Nu'un Ahun-hunut
Na'uub on na'ko Uisneno nmoe' neno tnanan ma pah-pinan
(Kejadian)
Uisneno nmoe' neno tnanan ma pah-pinan nok in nesan
1
Nahunut Uisneno nmoe' neno tnanan ma pah-pinan.2 Tabu nane, pah-pinan fe' ka mamo'ek fa, ma ale' saa'-saa' anbasiksana ma leo-basu. Ala nmu'i yaa, oe. Ma meis'okan an'aum naan ee. Uisneno In Ismanan natbo-boe nbi oe tunan.a
3 Oka te Uisneno nakua' a'an ma nak, “Lo mees he nmui' me'u.” Na'uab nalail on nane te, meu-sine anlail. 4 Annuu' meu-sine te, In nmaliin, natuin saa' le' In anmo'e nane lo leko ma namaas. Nalalit In nbatis meu-sine na'ko meis'okan, he es-es ate nmui' kuun in tabu. 5 In nakanab meu-sine nak, ‘manas’, ma meis'okan nak, ‘fai’. Neno nane, neno wes namsoup wen.
6-7 Nalalit Uisneno nakua' a'an antein ma nak, “Lo mees he nmui' bael luman he nbatis oe. Es nane te, anmui' oe nbi fafon, ma nmui' oe nbi 'piin.” Na'uab nalail on nane te, oe nane anbaits ok anlail bale nua', fafon ma 'piin. 8 Nalalit In nakanab bael luman abit fafon nak, ‘neno tnanan’. Neno nane, neno nua' namsoup wen.
9 Nalalit Uisneno nakua a'an antein ma nak, “Oe abit a'pinan nane lo mees he nakbuub ok anbi bale mese', maut he nmui' bael meto'.” Na'uab nalail on nane te, bael meto' anpoi neem. 10 Nalalit In nakanab bael meto' nane, ‘nai' meto'’; ma In nteek oe le' nakbuub on nane, ‘tasi’. Annuu ale' nane te, In nmaliin, natuin saa' le' In anmo'e nane, lo leko ma namaas. 11 Nalalit Uisneno nakua' a'an antein ma nak, “Auf meto ii lo mees he natolob hau huma'-huma'. Lo mees he nmui' hau manoo', hau masufa', ma hau mafuaf. Maut he hau mese'-mese' te, napoitan fini natuin in lisan.” Na'uab nalail on nane te, ale' hau sin nane anlalin. 12 Anbi auf meto' nane, hau sin napoitan fini natuin sin liisk eun mese'-mese'. Annuu on nane te, In nmaliin, natuin saa' le' In anmo'e nane, lo leko ma namaas. 13 Neno nane, neno teun namsoup wen.
14-15 Nalalit Uisneno nakua' a'an antein ma nak, “Anbi fafon na, lo mees he nmui' blua' me'u huma'-huma' he ntana' pah-pinan. Lo he nmui' blua' atana' anbi tabu manas, ma nmui' blua' atana' nbi tabu fai. Blua' eun nane anlalin a'taka' he tsoi' tahiin neno, toon, ma tabu.” Na'uab nalail on nane te, blua' me'un abiit neno tnanan sin anbolan. 16 In anmo'e blua' meu-sine huma' nua' le' a'naek. Es a'naek anneis, antana' anbi tabu manas; es suuk akbaun antana' anbi tabu fai. In anmo'e kfuun amsa'. 17 In nakfili blua' eun nane nbi neno tnanan he ntana' pah-pinan. 18 Nalalit sin ntaan' eun anbi tabu manas, ma tabu fai. Nok lanan nane, sin nbatis meu-sine na'ko meis'okan. Annuu niit sin ite, In nmaliin, natuin saa' le' In anmo'e nane, lo leko ma namaas. 19 Neno nane, neno haa' namsoup wen.
20 Nalalit Uisneno nakua' a'an antein ma nak, “Lo mees he nmui' kaun oe huma'-huma' le' anmonin anbin oe. Ma lo mees he nmui' kolo huma'-huma' le' natpenen anbin neno tnanan.” 21 Nalalit In anmoe' ika' huma'-huma' ma kauna' bian le' anmonin anbin oe. In anmo'e kolo huma'-huma' amsa' le' natpenen anbin neno tnanan. Annuu saa' le' In anmoe' sin nane te, In nmaliin, natuin saa' le' In anmo'e nane, lo leko ma namaas. 22 Nalalit In nakua' a'an anfee tetus neu ale' kanan mui't eun nane ma nak, “Iik' eun lo mees he naka'un, he naheun oe nbin bale-bale. Ma kolo sin on nane msa'.” 23 Neno nane, neno niim namsoup wen.
24-25 Nalalit Uisneno nakua a'an antein ma nak, “Lo mees he nmui' mu'it huma'-huma' le' anmonin anbin nai' meto'. Sin es eun le' mui' aem, mui' fui, ma anonok, es-es ate nok nain in lisan.” Na'uab nalail on nane te, mui't eun nane anlalin. Annuu on nane te, In nmaliin, natuin saa' le' In anmo'e nane, lo leko ma namaas.
26 Nalalit Uisneno nakua' a'an antein ma nak, “Eim he Hitb tmoe' mansian tatuin Hit huumk am Hit masak, Hit i'moe'k am Hit i'taok. Maut he sin es npanat ma npao iik' eun anbin tasi, ale' kolo nbin neno tnanan, ale' mui' aem, ma mu'it bian le' anmonin anbin pah-pinan.”c
27 On nane te, In anmoe' mansian namnees nok In human ma In masan, In i'mo'en ma In i'taon. In anmoe' sin, atoni ma bifee. 28 On nane te In na'uab anfeen sin tetus ma nak, “Hi lo mees he mihoin he miheun pah-pinan, mpanat ma mpao amsa'. Au 'fee ki plenat he m'ulus iik' eun, kolo sin, ma ale' kanan mui't eun anbin nai' meto'. 29 Amneen milek-leko'! Au 'fee ki mnahat huma'-huma' anbi pah-pinan. Es eun le': hau manoo', hau masufa', ma hau mafua'. 30 Au 'fee haun le' nane he nlalin amnahat neu mui't eun amsa'. Anmu'i mnahat neu mui' aem, mui' fui, anonok, ma kolo sin amsa'.” Na'uab nalail on nane te, ale' kanan mnahat namtiis. 31 Annuu niit sin on nane te, In nmaliin, natuin saa' le' In anmo'e nane, lo leko 'maten. Neno nane, neno nee namsoup wen.