Atoni Farisis sin he namouf Usif Yesus anpaken lais mafeet-mamonet ma lais mapolin
(Na' Mateos 19:1-12; Na' Lukas 16:18)
10
Oke te Na' Yesus sin annao nfuun ma nateef anbin propinsi Yudea, ma nbi bale bian antein et noe Yarden in aon-bian, ntoom neon-saet. Anbi mee-mee, too mfaun eun neman ma n'iuk naan In. Ma Na' Yesus nanoina' sin on le' biasa.
Na' Markus 10:1-31
2 Atoni Farisis tuaf fauk neman he namofu. Sin natanan ma nak, “Natuin hit atolan lais palsait, atoni amafeet es nabe'i npolin in fee, ai' kahaf?’’
3 Mes Na' Yesus nataa sin ma nak, “Mimnau miit fe'! Atolan anmatoom nok lais mafeet-mamonet le' nai' na' Musa nba'an nani neu ki nane, nak on mee?’’
4 Sin nataa ma nak, “Nai na' Musa in atolan nak, atoni nabe'i npolin in fee, mes lo mees he ntui sulat mapolin nahuun ma nnona' sulat nane neu in fee.’’a
5 Mes Na' Yesus nataa sin ma nak, “Amneen Kau fe'! Nai na' Musa antui on nane, natuin hi mi'naak-fatu' 'teeb-'teeb! 6 Hi kaisa' mnikan 'leta' un-unun tabu Uisneno anmoe' neno tnanan ma pah-pinan! Fun matui' et Sula Knino' ma nak,
‘Uisneno nmo'e mansian, atoni ma bifee.b
7 Es on nane te, atoni yes lo he nnao nasaitan in einaf ma in amaf,
he nmoin nabuan nekaf mese' ma ansaof mese' nok in fee,
8 henati' sin nua sin anfanin mese'.’c
9 Kaul Uisneno neikn On nameseb sin, ka nabei' fa he mansian aa nbait sin!’’
10 Oke te Na' Yesus nok In asimo lasi sin antaman nmesen nbi ume yes. Anbi nane, sin nataan Na' Yesus anmatoom nok In noina' le' lelon na.
11 Na' Yesus nataa sin ma nak, “Sekau le' anpolin in fee, ma nmafee ntein bifee 'teta', nane antaam lais makapaisa' msa'! 12 On nane msa' bifee! Kaul in npolin in mone, oke te in mamone ntein atoni 'teta', nane antaam lais mapaisa' msa'!’’d
Usif Yesus na'uab he nfee tetus neu li'ana' sin
(Na' Mateos 19:13-15; Na' Lukas 18:15-17)
13 Anbi tabu wes, sin neik sin anah sin neman neu Na' Yesus, ma ntotin he In na'uab anfeen sin tetus. Mes Na' Yesus In asimo lasi sin anpenan sin.
14 Tabu Na' Yesus niit lasi nane te, In nato'an In asimo lasi sin. In na'uab ma nak, “Mifetin li'aan eun nane he neman antian Kau'! Kaisa' mikaina' sin! Natuin atoni le' nahuumb on, on le' sin le' nane, es le' anlalin Uisneno Inin. 15 Mimnau milek-leko'! Sekau le' anloim he neem anhaumaak Uisneno, sin lo he namnau niis In, on le' li'ana' sin namnau sin einaf ma sin amaf. Kaul ka on fa nane te, ka nabei' fa he tteek sin tak Uisneno Inin.’’e 16 Oke te Na' Yesus anhoo naan li'aan eun nane, ma ntao In i'niman neu sin mese'-mese' ma na'uab anfeen sin tetus.
Atoni amu'it naim lanan he nmoin nabal-baal nok Uisneno
(Na' Mateos 19:16-30; Na' Lukas 18:18-30)
17 Tabu Na' Yesus sin he nnao nfinin, anmui' atoin amui't es naen neem he na'euk nokan. In na'luli' anbi Na' Yesus In matan, ma nataan Ee ma nak, “Aam kulu le' au 'tola 'ani ye! Au he utaan a'kle'o. On ii, Aam. Of au he 'moe' on mee, henati' au ube'i 'taam 'eu sonaf neno tunan, he 'moin ubal-baal 'ok Uisneno?’’
18 Na' Yesus nataa ma nak, “Nasaa' am es ho mteek Kau mmak, ‘le' au 'tola 'ani ye’? Ka tiit fa es le' he ttola 'teni ye, mes Uisneno nmees Kuun. 19 Ho muhiin mulali plenat ahunut na'ko Uisneno le' nak,
‘Kais amlool atoni;
kais ammaka'paisa';
kais mubaak;
kais am'eut lais poi;
kais amputa-bliu atoni in i'maus;
ma mtola' meu ho eina' ma ho ama'.’’’f
20 Atoni nane nataa ma nak, “Namneo, Aam kulu! Au unaoba' ale' kanan atolan sin nane mulai u'ko tabu au fe' munif kau'.’’
