2 Antia tabu he nseu anggur in fuan, nai tuaf nane anleun in ameupt es, he nnao neu ameup po'an nane he nait in paa'. 3 Mes tabu in ntia te, ameup poo'n eun nane anheke ma nbiso'. Oke te sin nlenu he nfain luum aah.

4 Nalalit nai tuaf nane anlenu ntein in ameupt es. Mes ameup poo'n eun nane antuut in i'nakan tal papa' oke'. Nalalit sin namae ye, ma nliu' na'aenab. 5 Oke te nai tuaf nane anlenu ntein in ameput tuaf es a'teta'. Mes sin anlool nisan. Maski sin nmo'en on mee-on mee msa', mes nai tuaf nane anleun in ameput sin piut. Mes ameup poo'n eun nane anbius bian, ma nlool niis bian. 6 Namuni te, nai tuaf ee anmu'i yaa tuaf mese'. Tuaf mese' nane, es le' nai tuaf in aan mone mese' le' in neek nisan. Natuin ka tiit attein fa lanan bian, es na' in nleun in aan mone nane. In natenab ma nak, ‘Kaul au 'leun au aan mone neikn on, sin of ansimo nok lek-leko, ma sin of natniin aa msa'.’

7 On nane te in anleun in aan mone nane ma nnao. Mes tabu ameup poo'n eun nane niit anah nane neem ate, sin na'uab eun ma nak, ‘Hoe! Hi mnuu' miit fe'! Ama anleun in aan honi neikn on neem! Kaul ama' anmate te, in le' ii of es le' ansimo ale' 'maus pusaak eun. On nane eim he tlool tisan, he hit atpaal taan ale' kanan in i'mui'n eun!’ 8 Oke te sin aal sin anheke, ma anlool nisan. Ma sin npolin in aon amates nane anbi po'an in kotin. 'Leta' naan antuu' ma namsoup on le' nane.’’

9 Oke te Na' Yesus nataan ale' a'naet nane ma nak, “Natuin hi teenb enu te, of nai tuaf nane anmoe' saa' neu ameup poo'n eun nane? Natuin Au teenb ate, in of neem ma nlool niis ale' ameupt eun nane ok-oke'. Oke te in nasebob po'an anggur nane neu atoni bian.

10 Hit aal kit attae tiit atbi Uisneno in Sula Knino' le' nak,

12 A'naet eun nane nahinen nak, Na' Yesus ansail sin neki 'leta' le' nane. Sin paap mese' nok atoin ameup po'an anggur sin. Es on nane te, sin nmulai namin lanan he nheke. Mes sin namtausan too mfaun eun le' anlomi he natniin Na' Yesus In noina'. On nanet sin nnao nasaitan.

13 Oke te atoni Yahudis sin i'naakt eun anleun tuaf fauk na'ko nonot palsait Farisi ma na'ko nonot politik Herodes neman he nataan Na' Yesus he namofu. 14 Sin neman antian ate, sin nataan Ee ma nak, “Aam kulu! Hai aal kai mihine mak, Ho neek maa lo amneot, ma ka mputa-bliu mitaf. Ho mnu'u waah atoni in nekan. Ho m'eut muneo waah Uisneno In i'lomin, natuin Ho ka mpiil fa humaf. On nanet tabu ii, hai he mitaan uab es. Tatuin hit atolan palsait Yahudi te, of hit he tbaena' noni-'poni teu uis kesel pah Roma,^c ai' kahaf?’’

15 Mes Na' Yesus nahiin nalail nak, sin namin lanan he nsuu' In, he anlaban plenat pah Roma. On nane te Na' Yesus nataa neik haan ma'fena' ma nak, “Nasaa' am es hi he mikleo Kau meik lasi nane? Miklila' miit Kau noni fua' es!’’

16 Oke te sin nnona' noni fua' es neu Na' Yesus. In insimo ma ntae noni nane. Oke te In nataan sin ma nak, “Sekau in huumn aa es le' ii? Sekau in kanan es le' matui' le' ii?’’

Sin nataa ma nak, “Le' nane uis kesel pah Roma.’’

17 Nalalit Na' Yesus na'uab ma nak, “Kaul on nane te, meik meu plenat saa' le' plenat in hak. Ma meik meu Uisneno saa' le' Uisneno In hak.’’

