Usif Yesus anmoni nfain!
(Na' Mateos 28:1-8; Na' Lukas 24:1-12; Na' Yohanis 20:1-10)
16
Noka fa te neon nee, atoni Yahudis sin neon onen. Maans ee anmouf nalali yeen, bi Maria na'ko kuan Makdala, ma eina' Maria (na' Yakobus in einaf), nok eina' Salome, sin nnao nsosan miin kaes fobona', he noka' te, sin he nnao nkanin neu Na' Yesus In aon-ta'un natuin sin halat atoni Yahudis.
Na' Markus 16:1-21
2 Ma noka fa neno fe' anmutik on nane te, sin teun sin annaon neu noup fatu nane. 3-4 Anbi lanan atnanan sin na'uab eun ma nak, “Ainoo! Of sekau es he ntita' na'loba' kit fatu 'naek nane na'ko nopu in enon? Hit teun kit ka neu ta'bei' ye fa'. Fatu nane 'nae le'uf!’’
Mes tabu sin antian bale nane, sin niit fatu nane natnanib nalali. 5 Oke te sin ntaman nfinin anbin noup fatu nane. Mes nok askeken, sin niit atoin muinf es anpaek muti' naliim, antook anbi sin aon-bian a'ne'u. 6 On nanet atoin munif nane na'uab neu sin ma nak, “Hi kais mimtau'! Au uhiin 'ak hi eim he maim Na' Yesus, atoni Nasaret nane, le' sin na'maet nalali Ye nbi hau nehe. In ka et fa ii. In nmoni nfani yen! Eim he hi mnuu' kiim bale le' sin ntao Na' Yesus In aon-ta'un nane. Ka tiit Ee fa yeen! 7 On nanet hi mfain nai lab-laab! Amnao ma m'eut meu na' Petrus sin ma mak, Na' Yesus anmoni nfani yeen. In nnao nahunun ki neu pah Galilea. Maut he sin na'euk nok Na' Yesus anbin nane, on le' nahunut In an'eut nalail neu sin. On nanet hi mfain nai!’’a
8 Tabu bifeen nane niit noup fatu nane luman on nane te, sin naskeken. On nanet sin naen anpoin. Sin nfanin lab-laab. Sin npi'on lanan te, sin ka n'etun fa sekau msekau, natuin sin namtau nmaten.
Usif Yesus nateef nok bi Maria le' na'ko Makdalab
(Na' Mateos 28:9-10; Na' Yohanis 20:11-18)
9 Anbi neno klei anbi nok-nook ana' te, Na' Yesus annao na'euk nahuun nok bi Maria le' na'ko kuan Makdala. Bi Maria le' nane, nahunut Na' Yesus anliu' napoitan niut amle'ut hiut na'ko in aon. 10 Tabu bi Maria na'euk nalail nok Na' Yesus, in nfain ma an'eut neu amfaut eun le' nahunut sin natuina' Na' Yesus. Sin fe' nabu-buan nok susal ma kaet, natuin sin namnau Na' Yesus In i'maten. 11 Oke te bi Maria na'uab neu sin ma nak, “Nasaa' am es hi fe' amsuse ma mkae'? Kais amneeka'leen amtein, natuin Na' Yesus anmoni nfani yeen! Le' lelon na, au u'euk okan!’’
Mes sin aal sin nataa ma nak, “Ho mupoib om!’’
Usif Yesus nakliil On neu tuaf nua'
(Na' Lukas 24:13-35)
12 Oke te Na' Yesus In asimo lasi tuaf nua' annaon neu kuan es. Anbin lanan atnanan te, Na' Yesus nakliil On neu sin, mes In na'baina'. Mes ka 'loo fa on nane te, sin nahiin Ye. 13 Oke te sin nua sin anfanin ma an'etun sin aok-biak eun ma nak, “Hoe! Hi mneen fe'! Le' lelon na hai mi'euk mok Na' Yesus anbi lanan!’’
