, ‘Musa! Ho mhaek et afu knino'. Amnui main ho 'pein hae eun nane! 34 Kaisa' muteenb am mak, Au 'nikan 'ain Au too Israelas sin abiit eun pah Masir. Kahaf! Au fe' umnau sin. Au uhiin sin neek as'unu'. Au 'neen u'lail sin haan sakoit antotin tulun ma babat. Tabu le' ii, Au 'saun ma 'nao he ufetin sin. Oum fe'! Au he 'leun ko amfain meu pah Masir.’^r

35 On nane Uisneno le' nakliil On anbi ai nane, naplenat nai' Musa he nfain neu pah Masir. Uisneno anluul ma anleek ee, he nafetin too Isra'el na'ko neek as'unu'. Nai' Musa ii, es le' afi unu' nataan aa ma nak, ‘Sekau es le' nait ko mfain a'nakat neu kai?’ Tabu le' ii, Uisneno neikn On es le' nait ye!^s 36 Es nane te, nai' Musa nfain-koit neu pah Masir. Anbi nane, in nmoe' lasi mkakat huma'-huma'. Nalalit in napoitan too Israelas sin na'ko pah Masir. In neik sin annaon natuin Tais Mee', ma sin nnao natuin bael sona' tal antia toon bo' haa'.^t

37 Nai' Musa neikn on an'eut neu too Isra'el ma nak, ‘Uisneno of nait naan tuaf es na'ko hi tnaanm eun, he nfain In mafefa knino', namnees on le' In nait kau le' ii.’^u 38 Nai' Musa neik hit bei' ma hit nai' sin anbin bael sona'. In kuun es anfain on nete-lanan neu hit bei' ma hit nai' nok Uisneno In ameput na'ko sonaf neno tunan. Ameput nane, es le' nasanut Uisneno In A'an ma In Iplenat neu nai' Musa, le' an'eut kit laan a'honis amneot. Uisneno In A'an ma In Iplenat nane, es le' nasanut sin anbi 'Tubu Sinai nane.^v

39 Meski on nane msa', hit bei' ma hit nai' sin ka natniin fa nai' Musa. Sin npenan nani, ma sin he nfain kukun neun pah Masir. 40 Oka te sin nnao ma nkope' nai' Harun ma nak, ‘Ho oli' na' Musa nok kit tpoi na'ko pah Masir. Mes tabu le' ii, hai ka mihiin fa neu in et bale mee! Es nane te, hai mtoit ko he mmoe' blua' tulu' mahuum es neu kai. Maut he in neikn on es le' nfain amniit-lanan neu kai.’^w 41 Nalalit sin nmo'en blua' tulu' mahuma' nane. In huumn aa on le' biye aan es. Nalalit sin nlolon mu'it ma na'tulu' neu ne. Ma sin nfeest eun nok neek malinat a'naek, natuin sin neek eun anmalinas nok blua' tulu' le' sin nmo'e ye neik sin a'niimk eun kuuk.^x 42 Tabu annuu' niit 'mo'et nane te, Uisneno ankoit sin. On nane sin anmulain na'tulu' ale' saa'-saa' anbi neno tnanan, on le' manas, funan, ma kfuun eun. On nane Uisneno anpalakab sin on le' nane. Nane namnees nok saa' le' Uisneno In mafefa knino' antui nani ma nak,

44 Na' Stefanus antuut ma ntaul in uaban nane mnak, “Uisneno nalulu' neu nai' Musa a'leta na'ko uim onen es. On nane nai' Musa sin nahakeb Uum'-ume' Onen es,^z le' sin nmoe' ye na'ko pasu ma mau', natuina' masaf nane. On nane too Israelas sin neman ma na'oin eun neu Uisneno anbin In Uum'-ume' nane. Kaul sin nanain eun bale, sin npukai Uum'-ume' Onen nane, sin nfutu, ma sin anloi neki neu bale bian. Anbi nane, sin nahakeb anteni Uum'-ume' nane.^a

