2 Neno nee anfini te, Na' Yesus antoit na' Petrus, na' Yakobus, ma na' Yohanis, he nnao nsaen nabuan neu 'tubu' mnanu yes, le' ka nmui' fa tuaf. Tabu sin antian in tunan, sin nkius niit Na' Yesus na'baina'. 3 Ma In blua-pake nane nfain muti' ma naliim. Ka nmui' fa blua' anbi pah-pinan le' ii, muitn ee namnees nok In iblua-pake nane. 4 Nok askeken, sin niit Na' Yesus na'uab nok nai' na' Elia ma nai' na' Musa.

5-6 Sin teun sin namtaun nmaten. Na' Petrus ansanmaak, tal in na'uab bute-bute. Oke te in na'uab neu Na' Yesus ma nak, “Aam! Hit tbi ii te, na' leko nneis. Leko te, hai mmoe' maan la'at teun. Es neu Ko', es neu nai' na' Musa, ma es atfee ye neu nai' na' Elia.’’

7 Oke te anmui' nope le' ansaun neem ma n'aum naan sin. On nanet sin anneen haanf es anpoi neem na'ko nope nane ma nak, “Amneen nai! Na' Yesus le' ii, Au Aan neka'. Hi mneen ma mituin Ee lek-leko!’’^a

8 Tabu na' Petrus sin nneen niit hanaf nane, sin ankison anfuun ma nateef, mes nok askeken sin ka niit antein fa tuaf nua' eun nane. Ala Na' Yesus anmees.

9 Oke te Na' Yesus nok In asimo lasi sin ansanun nfanin na'ko 'tubu' nane. Ma Na' Yesus anpenan sin ma nak, “Saa' le' hi miit milali ye le' lelon na, hi kaisa' m'etun neu sekau-msekau. Au le' ii, Mansian Namneo-Namneo, Au lo mees he 'maet fe'. Tabu Au 'moni 'fain, na' hi m'eut lasi nane neu too mfaun eun.’’

10 Sin nnaa' nahelan Na' Yesus In lais manta'en nane, ma sin ka n'eut wee fa neu tuaf es amsa'. Mes sin teun sin anmantaan eun es nok es ma nak, “In salit, on mee, es na' In nak, In he nmoni nfain na'ko In i'maten le' nane? On mee?’’

11 Ma sin nataan Ee ma nak, “Anoina' lasi palsait sin nak, nai' na' Elia lo he neem nahuun fe', oke te na' Kristus neem. Mes anbi Ho tenab, on mee?’’^b

12 Na' Yesus nataa ma nak, “Namneo on nane. Nai' na' Elia lo he neem nahuun fe', he nfei lanan neu Kristus, Tuaf le' Uisneno anluul nani Ye na'ko un-unun. Mes on mee? Hi ka mihiin fa saa' le' sin antui nani ye et Uisneno In Sula Knino' anmatoom nok Mansian Namneo-Namneo? Fun sin ntui nalali Ye ma nak, tabu In neem antia te, atoni of anha'mu'i ma sin of anlool nisan. 13 Ma hi lo mees he mtakan hi luikm eun lek-leko, oo! Nai' na' Elia neem nalali yen. Ma atoni nhamu'i natuin sin i'loimk eun. Lasi nane namnees nok saa' le' unu' te, sin nai' antui nani ye.’’

14 Tabu Na' Yesus nok In asimo lasi tuaf teun eun na'ekun nfanin nok asimo lasi bian, sin niit too mfaun eun nabuan. Too mfaun eun nane neman he niit asimo lasi bian sin anmatoen nok anoina' lasi palsait sin. 15 Tabu too mfaun eun niit Na' Yesus on nane te, sin naskeken, fun sin tenab nak of oin In fe' nabala anbi 'tubu' in tunan. Ma sin naen ansenu ma nteef In.

16 Oke te Na' Yesus nataan sin ma nak, “Hi mmatoen lais saa' mok sin?’’

17 Anmui' atoni yes neem na'uab ma nak, “Aam, kaul leko' te, amneen maan kau fe'! Au 'eik au aan mone he Ho muleko' maan. In meens ee es le' ka na'uab nahinef, fun niut amle'ut es ansaen ee. 18 Kaul niut amle'ut nane ansaen, in anbison neu nain. Oke te li'ana nane in hapen na'fule', ma in neuk in niisn eun. Oke te in aon aa nakbeet on le' hau noon wes. Au 'toit 'iit Ho asimo lasi sin, he sin nliu' niut amle'ut nane. Mes sin ka nabei' yef.’’