Anneen In haan tutas on nane te, sin aal sin ansanmakan, natuin In uaban nane lo namneo. On nane te sin ka nabe'in ntein Ye fa'.

18 Oke te atoni fauk na'ko pukan palsait bian neman he namouf Na' Yesus. (Sin na'ko pukan palsait Saduki le' nanoina' eun ma nak, amaets aa ka nmonin nfain niit fa). Sin na'uab eun nok Na' Yesus ma nak,^d

19 “Aam kulu! Nai' na' Musa antui hit atolan halat es ma nak: kaul atoni yes anmaet nasaitan in fee, ma ka nmui' fa anah, atoin amates nane in olif lo mees he naan bifee banu' nane, maut he nahoni nfee sufa'-ka'uf neu in tataf le' anmaet nalali yen nane.^e 20 Namneo, nai' na' Musa nanoina' kit on le' nane. On nane hai he mitaan miit Ko'. Anmui' atoni hiut anma'oil-taatn eun. 'Nae teif naan nahunun, oke te in anmaet, mes ka nahonin fa'. 21 On nane te in olif le' natuin ee naan bifee banu' nane. Mes ka 'loo fa te, in nmaet ma ka nahonin fa'. On nane msa', in olif le' natuin ee, naan bifee banu' nane, ma in nmate msa', mes ka nahonin fa'. 22 Ma lasi nane anlali msa' neu amuint eun, tal antia a'heut susu nmate msa'. Nalalit banu' nane anmate msa'.

23 On nanet tabu ii, hai he mitaan on ii: bifee nane anmamoen niit atoni hiut! Kaul pah-pinan ii namsopu te, ma Uisneno namonib nafani' amaets eun, of sekau es le' anfain bifee nane in mone?’’

24 Ma Na' Yesus nataa sin ma nak, “Kaul hi mitaan on nane, hi ka mihiin mimneo fa Uisneno In Suul Aknino in nesan. Ma hi ka mihiin fa Uisneno In kuasat amsa'. On nanet hi msaan milali yeen!

25 Amneen! Ka tiit fa lais mafeet-mamonet et sonaf neno tunan. Ale' amates le' Uisneno namonib nafani' sin, ka nmafeen ma nmamonen ntenin fa'. On nane msa' Uisneno In ameput sin na'ko sonaf neno tunan ka nmafeen ma nmamonen fa'. 26 On nane anmatoom nok ale' amates he nmoni nfain, ai' kahaf, Au he 'eut ki on ii: of oin hi fe' ka mitenab maan fa nu'u anmatoom nok ai le' nout hau uu' aan' es, mes ka nputuf. Nu'u nane nak, Uisneno na'uab neu nai' na' Musa ma nak, ‘Ho nai' sin Uisneno lo es le' Au'. Sin es eun le' nai' na' Abraham, nai' na' Isak, ma nai' na' Yakop. Sin aal sin na'luil eun ma na'besan piut neu Kau, tal antia tabu ii.’^f 27 On nanet hit tahine mtak sin nai' sin nmaten nlalin tabu ahunut. Mes, natuin Uisneno nak, In fe' anfani sin Uisneno, es nane te hit tahiin tak, sin nmonin nfanin. On nanet maski sin nmaten nlailn een, mes sin nmonin nfanin amsa'. Namneo, amoint ee es le' na'luli' ma na'bees neu Uisneno. Mes atoin amates, kaah fa ai'? On nane kaul hi mnaa' mimepan noina' le' nak, amaets eun ka nmonin nfanin fa, lo hi msaan a'teb-teeb!’’

28 Anbi tabu nane, anmui' naan anoina' lasi palsait tuaf es nok antoko ma nneen Na' Yesus na'uab nok atoni pukan Saduki sin. Anoina' lasi palsait nane natenab nak, Na' Yesus nataa sin haan tutas sin nok leko. Oke te in nataan Na' Yesus ma nak, “Aam! Au he utaan Ko on ii: hit atolan halat ma plenat lais palsait eun amfau le'uf. Na'ko ale' kanan plenat nai' na' Musa, plenat mee es le' anesit?’’

