Sin na'uab eun on nane, natuin anmeu te, atoni Yahudis sin na'euk nok neno 'naek ‘Paska’, ma ‘Fesat Utunu' ka Maseol Laul Haef fa’. Anbi nenon le' nane, sin feest eun he namnau nafani' tabu ahunut, le' Uisneno napoitan sin beif ma sin na'if sin na'ko pah Masir.^a

3 Anbi kuan Betania, anmui' atoni yes, kanan na' Simon. Nahunu te, atoni anma'nisin, natuin in ameen bono'. Mes tabu ii, in naleok nalali yen.

On nane tabu neno 'naek eun ka ntian fa fe', Na' Yesus sin annaon ma nbukaen anbin na' Simon in ume. Tabu sin nbukaen, bifee yes neem ma na'euk nok Na' Yesus. In nnaa' neik boit fatu wees, le' nalai ye neik miin foo meni' le' ma'upa'.^b Oke te bifee nane an'iup nain botil nane in to'an. Ma in nalonib akle'o-kle'o neu Na' Yesus In i'nakan he nfani 'taka' nak in ntola' Na' Yesus.

4 Mes anbi nane, anmui' atoni fauk le' anbukaen nokan amsa'. Tabu sin niit bifee nane anmoe' on le' nanet, sin nato'an ma na'uab eun nok haan aslaet ma nak, “Hoi! Bifee saa' es le' ii, es na' in npolin naleu' miin foo meni' ma'upa' le' ii!? 5 Leko nneis in na'sosa' mina' le' naa! Oke te in nbait loit enu neu ama'mui't sin! Natuin miin foo meni' nane in upan namnees nok tuaf es in kai anbi toon es.’’ Oke te sin nabokan in nok ma'tane'.

6 Mes Na' Yesus nataa sin ma nak, “Hi kais misusab bifee le' ii! Mifetin! Au 'maliin, natuin in n'oop nalail miin foo meni' neu Au aok. 7 Ama'mui't eun nok ki neno-neno. On nane hi mibe'i amtulun ma ambaab sin anbi ale' tabu. Mes ka 'loo fa te, Au ka neu he ubua 'tein fa ok ki'.^c 8 Au 'monik ii ka 'loo fa ntein. Ma bifee le' nalonib mina' neu Kau', in anpanat nain Au aok ii, on le' in nkanin nain fobona' neu Au aok-ta'uk. 9 Mimnau milek-leko'! Uisneno In Lais Leko of nanaob on anbi mee-mee nbi pah-pinan ii, ma tuaf of nanu'un anmatoom nok bifee ii in i'mo'en alekot. Maut he ale' mansian aa namnau in.’’

10 Oke te anmui' tuaf es na'ko asimo lasi tuaf bo'es am nua', kanan na' Judas Iskariot. In anpoi ma nnao mnaim a'naak lais palsait Yahudi sin i'naakt eun, he na'sosa' Na' Yesus neu sin. Tabu in na'euk nok sin, in natiaba' in salit. 11 Tabu a'naakt eun anneen na' Judas in uaban nane, sin nmalinan nmaten. Ma sin nba'an ma nak, “Kaul ho he mu'sosa' Na' Yesus meu kai, hai of ambaen ko'.’’ Oke te na' Judas anpoi ma nmulai naim lanan he nana'at Na' Yesus neu sin.

12 Neno nane, neon ahunut na'ko neno 'naek atoni Yahudis sin. Anbi neno nane, sin biasa ntunun utunu' le' ka malaul haef fa', ma sin anlolon 'bib-kase msa'. On nanet Na' Yesus In asimo lasi sin neman ma nataan Ee ma nak, “Aam! Neno ii, hit neno 'naek Paska. On nane Ho mloim he hai mnao miloitan bael fesat Paska nbi mee?’’