19 Anneen on nane te, Na' Yesus ankabal sin ma nak, “Hoe! Hi lo 'teeb-teeb! Au unoina' ki piut-piut, mes hi ka mheek-heek manaf. Ma hi ka mpalsai Kau fa namneo-namneo! Au he 'alan neu ki tal antia leka'! Meik Kau li'ana nane neem neu ii!’’ 20 Nalalit sin natnaat neik li'ana nane neem neu Na' Yesus. Tabu niut amle'ut nane nkius niit Na' Yesus on nane te, in nbison naan li'ana nane ma nahuila' neu nain, ma in haep fule ansai'.

21 Oke te Na' Yesus nataan li'ana nane in amaf ma nak, “Ho anah in menas ii na'ko leka'?’’

In amaf nataa ma nak, “Na'ko in fe' li'ana'. 22 Niut amle'ut nane he na'maet au anah 'loo-loo ween. In nbison au anah ii hae'-hae' anbi ai, ma nalema' anbi oe. On nanet amtulun maan kai'! Kaul leko te, amneek kai', he muleko' maan au anah le' ii.’’

23 Na' Yesus nataa ma nak, “Nasaa' am es ho mak ‘kaul leko te’? Namneo Au ubei' he 'moe' ale' saa'-saa', lamun atoni lo he npalsai fe'!’’

24 Oke te atoni mnasi' nane nataa ma nkae nok ma nak, “Aam! Namneo, au 'palsai'. Mes amtulun maan kau he au 'neek palsait le' ii, nma'tane ntein!’’

25 Tabu nane, Na' Yesus ankius too mfaun eun anmulain neem an'iuk naan sin. On nanet In naplenat niut amle'ut nane ma nak, “Hoi! Niut abulalut! Ho mpoi nai mu'ko li'ana le' ii, he in nabei' anneen, ma in nabei' he na'uab. Ho kais amtaam amfain oum!’’

26 Anneen Na' Yesus na'uab on nane te, niut amle'ut nane anhunun nameep. In nmo'e li'ana nane ansiloit ma npaiteetk on, oke te na' anpoi nasaitan. Ma li'ana nane antuamauf on le' anmate nlali yeen. Tal antia too mfaun eun le' anbin nane na'uab eun ma nak, “Ooo! In nmaet nalali yeen!’’

27 Mes Na' Yesus annaa' li'ana nane in i'niman, ma nfiit nafena'. On nanet li'ana nane anfeen nain tabu le' nane.

28 Nalalit Na' Yesus nok In asimo lasi sin nnaon nasaitan bale nane, ma ntaman neu ume yes. Anbi nane sin nataan Na' Yesus ma nak, “Aam! Nasaa' am es le' lelon na hai ka mibei' fa mliu' maan niut amle'ut nane?’’

29 Ma Na' Yesus na'uab neu sin ma nak, “Amneen milek-leok! Niut amle'ut eun lo amaufiunt eun. Es on nane te, kaul hi ka m'onen he mtoit fa Uisneno, hi ka mibei' fa he mliu' niut amle'ut on le' nane.’’

30 Oke te Na' Yesus nok In asimo lasi sin nnaon nasaitan bale nane, ma antaman neu propinsi Galilea. Tabu nane, Na' Yesus ka nloim fa he atoni nahiin nak In et bale nane. 31 Mes In ala haa he nanoina' In asimo lasi sin. In na'uab neu sin ma nak, “Ka 'loo fa ntein, sin of na'sosa' Kau' neu atoni bian. Oke te sin nlool niis Kau', Mansian Namneo-Namneo le' ii. Namneo Au lo mees he 'maet, mes anbi nmeu te,^c Au lo mees a'moni 'fain.’’

32 Na' Yesus na'uab on nane, ma In asimo lasi sin naskeken ma namkaakn aah. Sin ka nbalanin fa he nataan antein Na' Yesus In tenab on mee.

33 Oke te Na' Yesus sin annaon antian Kapernaum. Tabu sin antaman anbin ume yes, In nataan neu In asimo lasi sin ma nak, “Le' lelon na hi mmatoena' lais saa' anbi lanan?’’

