Usif Yesus na'leta' anmatoom nok fini nbi nain huma'-huma'
(Na' Mateos 13:1-9; Na' Lukas 8:4-8)
4
Anbi neno wes, Na' Yesus annao nfani nteni nbi nifu Galilea. Ma too amfaut eun neman ma n'iuk naan. Anmu'i 'belo' wes anhake nbi nane. Oke te In ansae ma antoko nbi 'belo' nane in tunan, ma nanoina' sin. Too amfaut eun le' anbi nifu nane in ninen, anneen In uaban.a
Na' Markus 4:1-20
3 “Hi mneen milek-leko'! Anmui' naan akifun fini tuaf es annao ma nkifun fini nbi in lene. 4 Tabu in nkifun fini te, bian anmoufun anbin lanan. Es on nane te, kolo sin neman ma nteo naan finin nane. 5 Ma fini bian anmoufun anbin nai mafatu' le' in nain manihis. Fini nane natool labah. Mes natuin nain nane manihis, 6 es on nane te, tabu manas ansae, fiin atolos sin nane maknene ma nmaet, natuin sin i'baa'k enu ka ntaman fa'.
7 Finin bian antein nmoufun anbin nai maskuna'. Oke te nai maskuna' nane anneo niis fini nane, tal antia ka napunen fa'. 8 Ma finin bian anmoufun nbi nai nesa'. Fini nane natool, ma na'nae tal napunen. Fini bian napuin ma napoitan fuan tal antia no bo' teun, bian no bo' nee', ma bian no natun mese'.
9 On nane sekau le' anneen ma nheek nani 'leta' le' ii in otan, maut he in nateenb ee nnao nkoon.’’
Nasaa' am es Usif Yesus nfee noina' te, anpake 'leta'?
(Na' Mateos 13:10-17; Na' Lukas 8:9-10)
10 Nalalit tabu Na' Yesus anmes-mees, In asimo lasi sin tuaf bo'es am nua, nok atoni bian antein le' anneen niit In i'leta' nane, neman he na'euk nokan. Sin natanan henati' In an'eut neu sin 'leta' nane in otan. 11 Na' Yesus nataa sin ma nak, “Natuin hi mloim he mihiin Uisneno In Iplenat amneot, es on nane te, Au 'eut ki 'leta' nane in otan. Mes neu tuaf bian, Au unoina' sin 'eki 'leta'. 12 Atoni bian sin nahuum on le' saa' le' Uisneno In mafefa knino' antui niit ma nak,
‘Sin niit nalalin, mes ka nlomin fa he nahinen.
Sin anneen nalalin, mes sin ka nlomin fa he nsimo.
Maut he sin kais anpalsain neu Uisneno,
henati' Uisneno kais anfeen sin saok sanat antein.’’’b
Usif Yesus anfei 'leta' anmatoom nok fini nane in otan
(Na' Mateos 13:18-23; Na' Lukas 8:11-15)
13 Nalalit Na' Yesus anfei leta nane in otan ma nak, “Kaul hi ka mheek fa 'leta' le' ii in otan, nok lanan mee, he hi mibe'i mheke 'leta' bian sin otan? 14 On nane 'leta' le' ii in otan es le' ii: akifun fini nane, es le' tuaf le' n'etun ma natoon Uisneno In A'an ma In Iplenat. 15 Finin le' anmoufun anbi lanan, tal antia kolo sin anteo nain sin nane, es le' tuaf-tuaf le' anneen Uisneno In A'an ma In Iplenat. Mes ka 'loo fa te, niut amle'ut sin i'naak anesit neem ma nasiik naan A'an ma Plenat nane na'ko sin neek enu. 16 Finin le' anmoufun nbi nai mafatu', es le' tuaf-tuaf le' anneen ma ansimo A'an ma Plenat nane nok neek malinat. 17 Mes A'an ma Plenat nane ka na'baa' fa'. Es on nane te, in ka ntahan fa 'loo anbi sin neek eun. Ma tabu atoni bian nasusab sin, natuin sin ansimo A'an ma Plenat nane, sin npolin nani A'an ma Plenat le' nane. 18 Finin le' anmoufun nbi nai maskuna' in atnanan, es le' atoin eun le' anneen nalail A'an ma Plenat nane. 19 Mes sin nasesun manenu' nok lasi huma'-huma', he sin nhaliin sin aok eun. Es on nane te, sesu huma'-huma' nane, es le' antite' napoitan A'an ma Plenat nane na'ko sin neek eun, on nane A'an ma Plenat nane ka nafua fa saa'-saa'. 20 Ma finin le' anmoufun neu nai nesa', es le' sin le' anneen ma ansium A'an ma Plenat nane, nalali te natuin Uisneno In i'lomin. Nalali te sin anmoe' alekot, on le' finin le' nafuan. Bian napuin ma napoitan fuan tal antia no bo' teun, bian no bo' nee', ma bian no natun mese'.’’