13 Oke te Na' Yesus anleun In asimo lasi tuaf nua' ma nak, “Hi mnao mihuun meu koot. Anbi nane, of hi mi'euk mok atoni yes le' nasaah oe nbi kuis aan' es. Hi mnao mituin ee. 14 Kaul in nnao ntaam neu ume mee te, hi mtaam mituin ee. Oke te hi m'eut meu uim tuaf nane ma mak, ‘Aam! Hai Kulu ntoit bale he nmoe' fesat Paska nok In asimo lasi sin.’ 15 Fun atoni nane of nalulu' ki ke'an manuan es, et ume ktuta' nane in tunan. In naloitan nalail ke'an nane. On nane hi nua ki mibalab bukaet anbi nane.’’

16 Oke te sin nua sin annaon neun koot. Anbi nane, sin na'euk nok ale' saa'-saa' le' Na' Yesus an'etun nalail sin. On nane te sin nabalab he Na' Yesus sin nbukaen fesat Paska anbin nane. Oke te sin nua sin anfanin ma na'auba' Na' Yesus nok In asimo lasi bian.

17 Tabu manas he ntees, Na' Yesus nok In asimo lasi bo'es am nua' annaon ntaman neu bale nane.

18 Anbin bale nane, sin ntokon ma nbukaen nabu-buan. Tabu sin nbukaen, Na' Yesus na'uab ma nak, “Hi mneen! Anmui' tuaf es na'ko ki le' of na'sosa' Kau neu atoni bian.’’^d

19 Tabu sin nneen on nane te, sin neek eun na'uun eun. Oke te sin es am es ate nataan Na' Yesus ma nak, “Aam! Le' Ho mteek ee nane, ka au fa, oo?’’

20 Na' Yesus nataa ma nak, “Tuaf le' nalepa' utunu' nok Kau' anbi 'pik-oef ee, of in es le' na'sosa' Kau'. 21 Mimnau, oo! Au, Mansian Namneo-Namneo le' ii, lo mees he 'maet, on le' matui' nalail et Uisneno In Sula Knino'. On nanet ampaant om! Atoni le' na'sosa' Kau nane, of in nsutai kuun in amle'ut! Leko nneis bait in einaf kais nahonis nani.’’

22 Tabu sin nbukaen, Na' Yesus nait naan utunu' piis' es, ma ntoit makasi neu Uisneno. Oke te In an'ebi utunu' nane pisa'-pisa', ma nfee sin neu In asimo lasi sin. Oke te In na'uab ma nak, “Utunu' le' ii, Au aok. Maiti ma mbukae nai'.’’

23 Oke te In nait naan klaa mninut le' matua tua miin-kase. Ma In ntoit makasi neu Uisneno. Oke te In nnona' klaas nane neu In asimo lasi sin, he sin anbukaen. 24 Ma In na'uab ma nak, “Tua miin-kase le' ii, Au naa'. In of nat'oop he nsoi nafetin too mfaun. Naa' le' ii, nfani 'taka' le' namnauba' kit nak, saa' le' Uisneno nba'an nalail sin nane, anlalin es le' ii. Maiti ma mbukae nai'.^e 25 Amneen milek-leko'! Anmulai mabe' ii, Au ka neu he 'bukae 'tein fa tua miin-kase on le' ii. Tal Au 'ok Au Ama' amtuun Om ma miplenat mibu-bua nbi sonaf neno tunan, na' Au 'bukae 'tein.’’

26 Oke te sin nsii siit es, he nbo'is Uisneno. Nalalit sin npoin nok fai, ma nnaon neu 'tubu' Saitun.

27 Tabu sin annaon nabuan nane, Na' Yesus an'eut nanin sin ma nak, “Mabe' ii, hi aal ki of maen misaitan Kau'. Fun matui' nalali yeen et Uisneno In Sula Knino' nak,

28 Namneo, Au lo mees he 'maet. Mes kaul Au 'moni 'fani yeen te, Au of a'nao uhunun ki 'eu propinsi Galilea.’’^g

29 Oke te na' Petrus anprotees ma nak, “Aam! Maski sin naen nasaitan Ko, mes au ka neu fa he 'aen!’’

30 Na' Yesus nataa ma nak, “Pe'u! Nati' mumnau'! Mabe' ii, nahuun na'ko manu ankokleo' hana' nua', ho msebuten mulail Kau hae' tenu ween mak, ho ka muhiin Kau fa'!’’