45 Tabu na' Yosua sin nmakenan suuk a'loo nok uuf-uuf bian anbin pah Kana'an le' ii te, Uisneno nliu' napoitan uuf eun nane. Nalalit In nbati pah nane neu hit bei' ma hit nai' sin. Tabu sin ntaman ma nasiik pah nane, sin neik Uum'-ume' Onen nane msa'. Uum'-ume' nane anhaek nabalah tal antia usif na' Daut annaa' aplenat.^b 46 Usif na' Daut an'onen neu Uisneno, on le' hit nai' Yakop amsa' an'onen neu Ne. Ma na' Daut anhalineb Uisneno In nekan, on nane te Uisneno nakliil ee In nekan alekot. On nane in ntoit Uisneno he in es le' nafena' Uim Onen Uuf feu'.^c 47 Mes namuni te, na' Daut in anah na' Soleman es le' nafena' Uim Onen Uuf nane.^d

48 Mes hit tahiin tak, Uisneno ka natua fa anbi ume le' mansian ee anmo'e. Lasi nane namnees nok saa' le' Uisneno In mafefa knino' tuaf es antui nani ma nak,

51 Nalalit na' Stefanus anluut antein in uaban. In ankabal sin ma nak, “Namneo', lo hi 'naak-fatun ki! Hi on le' tuaf le' ka nahiin niit fa Uisneno, ma ka mitniin Ee fa'. Hi mlaban Uisneno on le' bei' ma nai' sin ankoti! On nane tabu ii, hi he mlaban amtein Uisneno In Ismana Knino', ai'?^f 52 Hi bei' ma hi nai' sin nasusab niis ale' Uisneno In mafefa knino' sin. Hi m'eut miit kau, mafefa knino' mee, es le' ka napein fa ha'mu'it na'ko sin? Fe' ka tiit fa, ai'? Un-unu' Uisneno In mafefa knino' sin an'eut nanin nak, Uisneno of ansonu' In Atoni Knino'. Mes hi bei' ma hi nai' sin anlool niis Uisneno In mafefa knino' sin. Tal antia hi msa' ampaek tuaf a'teta' he nlool niis Uisneno In Atoni Knino'. 53 Uisneno In ameput sonaf neno tunan sin imsa', es le' neik ale' halat ma atolan le' Uisneno anloim he nfee sin neu kit, mes hi ka mfiloil fa sin.”

54 Tabu sin le' nokan ntokon anbin bale feek lasi nane, anneen na' Stefanus in uab eun nane, sin nahiin nanin nak in nasaan sin. Es nane te, sin neek eun namenan ma neuk niisk enu.

55 Mes na' Stefanus, le' Uisneno In Ismana Knino' antaam neu ne, na'aiti matan ma nbaiseun neu neno tnanan. Anbi nane, in niit Uisneno In pinan ma klahan no 'tem-temen, ma Usif Yesus anhake nbi Uisneno In aon-bian a'ne'u anbi bael amasat nane. 56 Ma na' Stefanus na'uab ma nak, “On ii, sin aam eun! Au 'iit neno tnanan antalfei', ma Mansian Namneo-Namneo anhaek es bael amasat anbi Uisneno In aon-bian a'ne'u.”

57 Anneen on nane te, apalekas lasi sin anpooh sin luik enu. Nalalit sin nakain aa nok haan ma'tane' he na' Stefanus kais na'uaba' ntein. Ma sin anfuat ok nabuan he n'usa' nisan. 58 Oka te sin anheel anfonat na' Stefanus ma neki ye npoi na'ko koot nane. Ma saksii sin anpuu' sin beet-kone mnaun kotif, ma nana'at sin anbi atoin muinf es. In kanan, na' Saulus. In es le' anhuita' sin. On nane sin npoil na' Stefanus nekin fatu.

59 Tabu sin npoil na' Stefanus, in nhunun namep-meep ma nak, “Koi, Usif Yesus! Au tabu anpaumaak een. Amtoup kau nai!” 60 Nalalit in nli'tuu ma nhunun antein namep-meep ma nak, “Koi, Aam! Kaisa' muloiba' sanat le' ii meu sin!” Nalalit in isnasan natfeek, ma in anmaet.