Mes sin aok-biak eun nataa ma nak, “Hae! Hi kaisa' mipoib om on le' nane!’’
Usif Yesus nakliil On neu In asimo lasi sin ok-oke'
(Na' Mateos 28:16-20; Na' Lukas 24:36-49; Na' Yohanis 20:19-23; Haef eun sin Nu'un 1:6-8)
14 Oke te Na' Yesus na'euk nok In asimo lasi tuaf bo'es am mese'. Tabu nane, sin ntokon ma nbukaen. In na'uab neu sin ma nak, “Hi 'naak-faut leu'f eun ki! Atoni an'etu nlail ki ma nak sin niit nalail Kau neik sin matak fuak eun, mes hi ka mpalsai fa, oo! Hi mak, sin aal sin napoib ok! Tabu ii, Au 'eikn Ok 'oum. Namneo Au 'maet, mes tabu ii, Au 'moni 'fain! Hi miit kiim meik hi matam fuam eun.
15 On nanet tabu ii hi lo mees he mnao mfuun ma mitefan pah-pinan ii, he m'etun ale' mansian eun ok-oke' Au Lais Leko ii.c 16 Sekau le' anpalsai neu Kau, ma naslani, of Uisneno nsoi nafeitn ee, he in natua nabal-baal nok Uisneno nbi sonaf neno tunan. Mes sekau le' ka npalsai fa te, of in napein hukun, ma Uisneno nliu' napoitn ee, oke te natua nabaal anbi mone'. 17 Ma le' apalsait neu Kau', of sin nmoe' lasi mkakat huma'-huma', he too mfaun eun nahinen nak sin kuasat nane na'uu ma na'baa' na'ko Uisneno. Na'leet on, on le': sin nabe'i nliu' niut amle'ut eun neik Au kanak. Of Uisneno nmoe' sin he sin na'uab eun neik uab bian le' sin ka nahiin ye fa'. 18 Oke te kaul sin nnaa' kaun amle'ut, ai' sin niun naan laso, sin ka neu he namle'un fa'. Kaul sin npoho ma n'oen eun neu amenat, amenat nane naleok.’’
Usif Yesus na'ait Yon neu sonaf neno tunan
(Na' Lukas 24:50-53; Haef eun sin Nu'un 1:9-11)
19 Tabu In na'uab nalail nok In asimo lasi sin on nane te, Uisneno nait nasaeba' Na' Yesus neu sonaf neno tunan. Anbi nane, In nfain Uisneno In tuaf mapalsai', he sin nua sin antokon ma napleent eun bua'-bua'.d
20 Oke te In asimo lasi sin anmo'en natuin In iplenat. Sin nnaon neu bale-bale ma an'etun ale' too mfaun eun anmatoom nok Na' Yesus In Lais Leko. Uisneno nfee kuasat neu sin, he sin nmoe' ale' lasi mkakat le' Na' Yesus an'etu nlalin sin. On nanet too mfaun anpalsain neu Na' Yesus, natuin sin nahinen nak Lais Leko nane lo namneo'.
Na' Markus 16:21-21
[NA' MARKUS NATU'AB IN I'LETAN, NATUIN TUIS AHUNUT BIAN e
9 Tabu bifee teun eun nane na'euk nok na' Petrus sin, sin an'etun amfaut eun nane anmatoom nok atoin munif le' na'uab nok sin anbi noup fatu nane. 10 Oke te Na' Yesus neikn On naplenat In asimo lasi sin, he nnao ma n'eut In Lais Leko neu ale' bale-bale, tal antia pah-pinan paan-mpanan. Lais Leko ii nalulu' lanan nak Uisneno nsoi nafetin sin na'ko sin saant eun, he sin nmonin piut nokan.
Lais Leko ii lo namneo ma namnoon. Es nane te, in ntahan piut na'ko batan neu batan, tal antia nabal-baal.]