2 Na'euk nok atoni Yahudis sin neon onen, Na' Yesus antaam anbi uim onen he nfee noina'. Neno nane, too mfaun eun neem he n'oen eun. Tabu sin aal sin anneen In noina' on nane te, sin ansanmakan ma na'uab eun ma nak, “Atoni le' ii hinen ma'tane'! In anmui' kuasat amsa'! Nok lanan mee es In nabei' on le' ii? 3 Amneot et, In ala tukan hau. Hit tahiin In einaf bi Maria, nok ale' In olif sin, es le': na' Yakobus, na' Yoses, na' Judas nok na' Simon. Hit tahiin In feotf eun amsa'. Hit tok Na ma aal kit tatua kuan mese'!’’ On nanet sin na'to'an ma ka nneen antein Ye fa'.

4 Oke te Na' Yesus na'uab ma nak, “Teeb! Atoni antola mafefa knino' Uisneno le' anao-amnemat, anneis na'ko mafefa knino' kua tuaf.’’^a

5-6a Too mfaun eun, sin neek eun namaun nisan, tal sin ka nlomin fa he npalsain neu Na' Yesus. Es on nane te, In ansanmaak, tal antia In ka nmo'e ntein fa lasi mkakat anbi nane. In ala anneof naleko' naan amenat fauk aah.

6b Nalalit Na' Yesus annao neu kuan-kuan le' anmapaumakan anbi nane, ma nfeen sin noina' anmatoom nok Uisneno In i'lomin. 7 In anboin naan asimo lasi tuaf bo'es am nua, ma nleun sin tuaf nu-nua, he nnao ma n'eut Uisneno In Lais Leko. In nfee kuasat amsa' neu sin he nli'un niut amle'ut. 8-9 In nba'an sin ma nak, “Kaisa' meki blua' amfaun anbi lanan, fun Uisneno of es an'atol hi paluut sin. Hi kais meik beti', noni, ma alu'. Hi meiki yaah teas, 'pein haef, ma mpaek maan ahaa 'fanu' mese'. 10 Kaul sekau nsium ki he mtaam meu in ume, mimaika' anbi nane tal antia hi mnao mfiin meu bale bian. 11 Mes kaul anbi bale mee sin ka nsium ki fa, ma sin ka natniin ki fa, ampoi mi'ko bale nane. Ma m'etun sin mak, ‘Natuin hi ka mloim he mitniin fa, es nane te maut he hi msutai kiim in amle'ut!’’’^b

12 Nalalit sin nnao ma n'etun Lais Leko nane. Sin nak, “Ale' mansian aal ki so' lekot hi misaitan hi sanat ma penu sin, ma miteu'n om he mmoin mituin Uisneno In i'lomin.’’ 13 On nanet sin anliu' napoitan niut amle'ut namfaun. On nane msa', sin nalonip mina' neu atoin amenat sin i'naak eun, ma n'oen eun he naleko' sin. On nanet sin nalekon.^c

14 Tabu nane, too anbi ale' bale anneen nalail anmatoom nok Na' Yesus. Nu'un anmatoom nok Na' Yesus In kuasan manenab nalail antia usif Herodes amsa'. Tuaf bian na'uab eun ma nak, “Na' Yohanis Aslain atoni anmoni nfain et Na' Yesus In ta'un! Es etun In nabei' he nmoe' ale' kanan lais sanmakat.’’

15 Mes tuaf bian nak, “Kahaf! In le' ii, mafefa knino' na' Elia es le' anmoni nfain et In ta'un.’’ Bian amsa' nak, “In le' nane, Uisneno In mafefa knino' tuaf es na'ko afi tabu ahunut.’’^d

16 Mes tabu usif Herodes anneen lasi nane te, in nak, “Ii na' Yohanis Aslanit, le' afi au 'leun tuaf he nkeut nafeek in i'nakan. Tabu le' ii in nmoin anfain.’’

17-18 Usif Herodes anleun on le' nane, natuin in nmoe' lasi nok na' Yohanis. Lasi nane na'uub on, on ii: usif na' Herodes anteet naan in olif na' Felipus in fee, kanan bi Herodias. Amneot aa, na' Felipus nok bi Herodias fe' ka nmapoiln eun fa'. Natuin lasi nane es, na' Yohanis nabookn aa piut-piut ma nak, “Usi'! Ka nabei' fa he ho mait ho oli' in fee. Natuin lasi nane antanhai hit halat atoni Yahudis.’’ Mes na' Herodes in ka nafetin fa bi Herodias. Ma in anleek tuaf he nheek na' Yohanis ma nataam ee neu uim o'of.^e

19 Natuin na' Yohanis nabookn aa piut-piut on le' nane, es on nane te bifee nane napela' neek menas he nlool nisan. Mes in fe' ka napein fa manuan, fun na' Herodes nataam nalail na' Yohanis anbi uim o'of, 20 ma anleek solalus sin he npao lek-leko.

