Na' Yesus antuthae atoni nifun haa'
(Na' Mateos 15:32-39)
8
1-3 Ka 'loo fa on nane te, anmui' too mfaun neem nabuan he nneen Na' Yesus In uaban. Sin natuin Ee tal antia neno tenu ween. On nanet sin nalalin beti'. Oke te Na' Yesus anboin In asimo lasi sin ma nak, “Au 'kasian too mfaun eun ii. Bian neman na'ko bale 'loo, ma nabuan nok kit neno tenu ween, tal antia sin nalalin beti'. Leko nneis kais sin annaon nfanin nok tei luman. Kais-kaisa' sin ntuamafun anbin lanan tnanan.’’
Na' Markus 8:1-21
4 Na' Yesus In asimo lasi sin nataa ma nak, “Aam! Bale ii na'loo na'ko kuan. On nanet hit ka neu fa he ttuthae taan too amfaut eun le' ii!’’
5 Na' Yesus nataan sin ma nak, “Hi mmui' utunu' pisa' fauk?’’
Sin nataa ma nak “Hai mmu'i yaa utunu' pisa' hiut.’’
6 Oke te Na' Yesus anleun too mfaun eun nane he ntokon anbin nain. Nalalit In nait utunu' pisa' hiut eun le' nane, ma antoit makasi neu Uisneno. Oke te In an'eib sin pisa'-pisa', ma nfee sin neu In asimo lasi sin. Sin nnao ma nbatin neu too amfaun eun ok-oke'. 7 Ma sin napenin ika' koe' fauk amsa'. Nalalit Na' Yesus antoit makasi antein neu Uisneno anmatoom nok iik' eun nane. Oke te In nleun In asimo lasi sin, he nnao nbatin anteni neu too mfaun sin. 8-9 Sin aal sin ok-oke' of oin atoni nifun haa'. Sin nbukaen tal anpetan. Nbukaen nalalin on nane te, asimo lasi sin nabuab mnaah neisf eun nahenu 'kuna' hiut. Oke te Na' Yesus anleun sin he nfanin ok-oke'. 10 Ma tabu sin nnao nfanin on nane te, Na' Yesus nok In asimo lasi sin ansaen neu 'belo', ma nnao nabnonon nifu nane in ninen, neu bale yes, le' kanan Dalmanuta.
Atoni Farisis sin namin lanan he namouf Usif Yesus
(Na' Mateos 16:1-4)
11 Tabu Na' Yesus sin antian Dalmanuta, anmui' tuaf na'ko nonot palsait Farisi neman he na'euk nokan. Sin nataan anhapnesa' Na' Yesus, ma sin ntoti ma nak, “Aam! Muklile' lasi mkakat he nfain bukti le' mamnita' nak, Ho mupein Ho ma'tanem na'ko Uisneno.’’a
12 Na' Yesus anheel In isnasan, on nane te In nak, “Kaul Au 'neen hi uab eun nane, Au nekak nameen! Nasaa' am es hi mtoit lasi mkakat? Kais on nane! Lasi mkakat lo nmu'i msa', mes Au ka 'mo'e 'fee ki fa'.’’b
13 Oke te Na' Yesus annao nasaitan sin, ma ansae nfanin neu 'belo' nabua nok In asimo lasi sin. Ma sin anlakan neu nifu nane in aon-bian.
Usif Yesus nanoina' nak, ampanat milek-leko' atoni Farisis sin lais maka'kope'
(Na' Mateos 16:5-12)
14 Tabu Na' Yesus sin antian nifu nane in atnanan, na' asimo lasi sin namnaun nak, sin innikan nain nak, sin ka nekin fa beti'. Ala sin neki utunu' pisa' mese'. 15 Anneen sin na'uab eun anteek utunu' on nane te, Na' Yesus nak sin ma nak, “Hi lo he mpanat milek-leko'! Kais hi mtoe mituin usif Herodes ma atoni Farisis sin lais maka'kope' amle'ut. Sin lasi kope' nane, nahuum on le' laul haef le' ankumu nselo' nok uut, he uut nane na'nae nsae.’’c
16 Anneen In na'uab on nane te, In asimo lasi sin antakmanan. Ma sin na'uab eun ma nak, “Ama na'uab lais saa'? Of oni In na'uab on nane, natuin hit ka teik fa utunu'.’’
17 Mes Na' Yesus nahiin sin neek tenab. Es on nane te, In na'uab ma nak, “Nasaa' am es hi mi'uab ahaa utunu'? Hi ka mheek maan fa Au salit ii, yoo? Hi loenm enu lo na'keek enu nmaten! 18 Hi miit milail meik hi maatm eun, mes hi ka mihiin fa in otan! On le' hi ka miit miit fa fe'! Hi mneen meik hi luekm eun, mes hi ka mihiin fa saa'-saa'. On le hi ka mneen miit fa msa'! Hi mnikan maind 19 utunu' pisa' niim le' Au 'eib sin pisa'-pisa' ma 'tuthae too nifun niim, ai'? Neno nane hi mibuab maan utunu' anesit 'sau' fauk?’’
Sin nataa ma nak, “'sau' bo'es am nua'.’’
20 Na' Yesus nataan anteni sin ma nak, “Hi mimnau, ai' kaha, le' neno naa, tabu Au 'ebi 'bait utunu' ma 'tuthae too nifun haa? Hi mibuab maan utunu neisf eun nane 'kuna' fauk?’’
Sin nataa ma nak, “'kuna' hiut!’’
21 On nane te Na' Yesus nak, “Namneo! Hi miit meik hi matam. Mes nasaa' am es hi ka mihiin fa, Au ma'tanek ii in neem na'ko mee?’’
