2-5 Atoni Farisis sin annaa' nameep-mepan sin halat atoni Yahudis. Tait i'leta' on le': kaul atoni he nbukae, lo mees he nafaun in i'niman natuin halat in i'lomin. On nane msa', kaul anfain neem na'ko 'masa', sin lo mees he naniun fe'. Tal antia sin ablua ume 'hana' nanan amsa', on le' 'pika', klaas, 'tuik oe, lo mees he nfaes sin natuin halat in i'lomin, hena' nabe'i npaek sin he nbukaen.

Kaul anmui' atoni Yahudis bian le' ka natuin fa halat sin nane, atoni Farisis sin nato'an.

Es on nane te, sin nato'an tabu sin niit Na' Yesus In asimo lasi sin anbukaen, mes ka nafaun fa sin i'niimk eun natuin halat in i'lomin. Oke te sin neman ma nasaan Na' Yesus ma nak, “Nasaa' am es ho asimo lasi sin anbukaen, mes sin ka nafaun fa sin i'niimk eun? Nane, sin an'eel hit atolan halat na'ko atoni mnais uun eun!’’

6-7 Mes Na Yesus nataa sin ma nak, “Hi le' ii on le' atoni le' na'uab ate, 'teta', mes hi mmo'e te, 'teta'! Nahunut nai' na' Yesaya antui nani Uisneno In a'an ma nak,

Hi huma' mese' on le' sin imsa'. 8-9 Hi misaitan milail Uisneno In iplenat ma mituin ahaa mansian in halat. Hi hinem ma manoem enu ma'taen le'uf!^a

10 Nahunut, nai' na' Musa an'eut nalail Uisneno In iplenat ma nak, ‘Amtola' hi mahoint eun.’ Antuut antein ma nak, ‘Kaul tuaf es na'akan in einaf ai' in amaf, lo mees he thukun tisan.’^b 11-12 Uisneno nanoina' ki on nane, mes hi minoina' 'teta' na'ko nane. Hi mak, ‘Kaul tuaf es anba'an nalail he nfee saa' es neu Uisneno, maski in einaf ma in amaf ansusan nmaten, mes blua' nane ka nabei' fa npake he ntulun sin, natuin anba'an nalail he nfee ye neu Uisneno.’ 13 Es on nane te, le' lelon Au 'ak ki 'ak, hi mpolin main Uisneno In i'lomin, ma hi mseka' meik atolan mansian. Anmui' atolan namfau le' hi mseka' nahuum on le' nane.’’

14 Oke te Na' Yesus anboin atoni bian anbi nane, ma na'uab mnak, “Amneen milek-leko', he hi mihiin. 15 Ale' saa' le' antaman neu atoni in tein ka nha'niis fa in tuan. Mes saa' le' anpoi nfain, es le' neik ha'nisit neu in tuan. 16 [Sekau he mneen ate, amneen he muhiin!’’]^c

17 Oke te Na' Yesus nok In asimo lasi sin annaon nasaitan too mfaun eun nane, ma antaman neu ume yes. In asimo lasi sin natana 'leta' nane in otan. 18-19 Na' Yesus nataa sin ma nak, “Hi ka mihiin fa msa', oo? In otan on ii: saa' le' atoni anbukae ye, nane in leko kuun. Mes saa' le' anpoi nfain nane, in es ka leko fa'. Saa' le' hit tbukae ye, antaam neu hit teik, oke te anpoi nfain. (Usif Yesus In salit nak, atoni nabe'i anbukae saa'-saa' aah. Ka talas fa'.)

20 Mes saa' le' anpoi na'ko atoni in nekan, nane es le' neik ha'nisit, tal antia Uisneno nma'nisin, ma ka nloim fa he nabua nokan. 21 Lais amle'ut namfau anpoi na'ko atoni in nekan, on le': lais tenab amle'ut, lasi maka'paisa', lais bakan, lais malolot, 22 lais komat, lasi sna'o, moe' amle'ut, puta-bliu huma'-huma', sinmakat, mantinos, na'uab nakle'uf es, na'mook on, ka nahiin fa atolan, ma na'naak-faut.

