Na' Ananias nok bi Safira nmaten, natuin sin he nsu'a Smana Knino'
5
Mes anbi tabu nane, anmui' atoni yes amsa', in kanan na' Ananias. In fee ye, kanan bi Safira. Sin nua sin na'sosa' sin afu piis es amsa'. 2 Mes sin nua sin nma'akool eun he na'tolo' afu nane in upan bian. Tabu na'sosa' nalail afu nane te, na' Ananias annao an'etun neu Uisneno In haef eun ma nak, “Hai fe' mi'sosa' milail hai afu piis es. Tabu ii, hai he mfee in upan ok-oke' neu Uisneno.” 3 Mes na' Petrus nakaina' ma nak, “Ananias! Ho lo teeb-teeb ko! Ho mmoe' on mee? Nasaa' am es ho mu'tolo' afu nane in upan bian? Ho neekm aa nameis'ook, fun ho mutuina' niut amle'ut eun sin a'naakt ee in i'lomin. Ho mbalain he mputa-bliu Uisneno In Ismana Knino'! 4 On ii! Ho he mu'sosa' afu nane, ai' kahaf, nane es le' ho. Ai' kaul ho mu'sosa' mulali, ma ho mloim he mfee in uupn aa oke', ai' kahaf amsa', nane es le' ho. Mes nasaa' am es ho mmoe' lasi nane? Ho he mubliu mansian ee, mes ka tiit fa es nabei' he nabliu naan Uisneno!”
5 Anneen na' Petrus in uaban nane te, nok askeken na' Ananias ansiloit, ma in nmaet nain tabu nane. Ale' too le' nneen lasi nane, namtaun nmaten. 6 Nalalit muinf eun tuaf fauk antaam neman, ma sin n'aum na' Ananias in aon, ma neki ye nnao he nsuub.
7 Nalalit oin tabu teun namuni te, na' Ananias in fee ye ntaam neem. In ka nahiin fa neu saa' es le' anlail nalali yeen. 8 On nane te na' Petrus nataan aa ma nak, “On mee, ein? Hi mi'sosa' afu nane, ma in uupn aa esa le' ii, yaah?”
In nataah ma nak, “Namneo', pah. In uupn aa lo es le' nane, pah.”
9 Nalalit na' Petrus nabookn aa ma nak, “Nasaa' am es ho mok ho mone mma'akol he msuu' Uisneno In Ismana Knino'? Ho mnuu'! Tuaf eun le' annao nsuub ho mone, fe' anfain neman. Kle'o wes anteni te, sin of anloi neik ho ta'um ma nsuub ee nbi ho mone in aon-bian.”
10 Na' Petrus na'uab on nane te, nok askeken, bifee nane ansiloit ma nmaet nain. Tabu muinf eun antaam anfanin ate, sin niit bifee nane nmate nlali yeen. Oka te sin anloi neki bifee nane, ma nsuub ee nbi in mone in aon-bian.
11 Nalalit apalsait eun neu Na' Yesus, sin namtaun nmaten. Ma ale' too mfaun le' nneen lasi anmatoom nok na' Ananias ma bi Safira sin i'maetk eun ate, sin namtaun amsa'.
Na' Petrus sin naleko' amenat namfaun
12 Tabu nane, Na' Yesus In haef eun anmo'en lasi mkakat amfaun, ma too mfaun eun nitan. Haef eun sin ntaman piut-piut anbi Uisneno In Uim Onen Uuf. Sin nabuan nok nekaf mese' anbi Lopo Usif na' Soleman. 13 Tabu nane, too mfaun eun anpules Usif Yesus In apalsait eun. Mes neu sekau le' fe' ka npalsai fa Na' Yesus ate, in nekan fe' na'oni' ma ka nbalain fa he ntaam nabua nok sin.
14 Mes apalsait eun neu Na' Yesus nane, ansaat ok piut na'ko tabu nnao neu tabu, et bifee ma atoni'. 15 On nane te tabu atoin eun niit nalail na' Petrus sin anmo'en lasi mkakat huma'-huma', tuaf amfaun neik amenat anbin a'nahe', ma natupa' sin anbin lanan ninen. Fun sin natenab ma nak, “Kal-kalu na' Petrus ma na' Yohanis anfinin natuin lanan nane, ma sin haofk eun antoomn ahaa ameent eun on nane, sin nabei' nalekon.” 16 Anbi tabu nane, atoni' ma bifee annao neman, ka natfeek niit fa'. Sin neman na'ko kuan-kuan le' anhaumaak koot Yerusalem in ninen. Sin anloi neik ameent eun, ma Uisneno In haef eun naleko' sin ok-oke'. Sin neik aniut-saes amsa', ma Uisneno In haef eun anliu' napoitan niut amle'ut na'ko sin ok-oke'.