34 Mes ka tiit fa tuaf es he nataa, fun anbi lanan tnanan, sin nmatoen ma nak, sekau es le' anesit anfiin na'ko sin.^d

35 Oke te Na' Yesus antook ma nanoina' sin ma nak, “Sekau es le' anloim he nlail atoni 'naek, in monin lo he namneo-namneo on le' atoni neek amnebet, he ntuthae ale' too mfaun.’’^e

36 Oke te Na' Yesus naskau naan li'aan es anbi nane, ma nfain neu sin itnaank enu. On nane te In na'uab ma nak, 37 “Sekau' le' natuina' Kau ma ntuthae tuaf a'baut eun on le' li'aan a'baut le' ii, tuaf le' nane on le' antuthae Kau msa'. Ma in ntuthae Au Ama' le' anleun Kau he 'taam 'oum a'bi pah-pinan ii msa'.’’^f

38 Oke te Na' Yesus In asimo lasi le' kanan na' Yohanis, ankalaak ma nak, “Aam! Anbi tabu wes, hai miit atoni yes anpaek Ho kanam ma nliu' niut amle'ut eun. Mes hai mtaal natuin ka hit ini yeef.’’

39 Mes Na' Yesus nataa ma nak, “Hoe! Hi kaisa' mikain. Fun sekau es anpaek Au kanak he nmoe' lasi mkakat, in of ka neu na'uab na'le'uf fa Au kanak. 40 Kaul in ka nlaban kit fa, on nane te in le' nane hit ini msa'.^g 41 Es on nane te, mimnau milek-leko'! Kaul anmui' tuaf le' nahiin nak hi mituina' Kristus, oke te in ntulun ki, Uisneno ka neu nnikan fa in haet nane. Maski in ala na'inu' ki neik oe luman klaas es amsa', Uisneno ka neu he nniikn eef.’’^h

42 Oke te Na' Yesus na'uab antein neu sin ma nak, “Kaul atoni yes anmo'e nsaan neu li'aan es, tal in ka npalsai antein Kauf, ampaant om, oo! Leko nneis tait fatu 'naek mese',ⁱ ma tfuut takfili' neu in to'an, ma tpolin tataam neu tasi tnanan.

43 Kaul ho musanab meik ho 'nimam, mketu mpolin ho 'nimam nane! Fun leko' neis ho mtaam meu sonaf neno tunan meik ho 'nimam mese', na'ko sin anpolin nataam ko neu ai maputu' ma ai malala' abal-balat meik ho 'nimam nua'.^j 44 [Ai malala' nane, namneo-namneo bael ma'ne'at. In ai ye ka nmaet nitaf. Ma ale' kaun kalis nale'un ka nasnaas fa'.]^k 45 Kaul ho musanab meik ho haem, mketu mpolin ho haem nane. Fun leko' neis ho mtaam meu sonaf neno tunan meik ho haem mese', na'ko sin anpolin nataam ko neu ai maputu' ma ai malala' abal-balat meik ho haem nua'. 46 [Ai malala' nane, namneo-namneo bael ma'ne'at. In ai ye ka nmaet nitaf. Ma ale' kaun' kalis nale'un ka nasnaas fa'.]^l 47 Ma kaul ho musanab meik ho matam, mlo'i mpolin ho matam nane. Fun leko nneis ho mtaam meu sonaf neno tunan meik ho matam fua mese', na'ko sin anpolin nataam ko neu ai maputu' ma ai malala' abal-balat meik ho matam fua nua'.^m

49 Au 'fee noina' le' ii, lo ma'fena'. Es nane te, sekau es le' he natuina' Kau te, lo mees in he nalan he nok Kau piut, on le' siis se'ik lo he tpaek masi', hena' sisi nane antaahn a'loo.

50 Masi' nane, lo leko. Hit tpake he taminab amnahat. Mes kaul masi' nane ka miin mali fa nteni te, he tpaek neu saa' antein? Lo hit tait itpolin aah. Hi lo he mfain on le' masi' amsa', he mmoni neu manekat mok ale' too mfaun eun.

[On nanet hi kais ammatoe mtein, mak sekau es le' a'naet ma sekau es le' a'baut.]’’^o