Usif Yesus an'eut nain anmatoom nok Uisneno In Uim Onen Uuf ee in atselen
(Na' Mateos 24:1-2; Na' Lukas 21:5-6)
13
Oke te Na' Yesus nok In asimo lasi sin anpoi na'ko Uim Onen Uuf. Tabu sin npoin, In asimo lasi tuaf es anluul Uim Onen Uuf nane, ma na'uab am nak, “Aiti Ho mnuu' miit ii fe'! Ume ii leokn ee kaah! Sin anbakin in fatu 'naek eun naleko nmaten!’’
Na' Markus 13:1-27
2 Mes Na' Yesus nataa ye ma nak “Uim Onen ii, lo namaas! Mes ka 'loo fa te, sin of anpukai natseleb ale' fatun le' ii.’’
Neon amsoupt eun sin i'taak eun
(Na' Mateos 24:3-14; Na' Lukas 21:7-19)
3 Oke te Na' Yesus sin annaon neun 'tubu' Saitun, ma ntokon nbain eun an'anin Uisneno In Uim Onen Uuf. Nalalit In asimo lasi sin tuaf haa', neman ma na'uab nokan. Sin es le' na' Petrus, na' Yakobus, na' Yohanis, ma na' Anderias. 4 Sin nataan Ee ma nak, “Aam! Aiti Ho m'eut mufani' miit kai Ho uab le' lelon na. Leka' te in tabu antia? Ma in i'taakn enu, on eun le' mee?’’
5 Oke te Na' Yesus nataa ma nak, “Lamun hi mpanat milek-leko', he kais anfuil naan ki'. 6 Natuin of anmui' tuaf amfaun le' neman ma npaas sin i'baask enu ma nak, ‘Au le' ii, Kristus, Atoni le' Uisneno nba'an nani ye na'ko unu'.’ On nanet sin mes anfuil naan tuaf amfaun. 7 Kaul hi miit atoni anmakenan, ai' hi mneen uab anin nak anmui' makenat et mee-mee, hi kais mimtau'. Natuin ale' lasi nane lo he nbolan, mes neon amsoupt eun ka ntian fa fe'. 8 Fun uuf es of anfeen ma nmalaban nok uuf es. Ma pah es of anmakeen nok pah es. Nainunus anhasu' anbi mee-mee. Amnahas of ma'tane' msa'. Ale' lasi le' ii anfanin a'taka' namnees on le' bifee ma'apu' le' natniin meen mahonit.
9 On nane hi aal ki lo mees he mpanat milek-leko'. Sin of neman ma nheek ki, oke te anheel neik ki neu ume feek lasi palsait. Ma sin of anbiso ki nbi uim onen sin naank eun. Ma sin of anfuut neik ki neu ale' anaa' aplenat sin, natuin hi mituina' Kau'. Mes lasi nane msa', anfain lanan he hi m'etun sin ale' lasi anmatoom nok Kau'. 10 Fun Uisneno In aanh eun lo mees he nnaon ma n'etun nahunun Au Lais Leko neu ale' uuf abit pah-pinan ii, oke te na' neon amsoupt eun antian. 11 Mimnau'! Kaul sin nfuut neik ki neu ume feek lasi, hi kais mimtau' ma mitenab mak, ‘Au he u'uab 'ak saa'? Ai' au he utaa 'ak saa'?’ Kaul in tabu antia, hi mi'uab mituina' saa' le' Uisneno In Asmana Knino' an'etu ee neu ki.a
12 Anbi ume yes in nanan, kaul tuaf es anpalsai neu Kau', of in olif ma in tataf sin es le' namin lanan he nlool nisan. Kaul aanh ee es le' anpalsai, of in aamf aa kuun es le' neikn on anlool nisan. Ma kaul in einaf ma in amaf anpalsai Kau', of sin aanh eun es le' anlool niis sin. 13 On nanet of atoni bian eun nato'an niis ki, natuin hi mpalsai meu Kau'. Mes sekau es le' nalan tal antia namsoup, Uisneno lo mees nafeitn ee ma nfee ne 'honis.’’b
Ampanat milek-leko' natuin neon amsoupt eun anpaumaakn een
(Na' Mateos 24:15-28; Na' Lukas 21:20-24)
14 Na' Yesus na'uab piut ma nak, “Tuaf es le' neik moe' 'poeteol le'uf of he neem. In antaam ma nhake nbi bael kae nbi Uisneno In Uim Onen Uuf, le' ka npantas fa neu ne, tal in nha'nisib bale nane. Es on nane te, Uisneno annao nasaitan bale nane. Kaul hi miit lasi nane, hi mpanat milek-leko'! (Sekau es le' ansoi' le' ii te, lo mees he npaant on!) Nane anfani 'taka' nak neon susal sin anpaumaak leu'-le'uf een. Kaul hi miit on nane te, abiit eun propinsi Yudea amfeen maen nai meu 'tubu sin.c 15 Ma hi lo mees he maen lab-laab, he kais misleut wom. Kaul tuaf mee npoi nalail na'ko in ume, kais annao nfain he naiti blua' bian antein. 16 Ma tuaf le' anbi lene, kais anfain koit he nait tai nusat antein. Lo mees in naen anfiin!d 17 Le' ansusal anneis-neisit, es le' bifee ma'apu', ma bifee le' nasuus li'ana'. Fun sin ka nabei' fa nae nanan. 18 On nane leko nneis hi m'onen ma amtoit he lais amle'ut nane kais neem na'euk nok tabu ulan ma anin. 19 Fun tabu nane, ma'nuukt aa 'nae' le'uf! Anmulai na'ko Uisneno nmoe' pah-pinan ii tal antia neno ii, ka tiit fa susal es a'nae' ee on le' nane. Ma atoni of ka niit antein fa susal nahuum on le' nane.e 20 Kaul Uisneno ka na'palan fa neon susal sin nane, ka tiit fa tuaf he nmoin nabaal. Mes natuin Uisneno nneek niis In aan mabeit eun, es nane te In na'palan neon susal sin nane.