31 Mes na' Petrus anfiti' hanan ma nak, “Kahaf! Kaul Ho mmate te, au 'maet 'ok Ko'. Au ka neu fa he 'aen usaitan Ko'!’’

Na' Petrus in aon-bian sin es am es ate na'uab on nane msa'.

32 Oke te Na' Yesus nok sin annaon nfinin ma antian po'an es et 'tubu' Saitun, kanan ‘Getsemani’. On nane te Na' Yesus na'uab neu sin ma nak, “Amtoko ma mpao Kau ambi le' ii. Au 'nao he 'onen nbi le' naa.’’

33 Ma In nboin nok na' Petrus, na' Yakobus, ma na' Yohanis, he nnao nabua nokan. Anmulai na'ko tabu nane, In nekan ansuus ma ka ntaininas fa'. 34 In na'uab neu sin ma nak, “Au nekak ansuus anmaet! Au utniin ate Au he 'mate yeen. Hi mtook ma mpao nbi le' ii.’’

35-36 Oke te In nnao anteni a'kle'o, nalali te anli'tuu ma n'onen ma nak, “Ama' amanekat! Kaul Ho mlomi te, Au kais a'sutai ma'ne'at nane tal a'tia he 'maet on le' ii. Au uhiin ulail 'ak, ka tiit tain fa saa' le' Ho ka mubei' he mmoe' maan ee fa'. On nane kaul leko te, Ho mait mu'loba' lais ha'mu'it le' ii na'ko Kau'. Mes kaisa' mutuin Au 'lomik; so' maut he mutuin Ho 'lomim.’’

37 Oke te In nfain neu In asimo lasi tuaf teun eun nane, mes sin ntupan nfinin. On nane te In npoo' na'fena' sin, ma na'uab neu na' Petrus ma nak, “Hoe! Pe'u!^h Ho mtuup kuum, oo? Au 'bi naa labah. Mes hi he mpao a'kle'o msa', hi ka mibei' fa'! 38 Mumeu maatm eun nane fe'. Oke te amfeen he mpao mok Kau'! Hi neekm eun anlomin he hi mmoe' lais leko, mes hi aom eun an'olen. On nanet leko nneis hi m'onen, he kaul 'suu' te neem ate, kais niis naan ki'.’’ⁱ

39 Oke te Na' Yesus annao ma n'onen anteni haef es. In ntoit antein he Uisneno nait na'loba' lais ha'mu'it le' nane na'ko In aon. 40 Oke te In nfain neem neu In asimo lasi tuaf teun eun nane. Mes sin ntupan nfinin, fun sin maatk eun nma'feen le'uf. On nane te In anpoo' nafena' ntein sin. Mes sin ka nahine ntein-tenin fa, he nataa Ye nak saa'.

41 Oke te Na' Yesus annao nasaitan sin he n'onen hae tenu'. Nalali te In nfain neem, ma anpoo' nafena' antein sin. In na'uab ma nak, “Ailoo! Hi fe' amtuup-tuup, oo? Noo baah! Amfeen nai! Fun atoni le' na'sosa' Kau, Mansian Namneo-Namneo le' ii, anhaumaak een. Tabu ii, sin he nheek ma nnona' Kau neu atoni amoe' sanat sin. 42 Amfeen nai ma mkiso nai'! Atoni le' na'sosa' Kau, neemn een. Eim he tnao ta'euk tok sin!’’

