2 Tabu sin antian gubernur ate, in nataan Na' Yesus ma nak, “On mee? Namneo ho le' ii atoni Yahudis sin Usif?’’

Na Yesus nataa ma nak, “Namneo'! Ama' gubernur ho uab nane, namneo'.’’

3 Nalalit a'naak lais palsait Yahudi sin i'naakt eun na'uab eun nok gubernur ee ma nak, “Atoni ii In saant ee mfau le'uf!’’ On nanet sin nsoi' In sanat sin mese'-mese'.

4 Oke te gubernur nane nataan antein Na' Yesus ma nak, “Ho mneen sin uab enu, ai' kahaf? Sin nasaeb ko saant amfaun. Bait ho mutaah miit fe'!’’

5 Mes Na' Yesus ka nataa fa fefa' mese' msa', tal antia gubernur ee nsanmaak.

6 Toon-toon ate, kaul atoni Yahudis sin anmo'en fesat Paska, lo mees too mfaun eun anbeit naan atoin o'of tuaf es, he gubernur ee nafeitn ee na'ko uem o'of. 7 Tabu nane, anmui' atoin o'of tuaf es, kanan na' Barabas. Nahunu te, sin nheek ye, natuin in anlaban anaa' aplenat pah Roma, ma in nlool atoni msa'. 8 Natuin fesat Paska nane anhaumaak een, es na' atoni mfaun eun annaon neun gubernur Pilatus ma nhuun eun ma nak, “Ama' gubernur! Neno 'naek Paska anhaumaak een. Kaul leko te, mufetin atoin o'of tuaf es, on le' toon-toon.’’

9 Oke te gubernur ee nataa sin ma nak, “On nane te, au he ufetin ki sekau'? Kaul au ufetin ki atoin Yahudis sin Usif le' ii te, hi mlomi, ai' kahaf?’’ 10 Gubernur ee na'uab on nane, amneon ee in nahiin nalail nak, a'naak lais palsait Yahudi sin i'naakt enu neik Na' Yesus neu ne, natuin sin neek enu namenan nmaten neu Na' Yesus.

11 Mes ale' a'naak lais palsait Yahudi sin i'naakt enu anhuitan too mfaun eun he sin ntoit neu gubernur ee ma nak, “Hai ka mloim mani Ye fa'! Mufetin kai na' Barabas!’’

12 Nalalit gubernur ee nataan anteni sin ma nak, “Kaul on nane te, au he 'moe' saa' neu Na' Yesus, le' sin nteek nani Ye ma nak ‘atoin Yahudis sin Usif’ii?’’

13 On nanet sin nhuun eun ok-oke' ma nak, “Mu'mate! Amkuus mu'peit Ee anbi hau nehe!’’

14 Oke te gubernur ee nataan ma nak, “In saant ee saa'? Au palekas ulali Ye, mes au ka upein fa sanat mese' msa'!’’

Mes sin aal sin anhuun eun nameep-mepan antenin ma nak, “Mu'mate! Amkuus Ee nai nbi hau nehe!’’

15 Natuin gubernur ee he nhaliin too mfaun sin neek enu, on nanet in nafetin na' Barabas natuin sin i'loimk eun. Oke te in naplenat atoin apaot eun he sin nnao nbiso Na' Yesus anpaken ue'.^a Anbiso nlali te, solalus sin neik Na' Yesus anpoi nnaon he nkuus niis Ne nbi hau nehe.

16 Oke te solalus sin anheel neik Na' Yesus neu sin koot ee in tanana'.^b Anbi nane, sin anboin nabuab solalus pukan mese', of oin tuaf natun niim. 17 Ma sin napakeb Na' Yesus neik beet-kone mnanu' masnaa mee-obe, on le' usif sin iblua pake. Oke te sin nait naan nono maskuna' ma sin anmo'e 'soeb kiisn es. Ma sin an'um'nii' nataam a'soeb maskuna' nane neu Na' Yesus In i'nakan, he sin na'lalu' on le' he nasaeba' 'pilu neu uis feu' wes.