23 Ale' 'moe' amle'ut eun on le' nane anpoi na'ko atoni in nekan. Nane es le' naleu' nafani' in tuan. Ma Uisneno nma'niisn aa msa'.’’

24 Oke te Na' Yesus sin nasaitan bale nane, ma nnao neun koot es, kanan Tirus. Antian bale nane, sin ntaman anbin ume yes, natuin Na' Yesus In ka nloim fa he atoni bian sin nahinen nak In et le' naa. Mes In ka nabei' fa he na'tolo'.

25-26 Anbi nane, anmui' naan bifee mnasi yes, le' ka Yahudis fa, le' nahoins ee nbi pah Fenesia et propinsi Siria. Tabu in nneen nak Na' Yesus neem ate, in nnao ma ntoti he nliu' napoitan niut amle'ut na'ko in aan feto.

27 Na' Yesus anpolin uab ma nak, “Li'aan eun sin lo he nbukaen nahunun, oke te na' anpolin mnaah neisf eun neu asun.’’ [Nok salit ma'tolo' nak, Na' Yesus lo mees he ntulun In atoni Yahudis sin fe', na' antulun atoni bian.]

28 Mes bifee nane nataa ma nak, “Namneo! Mes asun nane sin et mei ye kupun. On nane te sin nahan amnaah amouft eun na'ko li'aan eun sin a'piik eun.’’ [Nok salit nak, tabu li'aan eun anbukaen, asun nane napenin amnahat amsa'. Maski Na' Yesus antulun Inin kuun, In lo mees he nkius atoni bian amsa'.]

29 Anneen on nane te, Na' Yesus na'uab ma nak, “Hoi, bifee ii loo bifee! Ho uab le' nane lo namneo! Es on nane te ho mfain nai, natuin niut amle'ut nane anpoi nalali yeen na'ko ho anah.’’

30 Oke te bifee nane anfain koit. Antia in ume te, in anah nane antuup anfiin. Niut amle'ut nane anpoi nalali yeen.

31 Oke te Na' Yesus sin nasaitan koot Tirus, ma nnao nleuk lanan le' et tasi ninen, nfinin neu koot Sidon. Na'ko nane, sin nnao nfinin tal antian nifu Galilea. Oke te sin nnao neu pah es nok koot bo'es, le' sin nteek nani mnak, ‘Dekapolis’.^d 32 Anbi bale nane, anmui' atoni yes le' ka na'uab nahiin fa, ma le' antono' nok. In aon-bian sin neki nnao neu Na' Yesus. Sin ntotin he Na' Yesus antao In i'niman neu amenat nane, he naleko'. 33 On nane te Na' Yesus nasaitan too mfaun eun, ma nnao nmees nok atoni nane. Na' Yesus nataam In iklulun neu atoni nane in luik nenu nua sin. Oke te In ntao hape neu In iklulun nane ma annefo atoni nane in maan. 34 Na' Yesus anbaiseun neu neno tnanan ma anheel asnasan, nalalit naplenat anpaek sin uab ma nak, “Efata!’’ (In otan nak, “Mutfei nai!’’)

35 In na'uab on ahaa le' nane, mes amenat nane in luikn eun natfein ma anneen nain tabu nane. Ma in maan le' ka na'uab nahiin fa nane, anma'nuul nain amsa', on nanet in nmulai na'uab nok leko.

36 Oke te sin nua sin nfain koit neun too mfaun. Na' Yesus anpenan sin ma nak, “Amneen, oo! Kaisa' m'eut meu sekau-msekau mak, Au uleko' ulail atoni le' ii.’’ Maski Na' Yesus anpenan sin nok ma'tane' msa', mes sin na'uab eun piut anbi ale' bale. 37 Too mfaun eun le' anneen uab man'etun nane, ansanmakan. Sin na'uab eun ma nak, “Ma'taen le'uf! Atoni le' ii anmoe' ale' saa' ii lo leko oke'. Atono' te, anneen. Le' ka na'uab nahiin fa te, na'uab.’’