43 Tabu Na' Yesus fe' na'uab on nane te, nok askeken na' Judas nok atoni mfaun eun neman. Sin neik suin tuka' nok hau tuka', he nheek Na' Yesus. Sin nmoe' lasi nane, fun sin napenin aplenat na'ko atoni Yahudis sin i'naakt eun. Sin aal sin es le' a'nakat lasi palsait Yahudi sin i'naakt eun, anoina' lasi palsait eun, ma mnais halat Yahudi sin. 44 Na' Judas an'eut nanin sin ma nak, “Amnuu' milek-leko'! Au 'neek sekau te, mheke nai'! In es le' hi mam-mami!’’

45 On nanet tabu na' Judas nok sin antian bale nane, in neem anhake nbi Na' Yesus In matan. Ma in anse'o Ye ma nak, “Aam Kulu!’’ Ma na' Judas anhoo ma nneek In. 46 Oke te too mfaun eun neman he nheek Na' Yesus.

47 Mes Na' Yesus In asimo lasi tuaf es anfaik in benas, ma nsaip namouf atoni yes in luken noon. Atoin luek apapat nane, lais palsait Yahudi sin i'naak anesit, in ate. 48 Oke te Na' Yesus na'uab nok tuaf eun le' he nheke nane ma nak, “On mee? Hi mak Au le' ii, atoin abulalut Kau, oo? Es na' hi eim he mheek Kau meik suni' ma hau tuka'? 49 Neno-neno te, Au unoina' ki a'bi Uisneno In Uim Onen Uuf, mes ka tiit fa tuaf es, le' neem he nheek Kau'. Eim he mheek Kau nai'! Fun lasi nane matui' nalail na'ko unu' et Uisneno In Sula Knino'.’’^j

50 Na' Yesus In asimo lasi sin namtau nmaten. On nane sin naen nasaitn Ee nmees.

51 Anbi nane, anmui' atoin muinf es, annao natuina' Na' Yesus. In tainuus mau' tuuk es. Atoni mfaun sin he nheek ye msa', 52 mes sin nnaa' naan ahaa in mau'. On nanet in naen a'hoal aah, natuin in namtau nmaet.

53 Oke te sin neik Na' Yesus annao neu lais palsait Yahudi sin i'naak anesit in ume. Anbi nane, a'naet eun nabuan nanin. Sin aal sin es le' a'naak lais palsait Yahudi sin i'naakt eun, anoina' lasi palsait sin, ma atoni mnasi' halat Yahudi sin.

54 Tabu sin nheek neik Na' Yesus ate, na' Petrus natuin nok a'tol-tolo', tal antia lais palsait Yahudi sin i'naak anesit in ume. In antaam anbi ume nane in tanana', ma in ntook nok alaal ai sin.

55 Anbi ume nane in nanan, a'naak lais palsait Yahudi sin i'naakt eun na'uab eun nok afeek lais palsait eun. Sin aal sin namin bukti he nasaan Na' Yesus, fun sin he nhukun na'mate. Mes sin ka napenin fa bukti saa'-saa'. 56 Oke te sin anhaman saksii namfau', he namouf Na' Yesus. Mes sin uab eun nasulin es nok es.

57 Oke te anmui' saksii bian le' anfeen anhaken ma na'uab eun puta-bliu ma nak, 58 “Hai mneen atoni ii na'uab ma nak, ‘Au of utseleb Uim Onen Uuf, le' nafena' neki 'nimaf mansian. Ma neno teun namuni te, Au ufena' ufani' Ume nane, mes ka 'eik fa 'nimaf mansian.’’’^k 59 Mes sin uab eun nasulin es nok es.

60 Oke te lais palsait Yahudi sin i'naak anesit anfeen anhaek anbi ale' afeek lasi nane sin maatk eun. In nataan Na' Yesus ma nak, “Too mfaun ii natlaak Ko'. Mes nasaa' am es Ho mtaa' aa kuum?’’

