Uisneno In Ismana Knino' antaam neu sin
2
1-2 Na'euk nok atoin Yahudis sin neno 'naek le' sin nteek aa tnak ‘Neon Pantekosta’,a ale' too mfaun le' natuina' Na' Yesus, sin nabuan anbin ume yes.b Nok askeken ate, sin nneen a'luuf es neem na'ko neno tnanan paap mese' on le' ain nautus. A'luuf nane 'nae le'uf, tal abiit eun le' nane ka nmanenan fa hanaf es nok es kaul sin na'uab eun. 3 Nalalit sin niit antein paap mese' on le' ai pina' le' anpee' ma nkiufn On neu sin mese'-mese'. 4 Nalalit Uisneno In Ismana Knino' antaam neu sin aal sin. Oka te sin na'uab eun neik uab pah bian, anmatoom nok saa' le' Smana Knino' an'eut neu sin. 5 Tabu nane, atoni Yahudis na'ko bale-bale nbi pah-pinan ii, neem nabuan anbin koot Yerusalem. Sin neek eun anmalinan he natuin Uisneno. 6 Tabu sin nneen a'luuf nane te, sin aal sin neem nabuan anbin bale nane. Ma mese'-mese' anneen in uaba' na'ko Usif Yesus In haef eun sin luulk eun. On nane te sin aal sin ansanmakan. 7 Sin aal sin ansanmakan tal sin na'uab eun ma nak, “A'uab eun ii sin aal sin atoni Galileas, ai'? 8 Nasaa' am es hit tneen sin na'uab eun neik uab na'ko hit pah aa kuuk mese'-mese'? 9 Hit aal kit teem ta'ko propinsi Partia, Media, Elam, Mesopotamia, Yudea, Kapadokia, Pontus, Asia, 10 Frigia, Pamfilia, Masir, na'ko Libia le' anhaumaak koot Kirene; hit bian neman na'ko koot Roma; 11 ma bian antein neman na'ko pah Kreta, ma pah Arap. Hit atoni Yahudis ma atoni pah bian le' attaam atbi lais palsait Yahudi. Hit aal kit atneen sin na'uab eun neik hit uab mese'-mese', anmatoom nok ale' lais ma'taen le'uf eun le' Uisneno anmoe' nain sin. Ainoo! Hit tsanmaak ma tamkaak namneo-namneo!”
12 Sin aal sin namkakan, ma sin anmakataan eun es nok es ma nak, “On meem es nabei' anlail on le' ii? In ootn aa, saa'?”
13 Mes bian na'akan sin, ma na'uab eun ma nak, “Tfoi'! Kais amtoe mok sin, natuin sin nmafu nmaten, pah!”
Na' Petrus na'uab neu too mfaun eun
14 Na' Petrus, ma Usif Yesus In haef eun tuaf bo'es am mese', nokan anbi nane. Oka te na' Petrus neiki ntaam akle'o, ma na'uab neu too mfaun eun le' nabuan anbin nane. In na'uab namep-meep ma nak, “Sin eina' ma sin ama', au aok-bian ki ok-oke'! Hi le' atoni Yahudis, ma hi le' eim ma mitua ambi koot Yerusalem le' ii! Amtakan hi luikm eun ma mneen milek-leko' meu saa' le' au he u'uab, natuin anmui' uab penting mese', le' au he 'eut 'ani neu ki ok-oke'. 15 Hi kais mitenab mak sin le' ii anmafun laul tua min-kase. Sin ka neu he nmafun fa, pah! Mimnau, ka tiit fa es he niun tua he namafu we anbi nook-nook ana'. Saa' anteni fe' oin leuk sio'! 16 Hi mneen sin aal sin na'uab eun neki hi uab eun ii mese'-mese'. Amneon ee on ii: tabu nane, Uisneno n'etun nalail lasi ii neu In mafefa knino' na' Joel ma nak,
17 ‘Uisneno nakua a'an ma nak, “Anbi neon amsoupt eun,
Au of usanut Au Smanak neu bifee ma atoni sin ok-oke'.
Hi aan feto ma hi aan mone,
of Au 'paek sin anlalin Au mafefa knino' eun.
Hi aan muinf eun nane,
of niit saa' le' Au he ululu' neu sin anbin amnitas.
Ma hi atoni mnais eun nane,
of niit saa' le' Au he uklila' neu sin anbin nanait.
18 Na'eku neon amsoupt eun,
Au 'fee Au Smanak neu Au aan lenu' ma aan leka' sin.
