2 Es nane te, too mfaun neem na'ko mee-mee. Sin nfuun naan tal antia ume nane naheun nok too. Ma ume nane in enon ma'eka' nok too msa'. Anbi nane te, Na' Yesus an'etun sin Uisneno In A'an ma In Iplenat.

3 Tabu In fe' na'uab ate, anmui' atoni haa' anloi neik atoin ameen 'ole mese', he neki neem neu Na' Yesus. 4 Mes, natuin too amfaut nane, sin ka napenin fa lanan he neik atoni nane ntia Na' Yesus In matan. On nane sin nsaen neu ume in i'pupun, ma sin npukai ume nane in i'pupun, pas anbi Na' Yesus In i'nakan. Tabu sin npukai nalali ume nane in i'pupun, na', sin nasanut ameen 'ole nane nok nain in i'nahe'.^a 5 Tabu Na' Yesus niit sin nmo'en on nane te, In nahiin nak, sin npalsai namneo-namneo neu In. On nane In nak neu ameen 'ole nane nak, “Bae'! Ho sanat sin masako' nalali yeen.’’

6 Anbi nane, anoina' lais palsait Yahudi sin fauk nok antokon. Tabu sin nneen Na' Yesus In uaban nane, sin natnina te ka leko fa'. 7 Oke te sin na'uab eun es nok es ma nak, “Ailoo. Atoni ii, lo In nbalain he na'uab on le' nae, yoo! Aal kuun Uisneno es le' nabe'i nsaok atoni sin sanat. Mes atoni ii In uaban le' ii nmoe's on, on le' In es le' Uisneno. Nane in na'siu' ma na'akan Uisneno!’’

8 Mes Na' Yesus nahiin nalail sin neek enu. Nalalit In nak neu sin ma nak, “Hi kais mitenab on le' nane, pah! 9-10 Mee es ma'kaaf aa nneis? Kaul Au 'ak 'eu atoin ameen 'ole ii ma 'ak, ‘Ho sanat sin masako' nalail yeen,’ hi ka mihiin fa neu he nlail on nane, ai' kaah? Mes kaul Au 'ak ‘Amfeen nai! Mait ho 'nahe' ma mfain nai!’ Kaul tabu nane in nfeen ate, of na' hi miit ma mihine mak, Au es le' Mansian Namneo-Namneo. Fun Au 'mui' kuasat ma hak he 'saok sanat.’’

Oke te Na' Yesus nak neu atoni ameen 'ole nane ma nak, 11 “Amneen, oo! Tabu ii, ho muleok ween! On nane amfeen nai, mait ho nahe' ma amfain nai.’’

12 Anneen on nane te, ameen 'ole nane anfeen nain. In nnunu ma nait in i'nahe' nalalit anpoi ma nnao. Ale' too amfaut le' niit neik sin matan, ansanmakan, on nanet sin na'uab eun nak, “Ainoo! Hit fe' tiit lasi le' ii, oo! Uisneno lo apinat-aklahat!’’

13 Nalali te Na' Yesus annao nfain antein neu nifu Galilea in ninen. Too namfau neem ma na'euk nokan, ma In nanoina' sin anmatoom nok Uisneno In A'an ma In Iplenat.

14 Anbi bale nane, anmui' atoni yes, kanan na' Lewi, na' Alfius in aan mone. In mepu es le' ansium noni 'poni he nfee neu anaa' aplenat pah Roma. Tabu Na' Yesus annao nleuk nane te, In niit na' Lewi. On nane In nak neu ne ma nak, “Bae'! Oum he mutuina' Kau nai!’’

Na' Lewi anneen on nane te, in anfeen ma natuina' nani.

15 Oke te Na' Yesus sin antokon ma nbukaen nbi na' Lewi in ume, nabua nok na' Lewi in nonot asium noni 'poni sin. Anbi nane amsa', anmui' tuaf bian le' atoni Yahudis nabai sin atoni amoe' amle'ut, nok anbukaen. Too mfaun sin le' antokon ma nbukaen nbin nane, anlomin he nneen Na' Yesus In uaban.

16 Tabu nane, anoina' lais palsait ta'uf fauk na'ko nonot palsait Farisi, sin niit Na' Yesus antook ma anbukae nok asium noni poni sin, ma ale' amoe' amle'ut sin. On nane sin nataan In asium lasi' sin nak, “Nasaa' es hi Kulu naah ma niun nabua nok asium noni poni sin ma amoe' amle'ut sin?’’

