Na' Petrus naleko' atoni ameen 'ole es
3
Anbi neno wes, nleuk tenu maans ee nmaeb, na' Petrus nok na' Yohanis annaon anbin Uisneno In Uim Onen Uuf he n'oen eun nok tuaf bian. 2 Sin he nnao ntaman natuin eno' 'naek es le' in kanan ‘Eno' Amasat’. Anbi nane, sin niit atoni mese, le' in haen eun an'olen na'ko tabu in einaf nahoins ee. Neno-neno te, atoin eun anloi neki ye neu bale nane, he in nabe'i ntoit saa'-saa' na'ko es am es le' anpi'on eno' nane he ntaman neu Uim Onen Uuf. 3 Ma tabu in niit na' Petrus nok na' Yohanis he ntaman neun Uim Onen nane in nanan, in nnona' in i'niman ma antoti ma nak, “Ailoo, ama' sin! Hi mtulun maan kau fe'. Amfee maan kau saa' akle'o.” 4 Sin nua sin annuu' na'tesan atoin ameen 'ole nane, oka te na' Petrus na'uab ma nak, “Bae'! Amnuu' oum fe'!”
5 Atoni' nane na'aiti in matan ma nkius sin nua sin. In natenab ma nak, “Sin nua sin of he nfee kau saa' es.”
6 Mes na' Petrus na'uab ma nak, “Bae'! Au ka 'mui' fa loit sen mese'. Mes tabu ii, au he 'fee ko saa' le' au 'mu'i. Amneen mulek-leko', pah! Nok kuasat na'ko Yesus Kristus, atoni Nasaret nane, au 'ak ko: amfeen he mnao nai!”
7 Nalalit na' Petrus annaa' atoin ameen 'ole nane in i'niman a'ne'u ma nfiit nahakeb. Tabu nane, in haen eun naleok nanin. 8 Nok askeken, in ntaikleit, ma annao neu-mneem he na'taka' in haen eun. Nalalit in nok antaam anbi Uim Onen nok sin nua sin. In nnao nok, antaikleit nok, ma anbo'is Uisneno. 9 Ale' too mfaun eun anbi bale nane niit ee annao ma nbo'is Uisneno.
10 Tabu sin nahiin ye te, sin ansanmakan ma na'uab eun ma nak, “Atoni le' ii, in es le' atoni ameen 'ole le' antoit loit neno-neno nbi Eno' Amasat, ai'? On meem es in naleok?”
Na' Petrus na'uab anbi Uim Onen Uuf in nanan
11 Nalalit atoni nane annao nabua nok na' Petrus ma na' Yohanis. Sin teun sin antian loop buat manuan es, in kanan ‘Lopo Usif Soleman’. Nalalit ale' too mfaun eun neman ma nfuun naan sin nok neek amkakat. 12 Tabu na' Petrus niit too mfaun eun nane te, in nmulai na'uab ma nak, “Atoni Israelas ki! Nasaa' am es au aok-bian aal ki, hi msanmaak tabu hi mnuu' lasi ii? Nasaa' am es hi mnuu' kai piut? Oin hi mak atoni' ii nabe'i nnao, natuin hai mpaek malo kah, ai' natuin hai mmakoe he mituina' Uisneno? Ai' on mee? 13 Au he 'eut ki on ii: hit bei' ma hit nai' sin, es le' na' Abraham, na' Isak, ma na' Yakop, sin na'luil eun ma na'besan neu Uisneno. Uisneno le' nane, es nait na'latan In Atoni' le' In npiil nani Ye le' nane, es le' Na' Yesus. Na' Yesus le' nane, es le' maeb es naa, hi mait maan Aa ma mina'at neu gubernur Pilatus. Gubernur ee he nafeitn Ee, mes hi mlaban in i'lomin le' nane, he kais nafetin Na' Yesus.a 14 Mes Na' Yesus nane, Atoni' le' ka nmui' fa sanat. In neekn aa leko. Gubernur ee he nafetin Atoni' le' ka nmui' fa sanat nane, mes hi aal ki mlaban nok ma'tane'. Le' le'uf anneis-neis ye hi milelab, he nafetin atoin amoe' amle'ut es, le' anlool atoni', he nnona' nafani Ye neu ki.b 15 On nane hi es le' amlool miis Na' Yesus. Te kah fat, In es le' Uuf neu 'Monit. Amneot ee, In nmaet nalali yeen, mes Uisneno namonib nafani' In na'ko In i'maten. In le' ii, es le' hai miit Ee meik hai maatm enu.