Au 'fee neu atoin eun,
ma Au 'fee neu bifee sin amsa'.
Of sin na'uab saa' le' Au 'etu ee neu sin.
19-21 Neno Uisneno of antia, mes nahuun na'ko neno nane antia,
Au of a'moe' uhunun lasi mkakat huma'-huma' anbi neno tnanan.
Lasi mkakat on le' maans ee nameis'ook;
ma funan of mee' le'uf on le' naa'.
Au he 'moe' lasi mkakat maneun le'uf anbi pah-pinan ii msa'.
Lasi nane, on le' naa', ai, ma masu' le' ansae bua-bua' neu neno tnanan.
Ma nbi Uisneno In nenon le' maneun leu'f eun nane, sekau es le' anhunun ma antoit lais tulun-babat na'ko Uisneno te,
Uisneno of ansoi nafetin sin.”’c
Nane le' na' Joel antui nani ye, et afi unu'.
22 Au aok-bian atoin Israelas aal ki! Hi mtakan hi luikm eun ma mneen saa' le' au he eut ain ki tabu ii. Uisneno anlulu ma anleek nain Na' Yesus, atoin Nasaret nane. Hai mihiin namneo, natuina' hai miit meik hai matam, nak Uisneno anpake Ye he nmoe' lasi mkakat nfani lasi mkakat le' maneun le'uf. Hi mihiin lasi nane msa', natuin Na' Yesus anmoe' lasi mkakat huma'-huma' nbi hi sonam ma hi tnanam. 23 Mes hi mlool miis Ne, meik lanan amtoit meu amoe' amle'ut he nkuus na'peti' In ta'un ee nbi hau nehe. Te kahat, nane Uisneno nahiin nalail na'ko afi unu', ma nane antoom In salit.d 24 Namneo hi mmoe' on le' nane tal antia In nmaet namneo. Mes Uisneno ka nloim fa he Na' Yesus antuup nabalah. Es nane te, Uisneno nafeitn Ee na'ko lasi 'maten in kuasan, ma namonib nafani' In. Fun lasi 'maten nane in kuasat ka nabei' Ye fa'.e
25 Un-unu te, usif na' Daut antui lasi anmatoom nok Na' Yesus, on le' ii:
‘Au uhiin 'ak Uisneno nok kau piut-piut.
Es nane te, ka tiit fa saa' es, le' nabei' he namouf kau,
natuin Uisneno anhaek piut et au aok-bian.
26 Au nekak ii nmaliin, natuin lasi nane;
ma au 'pules u'naeba' Uisneno piut,
ma au u'tena' he 'pao We.
27 Fun In ka nnona fa au smanak he natua nabalah anbi bale 'maten.
Ma Uisneno ka npalakab fa In Tuaf Aknino' In Aon-Ta'un he npunu nbi nopu 'maten.
28 Uisneno n'eut kau lana 'honis le' amneot.
Es nane te, au nekak ii nmaliin anmaet,
natuin Uisneno nok kau piut.’f
Nane le' usif na' Daut antui nani ye, et afi unu'.
29 Au aok-bian aal ki! Tabu ii mfee kau sona' kle'o, he au u'uab nok aknino', uab le' anmatoom nok nai' Daut. In na'uab on nane, mes in ka nteek on fa neu in ta'un anmees. In nmate nlail, ma nsuub nalali ye, ma in naetn aa fe' et hit itnanak tal antia neno ii. 30 Usif na' Daut le' nane, Uisneno In mafefa knino'. Ma in nahiin nak Uisneno anba'an neki a'an supat nak, in sufan-ka'un tuaf es na'ko na' Daut of es annaa' aplenat, es le' Tuaf le' Uisneno anluul ma anleek nani Ye na'ko afi unu'.g 31 Tabu nane, na' Daut annuu' na'loo neu neon amnemat. Ma in n'eut nahuun anmatoom nok Tuaf le' Uisneno anlulu ma anleek nani Ye. Nak Tuaf le' nane of anmoni nfain na'ko In i'maten. Ma na' Daut nak Tuaf nane msa' of ka nabalah fa nbi bale 'maten, ma in aon-ta'un ka npuun niit fa'.
