A'naak lais palsait Yahudi sin a'naakt eun anboin na' Petrus ma na' Yohanis
4
Tabu na' Petrus ma na' Yohanis fe' na'uab eun nok atoni fauk ate, kase 'naek eun neman. Kasen nane es le': a'naak lais palsait Yahudi sin a'naakt eun, tuaf bian na'ko nonot palsait Saduki, ma a'naak apaot Uim Onen Uuf. Sin neman he nmatoen nok na' Petrus ma na' Yohanis. 2 Kasen nane nato'an na' Petrus ma na' Yohanis, natuin sin nua sin an'etun neu too mfaun ma nak, “Na' Yesus anmoni nfain na'ko In i'maten! Nok lanan nane, In nfei lanan neu amaets eun he nmoni nfanin amsa'.”a 3 On nane te sin nleun tuaf he nheek sin nua sin. Mes, natuin maans ee nmaab een, on nane te sin nataam sin nua sin anbi uim o'of. He nookf ate, na' anpalekas sin lasi. 4 Mes na'ko tuaf eun le' anlomin he nneen ma nsium haef eun sin noina' sin, tuaf namfau anmanakun nak saa'-saa' le' haef eun nanoina' sin le' nane, lo namneo. Es nane te, tuaf-tuaf neman ma ansaat ok piut, tal antia oin sin bu'-bua' tuaf nifun niim. 5 Nookf aa on nane te, atoin Yahudis sin a'naet eun nabuan anbin koot Yerusalem. Sin es le': a'naakt eun, atoni mnais haalt eun, ma kulu agama Yahudi sin. 6 Lais palsait Yahudi sin a'naak anesit amsa' nok anbi nane. In kanan na' Hanas. A'naet bian antein, es le' na' Kayafas, na' Yohanis, na' Aleksander, ma na' Hanas in ume nanan sin nokan anbin nane msa'. 7 Tabu sin aal sin antaam nabuan ate, sin anleek tuaf he neik na' Petrus ma na' Yohanis, he sin na'euk nok sin. Tabu sin nua sin ntaman nalalin ate, a'naet eun natanan ma nak, “Anmoe on meem es le' hi mibei' mileko' atoni ameen 'ole nane? Hi mpaek kuasat mi'ko sekau? Ma sekau es le' anleun ki he hi mbalain he mmoe' on le' nane?”
8 Nalalit Uisneno In Ismana Knino' anha'taen na' Petrus in nekan. On nane te in nataah ma nak,
“Sin ama' aal ki! Hi es le' amfain a'nakat ma atoni mnais halat meu too Isra'el ok-oke'! Kais mitoo', kaul hai on le' mtakmaan akle'o. 9 Atkiso te, hi on le' he mlais mok kai, natuin hai mtulun ma mileko' atoni ameen 'ole tuaf es. On nane te hi mitaan kai, hai mileko' atoni' nane, mpaek sekau in kuasat? 10 On nane te au he 'eut neu ki on ii: sin ama' aal ki mimnau atoin Nasaret es, le' In kanan Na' Yesus. In es le' Kristus, le' Uisneno anlulu ma anleek nani Ye na'ko unu'. Ma hi es le' amkuus mi'peit Ee nbi hau nehe. Mes Uisneno namonib nafani Ye na'ko In i'maten. Au 'loim he sin ama' aal ki mok too Isra'el ok-oke' mihiin mak hai mileko' atoin ameen 'ole le' nane, meik Na' Yesus le' nane In kuasat. 11 Anbi Uisneno In Sula Knino' matui' nalali yeen anmatoom nok Na' Yesus le' ii ma nak,
‘Anmui' fatu wes le' tukan fatu sin nait inpolin,
mes namuni te, fatu nane anfain on fatu 'sukif neu nii einaf.’b
12 Anbi pah-pinan ii no 'tem-temen Uisneno ka nfei fa lanan bian he nsoi nafetin kit na'ko hit sanat ma hit penu sin. Ala haa lanan mese', es le' Na' Yesus. Kaul ka In fa te, ka tiit fa es, le' nabe'i nfee kit i'honis.”
13 Atooks eun anbin nane nahinen nak, na' Petrus ma na' Yohanis, sin nua sin too amonot, ka on fa askoolt eun. Mes sin nsanmakan, natuin sin nua sin na'uab eun maat-maat ma nbalanin. Sin nahinen nak nua sin a'hakef mese' ma 'naof mese' nok Na' Yesus. 14 Etun sin na'teen ok ma ka fefa' mese' fa'. Saa' antein, atoni' le' naleok na'ko meen 'ole nane anhaek nakeit nok na' Petrus ma na' Yohanis anbi nane. 15 Oka te sin nleun Na' Yesus In haef eun nua sin ma nak, “Hi mpoi mtahan meu mone'.” On nane te sin na'uab eun he namin lanan he namouf sin. 16 Sin nmaka'taan eun ma nak, “On mee? Hit he tmoe' sin on mee? Natuin abiit eun koot Yerusalem ok-oke' nahinen nak sin le' nane es le' anmoe' lasi mkakat ii. Hit he tpeen teik uab saa' attein? Fun lasi ii mamnita' maat-maat. 17 Leko nneis, hit taim lanan he lasi ii ma'kuba' ma ma'tolo', ma kais natoon on anbi mee-mee. Leko nneis, hit aka'tau sin, he sin kais anfeen noina' antein anmatoom nok Na' Yesus In Laan A'honis. Kaul sin ka natninan fa te, of na' sin nahinen!”
18 Nalalit a'naet eun anboin nataam sin ma na'uab neu sin ma nak, “Amneen milek-leko'! Ka nabei' fa he mfee noina' antein anmatoom nok Na' Yesus!”
