Uisneno nleun na' Abraham he na'tulu' na' Isak
(Na' Mateos 3:17, 17:5; Na' Markus 1:11, 9:7; Na' Lukas 3:22, 9:35; 2 Na' Petrus 1:17)
22
Neno wes ate, Uisneno nsuu' na' Abraham, he nahiin nak in natniin Ee, ai' kahaf. Nalalit In nhaman ma nak, “Abraham!”Na' Abraham nataah ma nak, “Au es kau ii, ahoit.”
2 Nalalit Uisneno anlenu ma nak, “Amneen mulek-leko! Mait ho aan moen mese' le' ho mneek miis ne nane. Meki mnao meu pah Moria, he motu nfani fua'-tulu' neu Kau. Amtia nane te, of na' Au uklila' ko in balan et a'tubu wes.”
3 Anmeu nfini te, na' Abraham ankeut hau hopi'. Nalalit anfuut sin, ma nasaeb sin anbin bikaes keledai. Oka te in nok na' Isak, ma in ameput tuaf nua' annaon neu bale le' Uisneno nteek ee nane. 4 Sin nnaon neno nua yen. Ma nmeus ate, na' Abraham napeen niit bale nane et a'loo. 5 On nane te in nak neu in ameput tuaf nua' eun nane ma nak, “Hi nua ki mpao kai mbi ii, mok bikaes keledai nuu! Au 'ok au anah ii, meki-msae meu na, he m'onen ma mi'bees meu Uisneno. Nalalit of hai mfain eim meu ii.”
6 Nalalit na' Abraham nait hau hoip eun nane, ma naloiba' sin neu na' Isak. Ma in nnaa' neik besi ma ai nuta' amsa'. Tabu sin nua sin annaon nabuan ate, 7 na' Isak nak in amaf ma nak, “Aam!”
Na' Abraham nataah ma nak, “On mee, Isak?”
Oka te na' Isak nataan ma nak, “Aam, hit he totu 'tulu'. Anmu'i nlail hau hopi' ma ai es ii. Mes a'bib-kase le' he ta'tulu' we, es mee?”
8 Na Abraham nataah ma nak, “Isak! Uisneno of neikn On anfee In i'bib-kaes ana' he nfani 'tulu'.”
On nane te sin nua sin neki nsaen piut. 9 Tabu sin antian bale le' Uisneno naklila' nalali ye nane, na' Abraham anbakin fatu he nmoe' mei 'tulu'. Nalalit in n'atol hau meot eun anbin mei nane. On nane te in nfuut in anah, ma natupa' natneneb anbi hau meot eun nane. 10 Oka te in nait besi he nlool in anah. 11 Mes nok askeken ate, UISNENO In ameput ankoa' na'ko neno tnanan ma nak, “Hoe! Abraham! Kaisa' fe'! Ampao kle'o fe'!”
In nataah ma nak, “Nasaa', Usi'?”
12 Oka te hanaf nane nak, “Kais amlool li'ana' nane! Kais musaa'-sa'an! Tabu ii Au uhiin namneo, 'ak ho lo namneo-namneo mutuin Uisneno In i'lomin, es na' ho muloitan mulail he mu'tulu' ho aan moen mese' nane neu Ne.”
13 Nalalit na' Abraham niit a'bib-kaes keso wes, le' in suun eun na'kai' ok anbin hau aan' es in itlaek enu. Nalalit na' Abraham annao nheke 'bib-kase nane, ma notu nfani 'tulu' neu Uisneno, anseka' in anah. 14 On nane te na' Abraham nakanab bale nane Yehova Yire, (le' in otan, nak‘Uisneno of naloitan saa' le' hit tpaluu’). Etun antia tabu ii msa' biak eun na'uab eun ma nak, “Anbi 'tubu UISNENO nane, In of naloitan saa' le' hit tpaluu.”
15 Nalalit ameput Uisneno nane nkoa' antein na'ko neno tnanan ma nak, 16 “UISNENO neikn On nak, ‘Au 'suup 'eik Au kanak, on ii: ho muloitan mulail he mfee Kau ho aan moen mese' aah nane, he nlail fua'-tulu'. Es nane te, 17 Au of a'fee tetus nathoe 'eu ko ma 'eu ho sufam ma ho ka'um sin. Sin of ansaat ok piut, tal antia ka tsoi' tabei' fa sin' on le' kfuun sin et neno tnanan, ma snaen et tasi in ninen. Ho anah ma ho upuf sin of niis ma naplenat sin musun. 18 Na'ko ho sufam sin, too uuf-uuf anbin pah-pinan ii of napenin tetus-athoes, natuin ho munaoba' mulail Au plenat.”’
19 Nalalit na' Abraham ma na' Isak ansanun nfanin ma na'ekun nok sin ameput tuaf nua' eun nane. Ma sin nfanin neun Beer Seba. On nane te sin natuan anbin nane.
Na' Nahor in sufan ma in ka'un
20 Neno wes, na' Abraham anneen hanaf nak, in olif na' Nahor fee bi Milka nahoin li'ana' amfaun. 21 Aan mone 'nae, kanan na' Us. In olif, na' Bus. Oka te na' Kemuel (le' anlail amaf neu na' Aram). 22 Nalalit na' Keset, na' Haso, na' Pildas, na' Yitlaf, ma na' Betuel. 23 Na' Betuel nane, bi Ripka in amaf. 24 Mes na' Nahor napeni ntein li'ana' na'ko bifee koti yes, in kanan bi Reuma. In nahoin na' Teba, na' Gaham, na' Tahas, ma na' Ma'aka.