16 Hi mihiin main atoin ameen 'ole le' ii. Tabu ii, in ma'tanen, mes ka hai fa es le' mileok we. Hai ka mmui' fa kuasat saa'-saa'. Kuasat nane neem na'ko Na' Yesus kuun. Atoni' ii anfeen ma anhaek natuin in anpalsai neu Usif Yesus. Fun Usif Yesus nane es le' naleko' nani ye ma hi miit meik hi maatm enu.
17 Au aok-bian aal ki! Tabu ii, au uhiin 'ak hi mok hi 'naakf eun ammoe' amle'ut neu Na' Yesus. Mes hi ka mihiin fa in i'poin ee on mee. 18 Mes Uisneno n'eut nalail et afi unu', neki In mafefa knino' sin ma nak, Anah le' In npiil nalail Ye nane lo mees he napein ma'ne'at. Lasi nane, nlail nalali yeen. 19 Es nane te, hi lo he misaitan hi sanat ma hi penu sin, ma miteu'n om mfain eim meu Uisneno, maut he In nnoes nani sin, ma ka namnau ntein fa sin. 20 Uisneno of anha'taen hi neekm eun. Ma Uisneno of ansonu' nafani' neu ki, Kristus le' In npiil nalali Ye nane. Ma Kristus le' nane, es le' Na' Yesus le' In anleek nalali Ye neem neu ki. 21 Na'ko afi unu', Uisneno na'uab anpaek In mafefa knino' sin ma nak, ‘Uisneno of nanoon ma naneo ale' kanan lasi, tal antia sin anlalin feu'.’ Es nane te, Na' Yesus lo he npao nbi In Bale Knino' tal antia In neem he na'feu' ale' lasi.
22 Nai' Musa na'uab niit amsa' neu atoni Israelas ma nak,
‘Hi 'Nakaf nane, es le' Uisneno, of In anluul In haef Atoni yes na'ko ki he nlail In mafefa knino', on le' In npaek kau a'lail In mafefa'. Es nane te, hi lo he mtakan hi luikm eun ma mneen ale' saa'-saa' le' In n'eut ki sin.c 23 Mes sekau le' ka nloim fa he nneen nalek-leko' Atoni' nane In uaban ate, Uisneno of nait inpolin nani ye na'ko In inin, ma ka nmui' fa hak antein nok sin.’d
24 Ka nai' Musa nmees fa es na'uab lasi nane. Mes Uisneno msa' anpaek tuaf bian antein, he nlail In mafefa', ma sin an'eut ale' lasi nane msa'. Le' afi ahunut, Uisneno npaek nai' Samuel, he n'etun lasi le' muni' ii hit tiit sin teik hit maatk enu. 25 Uisneno anba'an amsa' neu nai' Abraham ma nak,
‘Na'ko ho sufam-ka'um tuaf es, Au of a'fee tetus-athoen neu ale' uuf am pah anfuun am nateef pah-pinan ii.’e
Ale' lais manba'an le' Uisneno nfee sin neu In mafefa knino' sin ahunut sin nane, tabu ii anlail anbi hi sonam ma hi tnanam, es le' au aok-bian ki atoin Israelas ki. 26 Uisneno anluul In Anah le' In npiil nani Ye, he nalulu' ma naklila' lanan, maut he hi misaitan hi sanat ma hi penu sin. Nok lanan nane, In naklila' In nekan alekot neu ki. Uisneno anluul In Anah nane nahuun neu ki, nalalit na' In anluul haef neu uuf ma pah bian sin. Nane anlail tetus-athoen neu kit aal kit.”