19 Mes na' Petrus ma na' Yohanis antutan ma nak, “Ait hi mitenab milek-leko', pah. Mee es le' leko nneis? Tatuina' hi pleent aa te, es le' leko nneis ii kah, ai' tatuina' plenat Uisneno? 20 Hai miit meik hai maatm eun, ma hai mneen meik hai luikm eun ale' kanan lasi namfau. Nasaa' am es hai mibei' mi'teen om? Hai lo mees he m'eut lasi nane!”
21 Mes a'naet eun le' antokon ma ntae lasi nane, antaal antein sin. Nalalit sin nafetin tuaf nua eun nane, natuin sin ka nahine ntenin fa neu he nhukun sin neik saa'. Ma sin namtaun amsa', kal-kaul too mfaun eun antaisibun. Fun too mfaun eun anbo'is Uisneno In kanan, natuin atoni ameen 'ole nane naleok nalali yeen. 22 (Atoni ameen 'ole nane, nameen naan toon bo' haa ma nnesi te, na' in nabe'i nnao.)
Usif Yesus In inin an'oen eun ma ntotin he sin kais namtaun
23 Tabu sin nafetin na' Petrus ma na' Yohanis, sin nua sin annaon nfanin ma na'euk nok sin aok-bian sin. Nalalit nua sin an'etun sin ale' uab ma talas le' sin anneen sin na'ko a'naet eun. 24 Anneen nalail on nane te, sin aok-bian sin nabuan nok nekaf mese', ma an'oen eun ma nak, “Uisneno, Akuasat Afin-finit. Uisneno Amo'et-Apakaet neno tnanan ma pah-pinan nok in nesan.c 25 Nahunu te, Ho Smana Knino' anpaek nai' Daut anfain on Ho mafefa knino', he ntui nani lasi anmatoom nok atoni' le' anlaban Na' Yesus am nak:
‘Atoni' na'ko uuf ma pah bian, nato'an natuin sin nneen uab anin.
Sin nmo'en lafu'-lafu' ma nanaoba' lasi le' ka ma'uu' fa'.
26 Ale' usif pah-pinan nabuan he sin nmakenan ma nlaban Uisneno.
Ma a'naakt eun anneek mesen he nlaban Uisneno ma Kristus,
es le' Atoni' le' Uisneno anluul nani Ye na'ko afi unu'.’d
27 Namneo', saa' le' nai' Daut antui nani ye le' nane, nlail nalali yeen tabu ii. In otan ii mamniit een. Anbi koot ii in nanan, usif Herodes ma gubernur Pontius Pilatus nabuan nok hai atoni mnais eun pah Isra'el, ma nok a'naakt eun na'ko pah bian. Sin aal sin namin lanan he nlaban Na' Yesus, Tuaf le' Uisneno Ho mbeit mani Ye.e 28 Mes tabu ii, hai mihiin namneo-namneo mak, ale' saa' eun nane antoom Uisneno Ho lomim, natuin saa' le' Ho mufeek mani ye nbi afi unu'. 29 Koi Usi' Ho miit! Fun tabu ii, sin n'aka'tau kai. On nane te hai mbaiseun ma mtoit Ko Usi', amfee kai neek ha'tanes, he tabu hai mnao ma m'eut Lais Alekot anmatoom nok Na' Yesus, kais nok neek amtaus. 30 Hai mtoit Ko, he mfee kai kuasat, he hai mibei' mileko' ale' ameent enu. Ma hai mtoit kuasat amsa' he hai mmoe' ale' lasi mkakat huma'-huma' he sin nahinen nak, kuasat nane in imneman ii na'ko Atoni Knino' le' Uisneno anleek Ee, es le' Na' Yesus. Hai onen na'tuuk ma na'paal on le' ii, Usi'!”
31 Tabu sin n'oen eun on nane te, ume le' sin nabuan anbi nane, na'beko'. Ma sin aal sin natniin Uisneno In Ismana Knino' antaam neu sin. Nalalit sin npoin ma n'eut Uisneno In Lais Leko nok maat-maat.
Apalsait eun anmoin nabuan anbi susal ma malinat
32 On nane ale' apalsait eun neun Na' Yesus, sin nekaf mese' ma ansaof mese', ma nmanekan es nok es. Ka tiit fa ama'it, fun sin nma'batin es nok es. Blua mee le' tuaf es ini, anfee ye he sin aal sin anpake namnes-nesan.f 33 Ma Uisneno nfee In kuasat neu In haef eun, he n'etun neu too mfaun eun ma nak, “Usif Yesus anmoni nfain na'ko In i'maten. Ma hai miit milail Ye meik hai maatm eun kiim.” Nalalit Uisneno nfeen sin tetus natho-hoe. 34-35 Anmui' tuaf na'ko sin le' nane, na'sosa' in afu, ai' in ume. Ma upa' na'ko blua' eun nane, sin nnona' sin neun Uisneno In haef eun. On nane te sin npaek sin he ntulun ma nbaab es am es le' anma'nuuk. On nane te ka tiit fa tuaf es le' ankulan saa' es anbi sin.
36-37 Ta'leta' on le' na' Yusuf. In le' ii, na'ko uuf na' Lewi, ma in na'ko pah Siprus. (Uisneno In haef eun sin nteek ee te nak ‘Barnabas’, le' in otan ii nbi hit uab aa te nak, ‘atoni le' anha'taen nekaf neu tuaf bian’.) In nnao ma na'sosa' in afu piis es, nalalit in nnona' loit eun nane neu Uisneno In haef eun.