18 Oke te sin na'luil eun ma na'besan, nalali te na'leu'f Ee ma nak, “Tabe oo, Usif too Yahudi!’’ 19 Ma sin na'luil eun nok asa'fanu anbi Na' Yesus In matan. Ma sin nasbuul' eun hape piut-piut neu In human. Oke te sin nnoto piut-piut neik hau. 20 Sin na'le'uf nalali Ye on nane te, sin npuu' nain beet-kone mnanu' nane. Ma sin napakeb nafani' In pake. Oke te sin neki Ye npoi na'ko koot Yerusalem, he nkuus na'peti' anbi hau nehe tal anmaet.

21 Tabu sin npoin annaon na'ko Yerusalem, sin na'euk nok atoni yes anbi lanan atnanan. Atoni nane na'ko koot Kirene, kanan na' Simon. In le' nane, na' Aleksander ma na' Rufus sin amaf. In fe' he ntaam neu koot Yerusalem ate, solalus sin anheel nane, ma nalelab he nasaah Na' Yesus In hau nehe.^c 22 Sin anheel neik Na' Yesus antia bale yes, kanan Golgota. (In otan nak ‘bale nui' 'nakaf’.) 23 Anbi nane, sin he na'inu' Na' Yesus neik laul mahei' maseol malo, he In nabe'i ntahan menas. Mes In ka nloim fa he niun. 24-25 Oke te sin nkuus natneneb Na' Yesus anbi hau nehe. Nalalit sin na'hakeb hau nehe nane, of oin fe' leuk sio'. Oke te solalus sin nosun suul ana' he nleek sekau es le' he napein Na' Yesus In pake.^d 26 Oke te sin antuin anbi hau pisa' es ma nak:

Oke te sin nkuus hau pisa' nane, anbi hau nehe in fafon, anhaumaak Na' Yesus In i'nakan. Sin neik lais matui' nane he nhukun. 27 Anbi nane, sin nkuus na'maet abulalut tuaf nua msa'. Es anbi Na' Yesus In aon-bian a'ne'u, ma es antein anbi 'lii. 28 [Nok lasi nane ate, sin natuin saa' le' matui' nain anbi Uisneno In Sula Knino' le' nak, “Sin nmo'e Ye nahuum on le' atoin amoe' amle'ut.’’]^{e f}

29 Ale' atoni mfaun eun le' annaon natuin lanan nane, niit Na' Yesus ma'peti' anbi hau nehe. On nane sin ankiu'n eun ma nakle'uf Na' Yesus ma nak, “Hoe! Ho es le' mak, Ho he mpukai muleu' Uisneno In Uim Onen Uuf, oke te mufena' mufani' ee anbi neno teun in nanan.^g 30 Maut he Ho msaun mu'ko hau nehe nane, he mufeitn om nai'! Kaul Ho mmoe' on nane te, na' hai mpalsai mak Ho le' ii Uisneno In Anah.’’

31 A'naak lais palsait Yahudi sin i'naakt eun nok anoina' lasi palsait sin nakle'uf Na' Yesus amsa' ma nak, “In nsoi nafetin atoni bian sin, mes In ka nabei' fa nafetin naan In aon. 32 In nteek In aon ee nak ‘Kristus’, Atoni le' Uisneno anleek nani Ye na'ko un-unu. Bian nak, In le' nane atoni Israelas sin Usif. Kaul namneo on nane te, maut he In nsaun na'ko hau nehe he hai miit fe'. Oke te hai mpalsai meu Ne.’’

Tuaf nua' eun le' na'peti' sin bu'-bua' nok Na' Yesus anbi sin hau nehe mese'-mese', sin nakle'uf Na' Yesus amsa'.