Usif Yesus naleko' afoolt es anbi Betsaida
22 Oke te Na' Yesus sin antian kuan Betsaida. Anbi naa, anmui' tuaf neik atoin afoolt es neu Na' Yesus. Sin antotin he In nnefo ma anpoho naleko' atoin afolot nane.
Na' Markus 8:22-38
23 On nane te Na' Yesus annaa' atoni nane in i'niman ma neki npoi neu kuan in kotin. Oke te In npulan hape neu atoni nane in matan, ma In annefo ma anpoho ye. In nataan ma nak, “On mee? Ho bisa miit, ai' kahaf?’’
24 Atoni nane na'aiti in matan, ma nkius neu 'lii ma 'ne'u, ma in nataa ma nak, “Hae! Au 'iit mansian eun neu-mneman. Mes nahuum on le' au 'iit hau sin es le' anaot eun!’’
25 Ma Na' Yesus antao anteni In i'niman neu atoni nane in matan. Ma atoni nane ankius nameep-meep antein, ma in nahiin nak in niit leko ween. Tabu ii in nabei' niit nok aknino'. 26 Oke te Na' Yesus anleun atoni nane he nnao nfain, ma namnauba' ma nak, “Ho mfain nai, mes amnao mutuin lanan 'teta'! Kaisa' amnao mfain meu Betsaida.’’
Na' Petrus anmanaku nak, Usif Yesus nane Kristus, Tuaf le' Uisneno anluul nani na'ko unu'
(Na' Mateos 16:13-20; Na' Lukas 9:18-21)
27 Oke te Na' Yesus sin annaon nfuun ma na'euk kuan-kuan anbin Kaisarea Filipi. Anbin lanan atnanan te, Na' Yesus nataan sin ma nak, “Kaul tatuin too mfaun eun sin uab eun, sin nak Au le' ii, sekau'?’’
28 Sin nataa ma nak, “Bian sin nak ‘na' Yohanis Aslain Atoni’. Bian sin nak, ‘nai' na' Elia, Uisneno In mafefa knino' unu' nane’. Ma bian antein nak, Ho le' ii atoni yes na'ko Uisneno In mafefa knino' nbi tabu ahunut sin.’’e
29 Ma Na' Yesus nataan anteni neu sin ma nak, “Mes natuin hi hinem te, Au le' ii, sekau'?’’
Na' Petrus nataa ma nak, “Ho le' ii Kristus, le' Uisneno anluul nani na'ko unu'.’’f
30 Mes Na' Yesus anpenan na'maet sin ma nak, “Ka nabei' fa he hi m'etun sekau-msekau saa' le' na' Petrus na'uab le' ii!’’
Usif Yesus an'eut In ma'ne'at ma In i'maten
(Na' Mateos 16:21-28; Na' Lukas 9:22-27)
31 Oke te Na' Yesus anmulai na'uab neu In asimo lasi sin ma nak, “Au le' ii, Mansian Namneo-Namneo Kau'. Au of upein lasi ha'mu'it namfau, natuin a'naak halat sin, a'naak lasi palsait Yahudis sin i'naakt eun, ma anoina' lasi palsait ok-oke' of antite' Kau'. Sin of anlool niis Kau, mes anmeu te,g Au 'moni 'fain.’’
32 Na' Yesus an'eut maat-maat on nane, on nane te na' Petrus anheel anpaisan, ma nakaina' ma nak, “Aam! Kaisa' mu'uab on nane! Au ka neu he 'no'al sin fa, he nsae 'niman Ko'.’’
33 Mes na' Petrus in uaban nane ka natuin fa Uisneno In i'lomin. Es nane te, Na' Yesus nabain on ma nkius In asimo lasi bian sin. Oke te In nakaina' na' Petrus nok haan ma'tane' ma nak, “Hoe! Nane niut amle'ut eun sin i'naak anesit in uaban! Mu'loo mu'ko ii! Ho ala mutenab meik tenab mansian, mes tenab nane ka natuin fa Uisneno In i'lomin!’’
34 Oke te Na' Yesus anhaman too mfaun he neem nabuan nok In asimo lasi sin. Ma In nanoina' sin ma nak, “Atoni le' anloim he natuin Kau, lo mees in he nalan ma natuin Kau neno-neno! In lo mees he nnikan nain in i'lomin sin, ma natuin ahaa neu Uisneno In i'lomin. Maski atoni he nlolo msa', mes in natuin piut, on le' atoni nasaah in hau nehe he nnao neu in bale 'maten.h 35 Fun atoni le' anmoin alahaa neu in ta'un, of in i'monin namneuk on ahaa le' nane! Mes atoni le' naloitan in ta'un he nmaet natuin in nfain Au ini ma an'eut Uisneno In lanan a'honis, in of anmoin nabal-baal nok Uisneno.i 36 Amneen, oo! Kaul ho mpaal pah-pinan ii in afan oke', mes Uisneno antite' ko, ho mupein saa'? 37 Maski nak ho mloi meik pah-pinan in afan oke' msa', 'maus nane ka neu he ntuik naan fa ho smanam!
38 Mimnau'! Mansian batan muni' ii, anmo'en amle'ut huma'-huma'. Sin ka nfiloil fa he natuina' Uisneno. Es on nane te, sekau le' namaeb on he natuin Kau, ai' namaeb on he natuin Au noina' sin, Au of umaeb ok amsa' he 'mmanauk' in ta'un a'bi Uisneno In human ma In matan. Fun Au, Mansian Namneo-Namneo le' ii, of Au 'fain 'oum u'ko neno tunan. Ma Uisneno In ameput sin na'ko neno tunan of naub naan Kau'. Tabu hai msaun eim mi'ko sonaf neno tunan meik Ama' In pinan ma In iklahan, of mansian eun na' nahinen nak, amneot aa Au le' ii sekau'.