32 Tuaf le' na' Daut an'etu nane, es le' Na' Yesus! Uisneno namonib nafani In na'ko In i'maten. Ma hai aal kai miit meik hai matam. Namneo', In nmoni nfain. 33 Tabu ii, Uisneno nait na'latan nalail Na' Yesus ma nfee Ne 'toko' ma kuasat a'naek anneis. In ntook et Uisneno In aon-bian a'ne'u, et bale le' Uisneno naloitan nani ye. In Aamf ee anfee Ne In Ismana Knino', on le' Uisneno anba'an nani ye et afi unu'. In anba'an amsa' he nfee kit In Ismana Knino' nane. On nane te tabu ii, saa' le' hi mneen ma hi miit ee, nane Uisneno anfee In Ismanan. 34 Na' Daut ka nsae niit kuun fa ntia neno tnanan, mes in ntui niit am nak,
‘Uisneno na'uab neu au usi' ma nak,
“Amtook nai nbi Au aok-bian a'ne'u, nbi bale le' Au uloitan 'ani ye,
35 tal Au 'moe' ho musu sin anlituun neu ko.”’h
36 Es nane te, hi atoni Israelas aal ki lo mees he mihiin namneo anmatoom nok Na' Yesus le' hi mkuus misan. In es le' Kristus, le' Uisneno npiil nani Ye na'ko un-unun, ma In anfani 'Nakaf neu kit imsa'.”
37 Annenan on nane te, sin neek eun klati'-klati'. On nane te sin nataan na' Petrus nok haef bian sin ma nak, “Eee, bae' sin! On nane tabu ii, hai he mmoe' on mee, pah?”
38 Nalalit na' Petrus nataah sin ma nak, “Hi aal ki mese'-mese' lo mees he misaitan ma mifetin hi sanat ma hi penu sin, ma miteu' nom mfain eim mituina' Uisneno. Oka te hi lo mees he mnona' hi tau'm eun he naslain ki, he nfani taka' nak, hi mi'te'un ma mi'baina' hi 'monim he mituina' Yesus Kristus In laan a'honis. Nane nfani taka' amsa' nak, Uisneno nsaok nani ale' kanan hi sanat ma hi penu sin. Ma hi of mipein Uisneno In Ismana Knino' amsa'.
39 Fun Uisneno nba'an nani he nfee Ye neu ale' tuaf le' antaam anfani In ini. Nok lanan nane, In natiaba' In lais manba'an neu ki ma neu hi sufam-hi ka'um eun. In nba'an on le' nane msa' he nfee Ye neu tuaf bian antein.”
40 Na' Petrus fe' na'uab amnanu' neu sin, ma nak, “Tabu ii, too mfaun eun anseken ma npeon ok na'ko laan a'honis amneot. Es nane te, hi lo mees he mpanat milek-leko' he kais hi mituina' amoe' amle'ut eun sin lanan. Hi lo mees he mituin meu Uisneno In laan amneot ma amnonot nane. Nok lanan nane te, of Uisneno nsoi nafetin ki, he hi mmoin mibalah mok In.”
41 Nalalit too mfaun eun ansium na' Petrus in uaban. On nane te sin ntaam natuin Na' Yesus In Laan A'honis, ma sin nnona' sin aok eun he naslain sin. Neno nane, tuaf nifun teun antaam anlalin apalsait neu Na' Yesus. 42 Sin nlomin he nabua nok atoni bian sin le' natuina' Na' Yesus. Ma sin nmonin leko es nok es. Neno-neno te, sin nmakoen he nneen noina' na'ko Usif Yesus In haef eun. Sin n'oen eun ate nabuan. Sin nbukaen nabuan amsa'.
Apalsait eun sin i'moink eun
43 Tabu nane, Usif Yesus In haef eun anmo'en lasi mkakat namfau, tal antia ale' too mfaun eun ansanmakan ma namtaun amsa'. 44 Apalsait eun le' natuin Usif Yesus In Laan A'honis nane, nabuan ma nmonin nok nekaf mese', tal saa'-saa' le' sin nmu'i ye te, sin aal sin anpaek nabuan.i 45 Bian na'sosa' sin blua' eun ma sin i'mui'k enu, nalalit anbait noni nane neu apalsait eun, mese'-mese' natuin sin paluut. 46 Neno-neno te, sin nlomin he nabuan anbin Uisneno In Uim Onen Uuf. Sin aal sin anbukaen nabu-buan na'ko ume yes neu ume yes nok neek malinat. Sin aal sin anmatuuln eun es nok es, ma ka nmaka'panen fa'. 47 Neno-neno, sin npules ma nbo'is Uisneno ka natfeek niit fa'. Atoni bian sin le' ka nabua nok sin fa anmalinas sin amsa'. Neno-neno te, Uisneno nsoi nafetin tuaf bian, ma sin antaam nabuan nok Usif Yesus Inin. Tal antia sin anlonu wok ma namfaun piut.