21 Kaul nenon nane antian ate, hi of amneen atoni bian eun na'uab eun ma nak, ‘Amnuu' nai! Kristus es ii!’ Mes tuaf bian nak, ‘Kristus es naa!’ Mes nati' hi kais amneen, oo! 22 Ma of anmui' atoni le' anpoi ma npaas in i'basan ma nak, ‘Au le' ii, Kristus!’ Bian antein nak, ‘Au le' ii, Uisneno In mafefa knino'.’ Sin of anmo'en lasi mkakat huma'-huma' neki kuasat na'ko niut amle'ut he nputa-bliu. Sin namin lanan huma'-huma' he kaul leko te, sin nasekeb Uisneno Inin. 23 Hi lo mees he mpanat milek-leko'! Neon suusl eun nane ka antian fa fe', mes Au umnaub 'ain ki sin!’’
Mansian Namneo-Namneo In amneman
(Na' Mateos 24:29-31; Na' Lukas 21:25-28)
24 Oke te Na' Yesus anluut antein In uaban neu In asimo lasi sin ma nak, “Kaul neon suusl eun anfinin ate,
‘Maans ee of nameis'ook,
ma funan of nasab-saab aah.f
25 Akfuun eun of anbamoufun na'ko neno tnanan,
ma ale' kuasat abiit eun neno tnanan ansiksaan ok.’g
26 Oke te na' ale' mansian of niit Kau', Mansian Namneo-Namneo le' ii. Of Au 'oum u'ko neno tunan. Ma ale' too mfaun eun of niit Au kuasat, Au pinak ma Au klahak ok-oke'.h 27 Oke te Au of a'leun Uisneno In ameupt eun na'ko sonaf neno tunan, he annaon nabuaba' ale' tuaf eun le' Au 'beit ulail sin, na'ko pah-pinan ii pana-mpanan, na'ko neon-saet tal antia neon-tees, na'ko kaliin a'lii tal antia kaliin a'ne'u.’’
Neon susal sin anfanin 'taka' neu Usif Yesus In imneman
(Na' Mateos 24:32-35; Na' Lukas 21:29-33)
28 Na' Yesus anluut antein In uaban ma nak, “Au 'aiti 'leta' u'ko hau. Kaul hau nane in noon enu nmulai namnatun, nane anfanin 'taka' nak tabu faok-nais ee anhaumaak een.
Na' Markus 13:28-37
29 On nane msa', kaul hi miit neon susal sin nane neman, on le' saa' le' Au 'etu 'lail ki nane, nane anfani 'taka' nak anhaumaak he Au 'oum een. 30 Tabu ii, amneen milek-leko'! Na'ko hi al-aal ki le' ii, of anmui' tuaf le' fe' anmoin, tabu neon susal sin nane antian. 31 Maski neno tnanan ma pah-pinan namneuk, mes Au uab ii of antahan nabal-baal.’’
Usif Yesus In imneman nane ma'tolo'
(Na' Mateos 24:36-44)
32 Na' Yesus anluut antein ma nak, “Ka tiit fa tuaf es, le' nahiin neno mee, ai' tabu ma leku mee te, of Au 'fain 'oum. Uisneno In ameupt eun na'ko sonaf neno tunan amsa' ka nahinen fa'. Au Tuak ii msa', ka uhiin fa'. Ala Au Ama' anmees es nahiin.i 33 Natuin lasi nane te, hi lo mees he mpanat milek-leko', natuin hi ka mihiin maan fa leka' te in tabu ntia.
34 Ka 'loo fa te, Au 'nao usaitan ki. Mes of Au 'fain 'oum. Namnees on le' tuaf le' annao npolin in ume neu bale 'loo-loo. In anleun in ameupt eun he npao in ume nane lek-leok. Ma in nbati nfeen sin es am es nok in mepu. In naplenat apao eno' he npanat nalek-leko' tal antia in nfain neem.j 35 Hi lo mees he mpao fai-manas amsa', natuin hi ka mihiin fa tabu mee te, uim tuaf nane of anfain neem. He manas anfai, oo, fai tnana', oo, manas na'pupu', oo, ai' manas fe' ansae'. Hi ka mihiin maan fa neu he leka'. 36 Kais-kaisa' in neem nok askeken ate, in napein naan ki amtuup amfiin ma mikoon.
37 On nanet saa' le' Au 'eut 'eu ki ii, Au 'etun 'eu bian sin imsa' 'ak, ‘Hi lo mees he mpanat milek-leko' he msiom Kau'.’’’
[Nok lasi nane te, Usif Yesus natu'ab In uaban nok In asimo lasi sin anbi 'tubu' Saitun.]