Usif Yesus sin antaman neun Yerusalem, ma too mfaun eun anboi's Ee on le' a'naet
(Na' Mateos 21:1-11; Na' Lukas 19:28-40; Na' Yohanis 12:12-19)
11
Tabu sin npaumaak koot Yerusalem, sin antian kuan Betfage ma Betania, nbi 'tubu' Saitun in ibnapan bian.a Anbi bale nane, Na' Yesus sin nasnaasn akle'o. Oke te In nleun In asimo lasi sin tuaf nua he nnao nahunun.
Na' Markus 11:1-14
2 In nba'an sin ma nak, “Hi nua ki mnao mihuun meu kuan le' nane. Tabu hi mtaam, hi of miit bikaes keledai yes, le' fe' ka masaena' fa', mafutu' et bale nane. Hi mnao mseif in tani ma amtoup meki neem. 3 Kaul atoni nataan ki ma nak, ‘Nasaa' am es hi amtoup meik bikaes keledai nane?’ On nane te, hi mak, ‘Hai Usi' he npake. Ma kaul In npake nlali te, na' hai of meik mifani' neem.’’’
4 Oke te tuaf nua' eun nane sin annaon, ma sin niit bikaes keledai nane mafutu' anbi ume yes in enon, nbi lanan ninen. Sin nsefi, he nheel neki nnao. 5 Mes atoni fauk le' anhaken anbin nane nataan sin ma nak, “Hoe! Bae'! Nasaa' am es hi mseif atoni in bikase'?’’
6 Sin nataa am nak, “Hai Usi' he npake. Kalu npake nalali te, hai of meik mifani' neem.’’ On nanet tuaf eun le' nane, anfeen sin sona' he anheel neik bikase' nane. 7 Sin anheel neki nnao antia Na' Yesus. Oke te sin na'peni' bikase' nane npaken mau'. Oke te Na' Yesus ansae'.
8 Tabu sin he nuu ntaman neu koot, too mfaun eun nait sin mau' eun ma sin mau' aan eun, oke te na'been sin anbin lanan. Anmui' tuaf bian an'oten on le' pet-noo'b anbi lanan ninen, ma na'been sin anbi lanan atnanan. Anpaek mo'et nane, sin he n'etun ma naklile' nak sin nsiom Na' Yesus nok tola', nahuum on le' sin nsiom a'naet. 9 Anmui' tuaf bian le' annao nahunun anbi Na' Yesus In matan, ma bian namunin. Sin nmulain nabaa' eun ma nak,
“Hosana! Hai mpules ma mbo'is Uisneno!c
Uisneno nfee tetus-athoe neno neu amnemat le' neem ma neik Uisneno In kanan,
natuin Uisneno es le' anleun nalali Ye!d
10 Hosana! Hai mpules ma mbo'is Uisneno!
Natuin Uisneno he nahakeb nafani' usif na' Daut in iplenat!
Hosana! Hai mpules ma mbo'is Uisneno!
Natuin Uisneno naplenat nani nbi neno kunipeni!’’
11 Tabu sin antian koot nane in nanan, Na' Yesus sin nnao ntaman anbin Uisneno In Uim Onen Uuf in tanana'. Oke te Na' Yesus annu'u nfuun am nateef bale nane. Mes, natuin tabu ka nanokab fa, es nane te sin nnao nfanin neun kuan Betania.
Usif Yesus naplenat hau sena' uu' mese' he kais nafua ntein
(Na' Mateos 21:18-19)
12 Anbi nok-nook ana' te, sin npoin na'ko Betania he ntaam anfanin neu koot Yerusalem. Anbin lanan atnanan, Na' Yesus natniin ate In namnaah. 13 In niit hau sena' uu' mese' nbi lanan ninen. Biasa sin naah in fuan.e On nane Na' Yesus anhaumaak hau sena' nane he nkius niit, kal-kalu in nafua', ai' kahaf. Mes tabu In ntia hau sena' nane in uun ate, In ka niit fa saa'-saa', natuin hau nane in tabu fe' ka ntia fa he nafua'. In fe' napool. 14 Es nane te, Na' Yesus na'uab neu hau sena' nane ma nak, “Natuin ho ka mufua fa meu Kau, es nane te anmulai na'ko tabu ii, ho ka neu mufua mtein fa'. Ma of ka tiit fa tuaf es he naah antein ho fuam.’’
In asimo lasi sin anneen In uaban nane lo ma'fena' msa'.
Usif Yesus antaam anbi Uisneno in Uim Onen Uuf, ma nait inpolin blua' sosa' anbi nane
(Na' Mateos 21:12-17; Na' Lukas 19:45-48; Na' Yohanis 2:13-22)
15 Oke te sin annaon nfinin tal antian Yerusalem, ma Na' Yesus antaam antein anbi Uisneno in Uim Onen Uuf. Anbi Uim Onen nane in tanana', too mfaun eun anmo'en a'masa' ma na'soos' eun kool otos, le' biasa sin inpaek sin he nfeen fua'-tulu'. Tabu Na' Yesus niit sin on nane te, In nnao ma nliu' napoitan sin. In nbison nasana' mei nuu le' sin npaek sin he ntukin loit, ma nbison nsiksana' hau 'been eun le' sin npaek sin he na'soos' eun kolon nane.
