Usif Yesus naleko' atoin amenat na'euk nok neno snasat
(Na' Mateos 12:9-14; Na' Lukas 6:6-11)
3
Oke te Na' Yesus anfain 'koit neu uim onen. Anbi nane, In niit atoni mese, le' in i'niman bian an'oel.
Na' Markus 3:1-19
2 Anbi nane msa', anmui' atoni bian le' namin lanan piut-piut, he nasaan Na' Yesus. On nane te, sin natuina' Na' Yesus, he nahinen neu In naleko' atoni amenat nok neno snasat, ai' kahaf.
3 Oke te Na' Yesus anhaman atoni le' in i'niman bian an'oel le' nane nak, “Bae'! Oum he mhaek meu matan ii.’’
4 Oke te In nataan sin ok-oke' mnak, “Kaul tatuina' hit fekat lais palsait, hit tabei' he tmoe' saa' anmatoom nok neno snasat? He taleko', ai' tale'u? He taleko' atoin amenat, ai' he tlool tisan?’’ Mes sin ka ntutan fa saa'-saa'.
5 On nane te Na' Yesus In nekan ansuus anmaet, natuin sin ntao niis neek eun he npanat sin halat ma atolan, anneis na'ko he npanat atoni 'niim a'olet nane. Oke te In natoo' ma In na'mee' In maatn enu neu sin. Nalali te In nak atoni nane nak, “Bae'! Amnona' ho 'nimam neem!’’ On nanet atoni nane annona' in i'niman. Nok askeken ate, in i'niman naleok nain.
6 Nalali te atoni na'ko nonot palsait Farisi sin anpoin ma annao nasaitan uim onen nane. Ma sin annao na'euk nok atoni na'ko nonot politik Herodes, he sin nabuan namin lanan he na'maet Na' Yesus.
Usif Yesus naleko' too mfaun anbin nifu Galilea in ninen
7-8 Anbi neno wes, Na' Yesus nok In asimo lasi sin annaon he nasnasan 'kle'o anbi nifu Galilea in ninen. Mes, natuin too mfaun eun, sin anneen saa' le In anmoe' nalail sin, es on nane te, too na'ko kuan-kuan neman ma natuin In. Sin neman na'ko propinsi Galilea, Yudea, ma Idumea. Bian antein neman na'ko koot Yerusalem, Sidon, ma Tirus. Bian antein neman na'ko noe Yarden in aon-bian neon-saet. Sin aal sin namin lanan he na'euk nokan. 9 Na' Yesus anleek In asimo' lasi sin he nami nfeen Ee 'belo' mese', natuin amnemat sin nane, sin namfaun. In nloim he na'uaba' anbi 'belo' in tunan, henati' In mamnita' ma sin nneen In hanan.
10 Afi neno, In naleko' naan amenat namfau. Es etun ta'at, ale' amenat bian sin anmabe'un he nneof naan In.a 11 Tabu atoin eun le' anniut-saen sin niit In, sin ntoofn ok anbin Na' Yesus In matan. Ma sin anhunun ma nak, “Ho le' nane, namneo Uisneno In Anah!’’
12 Mes In ntaal sin nok ma'tane ma nak, “Kaisa' m'etun meu sekau-msekau saa'-saa' le' anmatoom nok Kau'!’’
Usif Yesus anbeit In asimo lasi ta'uf bo'es am nua'
(Na' Mateos 10:1-4; Na' Lukas 6:12-16)
13 Oke te Na' Yesus ansae nbi 'tubu' wes. In anboin naan atoni fauk he natuina'. On nanet sin neem natuina'. 14 Oke te In anlulu naan atoni bo'es am nua'. In nak sin ma nak, “Au 'beit ki he hi mituina' Kau piut-piut. Au he 'leun ki he mnao ma m'eut Uisneno In Lais Leko neu ale' kanan mansian. 15 Ma Au of a'fee ki kuasat he mliu' nitu maufinu sin na'ko mansian sin.’’