Usif Yesus In haef eun napenin ha'mu'it
17 Tabu nane, natuin Usif Yesus In haef eun sin mepu, es na' lais palsait Yahudi sin a'naak anesit nok in haef in nimaf sin na'ko nonot Saduki, sin nato'an. 18 Es nane te, sin annaon ma nheek Usif Yesus In haef eun, ma nataam sin anbin uim o'of.a
19 Mes mabe' nane, Uisneno In ameput na'ko sonaf neno tunan tuaf es, neem anbi uim o'of nane, ma nasoitan uim o'of nane in enon. Nalalit in nok sin anpoin neun sona', ma in anleun sin ma nak, 20 “Tabu ii, hi mnao nai meu Uisneno In Uim Onen Uuf. Amnao m'etun ale' too mfaun eun anbi nane, he sin natuina' Usi' In Laan A'honis feu' le' ii.”
21 Nok-nok ana' te, sin natuin haan lenu' na'ko Uisneno In ameput sonaf neno tunan nane. Ma sin ntaman neu Uim Onen Uuf in tanana', ma sin nanoina' too mfaun eun anbin nane.
Ka 'loo fa te, lais palsait Yahudi sin a'naak anesit neem nok in aok-bian sin ma nok atoni mnais halat na'ko pah Isra'el. Sin neem nabuan he ntae lais palsait anmatoom nok Usif Yesus In haef eun. Nalalit sin nleun he nboin na' Petrus sin na'ko uim o'of, he sin ntae lasi nane.
22 Mes tabu sin antian uim oo'f ate, na' Petrus sin ka et eun fa nane. Es nane te, atoin apaot eun annaon ma n'etun a'naet eun anbi bael buat nane. 23 Sin n'etun ma nak, “Sin ama' aal ki, kais mitoo'. Tabu hai eim amtia uim oo'f ate, hai miit in eno' sin ma'letu' maten. Ma apaot eun anhaken anbin nane. Mes tabu hai mleun sin he nfei eno', ma hai mtaam. He'e! Hai ka miit fa saa'-saa', ahoit.”
24 Annenan on nane te, a'naak lais palsait Yahudi sin a'naakt eun, ma a'naak apaot Uisneno In Uim Onen Uuf, sin aal sin antaak'manan ma ka fefa' mese' fa, fun sin neek eun namnekun.
25 Nalalit atoni yes neem ma n'eut neu sin ma nak, “Sin ama' aal ki, au 'baiseun, ahoit! Tuaf eun le' hi mitaam sin anbi uim o'of, sin et eun mone' ii! Tabu ii, sin nhaken ma nfeen noina' neu too mfaun eun et Uim Onen Uuf ii, pah!”
26 Ma tabu sin nnenan on nane te, a'naak apaot Uim Onen Uuf, anleek in haef ma in nimaf sin he nnaon ma nheke ntein na' Petrus nok in aon-bian sin. Mes in haef ma in nimaf sin namtaun, natuin too mfaun eun annenan na' Petrus in uaban. Sin natenab ma nak, “Kais-kaisa' too mfaun eun nato'an ma npoil kit neik fatu.” Es nane te, tabu sin nheke ntein na' Petrus sin, sin ka nabe'in fa he na'seke' sin.
27 Nalalit sin neik na' Petrus sin neu bale le' npake ye he nafekan lasi. Ma a'naak anesit anmulai nataan sin 28 ma nak, “Hai mtaal milail ki he kais minoina' too nuu nmatoom nok Atoni' le' he nmoe' laan a'honis feu' nane, ai'? Hi lo mi'naak-faut! Hi ka mitniin fa hai plenat, mes hi mituin kiim hi 'lomim kiim! Hi mnao ma minoina' ka misnaas fa anfuun am nateef koot Yerusalem le' ii. Hi on le' he misaeba' kai ma'fena' mak, hai es le' amleun tuaf he na'maet Na' Yesus nane.”b
29 Nalalit na' Petrus anhaek ma nfain mafefa' neu haef eun ok-oke'. In nataah ma nak,
“Sin ama' aal ki! Kaul anmui' mansian nanaoba' plenat le' nasuil ma ka namnees fa nok Uisneno In i'lomin, hai ka mibei' mituina' fa, ahoit. Mes hai lo he mituin ahaa Uisneno In iplenat! 30 Atoni' le' anfei kai lanan neu 'monit feu' nane, es le' Na' Yesus. In es le' Atoni' le' hi mkuus mi'peti Ye anbi hau nehe. Na'ko afi unu', hit bei' ma hit nai' sin anlomin he n'oen eun neu Uisneno. Uisneno le' nane, es le' namonib nafani' Na' Yesus na'ko In i'maten!