Na' Markus 11:15-33
16 In ntaal too amfaut eun he sin kais neik sin iblua' ma nnaon lefin ntenin npi'on Uim Onen nane in tanana'. 17 Oke te In nanoina' sin ma nak, “Hi mihiin milail saa' le' Uisneno In mafefa knino' antui nani ma nak, ‘Au ufena' Au Ume, he too na'ko ale' pah ma uuf neman he n'oen eun anbi bale nane.’ Mes hi mmoe' Ume nane anfain on bael buat neu abakat sin!’’f
18 Tabu a'naak lais palsait Yahudi sin i'naakt enu ma anoina' lais palsait sin anneen nak Na' Yesus anmoe' lasi nane te, sin nato'an ma neuk niisk enu. Nalalit sin namin lanan he nlool nisan. Mes sin namtausn Ee msa', natuin too amfaut eun anloim niis In noina'.
19 Ma tabu maans ee nmaeb on nane te, Na' Yesus sin anpoin na'ko koot Yerusalem, ma nfain nkotin he ntupan nbin kuan Betania.
Kaul hit itpalsai namneo-namneo teu Uisneno, In of anfee saa'-saa' le' hit ttoti
(Na' Mateos 21:20-22)
20-21 Anbi nok-nook aan ate, sin nnao nfanin neu Yerusalem. Anbi lanan atnanan, sin nnao npi'on hau sena' le' afi neno Na' Yesus na'uab neu ne. In asimo lasi sin ansanmakan, natuin hau sena' nane anmaet nalali yeen tal in i'baa'n aa msa' anmeto nmaet. Oke te na' Petrus namnau niit Na' Yesus In uaban afi neno. Nalalit in na'uab ma nak, “Aam! Amnuu' miit! Hau sena' le' afi neno Ama amtaal ee, nmaet nalali yeen!’’
22 On nane te Na' Yesus nataa ma nak, “Namneo'! Lo hi he mpalsai Uisneno on le' nane. 23 Kaul hi mpalsai namneo-namneo, hi of amlenu 'tubu' wes he nanani' bale neu tasi. Oke te Uisneno of nanani' 'tubu' nane, lamun hi mpalsai 'teeb-teeb! Hi lo he mpalsai namneo-namneo meu Uisneno.g 24 Kais amnikan! Lamun hi mpalsai namneo-namneo mak Uisneno nabe'i nfee saa'-saa' le' hi mtoti ye, In of anfee ki on nane. 25 Mes kaul hi m'onen, ma fe' ammui' neek ma'fena' mok es ate, hi so' amnao he mhalan mokan. Nok lanan nane te, na' hi Ama' abit sonaf neno tunan he nsaok nain hi sanat sin. 26 [Mes kaul na'ko ki, anmui' neek menas, ma ka mloim fa he msaok hi aom-bian in sanat, lo 'tebes hi Ama' abit sonaf neno tunan ka nsaok fa hi sanat sin imsa'.]’’h i
Sin nmantaan eun anmatoom nok Usif Yesus in hak
(Na' Mateos 21:23-27; Na' Lukas 20:1-8)
27 Oke te sin annaon nfinin. Tabu sin ntian Yerusalem, sin ntaman ntenin anbin Uisneno In Uim Onen Uuf. Tabu sin ntaman ntian in tanana', a'naak lais palsait Yahudi sin i'naakt eun, anoina' lasi palsait, ma amnais halat Yahudi sin neman 28 ma nataan Na' Yesus ma nak, “Afi neno sekau es le' anleun ko he oum meik taisibu neu bale ii? Sekau es le' anfee ko hak!?’’
29 Na' Yesus nahiin nak sin namin lanan he namofu. Nalalit In nataa sin ma nak, “Au he utaan ki msa'. Hi mitaa Kau fe', hena' Au 'utaa ki. 30 Au he utaan ki on ii: hi aal ki mihiin na' Yohanis Aslain atoni le' nane, oo? Sekau es le' anlenu he naslain? Uisneno oo, ai' mansian?’’
31 On nane sin nateenb eun neu-mneman, ma na'uab eun ma nak, “Ailoo! Hit talail uab! Kaul hit tataa am tak, ‘Uisneno es le' anleun wue te,’ In of nataa kit ma nak, ‘Kaul on nane te, neu saa' am es hi ka mpalsai fa na' Yohanis!?’ 32 Mes kaul hit tataa am tak, ‘Mansian aa es le' anleun wue.’ Of ale' too mfaun eun antaisibun, natuin sin anpalsai ma nak, na' Yohanis le' nane Uisneno In mafefa knino'.’’
33 On nane sin nataa ma nak, “Neu'! Hai ka mihinef.’’
Oke te Na' Yesus nataa neu sin ma nak, “Kaul on nane te, Au ka 'eut ki fa msa', sekau es le' anleun Kau'.’’