Na' Herodes an'ao-mahein na' Yohanis. In nahiin nak Uisneno es le' anleek na' Yohanis. Ma na' Yohanis nane atoni neek leko. Na' Herodes anloim he nneen na' Yohanis in uaban. Mes anfoe naan ate, in npenan na' Yohanis in uaban.

21 Anbi tabu wes, fenai Herodias napein manuan he natiaba' in neek menas nane. Tabu nane, sin nfeest eun neu na' Herodes in neon mahonin. Sin na'auba' a'naet eun he nokan nbukaen anbi fesat nane. Amnokat sin, es le' anaa' aplenat, a'naak solalus, ma mnasi-mnasi' pah Galilea. 22 Tabu fesat anbati neesb on, fenai Herodias in aan feto antaam neem ma nasboo'. In sboo'n ee leokn ee tal antia nmoe' usif Herodes nok ale' amnemat fesat nane anmalinan nmaten. Es on nane te, Na' Herodes anboin li'aan feot asbo'ot nane ma nak, “Ho mloim he mtoit saa' ate, m'eut kau'! Au mes a'fee ko'. 23 Maski ho mtoti tal antia tbati tnesab au plenat ii msa', au 'fee ko ye. Au 'suup 'eik Uisneno In kanan!’’

24 Li'aan feto nane annao ma nataan in einaf ma nak, “Ein! Ho mloim he au 'toit saa' le' naleko nneis na'ko ama'?’’

Ma in einaf nataa ma nak, “Neu! Leko! Amnao nai ma mtoit es na' Yohanis in i'nakan.’’

25 Nalalit li'aan feto nane neem labah neu na' Herodes in matan ma nak, “Aam! Au 'toit he mfee kau na' Yohanis in i'nakan. Amtao maan ee neu 'tuuts es. Labah!’’

26 Tabu na' Herodes anneen haan totis nane te, in nekan namneuk. In ka nabei' fa he anheel nafani' in haan supat, natuin ale' too mfaun eun anneen nalail haan supat nane. 27 Oke te in naplenat naan a'naak solauls es ma nnao he nkeut neik na' Yohanis in i'nakan na'ko uim o'of. 28 Oke te sin nkeut naan na' Yohanis in i'nakan, ma ntao nbi 'tuuts es. Nalalit sin annao ma nfee neu li'aan feto nane. Li'aan feto nane ansimo, ma nnao ma nfee neu in einaf. 29 Tabu na' Yohanis in asimo lasi sin annenan nak, an'oet nalail na' Yohanis in i'nakan, sin neman ma nait neki na' Yohanis in ta'un, ma annaon ma nsuub.

Nu'un anmatoom nok na' Yohanis in i'maten antuu' ma nheu' on le' nane.

30 Neno wes, Na' Yesus In asimo lasi sin le' In anleun sin tabu ahunut, sin nfain neem ma nabuan nokan. Sin an'etun ale' kanan lasi le' sin nmoe' nalail sin, nok ale' saa' le' sin nanoina' nalail sin neu too mfaun eun.

31 Tabu nane, too amfaut eun annao na'onin neu-mneman he nami Na' Yesus. Tal antia In nok In asimo lasi sin ka napenin fa sona' he nbukaen. Na' Yesus na'uab nok In asimo lasi sin ma nak, “Eim he tnao taim bale ma'tolo', he tapein sona' he tasnaas akle'o.’’

32 On nane te sin aal sin ansaen anbin 'belo', ma sin annao ma namin bale ma'tolo', na'loo na'ko kuan.

33 Mes too mfaun eun nita' 'belo' nane nnao nabnono npio' nifu nane in ninen. Oke te sin natuin eun anpi'on laan meto', ma sin ntia nahunun Na' Yesus nok asimo lasi sin. 34 Tabu Na' Yesus ansaun na'ko 'belo' nane, In niit too mfaun eun anpao nani. Oke te In ankasian sin, natuin sin ka nahinen fa he nmo'en saa', paap mese' on le' 'bib-kase le' ka nmu'if atukus. Oke te In nanoina' sin Uisneno In i'lomin^f 35-36 na'ko tabu neno namteut tal antia neno nmaeb. On nanet In asimo lasi sin na'uab neu Ne ma nak, “Aam! Leko nneis Ho mleun too mfaun eun ok-oke', he nnaon ma nsoosn aa mnahat anbi ale' kua paumaka' nbi ii. Fun neno he nfai yeen, ma ka tiit fa mnahat et bale ii.’’