61 Mes Na' Yesus ka nataa fa fefa' mese' msa'. On nanet lais palsait Yahudi sin i'naak anesit nataan Ee ma nak, “Ho m'eut miit! In amneon ee, Ho le' ii, namneo-namneo Kristus, Uisneno In Anah le' In anba'an nani Ye na'ko un-unun?’’

62 Na' Yesus nataa ma nak, “Namneo'! In es le' Au le' ii. Hi aal ki of miit Kau', Mansian Namneo-Namneo le' ii, a'toko 'bi sonaf neno tunan, a'bi Uisneno In aon-bian a'ne'u. Uisneno anmui' kuasat ma'tane' nneis! Au of 'ok Ne mnaa' aplenat mibu-bua'. Namuni te, Au 'saun 'oum a'bi nope u'ko sonaf neno tunan.’’^l

63 Anneen Na' Yesus In uaban nane te, lais palsait Yahudi sin i'naak anesit natoo' ma'tane', tal antia in npius naklati' in beet-kone. Oke te in nkoa' ma na'uab neu ale' afeek lasin sin ma nak, “Hit kais tami ttein saksii! 64 Hi mneen kiim meik hi luekm eun. In es neikn on na'uab on nane. In nait In tuan ee nfain Uisneno in Anah. In na'le'uf Uisneno! Tatuin hit atolan lais palsait, kaul tuaf es nanees on nok Uisneno, in lo mees he nmaet! On nane tabu ii, hi he mifeka mak saa'?’’

On nanet sin nafekan ok-oke' ma nak, “Namneo', atoni ii, ansaan! On nane lo mees he thukun tisan!’’^m

65 Oke te tuaf fauk neik intaman ma naloon Na' Yesus. Sin n'aum naan In maatn enu, oke te sin nbiso. On nanet sin nataan Ee ma nak, “Ho mteek miit, sekau es le' anbius ko'?’’ Oke te sin nboin apao Uim Onen Uuf eun, he neem ma neik Na' Yesus. Tabu sin neki nnao, sin npaas na'fan-fani' In.

66-67 Tabu nane, na' Petrus fe' antoko nbi tanana'. Oke te aet bifee tuaf es na'ko lais palsait Yahudi sin i'naak anesit, neem niit na' Petrus anlaal ai. In nnu'u nalek-leko' na' Petrus in human, ma in na'uab ma nak, “Le' lelon na, ho mubua mok Na' Yesus, atoni Nasaret nane. 'Teeb, ai'?’’

68 Mes na' Petrus nataa ma nak, “Kahaf! Nasaa' am es ho mutaan on nane? Au ka uhiin Ye fa'!’’ Oke te na' Petrus anpoi ma anhake nbi eno' 'kono'. [Na'euk tabu nane, manu nkokleo'.]ⁿ

69 Oke te ate le' nane niit antein na' Petrus. Ma in an'etun atoni mfaun abiit eun nane ma nak, “In le' ii, tuaf es na'ko sin imsa'.’’

70 Mes na' Petrus anprotees ma nak, “Of oin ho mumaun! Au ka uhiin Ye fa'!’’

Ka 'loo fa te, tuaf es antein le' anhake nbi nane na'uab antein neu na' Petrus ma nak, “Hoe! Ho he mputa-bliu mak ho ka mubua fa mok sin! Hi aal ki atoni Galileas!’’

71 Mes na' Petrus anlaban ma'tane' ma nak, “Au 'suup! Au ka uhiin fa atoni nane!’’

72 Nateef tabu in na'uab on nane te, manu nkokleo' hae' nua. On nanet na' Petrus namnau niit Na' Yesus In uaban le' lelon na nak, “Nahuun na'ko manu nkokleo' hae' nua ate, ho msebuten Kau hae' tenu ween.’’

Tabu namnau niit on nane te, na' Petrus ankae ma nse'-se'ul.