2-6 Anbi nane, anmui' naan atoni yes le' nitu ansaen tal in namaun. In natua nbi niut naetn aa. Fai-manas in na'oin neu-mneem nok ao monas piut anbi ale' netu' ma nonof sin, ma nhunun ka natfeek fa'. In ntuut napapa' in aon neik fatu. In ma'taen le'uf. Ka tiit fa es, le' nabei' he nfutu, maski npaken kolen besi msa'. Sin nfuut in haen ma in niman piut-piut neik kolen besi, mes in nafeek kolen besi sin, ma niit besi nane in na'iup sin na'ko in haen enu. In lo ma'taen le'uf, tal antia ka tiit fa tuaf es, le' nabei' nani.

Tabu Na' Yesus sin ansanun na'ko 'belo', aniut-saes nane niit sin na'ko 'loo. In npoi na'ko niut naten, ma in naen an'ain Na' Yesus ma nli'tuu nbi In matan. 7-8 Tabu Na' Yesus niit atoni nane te, In na'uab ma nak, “Hoi! Niut amle'ut! Ampoi nai mu'ko atoni ii!’’

Nalalit atoni nane anhunun nameep-meep ma nak, “Hoi! Ho he musaa' kau'? Au uhiin 'ak Ho le' ii Na' Yesus, Uisneno Akuasat In Anah. Au 'toit Ko he Ho kaisa' mha'mui' kau, woo!’’

9 Nalalit Na' Yesus nataan ee ma nak, “Ho kaanm aa, sekau?’’

In nataa ma nak, “Au kaank aa na' Legion, natuin hai mfau le'uf, on le' solalus batalion-batalion sin!’’

10 Niut amle'ut sin anpake atoni nane he ntoit Na' Yesus he kaisa' nleun sin he npoin na'ko bale nane.

11 Anhaumaak bale nane, atoni fauk anpao fafi puka' naek mese'. Fafin le' nane oin nifun nua'. Sin nsoban amnahat anbi 'tubu nane in ibnapan. 12 Nalalit niut amle'ut sin antotin ma nak, “Amleun kai he hai mnao mtaam neu fafin le' naa.’’

13 Na' Yesus ansimo sin haan totis nane. Es on nane te, ale' niut amle'ut sin nane sin anpoin ma antaman neu le' fafin nane. Fafin pukan nane, naen ansiksaan ok, ma natlolo nsanun npi'on naisanut ma nmoufun ntaman neu nifu nanan. Ma sin nleem anmaten ok-oke'.

14 Ankius nitan on nane te, apao faifn aa namtaun nmaten. Sin naenan nfuun ma natefan kuan-kuan mapaumaak eun, ma n'etun ale' too namfau. Es on nane te, too mfaun eun anpoi neman he nkius niit kuuk saa' le' anlali anbi le' nane. 15 Sin neem na'euk nok Na' Yesus, ma sin niit atoni aniut-saes nane ntoko nbi nane. Mes in teenb aa naleko nfain, ma in anpaek mau'. Ma tabu sin niit lasi nane sin aal sin namtaun, fun sin nahiin nak sekau es le' nabei' he nliu' napoitan niut amleu't eun na'ko atoni nane, lo in atoni ma'taen le'uf. 16 Nalalit sin aal sin anma'eut eun nak sin niit neik sin maatk enu nak, atoni aniut-saes nane naleko nfain, ma faifn aa nleem anmaten. 17 Nalalit sin antotin a'teb-teeb he Na' Yesus annao nasaitan sin pah.

18 Tabu Na' Yesus he ansae nfain neu 'belo' nane te, atoni aniut-saet le' naleok nalail nane, in neem ma ntoit he in nabei' nnao nabua nok Na' Yesus.

19 Mes Na' Yesus anpeen. In na'uab neu atoni nane ma nak, “Leko nneis ho mfain nai meu ho nonot sin. M'eut neu sin ale' kanan lasi le' Uisneno nmo'e nlali sin neu ko'. M'eut neu sin mak, Uisneno nneek ma nkasian ko'!’’

20 Nalalit atoni nane annao nfuun ma nateef pah es nok nain in koot bo'es, le' antekat nak ‘Dekapolis’. In n'eut ma natoon ale' kanan lasi le' Na' Yesus anmo'e nalali sin neu in. Ma ale' too mfaun le' anneen in uaban nane ansanmakan ma nma'eutn eun ma nak, “Lo ma'tane', woo!’’

21 Nalalit Na' Yesus sin ansaen 'belo' ma anlaak anfanin neu nifu in aon-bian. Tabu sin ansanun na'ko 'belo' nane, too mfaun neman ma n'iuk naan.