31 Tabu le' ii, Uisneno nait na'latan Na' Yesus, he nfain In Tuaf Atait Lanan. Na' Yesus annaa' kuasat on le' usi 'naek es. In nfei lanan, he nsoi nafetin mansian aa na'ko sin sanat ma sin penu sin. In nfee kit lanan neu too Isra'el, he tasaitan hit saant eun ok-oke', ma tfain-koit tatuin Uisneno in lanan amneot. Nok lanan nane, Uisneno In nekn ee na' ansaisuum tal antia In ka nso'i ntein fa too Isra'el hit sanat sin. 32 Fun hit tiit teik hit maatk enu tak, Na' Yesus anmaet nalali yeen, mes In nmoni nfani yeen amsa'. Tabu ii, Uisneno In Ismana Knino' n'eut lasi ii neu bifee ma atoni le' natuina' Na' Yesus In Laan A'honis.”
33 Anneen nalail na' Petrus in uab eun on nane te, atooks eun anbin bale 'tae lasi nane, anmulai ntaisibun, tal antia ala kle'o te, bait sin he na'maet niis Uisneno In haef eun. 34 Mes anbi nane, anmu'i atoni yes, le' nok antook he ntae lasi nane. In kanan, na' Gamalial. Too mfaun eun antola' ma na'tuna', natuin in le' nane kulu ahinet na'ko nonot Farisi. Tabu na' Petrus na'uab nalail, ma sin he na'maet ye te, na' Gamalial anfeen anhaek ma anleek sin he neik na' Petrus nok in aok-bian sin anpoin ntaahn eun. 35 Tabu sin anpoin, in na'uab neu a'naakt eun anbi nane ma nak,
“Au aok-bian aal kit! Hit lo mees he tpanat! Kais-kaisa' hit tmanaap he tmoe' amle'ut neu sin. Hit lo mees he tatenab lek-leok fe'. 36 Hi mimnau atoni yes le' in kanan na' Teudas. In nmate 'loo leu'f een. Mes tabu in fe' nmoin, in nait in tuan ee nak in atoni 'naek, tal antia oin tuaf natun haa natuin ee. Mes tabu atoin eun na'maet ye, in haef ma in nimaf sin naen namnekun. Antia tabu ii, in tuaf eun le' natuin ee, ka tiit fa sin huumk eun ma sin maatk eun!
37 Ma hi lo mees he mimnau lasi es antein. Tabu nane, anaa' aplenat sin nanaoba' tui kanaf. Sin ansoi' too anbi pah es a'tem-'teme. Atoni yes in kanan, na' Yudas, na'ko propinsi Galilea. Too mfaun eun natuin ee msa'. Mes sin nlool niis na msa'. Es nane te, in atuin eun naen namnekun, tal ka mniit eun fa yeen.
38 On nane te tabu ii, au aok-bian aal ki, au utenab on ii: kais mi'maet sin. Mifetin sin. Natuin kaul sin noina' ma sin a'moe'k eun nane na'ko mansian, tebes of namneuk. 39 Mes kaul namneo nak sin noina' nane in amneman na'ko Uisneno, hi of ka mibei' fa he mimouf sin. On nane te hi mpanat fe'. Kais-kaisa' hi mlaban Uisneno.”
Ma tabu sin anneen lasi nane te, sin nlomin he natuin na' Gamalial in fainekat. 40 Nalalit sin nboin nataam haef eun. Ma sin anleek atoni he nbius sin. Nalalit sin ntaal antein sin he kais anteek antein Na' Yesus In kanan. On nane te sin nafetin haef eun nane.
41 Nalalit haef eun nane nnaon anpoi nasaitan bale nane. Sin natenab ma nak, maut he sin kaank eun mes namle'un natuin sin nok Na' Yesus, mes sin nmalinan, natuin Uisneno nahiin nak sin lo pantas he nasaah ha'mu'it on le' nane. Etun sin neek eun anmalinan nmaten. 42 On nane neno-neno te, sin nnaon anfeen noina' neu too mfaun ma nak, “Atoni' le' Uisneno anluul nani Ye nane, es le' Na' Yesus.” Ma sin an'eut lasi nane piut-piut anbi ume mese'-mese', ma anbi Uim Onen Uuf amsa'.