29 Na' Yesus nataa ma nak, “Plenat le' anesit anbi Uisneno In Sula Knino' nak on ii:

31 Ma plenat no nua' aa nak:

Plenat noon nua' eun le' ii, es le' anesit. Ka nmui' fa plenat bian le' anneis na'ko pleen nua' eun le' ii.’’^h

32 Oke te anoina' lasi palsait nane na'uab antein neu Na' Yesus ma nak, “Namneo'! Le' Ho mu'uab ee nane, namneo'. Uisneno nlail hit Usif, ma ka tiit fa Uisneno 'teta'.ⁱ 33 Hit lo mees he tneek Ee anneis na'ko ale' kanan saa'-saa', ma tamnau Ye piut, tahiin Ye, ma tmeup ma'tane' he tatuin In i'lomin, ma hit lo mees he tneek hit aok-bian eun namnees on le' hit tneek hit aok. Nok lanan nane te, na' Uisneno anmaliin anneis, na'ko hit alahaa he tatuin atolan lais palsait anmees. Nane leko nneis na'ko hit alahaa he tlool mu'it he ta'tulu', ai' atfee 'maus bian neu In.’’^j

34 Anneen in haan tutas nane te, Na' Yesus natenab nak anoina' lasi palsait nane nahiin In salit nane nok leko. On nane te Na' Yesus nak, “Ala kle'o te, ho of he mfain Uisneno Ini.’’

Oke te, ka nmui' fa tuaf es antein le' nloim he nataan Na' Yesus, fun ka tiit fa es le' nabei' Ye te.^k

35 Oke te Na' Yesus nanoina' too mfaun eun anbi Uisneno In Uim Onen Uuf. In nataan sin ma nak, “Natuin hi teenb ee te, on mee? Anoina' lais palsait eun nanoin eun ma nak, Kristus le' nane es le' Tuaf le' Uisneno anlulu nani Ye na'ko afi unu'. Ma sin natenab nak, In ala usif na' Daut in sufan. Mes tenab nane ka namneo fa'. 36 Natuin afi unu' Uisneno In Asmana Knino' anpaek na' Daut he ntui ma nak,

37a Na'ko nane te, hit tahiin tak usif na' Daut anteek Kristus nak ‘Tuan’. In otan nak, kaul sin nteek ee nak Kristus nane ala usif na' Daut in sufan-ka'un, nane ka nanookb on fa fe'. Fun In nfain usif na' Daut in Tuan amsa'.’’

37b Tabu Na' Yesus na'uab on nane te, too mfaun eun anlomin he nneen Ee. 38 Nalalit In na'uab antein neu sin ma nak, “Hi lo mees he mpaant om na'ko anoina' lasi palsait sin. Sin nlomin he npaisuun ok neik sin beet-konen, he nnao na'ekun nok too mfaun eun, he sin niit sin ma nak, ‘Hoe! Sin lo a'naet namneo'!’ 39 Kaul sin antaman anbin uim onen, ai' nokan anbin fesat, sin namin 'took alekot abit maat he too mfaun eun niit sin. 40 Mes ampaant om! Fun sin le' nane anputa-bliu bifee baun eun, he nasiik ma nsium naan sin umen. Mes anbi too mfaun eun sin maatk eun, sin na'tolo' sin moe' amle'ut sin nane nok sin onen le' amnanu-mnanu'. Sin nlomin he atoni bian sin nahinen nak sin neek enu knino'. Mes Uisneno of anfee kasat ma'fena' neu sin.’’

41 Oke te Na' Yesus antoko nbaina' neu peti 'tulu', anbi Uisneno In Uim Onen Uuf. In niit tuaf amfaun neman ma ntao sin loi 'tulu' anbi peti 'tulu' nane. In niit atoni amu'it sin neman ma nataam sin loit a'naek anbi nane. 42 Oke te bifee banu' ama'mu'it tuaf es neem ma n'onen nok. In nataam loit sen nua anbi peti nane. Loit nane in uupn ee aan'-ana'.

43 On nanet Na' Yesus annapen In asimo lasi sin ma na'uab neu sin ma nak, “Hi mnuu' milek-leko' meu bifee banu' ama'mu'it nane. In nataam loit ala sen nua yaah, mes in nfee nfiin na'ko ale' kanan afeet eun. 44 Sin aal sin anfeen a'tulu' na'ko loi nesif. Mes bifee banu' ii, anfee nain in loit eun ok-oke' neu Uisneno.’’