50
On nane te na' Yusuf anhoo in amaf, ma nkae nme'-me'ul. Ma in nneek nakten-teni'. 2 Nalalit na' Yusuf naplenat tuaf a'ulus amates, he npaloil na' Yakop in aon-ta'un he kais anpuun. 3 Oka te tuaf a'ulus amates nane, anpaloil na' Yakop in aon-ta'un nane neno bo' haa', on le' biasa sin anmoe' nani. Nalalit abiit eun Masir ankaen amsa' tabu na' Yakop anmaet. Sin nkaena' na' Yakop tal antia neno bo' hiut (70), on le' sin a'naet es anmaet.4 Neno bo' hiut namsopu te, na' Yusuf an'eut neu in a'naak mepun ma nak, “Amneen milek-leko'! Au 'toit ki he meik au hanak ii meu kesel. Hi mak on ii: 5 ‘Tabu au ama' he nuu nmate te, in ntoit kau he 'nao 'suub in aon-ta'un ii 'eu pah Kana'an. On nane te au 'baiseun ko usi' he mfee kau sona', he au 'eik au ama' in aon-ta'un ma 'nao 'suub ee 'eu pah Kana'an. Nalalit, na' au 'fain 'oum.”’
6 Tabu kesel anneen hanaf nane te, in nataah ma nak, “Kaul ho msuup amlail meu ho ama' on nane te, maut he ho mnao ma msuub.”
7 Oka te na' Yusuf annao he nsuub in amaf. Too mfaun sin nokan amsa'. Sin es eun le' kesel in a'naak meupn aa ok-oke', ma kase 'naek na'kon pah Masir. 8 Na' Yusuf in olif ma in tataf sin, ma sin ameupt eun ok-oke' msa' nokan anbin subat nane. Le' a'maika' anbi Gosen, alahaa sin feek enu, li'aan enu, ma mui't enu. 9 Solauls eun nokan namfa-faun. Bian ansaen akleet bikase', bian ansaen bikase'. Natuin amnokat sin namfaun, es na' pukan anaot neu subat nane, na'lool ok pinone mnanu'.
10 Nalalit sin aal sin annaon ma nlaak noe Yarden, anbi bale yes in kanan Atat. Biasa abiit eun nane neman ma ntelin ane anbin bale nane. Anbi nane, na' Yusuf sin nkaena' sin amaf. Sin nbe'en ntenin fai hiut.
11 Tabu abiit eun Kana'an niit sin ansusen on nane te, sin na'uab eun ma nak, “Hae! Hi mkius miit. Atoin Masiras sin nbe'en amates ate, nuuk enu ka aan'-ana fa. Sin ankaen ate, on le' naa yoo!” Etun sin nakanab bale nane Abel-Misraim. In otan, nak ‘atoni Masiras sin kulut’.
12 Nalalit na' Yakop in aanh eun anmoe' natuin saa' le' sin anba'an nalali ye. 13 On nane te sin nloi neik na' Yakop in aon-ta'un nane, ma nnaon nsuub ee nbi nuat le' anpaumaak kuan Makpela ma kuan Mamre. Na' Abraham ansoos nafeek bale nane na'ko atoni yes na'ko uuf Hetes, kanan na' Efron; he nmo'e nlail sin bael subat.
Na' Yusuf anhaliin in taatf enu
14 Tabu ansuub anlail sin amaf na' Yakop ate, na' Yusuf nok in olif ma in tataf sin, annaon nfanin neun pah Masir. Too mfaun le' nokan anbin subat nane amsa' on nane.
15 Tabu sin antian pah Masir ate, na' Yusuf in taatf enu anmulai namtaun, natuin sin amaf anmate nlali yen. On nane te sin na'uab eun es nok es ma nak, “Hae! Hit tatenab talek-leko' tiit fe'! Kais-kaisa' na' Yusuf fe' natenab kit. Kaul in he nmoe' lais amle'ut neu kit ite, of on mee?” 16 Nalalit sin nma'akool eun ma nfeen hanaf neu na' Yusuf ma nak, “Usi', hai fe' mimnau, tabu hit ama' fe' anmoin, in nleun kai 17 he m'eut ko, ahoit, mak, ‘Na' Usu lo mees he nnikan nain in taatf eun sin saant enu. Natuin sin nmo'e nlalin lais amle'ut neun.’ Hai mimnau msa' am mak, hit ama' in na'luli' ma na'bees neu Uisneno na'ko afi unu'. Hai mfain Uisneno nane In aten amsa'. On nane te tabu ii hai eim amtoti saok sanat, natuin hai mmo'e mlail sanat meu ko, ahoit.”
Anneen on nane te, na' Yusuf ankae.
18 Nalalit in taatf eun neikn ok neman ma nli'tuun anbin in matan, ma na'uab eun ma nak, “Mait kai mfain ho aten, ahoit.”
19 Mes na' Yusuf nak neu sin ma nak, “Sin au tata' aal ki! Hi kais mimtau mtein! Uisneno nmees kuun es le' anmui' hak he nhukun tuaf. Mes au le' ii, ka 'mui' fa hak, pah. 20 Nahunu te, namneo hi ma'akool he mmoe' amle'ut meu kau. Mes Uisneno nabaina' hi salit amle'ut nane, he nmo'e nlail alekot. Etun In nait kau 'lail a'naet a'bi pah ii, henati' too mfaun eun napenin a'honis. 21 On nane te tabu ii, au 'eut ki, he kais mimtau mtein'. Au es ufeek kuuk ma 'ak, au of a'kius ki, ma hi aanh eun ok-oke'.”
Nok uab nane te, na' Yusuf anhaliin in taatf enu.
Na' Yusuf in i'maten
22 Nalalit na' Yusuf natua nabalah anbi pah Masir nok in olif ma in tataf sin ok-oke'. In anmoin naan toon nautn es am bo'es. 23 In fe' niit na' Efraim in anah ma in upuf sin. Ma in nkauh na' Manase in upuf, es le' na' Makir in aanh enu.
24 Na' Yusuf na'uab neu in taatf eun ma nak, “Sin au tata' aal ki! Au utninat ate, au neno 'maetk aa he ntia yen. Mes au 'palsai 'ak Uisneno of anpaloil ki. In of neik ki mpoi mi'ko pah le' ii. In of natuuk ki he mfain meu pah, le' In anfee ye neu hit nai' na' Abraham, nai' na' Isak, ma hit ama' na' Yakop. In nfee bale nane neik lais supat.” 25 Nalalit na' Yusuf antoit in olif ma in tataf sin he nsupan ma nak, “Hi mes he maba'an mok kau. Kaul antia tabu le' Uisneno neik ki mfain meu hit pah ate, hi mes he meik au aok-ta'uk ii.”
26 Nalalit na' Yusuf anmate nbi pah Masir, ma in nmoin naan toon nautn es am bo'es (110). Oka te sin npaloil in aon-ta'un. On nane te sin nabela' in aon-ta'un nane anbi in noup-pala'.