21 Na' Yesus ankasian neu atoni nane ma nak, “Namneo'! Mes anmui' lasi yes antein. Ho mfain nai ma mu'sosa' main ale' kanan ho 'mu'im. Oke te meik nonin le' ho mupein sin nane ma mnao he mbait main sin neu ama'mu'it sin. Oke te ho mfain oum nai he mutuina' Kau'. Uisneno of anseun banin ko neki 'mu'if neno tunan.’’
22 Tabu in nneen Na' Yesus In uaban nane te, in nekan nas'unu'. Ma in nfain nok neek susal ma'tane', natuin atoni le' nane, amu'it namneo-namneo.
23 Ma Na' Yesus ankiso nfuun ma nateef ma na'uab neu In asimo lasi sin ma nak, “Amneen, oo! Amu'it susal mafena' he ntaam neu sonaf neno tunan!’’
24 Anneen lasi nane te, In asimo lasi sin anmukekun. Ma Na' Yesus na'uab antein ma nak, “Amneen milek-leko'! He tfain Uisneno Inin, susal ka ktia' fa'! Kaisa' mitenab mak nane ma'kaf-kafa'. 25 Atoni amui't es he ntaam neu sonaf neno tunan ma nfain Uisneno In anah te, in susal paap mese' on le' bikaes pah asnaen he ntaam neu in o'of, annao ntaam anpio' aent es in luken.’’
26 Na' Yesus In uaban nane anmoe' sin namkakan anteni. Ma sin nmantaan eun ma nak, “Kaul namneo on nane te, sekau es le' nabei' napeni 'honis nabal-baal?’’
27 Na' Yesus annuu' sin mese'-mese', oke te na'uab ma nak, “Natuin hinet mansian, of ka nlail fa saa' es. Mes mimnau, natuin hinet Uisneno, ka tiit fa saa' es, le' of ka nlalif.’’
28 Oke te na' Petrus anmulai na'uab ma nak, “Aam! Hai mnikan main ale' kanan hai saa' he mituina' Ko'. On nanet hai of mipein saa'?’’
29-30 Na' Yesus nataa ma nak, “Au he 'eut ki 'ak on ii: sekau es le' natuina' Kau, ma annao na'loo' na'ko in einaf ma in amaf, in olif ma in tataf, in anah sin, in lene, in mepu, nok ale' in ume nanan, he nnao n'etun Uisneno In Lais Leko nbi mee-mee, in of ansimo nafani' no nautn es. Ale' saa' le' in nasaitan sin nane, of napein nafani' sin anneis intein na'ko nane. In of napein ha'mu'it amsa', natuin in natuina' Kau'. Mes tabu pah-pinan ii namsopu te, in of anmoin nabal-baal nok Uisneno. Lasi le' nane, es anfain seun banit neun! 31 Mimnau, oo! Natuin Uisneno In tenab te, sekau na'naeb on ate, of na'bauna'. Ma sekau naneebt on ate, natuin Uisneno In tenab, of na'aiti'.’’g
Ii haan 'etus hae tenu anmatoom nok Usif Yesus In i'maten
(Na' Mateos 20:17-19; Na' Lukas 18:31-34)
32 Tabu nane, Na' Yesus sin nnao neun Yerusalem. Anbi pukan le' nane, Na' Yesus es le' ahunut. Ma In asimo lasi sin nok tuaf bian antein anbin In kotin. Sin namnau In uaban neno naa le' nak, atoni bian sin of na'mate nbi Yerusalem. On nane te sin anmukekun ma namtaun amsa'. Anneen on nane te, Na' Yesus anboin naan In asimo lasi sin anmesen, ma na'uab antenin saa' le' atoni bian sin of anmo'e neu Ne nbi Yerusalem.
Na' Markus 10:32-52
33 In na'uab ma nak, “Hi mneen, oo! Tabu ii, hit tnao teu Yerusalem. Au le' ii, Mansian Namneo-Namneo. Mes anbi Yerusalem sin of na'sosa' Kau neu a'naak lais palsait Yahudi sin i'naakt eun ma anoina' lasi palsait sin. Oke te sin of anhukun niis Kau'. Ma sin nnona' Kau neu tuaf bian le' ka nahiin fa Uisneno. 34 Oke te sin na'akan Kau 'le'uf-'le'uf. Sin naloon Kau'. Sin nbius Au aok ii tal papa' oke'. Oke te sin nlool niis Kau'. Namneo, Au 'maet. Ma nmeu te, Au 'moni 'fain.’’h
Na' Yakobus ma na' Yohanis antotin he nfanin kase 'naek
(Na' Mateos 20:20-28)
35 Oke te Na' Sebedius in aanh eun, es le' na' Yakobus ma na' Yohanis, sin neman neu Na' Yesus. Sin ntotin ma nak, “Aam kulu! Hai he mi'uab maan a'kle'o!’’