16-19 Asimo lasi tuaf bo'es am nua' eun nane, es eun le':
na' Simon (le' Na' Yesus anteek ee te nak, na' Petrus),
na' Yakobus, nok in olif,
na' Yohanis, (sin nua sin, na' Sebedius in anah sin. Na' Yesus anteek nanesa' sin nua sin nak, ‘Boanerges’, le' neik hit uab ate nak ‘lotos le' na'punu'’.)b
na' Anderias,
na' Felipus,
na' Bertolomeos,
na' Mateos,
na' Tomas,
na' Yakobus (na' Alfius in aan mone),
na' Tadius,
na' Simon (atoni na'ko nonot politik Selot),c
ma na' Judas Iskariot (le' of he na'sosa' Na' Yesus).
Anoina' lasi palsait sin nasaan Usif Yesus nak, niut maufinu sin i'naak anesit es le' anfee kuasat neu In
(Na' Mateos 12:22-32; Na' Lukas 11:14-23, 12:10)
20 Oke te Na' Yesus nok In asimo lasi sin ansanun nfanin na'ko 'tubu' nane. Ma sin ntaman anbin ume. Too amfaut eun neem an'iuk naan anteni, tal Na' Yesus sin ka napenin fa manuan he nbukaen.
Na' Markus 3:20-35
21 Annuu' on nane te, atoni na'uab eun ma nak, “Amnuu' miit Na' Yesus. In nnikan nani In ta'un, ma ka mapaloli fa'.’’ In olif ma in tataf sin anneen uaba' nane, on nane te sin neman he nok nafani'.
22 Tabu nane, anoina' lasi palsait fauk na'ko koot Yerusalem, neman ma n'etun abiit eun le' nane ma nak, “Hi kais mituina' Na' Yesus. Natuin niut maufinu sin i'naak anesit le' anteek ee te nak Balsebul, antaam nalail es In ta'un, ma nfee Ne kuasat he In nliu' niut maufinu sin.’’d
23 Tabu Na' Yesus anneen on nane te, In nboin nabuaba' sin ma nak, “Lasi nane, ka masimo' leko fa, ahoit! Nok lanan mee, niut maufinu sin i'naak anesit nabe'i nliu' nafani in ta'un? 24 Kaul anbi pah mese', in too nmatoen ma nmabanan piut, nok lanan mee henati' pah nane nabei' anhaek nabala? 25 Ma nbi ume es in nanan, kaul sin es am es anmafain nanan, nok lanan mee henati' sin nabei' anhaken nabala? 26 On nane msa', kaul niut maufinu sin anmamusun es nok es, lo mees sin of anbaits ok. Kalu nlail on nane te, sin mes namle'un nmaten.
27 Kaul atoni yes neem he nabaak ai' nasiik a'maus anbi atoni ma'tane' es in ume, in lo mees he nfuut namepan atoni ma'tane' nane nahuun fe'. Oke te na' in napein manuan he nait atoni nane in i'maus enu.e
28 On nane Au 'eut 'ain ki: Uisneno nhaat ma npao he nnoes nain ale' mansian eun sin saant enu. Ma kaul sekau na'uab na'le'uf atoni mese', Uisneno fe' anloim he nsaok sanat nane. 29 Mes kaul sekau-msekau na'uab na'le'uf Uisneno In Ismana Knino', Uisneno ka nsaok fa in sanat nane, tal antia nabal-baal!’’f
30 Na' Yesus na'uab on nane, natuin sin na'uab nakle'ut ma nak, “Tuaf le' ii, anniut-sae!’’
Atoni le' natuina' Uisneno In i'lomin, sin le' nane es le' anfanin Usif Yesus In ini amneot
(Na' Mateos 12:46-50; Na' Lukas 8:19-21)
31 Oke te Na' Yesus In einaf nok In olif sin neman neu ume nane, he na'euk nokan. Sin nhaken nbi mone' ma anleek atoni he nhaman. 32 Tabu nane, Na' Yesus antook ma na'uaba' nok too amfaut anbi ume nanan. Oke te tuaf le' maleka' nane antama ma an'etu ma nak, “Aam! Ho eina' nok Ho olif sin eteun mone'. Sin he na'ekun nok Ko'.’’
33 Mes Na' Yesus nataa neik haan tanas ma nak, “Au eina', Au oli' ma Au tata' amneot, es le' sekau'?’’