17 Mes Na' Yesus anneen sin haan tanas nane, oke te In nataa sin ma nak, “Atoin amenat naim apaloil menas, mes atoin ao-mina' ka naim fa apaloil menas. Au 'oum he 'paloil atoni le' namleu'. Mes Au ka 'oum fa he 'paloil atoni le' natnina te, in namneo'.’’

18 Anbi neno wes, tuaf na'ko nonot palsait Farisi, sin nanaah ok. Sin niit na' Yohanis in asium lasi sin nanaah ok amsa'. Mes sin ka niit niit fa Na' Yesus in asium lasi sin nanaah ok on le' sin. Es nane te, tuaf bian na'ko sin neman ma na'euk nok Na' Yesus, he natanan nak, “Aam! Hai minaah om. Na' Yohanis in asium lasi sin nanaah ok amsa'. Mes nasaa' am es Ho asium lasi sin ka nanaah ok fa'?’’

19 Na' Yesus nataa sin im nak, “Hi mihiin milail, kaul anmui' fesat ama-fee feu', amnemat sin ka nanaah ok fa, mes sin nbukaen tal anpetan. Kaul ama-fee feu' fe'e nbin, sin of anbukaen bua'-bua'. 20 Mes anbi tabu wes, kaul es nabaak neik ama-fee feu' nane te, in aon-bian sin neek eun ansusan, na' sin nanaah ok.’’

21 Oke te Na' Yesus nait naan uaba 'leta' mese' mnak, “Ka tiit fa tuaf es he nsoo napenit muit feu' neu 'fanu' mnaa'. Fun kaul tfase 'fanu' nane, muit feu' nane of an'uku won ma napius antein 'fanu' mnaa' nane. 22 On nane amsa', ka tiit fa es, le' nalai tua miin kase feu' neu 'sapa' alapu'. Natuin 'sapa' nane of na'bola', ma tua mina' nane of nat'oop anpoi oke'. On nane tua miin kase feu', lo mees he talai neu 'saap feu'.’’^b [Nok uaba' nane, Na' Yesus nanoina' sin nak, In noina' feu', kaisa' sin nselo nok atoni Farisis sin noina'.]

23 Anbi neno wes, anmatoom nok atoni Yahudis sin neon onen, Na' Yesus sin nnao natuin lene sin, sin niink eun. Ma In asium lasi sin anhounun aen kase-gandum he sin nnahan.^c 24 Atoni Farisis niit sin anmo'en on nane te, sin nak neu Na' Yesus ma nak, “Nasaa' am es Ho asium lasi sin antanhai hit atolan lasi palsait? Sin nhounun aen kase-gandum pas nok neno snasat! Ka nabe'i fa he hi mmoe' on le' nane!’’

25-26 In nataa ma nak, “On mee? Hi ka mimnau fa nu'un na'ko nai' na' Daut? Tabu nane, na' Abiatar anlail lais palsait Yahudi sin i'naak anesit. Na' Daut nok in tuaf eun sin teik enu na'loton tal namnahan nmaten. On nanet sin ntaman neu Uisneno In Uum'-ume' Onen, ma nait utunu' le' a'naak palsait sin na'tulu' ma nana'at nalail sin neu Uisneno, ma sin anbukaen. Te kahfat, amneo ta, ala a'naak palsait eun es le' nabei' anbukae sin, mes atoni 'teta' na'ko nane te, ka nabei' fa'. Oke te na' Daut sin anbukae utunu' sin nane, mes ka tiit fa es, le' nakaina' sin.’’^d

27 Nalalit Na' Yesus na'uab neu sin antein ma nak, “Nati' kaisa' mnikan, mak Uisneno nleek neno snasat he nfee alekot le' he ntulun ma nbaab mansian aal kit. Mes In ka nmoe' fa mansian aa he natuin ahaa neno snasat in atolan sin. 28 Au le' ii, Mansian Namneo-Namneo. Au 'mui' hak he 'leek mansian he nabei' nmeup saa'-saa' anbi neno snasat. Ma Au 'mui' hak amsa' he 'penan mansian he kaisa' nmeup saa'-saa' anbi neno snasat.’’