36 Na' Yesus nataan sin ma nak, “Hi he mi'uab saa'?’’
37 Sin nataa ma nak, “On ii, Aam! Nati' kaul Ho mtook ma mnaa' apleent ate, hai mtoit he Ho mutokob kai, tuaf es anbi Ho 'nimam a'lii, ma tuaf es antein anbi Ho 'nimam a'ne'u, he hai mok amnaa' apleent amsa'.’’
38 Na' Yesus nataa sin ma nak, “Hi nua ki ka mihiin main fa saa' le' hi mtoti. Au le' ii, of upein susal ma ma'ne'at amfaun. On nanet on mee? Anbi hi tenab ii te, hi mak, hi mibei' he mnaben susal ma ma'ne'at tal ammaet mok Kau, oo?’’i
39 Sin nataa ma nak, “Hai mibei'!’’
Na' Yesus na'uab antein neu sin ma nak, “Namneo'. Hi of amnaben susal ma ma'ne'at amsa' on le' Au. 40 Mes sekau es he antoko' nbi Au 'nimak a'lii ai' a'ne'u, Au ka 'seol Ok fa nbi lasi nane. Natuin lasi nane, Uisneno es le' nafeek. Ma In nafeek nalail sekau-msekau es le' he ntoko nbi bale nane.’’
41 Tabu asimo lasi bian sin anneen na' Yakobus ma na' Yohanis sin haan totis on nane te, sin nato'an nmaten. 42 Oke te Na' Yesus anboin sin ok-oke' ma na'uab ma nak, “On ii! Hi mihiin milali yen, ai' kahaf? Kase 'naek le' annaa' aplenat, sin es le' nfoe nana te anha'mui' too. Tal antia too ka nabloti fa leko'. Ma a'nakaf sin anbi pah-pah le' ka nahiin fa Uisneno, sin nanaoba' atolan ma plenat huma'-huma', tal sin too ka nabei' fa he na'aiti sin i'naak enu. 43 Mes ka nabei' fa he hi mmoe' on le' nane! Sekau na'ko ki le' anloim he nfain kase 'naek, in lo mees he nlail on le' a'baut he ntuthae in aon-bian sin.j 44 Ma sekau es le' anloim he nfani 'nakaf, in lo mees he anmoe' in tuan nane on le' ate ma nmeup neno-neno on le' naa.k 45 Fun Au, Mansian Namneo-Namneo, es le' ii. Au ka 'oum fa he atoni ntuthae Kau, mes Au 'oum he 'tuthae too mfaun. Au 'oum he 'nona' Au monik ii no' 'teem-'teme, he 'soi 'aan too mfaun eun na'ko sin sanat ma sin penu sin.’’
Usif Yesus naleko' atoin afolot
(Na' Mateos 20:29-34; Na' Lukas 18:35-43)
46 Na' Yesus nok In asimo lasi sin ma too mfaun eun neem antian koot Yeriko. Tabu sin he nnao nfinin, sin niit atoin afoolt es antook ma ntoit piut-piut anbi lanan ninen. In kanan na' Bartimeus, na' Timeus in anah. 47 Tabu in anneen am nak, afinit nane Na' Yesus na'ko Nasaret te, in nhunun nameep-meep ma nak, “Yesus! Ho le' nane, sufa'-ka'uf ko na'ko na' Daut! Hai mpao Ko 'loo-loo ween! Amtulun maan kau'!’’
48 Anneen in hanan nane te, too mfaun eun nakain ee ma nak, “Hoe! Mu'tena' fe'!’’
Mes in nhunun nameep antein ma nak, “Yesus! Na' Daut in sufan! Mumnau maan kau'!’’
49 Ma Na' Yesus anhake ma nak, “Hi meki neem!’’
Oke te sin nnao neun ee ma nak, “Noo baah nai! Aam kulu anboin ko'. Oum nai'!’’
50 Anneen on nane te, na' Bartimeus anpolin nain in tai nusat, oke te anfeen ma nnao lab-laab he na'euk nok Na' Yesus.
51 Oke te Na' Yesus nataan ee ma nak, “Ho mloim saa' he Au 'mo'e neu ko'?’’
Atoin afolot nane nataa ma nak, “Koi, Aam! Au 'toits ee es le' kaul leko te, au 'iit.’’
52 Na' Yesus na'uab antein ma nak, “Natuin ho mpalsai mulali mak, Au ubei' uleko' ko, es on nane te tabu ii ho muleok nai'! Amkoen om amfain nai'!’’
Oke te na' Bartimeus in matan afoolt eun nane naleok nanin. On nanet in nok annao nanaat Na' Yesus.