37 Mes Na' Yesus nataa sin ma nak, “Kaisa'! Lo mees hi es he mfeen sin he nbukaen.’’

Mes sin nataan Ee ma nak, “Ailoo! Kaul hit es he ttuthae too mfaun eun ii, hit so' he tapoitan noni' mfaun! Namnees nok ameput mese' in kai nbi toon es!^g Mes hit tapein noni' amfaun nane na'ko mee?’’

38 Mes Na' Yesus nataa sin ma nak, “Hi mnao he maim miit fe', sekau es amneik beti'.’’

Oke te sin nnaon ma natanan ma nfain neman an'eutn am nak, “Anmui' utunu' pisa' niim, nok ika' koe' nua yaah.’’

39 Oke te Na' Yesus anleun too mfaun eun nane he ntokon pukan-pukan anbin huun. 40 On nane te sin ntokon puukn ok. Pukan bian nabuan nat-natun, ma pukan bian antein bo' nim-niim.

41 Oke te Na' Yesus nait naan utunu' pisa' niim ma ika' koe' nua'. Oke te In nbaiseun neu neno tunan ma natiaba' makasi neu Uisneno. Oke te In an'ebi utunu' nane pisa'-pisa', ma anfee sin neu In asimo lasi sin, he nnao ma nbatin neu too mfaun eun nane ok-oke'. Ika' koe' nua' eun nane msa', In nbait sin neu sin aal sin. 42 On nanet sin aal sin anbukaen tal antia npetan. 43 Tabu sin anbukae nalail on nane te, asimo lasi sin nabuab nafani' mnaah nesif nane, nahenu 'sau' bo'es am nua'.

44 Sin aal sin ok-oke' oni' too nifun niim. Nane sin ansoi' nana haa atoin' eun. Bifee ma li'ana' ka maso'ik fa'.

45 Oke te Na' Yesus anleun In asimo lasi sin he nnao nsaen a'belo' he nnao nahunun neu kuan Betsaida et nifu in aon-bian. Mes In fe' na'maika anbi nane, he nleun too mfaun sin he nnao nfanin. 46 Tabu sin aal sin nfanin on nane te, In ansae neu 'tubu yes ma n'onen.

47-50 Tabu manas anfai yeen te, Na' Yesus ansanu nfain. In niit asimo lasi sini 'belo' ntia nlail nifu tnanan. Mes sin anseopn ok ma'tane', natuin a'belo' nane annao antumatan nok ani slutuf. Tabu neis neu he nmeu te, Na' Yesus annao natuina' sin. Mes In annao ntoen oe ye tunan. Tabu In he nnao nahunun 'belo' nane te, sin nkius niit Ee. Sin namtaun nmaten. On nane te sin mantanan es nok es ma nak, “Hoe! Saa' es le' naa? Nitu, ai'?’’

Mes Na' Yesus na'uab ma nak, “Hoe! Hi kaisa' mimtau! Au es Kau le' ii.’’

51 Tabu Na' Yesus antaam neu 'belo' nane, anin nane nasnaas nain. In asimo lasi sin ansanmakan namneo-namneo. 52 Sin fe' niit Na' Yesus In neki kuasat ma ntuthae too nifu niim anneis, mes sin ka nahiin namneo fa fe' In kuasat nane, natuin sin neek manu'.

53 Tabu sin antian nifu nane in aon-bian, sin nasanut 'bonit anbi koot Genesaret in ninen. 54 Tabu sin ansanun na'ko 'belo' nane, too mfaun eun niit sin. Ma sin anmaboin eun ma nak, “Hoe! Na' Yesus neem een, oo!’’ 55-56 Sin aal sin naenan ma nma'eutn eun nfuun am nateef, tal antia sin anloi neik ale' kanan ameent eun.

Teik uab tuka', lamun sin nnenan nak Na' Yesus et bale mee, sin aal sin anloi neik ale' kanan ameent eun, ma natupa' sin anbi mnela' huu sona'. Sin nateenb eun ma nak, “Lamun amenat sin anneof naan Na' Yesus In beet-kone in panan, sin of nalekon.’’ Sin nmo'en on nane te, sin naleok nanin.