22 Anbi koot nane, anmui' naan atoni yes, in kanan na' Yairus. In es na'naak anbi uim onen koot nane. Tabu in niit Na' Yesus, in nli'tuu nbi Na' Yesus In matan, 23 ma antoti ma nak, “Koi, Aam! Au aan feto fe' toon bo'es am nua'. In nameen ma he nuu nmaten. Ho mkoen Om oum he mtulun muleko' maan au anah nane!’’^a

24 On nane te, Na' Yesus annao natuin na' Yairus neu in ume.

Tabu sin annaon on nane te, too mfaun nok ma anbe'u.

25 Anbi too mfaun eun nane, anmui' bifee yes le' napein funan le' anloni kle'o-kle'o ka natfeek niit fa oin toon bo'es am nua yeen. 26 In nalail in noni nok in i'mu'in he nbaen apaloil menas sin. Mes ka tiit fa tuaf es nabei' he naleko' in menas naa. In naa' ka nheut niit fa, tal in menas nane ma'fena'. 27-29 Bifee nane anneen piut-piut anmatoom nok Na' Yesus. Es on nane te, in nbeu' too mfaun eun nane, he npaumak-maak anbi Na' Yesus In kotin. In natenab ma nak, “Na haa au 'neof 'aan In beet-kone, au of uleok.’’

Tabu in neof Na' Yesus In beet-kone, nok askeken, naa' nane anheut. In natnina te in naleko ween.

30 Na'euk tabu nane msa', Na' Yesus natnina te anmui' nenuf le' anpoi na'ko In ta'un. Es on nane te, In nabain on ma nkius neu too mfaun eun nane. Oke te In nataan sin ma nak, “Sekau es le' anneof Au beet-kone?’’

31 In asimo lasi sin nataa ma nak, “Ho mnuu' Kuum. Too mfaun sin anmabe'un es nok es ate, Ho mutana mak, ‘Sekau es le' anneof Au beet-kone?’’’

32 Na' Yesus annuu' sin mese'-mese' he naim tuaf le' anneof In beet-kone. 33 Anneen Na' Yesus nataan on nane te, bifee le' naa namtau ma na'tai'. Nalalit in nli'tuu nbi Na' Yesus In human ma In matan, ma nmanaku mnak, “Koi, Aam! Au es le' a'neof Ho beet-kone nane, pah.’’

34 Ma Na' Yesus nataa bifee nane ma nak, “Ein! Natuin ho nekam na'teeb amneot neu Kau, es nane te ho muleok. Ho mfain nai nok neek malinat, fun ho susal nane namsopu ween.’’

35 Tabu Na' Yesus an'eut on nane te, atoni yes neem na'ko na' Yairus in ume, ma n'eut ma nak, “Eee, kasian! Ho aan feto smanan nfeen een. Kaisa' muhaeba' Uis kulu ntein!’’

36 Mes Na' Yesus ka nfiloil fa atoni nane in uab. On nane In na'uab neu na' Yairus ma nak, “Kais mumtau! Ampalsai meu Uisneno!’’ 37 Nalalit Na' Yesus anleun too mfaun eun ok-oke' he namaik antahan anbin nane. Mes In nok ahaa na' Petrus, na' Yakobus ma in olif na' Yohanis, he sin annaon nfinin. 38 Tabu sin antian na' Yairus in ume, sin niit too mfaun an'uuls eun mepu huma'-huma', bian ankaen ma bian an'etun. 39 Na' Yesus antaam anbi nane. In nataan sin ma nak, “Nasaa' am es hi mtaisiub ma mkae on le' ii? Li'ana le' ii ka nmatef. In aal antuup kuun.’’

40 Tabu sin nneen Na' Yesus na'uab on nane te, sin nmanis nisan.

Nalalit In nleun sin he npoin ok-oke'. In nboin li'ana nane in einaf ma in amaf, ma nok In asimo lasi tuaf teun, nalalit sin aal sin antaman anbi li'ana nane in ke'an. 41 On nane te Na' Yesus annaa' li'ana nane in i'niman, oke te In na'uab neki sin uab Aram ma nak, “Talita kum!’’ (Le' neki hit uaba' te nak, “Aan feto! Amfeen nai!’’)

42-43 Nok askeken ate, li'aan feto nane anfeen ma anhaek. Na' Yesus anleun aan feto nane in einaf nak, “Amfee ne he naah!’’

Ale' too mfaun eun le' niit lasi nane ansanmakan. Mes Na' Yesus anpenan sin nok haan ma'tane' ma nak, “Kaisa' m'etun es am es mak Au umonib ufani' li'aan feto amates le' ii!’’