33 Oke te meis'ookn ee n'aum naan bale nane, na'ko manas na'fufu' tal antia leuk tenu' neno nmaeb.

34 Tabu anleuk tenu' on nane te, Na' Yesus anhunun neki uab Aram ma nak, “Eloi! Eloi! Lema sabaktani?’’ (Le' neik hit uab ee te nak, “Koi, Au Usi'! Koi, Au Uisneno! Nasaa' am es Ho musaitan Kau on le' ii?’’)^h

35 Tuaf fauk le' anhaumakan anbin nane, sin nneen Na' Yesus In hanan nane. On nane te sin na'uab eun ma nak, “Hoe! Hi mneen fe'! In nboin nai' na' Elia, Uisneno In mafefa knino' un-unun.’’ 36 Oke te tuaf es naen am nait ani'-tei meto' ma nalema' nbi laul mahei'. Oke te napuunk ee nbi hau yees in panan, ma nalamib Na' Yesus he nmuis. Oke te atoni nane na'uab ma nak, “Maut he tpao ma hit tnuu' tiit! Kais-kaisa' nai' na' Elia neem ma nasaunt Ee na'ko hau nehe.’’ⁱ

37 Oke te Na' Yesus anhunun antein, ma In anmaet.

38 Anbi Uim Onen Uuf ee, anmui' naan muit ekat eno a'naek es, nakfiil ye he naniin Uisneno In Ke'an Aknino'. Tabu Na' Yesus snaasn ee natfeek, muit ekat eno 'naek nane natpisu nbati yon nua' na'ko fafon tal antia 'pinan.^j

39 Anbi Golgota, a'naak solauls es anhake nhaumaak Na' Yesus In hau nehe. Tabu in niit Na' Yesus In i'maten, in naskeek. Oke te in na'uab ma nak, “Namneo'! Atoni ii namneo-namneo Uisneno in Anah!’’

40-41 Anmui' naan bifee fauk le' napeen Na' Yesus In i'maten na'ko 'loo. Sin es le' nahunut te antuthae Na' Yesus nok In asimo lasi sin anbin pah Galilea. Sin es le' eina' Salome, bi Maria na'ko kuan Makdala, nok eina' Maria (le' na' Yakobus muni' nok na' Yoses^k sin einaf), ma bifee mfaun bian antein le' neem nabu-buan nok Na' Yesus nbin Yerusalem.^l

42-43 Oke te atoni yes naim lanan he nasanut Na' Yesus In aon-ta'un amates na'ko hau nehe. Atoni nane kanan na' Yusuf. In na'ko koot Arimatea. In le' nane tuaf es na'ko pukan afeek lais palsait Yahudi. In neekn aa leko. In anhaat ma npao plenat Uisneno le' he neem.

Na' Yesus anmaet nok neon nima'. Noka' te na'euk nok atoni Yahudis sin neon onen. Es nane te, anbi neon nima' nane, na' Yusuf he nasanut nahunun Na' Yesus In ta'un. Na' Yusuf anha'tain in nekan, ma nnao nbaiseun gubernur Pilatus he nasanut Na' Yesus In ta'un amates nane. 44 Tabu gubernur ee anneen na' Yusuf in haan totis nane te, in ansanmaak. On nane in na'uab ma nak, “Ailoo! Atoni nane anmaet labah! Anbi au teenb ee te, au 'ak oin fe' kahaf.’’

Oke te in nleun tuaf he nboin a'naak solalus. Tabu in neem antia te, gubernur ee nataan ma nak, “On mee? Na' Yesus anmate nlali yeen, ai' fe' kahaf?’’

45 A'naak solalus nane nataa ma nak, “Namneo'! In nmaet nalali yeen.’’ Tabu gubernur ee nneen on nane te, in nfee manuan neu na' Yusuf he nnao nasanut Na' Yesus In aon-ta'un nane.

46 Oke te na' Yusuf annao neu Golgota. Ma in nasanut Na' Yesus In ta'un na'ko hau nehe. In n'aum aon-ta'un nane neik mau' feu' le' ma'upa. Anbi nane, sin fe' anpaah nalail noup fatu wes anbi 'neut' fatu. Oke te sin nataam aon-ta'un nane neu noup fatu. On nanet sin an'obe neik faut bena 'naek es, he n'eek na'maet noup fatu nane. Oke te na' Yusuf sin anfanin.

47 Tabu nane, bi Maria na'ko Makdala, ma eina' Maria (na' Yoses in einaf), sin nokan anbin nane msa'. Sin nua sin ankius nalek-leko' bale le' sin ntao Na' Yesus In aon-ta'un nane.