Kaisa' m'oeb paku meki 'sau'
(Na' Lukas 8:16-18)
21 Na' Yesus na'uab piut na'ko 'belo' in tunan. In nfee 'leta' es antein ma nak, “On mee! Hi miit miit, ai' kahaf, kaul atoni nout pauk ana', oke te an'obe neki 'sau'? Ai' antao nbi hala' kupun. Ka tiit fa fe', ai'? Kaul antao wee nbi nane, in ka npiin fa yeen. Atoni lo mees he ntao paku nbi bale ma'aiti' he npiin.c
Na' Markus 4:21-41
22 Nok lanan nane, lasi le' nahunut ma'tolo', of mamnita'. Ma saa' le' tabu ii ka mahine' fa', of mahine'.d 23 Sekau es le' anneen ma anheek nana 'leta' ii in otan, maut he nateenb ee nnao nkoon.
24 Mitenab milek-leko'! Kaul hi mleit atoni in i'mo'en, atoni bian of anleit ki on nane msa'. Uisneno of anleit ki nneis na'ko nane msa'.e
25 Kaul sekau he naim Uisneno In i'lomin namneo-namneo te, in hinen of anlonu won piut. Mes atoni le' ka nlomi natuin fa Uisneno In i'lomin, in mono of anlonu won piut amsa'.’’
'Leta' anmatoom nok fini le' anmese nmoin kuun
26 Nalalit Na' Yesus na'uab antein ma nak, “Uisneno In Iplenat ansaat on antein, on le' finin le' makifu' anbin atoni in lene. 27 Maski atoni nane anfain neu in ume, ma fai-manas in ntuup ma nfeen, in annikan nain finin nane. Mes finin nane natolon ma na'naen piut. 28 Finin nane anmoin kukun anbin nain, anmulai na'naen, nasufan, ma napunen. 29 Kaul ane namnaut in tuan ee aal nema ma nonu waah. Uisneno In Iplenat ii on nane amsa'. Ale' saa'-saa' ii, Uisneno es le' anmeup sin.’’f
'Leta' anmatoom nok fini le' namnuut niis
(Na' Mateos 13:31-32, 34; Na' Lukas 13:18-19)
30 Oke te Na' Yesus na'uab antein ma nak, “Au 'fee 'tein ki 'leta' es on ii. Uisneno Inin, nahunut te sin fauk aah, mes na'ko neno neem neu neno, sin ansaat ok piut ma namfau nneis. 31 Nane namnees on le' fini le' namnuut niis anbi po'an. 32 Kaul hit tseen fuaf namnuut niis on nane, in na'nae nfain hau' naek anbi po'an nane. Tal antia kolo sin neman ma namin hafo' anbi nane, ma nakunan.’’
33 Na' Yesus nanoina' sin neki 'mo'ef on nane, namnees nok sin hinet. 34 In lo neki 'leta' kaul In nanoina' tuaf bian sin. Mes kaul In nok In asimo lasi sin, In an'etu ale' 'leta' nane sin salit.
Usif Yesus nasnasab ani slutuf
(Na' Mateos 8:23-27; Na' Lukas 8:22-25)
35 Maans ee nmaab een, mes Na' Yesus fe' anbi 'belo' in tunan. Ma In nleun In asimo lasi sin ma nak, “Eim he aal kit atlaak teu nifu in aon-bian.’’
36 Oke te sin ansaena' 'belo' nabuan nok Na' Yesus. Ma sin nnao nasaitan too mfaun eun anbin nane. Mes bian ansaen anbi 'belo' 'teta'. 37-38 Tabu nane Na' Yesus antao In i'nakan anbi aka'nunu' ma ntuup anfiin anbi 'belo' in kotin nanan. Sin annaon ka 'loo fa te, ani slutuf neem. Ma oki anpesen sin, ma oe ye ntaam anbi Na' Yesus sini 'belo', tal antia ala kle'o te naheun. On nane asimo lasi sin namtau nmaten. Ma sin neem anpoo' nafena' ma nak, “Aam! Amfeen fe'! Hit he tleem atmaet yeen! Mes Ho ka mfiloil kit fa'!’’
39 Anneen on nane te, Na' Yesus anfeen ma ntaal anin ma nak, “Musnaas nai!’’ Oke te In naplenat okin nane ma nak, “Mi'tena' nai!’’ Tabu le' nane, anin nane nasnaas nain, ma okin nane namnee' nanin. 40 Nalali te Na' Yesus nabokan In asimo lasi sin ma nak, “Nasaa' am es hi mimtau miis on nane? Hi ka mmui' fa 'panet ma fnekat meu Kau, kah?’’
41 Sin aal sin namtaun ma nsanmakan. Ma sin namoolk eun ma nak, “In le' ii, sekau'? Tal antia anin ma okin sin natuina' In iplenat!’’