Sin npiil tuaf hiut he npaloil a'baut eun
6
Tabu nane, Usif Yesus In inin ansaat ok piut tal antia namfaun. Mes sin na'kon uab pukan nua'. Bian atoin Yahudis le' na'uab eun neik uab Aram. Ma bian antein Yahudis le' na'uab eun neik uab Yunani. Namuni te, lasi yes anbool anbi pukan nua' eun sin atnaank eun. Pukan le' neik uab Yunani sin nasulin kle'o nok pukan le' neik uab Aram. Sin nak, “Le' ii nsaan! Kaul hi mbait bukaet neno-neno te, hi kais ampaek neek ao-biaf. Natuin hai baun eun ka napenin fa sin paa'.”2 Natuin lasi nane, es na' Uisneno In haef eun, tuaf bo'es am nua', anboin nabuaba' apalsait eun. Nalalit sin na'uab eun ma nak, “Hai aom-bian aal ki ok-oke'! Hai mibei' misnasab balab bukaet neu ki, mes nane ka npantas fa neu kit. Natuin hai lo he minoina' ki Uisneno In A'an ma In Iplenat piut-piut. 3 On nane te anbi hai teenb aa on ii: leko nneis, hi mpiil maan tuaf hiut na'ko ki. Hi maim tuaf le' too mfaun antola', ma in nahiin in ta'un, in nahiin lasi namfau ma neek ma'nula', ma Uisneno In Ismana Knino' an'atol in i'monin. Kaul hi mpiil maan tuaf eun on le' nane te, of hai mait sin he sin n'atol lais bukaet. 4 Nok lanan nane, na' hai mipein sona' he m'onen ma minoina' Uisneno In A'an ma In Iplenat.”
5 Nalalit sin aal sin anlomin ma natuina' na' Petrus in uaban nane. Sin npiil naan tuaf hiut.
Tuaf es in kanan na' Stefanus. In npalsai namneo-namneo neu Usif Yesus, ma Uisneno In Ismana Knino' npake. In aok-bian sin es le':
na' Felipus,
na' Prokorus,
na' Nikanor,
na' Timon,
na' Parmenas,
ma na' Nikolas le' antaam nok anbi palsait Yahudi, mes in ka atoin Yahudis fa'. In na'ko koot Antiokia.
6 Nalalit sin neik tuaf hiut le' sin npiil sin nane neun Usif Yesus In haef eun. Nalalit haef eun antao sin i'niimk eun, ma n'onen sin he nlalin ameput neu balab-loitan bukaet, he a'baut eun napenin paa' namnes-nesan.
7 On nane te Uisneno In A'an ma In Iplenat ma'etun ma mateka' nasoup bale-bale. Ma too le' natuin Usif Yesus In Laan A'honis nane, ansaat ok piut-piut anbi Yerusalem. On nane msa', a'naak lais palsait Yahudi bian namfaun antaam nokan anlalin Usif Yesus In inin.
Sin nheek na' Stefanus
8 Tabu nane, Uisneno naklila' In nekan alekot nathoe neu na' Stefanus. In nfee kuasat he na' Stefanus anmoe' lasi mkakat huma'-huma' msa', he too mfaun eun nitan neik sin maatk eun. 9 Anbi nane, anmui' atoni Yahudis fauk le' neman na'ko bale 'loo. Sin na'kon koot Kirene, koot Aleksandria, propinsi Kilikia, ma propinsi Asia. Nahunut, sin anlalin ate neu atoni bian, mes namunit sin aam usif nafetin sin. Nalalit sin nabuan anbin Yerusalem. Henati', sin ntaman anbi uim onen le' sin nmoe' kuku we. Uim onen nane, sin nteek ate nak, “Fetin na'ko Ate.” Tabu sin nneen nalail na' Stefanus in uaban, sin ka nloim ye fa'. Es nane te, sin anmulain nmatoen nokan. 10 Mes na' Stefanus in hinen kah een, natuin in na'uab neik kuasat na'ko Uisneno In Ismana Knino'. On nane te sin ka nabe'i ye fa'. 11 Nalalit sin namin lanan amle'ut. On nane sin nnaon nbaen atoni bian, he na'uab nabliun ma nak, “Hai mneen atoni' ii na'uab na'le'uf nai' Musa nok Uisneno!”
12 Sin nhuita' too mfaun, tal antia atoni mnais halat Yahudi sin ma kulu agama sin anneen nokan. Nalalit sin nato'an. On nane te sin nnao nheek na' Stefanus, ma anheel neki ye nnao neu bale feek lasi palsait. 13 Sin saksii sin nane, an'etun uab poi anmatoom nok na' Stefanus ma nak, “Atoni' le' ii, na'uab na'le'uf Uim Onen Uuf piut-piut. Ma in na'uab na'le'uf amsa' plenat Uisneno le' nai' Musa nasanut sin neman neu kit. 14 Hai mneen amsa' in na'uab ma nak, Na' Yesus, atoin Nasaret nane, of natseleb Uim Onen Uuf le' ii. Ma In of annoes ma ansenu nani hit halat ma atolan sin ok-oke', le' nai' Musa nasanut sin neman neu kit!”
15 Oka te ale' too mfaun le' antokon nbi bale feek lasi palsait nane, sin nkius na'tesan neu na' Stefanus, natuin in human anpiin on le' ameput Uisneno na'ko sonaf neno tunan.